1. Die yen avwanre eje guọnọre nẹ imoni rẹ avwanre ru?

ONIỌVO rẹ aye ọvo re se Pauline * da ta: “Ghwe vwo nẹ ọke mi vwo yono uyota na yen me vwọ guọnọ nẹ mẹ vẹ ihwo orua mẹ eje dia vwẹ Iparadaisi. Me guọnọre nẹ ọshare mẹ Wayne vẹ ọmọshare avwanre vwomaba vwẹ ga Jihova.” Wo vwo imoni re je rhe riẹn Jihova ji vwo ẹguọnọ rọye-en? Kerẹ Pauline, ọkiọvo wọ je guọnọ nẹ imoni wẹn vwomaba wẹ ga Jihova.

2. Enọ vọ yen a cha fuẹrẹn vwẹ uyono nana?

² Avwanre cha sa gba imoni rẹ avwanre nẹ ayen rhe ga Jihova-a, ẹkẹvuọvo a sa vwẹ ukẹcha kẹ ayen vwọ kerhọ rẹ ovuẹ ri Baibol na. (2 Tim. 3:14, 15) Diesorọ o vwo fo nẹ e ghwoghwo kẹ imoni rẹ avwanre? Diesorọ o vwo fo nẹ e dje erorokẹ phia? Die yen e se ru vwọ chọn ayen uko vwo vwo ẹguọnọ ri Jihova kerẹ avwanre? Kẹ, mavọ yen iniọvo rehẹ ukoko na sa vwọ chọn avwanre uko?

3. Vwo nene obo rehẹ 2 Pita 3:9, diesorọ o vwo fo nẹ e ghwoghwo ota kẹ imoni rẹ avwanre?

³ Chekemerha Jihova cha ghwọrọ eyeren nana. Otu “re ve arhọ ri bẹdẹ na kẹ” ọvo yen che vwo usivwin. (Iruo 13:48) Avwanre vwọ ghwọrọ ọke vẹ ẹgba vwo ghwoghwo ota ke ihwo rehẹ ekogho avwanre rere ayen sa vwọ ga Jihova na, o ji fo nẹ e ru ọtiọyen kẹ imoni rẹ avwanre. Jihova rọ dia Ọsẹ avwanre, “guọnọre nẹ ohwo ọvuọvo ghwru-u,  ẹkẹvuọvo nẹ ihwo ejobi kurhẹriẹ.”—Se 2 Pita 3:9.

4. Mavọ yen e se vwo ghwoghwo ota kẹ imoni rẹ ohwo vwẹ idjerhe ro je fo?

⁴ Ofori a vwọ karophiyọ nẹ e se ghwoghwo ovuẹ rẹ usivwin na vwẹ idjerhe ro fori vẹ idjerhe ro je fo. Kerẹ udje a sa vwẹ aghẹnghẹn vwo ghwoghwo ota kẹ ihwo re vugheri-i, a me rha ta kprekpre vwọ kẹ imoni rẹ ohwo.

5. Die yen fori nẹ a karophiyọ e ki ghwoghwo ota kẹ imoni rẹ avwanre?

⁵ Buebun rẹ avwanre sa viẹ idiekpọvwẹ kpahen obo ra davwẹngba vwo ghwoghwo ota kẹ imoni rẹ avwanre vwẹ ọke rẹsosuọ. Ọyinkọn Pọl vwẹ uchebro nana kẹ Inenikristi: “We jẹ ota rẹ ovwan dia dẹndẹn rere ota avwerhe nẹ unu rẹ ovwan rhe, re ovwan riẹn obo rẹ ovwan kpahe ota kẹ ohwohwo.” (Kọl. 4:5, 6) Ofori nẹ avwanre karophiyọ uchebro nana ọke re de ghwoghwo ota kẹ imoni avwanre. E rhe ru ọtiọye-en, a sa nẹrhẹ ophu mu ayen, ukperẹ a vwọ vwẹ ukẹcha kẹ ayen vwọ kerhọ rẹ avwanre.

6-7. Djudje ọvo ro dje oboresorọ o vwo fo nẹ e dje erorokẹ phia vwọ kẹ ọrivẹ rẹ orọnvwe rọhẹ ukoko na-a.

⁶ Dje erorokẹ phia. Pauline re djunute siẹvure da ta: “Me guọnọ vuẹ ọshare mẹ kpahen Jihova vẹ Baibol na, ẹkẹvuọvo, avwanre nama ta ota kpahen akpeyeren ri kẹdẹ kẹdẹ rẹ avwanre-e.” Ọshare ri Pauline re se Wayne, ghwa riẹn emu vuọvo kpahen Baibol na-a. Ọtiọyena, o rhe vwọ ẹruọ rẹ oborẹ Pauline ta ota kpahan na-a. Vwọ kẹ, Pauline mu ẹga kpahen uyovwin. Udu ko bro nẹ ẹko ro muoshọ yen ọ vwomaba na, a jẹ phiẹn tobọ re.

⁷ Pauline rhọnvwere nẹ vwẹ uvwre rẹ  ọke evo rhire na, ọ vẹ iniọvo na yen gba ghwọrọ ọke kuẹgbe vwẹ uyono, aghwoghwo, ji riamakpọ vwẹ ovwọnvwọn vẹ oba rẹ udughwrẹn. da ta: “Ọke evo Wayne de te uwevwin, ọ vwa ohwo vuọvo-o, ọyen ọvo kọyen munudje.” Aphro herọ-ọ, Wayne ghene guọnọ nẹ ọyen vẹ aye rọyen vẹ ọmọ rọyen ghwọrọ ọke kugbe. O vughe ihwo ri Pauline nene ghwọrọ ọke kuẹgbe na-a, kọ ghwa họhọ nẹ igbeyan kpọkpọ rẹ aye rọyen muru na yen ma ghanre kẹ nẹ ọyen. Ọtiọyena, Wayne de djuguegue muo nẹ, ọyen cha fan orọnvwe rayen. Wọ sa ẹwẹn roro idjerhe evo ri Pauline se vwo dje erorokẹ phia?

8. Vwo nene obo rehẹ 1 Pita 3:1, 2, die yen imoni rẹ avwanre me nẹsua?

⁸ Dia omamọ rẹ udje. Ọke buebun, oborẹ avwanre ruẹ yen imoni avwanre me nẹsua vrẹ eta rẹ avwanre. (Se 1 Pita 3:1, 2.) Ukuko na, Pauline da rhe mrẹ uyota yena vughe. Ọ da ta: “Me riẹnre nẹ Wayne vwo ẹguọnọ rẹ avwanre, ọ je guọnọ fan orọnvwe na-a, ẹkẹvuọvo, ota rọ ta kpahen orọnvwe ẹfan na, da rhe nẹrhẹ mi mrẹvughe nẹ ofori nẹ mi ru oborẹ Jihova ta kpahen orọnvwe. Ofori nẹ mi dia omamọ rẹ udje ukperẹ me vwọ ta eta ibuebun.” Pauline rha gba Wayne ta ota kpahen Baibol na ọfa-a, ukperẹ ọtiọyen kẹ ayen ta ota kpahen akpeyeren ri kẹdẹ kẹdẹ rayen. Wayne kọ rhe mrẹvughe nẹ uruemu esiri ri Pauline rhe teyenphia vrẹ obo ri jovwo, uruemu rẹ ọmọshare rọyen ko ji rhi yovwinphiyọ. (Isẹ 31:18, 27, 28) Ọke ri Wayne rhe vwọ mrẹ obo ri Baibol na wene akpeyeren rẹ orua rọyen, o de rhie ẹwẹn rọyen phiyọ vwọ kẹ ovuẹ ri Baibol na.—1 Kọr. 7:12-14, 16.

9. Diesorọ o vwo fo nẹ e vwo erhiorin?

 ⁹ Vwẹ erhiorin vwọ vwẹ ukẹcha kẹ imoni wẹn. Jihova dje omamọ rẹ udje kẹ avwanre. “Nẹ ẹdẹ ra rọ ẹdẹ” yen ọ vwọ kẹ ihwo uphẹn rẹ ayen vwọ kerhọ rẹ iyẹnrẹn esiri na ji vwo arhọ. (Jer. 7:25) Ọyinkin Pọl ji vuẹ Timoti nẹ ọ vwẹ erhiorin vwẹ ukẹcha kẹ ihwo efa. Diesorọ? Kidie o de ru ọtiọyen, o che sivwin oma rọyen kugbe ihwo re kerhọ rọyen. (1 Tim. 4:16) Avwanre vwo ẹguọnọ rẹ imoni rẹ avwanre, ọtiọyena avwanre guọnọre nẹ ayen riẹn uyota rọhẹ Baibol na. Omamọ rẹ uruemu vẹ eta ri Pauline de djobọte orua rọyen. Asaọkiephana, ọ vẹ ọshare rọyen yen gba ga Jihova. Ayen ihwo ivẹ na ekobaro rẹ ọkieje, Wayne ga kerẹ ọkpako enẹna.

10. Diesorọ o vwo fo nẹ e vwo edirin?

¹⁰ Vwo edirin. Ọ cha bẹn vwọ kẹ imoni rẹ avwanre ayen vwọ rhiabọreyọ ewene re ruru ọke rẹ avwanre vwo brorhiẹn nẹ Jihova yen a cha ga. Ọke buebun, orọnvwọn ẹsosuọ rẹ ayen ke nẹsua yen, avwanre rhe kuomakugbe ayen re orẹ yẹrẹ vwobọ vwẹ oseghe rẹ usuo-on. Ẹsosuọ, ivun se miovwo ayen. (Mat. 10:35, 36) Ẹkẹvuọvo, e jẹ ofu dje avwanre-e. Ofu de dje avwanre, a rha cha sa vwẹ ukẹcha kẹ aye-en, kọyen avwanre brorhiẹn hwe ayen nẹ ayen muwan rẹ arhọ ri bẹdẹ-ẹ. Jihova kẹ avwanre uturhi ra vwọ vwẹ ihwo efa vwo guẹdjọ-ọ, Jesu yen ọ vwẹ uturhi yena kẹ. (Jọn 5:22) Avwanre de vwo edirin, ukuotọ rọyen imoni rẹ avwanre se vwo owenvwe rẹ ayen vwọ kerhọ rẹ avwanre.—Ni ekpeti na “Reyọ Wẹbsaiti rẹ Avwanre Vwo Yono.”

11-13. Die wo yono nẹ idjerhe rẹ Alice nene ọsẹ vẹ oni rọyen yerin wan?

¹¹ Tinka mu orhiẹn-ebro wẹn, ẹkẹvuọvo ruo vẹ aghwanre. (Isẹ 15:2) Roro kpahen udje rẹ Alice. O yono kpahen Jihova ọke rọ vwọ dia asan ro sherabọ kẹ ọsẹ vẹ oni rọyen ri dia ihwo ri sivwin oseghe rẹ usuon, ayen ji se Ọghẹnẹ gbuyota-a. Ọ da rhe mrẹvughe nẹ ofori ọ vwọ fobọ vuẹ ayen kpahen erọnvwọn iyoyovwin ro yono na. Ọ da ta: “Wọ rha fobọ vuẹ ihwo rẹ orua wẹn kpahen obo ru wo segbuyota-a, ayen da rhe riẹn obọ, ivun che miovwo ayen gangan.” Alice de si ileta rhe ọsẹ vẹ oni rọyen, rọ vwọ nọ ayen oborẹ ayen roro kpahen iyovwinreta ri Baibol ro rorori nẹ ọ cha vwerhen ayen oma, kerẹ ẹguọnọ. (1 Kọr. 13:1-13) Ọ kpẹvwẹ ayen fikirẹ oborẹ ayen vwẹrote wan, ọ da je vwarọ ọko vwo rhe ayen. Ọ da kọn bru ayen ra, je davwẹngba rọyen eje vwọ vwẹ ukẹcha kẹ oni rọyen vwo ruiruo rẹ uwevwin na. Ẹsosuọ, oma ghwa vwerhen ọsẹ vẹ oni rọyen rọ vwọ vuẹ ayen kpahen obo ro yono na-a.

¹² Uvwre rẹ ọke rẹ Alice vwo nene ọsẹ vẹ oni rọyen dia na, o tinka mu isese ri Baibol ri kẹdẹ kẹdẹ rọyen. Ọ da ta: “Ọnana chọn oni mẹ uko vwọ riẹn oborẹ Baibol na ghanre kẹ vwẹ te.” Uvwre rẹ ọke vuọvo yena, ọsẹ rọyen de brorhiẹn ro vwo yono emu evo kpahen Baibol na rere ọ sa vwọ riẹn obo ri mu Alice vwo ru ewene ro ruru na, je guọnọ asan ri Baibol na de shechọ. Alice da ta: “Mi vwẹ Baibol ọvo vwọ kẹ, mi de si ovuẹ phiyọ Baibol na vwo rhe.” Die kọyen nẹ obuko rọyen rhe? Ọ mrẹ asan vuọvo ri Baibol na de shechọ-ọ, ukperẹ ọtiọyen obo ro seri na de rhi te ubiudu rọyen.

¹³ Ofori nẹ avwanre tinka mu orhiẹn-ebro avwanre, ẹkẹvuọvo e ruo vẹ aghwanre, ọ da tobọ dianẹ e mukpahen avwanre. (1 Kọr. 4:12b) Kerẹ udje, Alice chirakon rẹ omukpahen ro nẹ obọ rẹ oni rọyen rhe.  “Mi vwo bromaphiyame nu, Oni mẹ de se vwe ‘orharhe ọmọ.’” Die kọyen Alice ruru? “Ukperẹ mi vwọ kẹnoma kẹ eta ri shekpahen ẹga kpokpọ mẹ na, me da nabọ djefiotọ vwẹ idjerhe rẹ ọghọ nẹ mi brorhien me vwọ dia Oseri ri Jihova nurhe, mi ji che wene orhiẹn-ebro yena-a. Me davwẹngba vwọ vwẹ imuẹro kẹ oni mẹ nẹ mi vwo ẹguọnọ rọyen mamọ. Avwanre da viẹ. Mi de chere omamọ udemu ọvo vwọ kẹ. Nẹ ọke yena rhe, oni mẹ de rhi noso nẹ Baibol na ghini wene uvwe phiyọ omamọ rẹ ohwo re.”

14. Diesorọ o vwo fo nẹ a vwẹ uphẹn vwọ kẹ ihwo rẹ orua rẹ avwanre nẹ ayen wene orhiẹn-ebro avwanre-e?

¹⁴ Ọ sa reyọ ọke imoni rẹ avwanre ki se vwo ẹruọ rẹ oborẹ ẹga ri Jihova ghanre te kẹ avwanre. Kerẹ udje, ọke rẹ Alice vwo brorhiẹn nẹ ọyen cha dia ọkobaro ukpe rọ vwọ reyọ vwọtua ẹbe eyono ride, oni rọyen da rhoma viẹ. Ẹkẹvuọvo, Alice tinka mu orhiẹn-ebro rọyen. Ọ da ta: “Wọ da vwẹ uphẹn kẹ ihwo orua wẹn nẹ ayen wene orhiẹn ọvo ru wo bruru, ayen je sa gba wẹ vwo wene efa. Ẹkẹvuọvo, wo de tinka mu orhiẹn-ebro wẹn ji ruo vwẹ idjerhe aghwanre, evo usun rayen sa kerhọ wẹn.” Ọyena yen obo re ghene phia kẹ Alice. Asaọkiephana, ọsẹ vẹ oni rọyen ekobaro, ọsẹ rọyen ga kerẹ ọkpako.

15. Vwo nene obo rehẹ Matiu 5:14-16 vẹ 1 Pita 2:12, ukẹcha vọ yen “iruo esiri” rẹ ihwo efa vwọ kẹ imoni avwanre?

¹⁵ Jihova reyọ “iruo esiri” rẹ iniọvo rehẹ ukoko na ruẹ vwo si ihwo te oma. (Se Matiu 5:14-16; 1 Pita 2:12.) Ọrivẹ orọnvwe wẹn rọ dia Oseri ri Jihova-a vughe  iniọvo rehẹ ukoko wẹn? Pauline re djunute siẹvure, durhie iniọvo rehẹ ukoko rọyen rhe uwewvin rọyen rere ọshare rọyen se vwo vughe ayen. Wayne karophiyọ oborẹ oniọvo ọvo chọn rọ uko vwọ nabọ vughe oka rẹ ihwo rẹ Iseri ri Jihova hepha, rọ vwọ ta: “Oniọvo na reyọ ọke nẹ iruo ẹdẹ ọvo rere mẹ vẹ ọyen se vwo nughe rẹ ibọrọ kugbe. Me da rhe riẹn nẹ o vwo omavwerhevwẹn kpahen erọnvwọn efa, ọ dia ẹga ọvo-o.”

16. Diesorọ o vwo fo nẹ e durhie ihwo rẹ orua avwanre kpo emẹvwa?

¹⁶ Idjerhe ọvo ro me yovwin ra sa vwọ chọn ihwo rẹ orua rẹ avwanre uko yen e vwo durhie ayen kpo emẹvwa. (1 Kọr. 14:24, 25) Omẹvwa rẹsosuọ rẹ Wayne tu ra, yen Ẹkarophiyọ rẹ ughwu ri Jesu. O kpo omẹvwa yena kidie o nẹ iruo rhe tavwen e ki ruo, ọ je reyọ ọke-e. Ọ da ta: “Mi ghwe vwo ẹruọ rẹ ota na-a, ẹkẹvuọvo, me karophiyọ oborẹ ihwo na dede uvwe sasasa, je nabọ sa vwẹ obọ. Mi niroso nẹ ayen emamọ rẹ ihwo.” Aye gbe ọshare ọvo si Pauline te oma jovwo re, ayen vwẹ ukẹcha vwọ kẹ vẹ ọmọshare rọyen vwẹ uyono kugbe aghwoghwo na. Ọtiọyena, ọke rẹ Wayne vwọ choma nẹ ọyen che yono Baibol na, ọ da vuẹ oniọvo rẹ ọshare yena nẹ o yono ọyen.

17. Die yen cha nẹrhẹ e jẹ oma avwanre ẹhanrhọ, ẹkẹvuọvo diesorọ o vwo je fo nẹ e si ẹro nẹ imoni rẹ avwanre-e?

¹⁷ Avwanre rhẹro rọyen nẹ imoni rẹ avwanre eje cha vwomaba avwanre ga Jihova. Dede nẹ avwanre sa davwẹngba vwọ chọn ayen uko vwọ dia idibo ri Jihova, ọkiọvo ayen che kurhẹriẹ-ẹ. Ọ da dia ọtiọyen, avwanre hanrhe oma rẹ avwanre-e. Vwọrẹ uyota, a cha sa gba ohwo vuọvo vwọ rhiabọreyọ esegbuyota rẹ avwanre-e. Ẹkẹvuọvo, imoni wẹn da mrẹ nẹ oma rẹ ẹga ri Jihova vwerhen owẹ, ọnana se wene iroro rayen. Nẹrhovwo kẹ ayen. Vwẹ aghwanre ta ota kẹ ayen. Vwẹ ọkieje vwọ vwẹ ukẹcha kẹ ayen! (Iruo 20:20) Vwo imuẹro nẹ Jihova che bruba ẹgbaẹdavwọn wẹn eje. Imoni wẹn da jẹ ojẹ rẹ ayen vwọ kerhọ wẹn, kẹ ayen che vwo usivwin!