UYONO 24
Guọghọ Iroro re Vwọso Uyono rẹ Ọghẹnẹ!
“Avwanre guọghọ aphro kugbe eyan ri hirhe phihọ ukọn kẹ erianriẹn rẹ Ọghẹnẹ.”—2 KỌR. 10:5.
UNE 124 Fuevun Ọkieje
ỌDJẸKOKO *
1. Orhọesio vọ yen ọyinkọn Pọl si vwo rhe Inenikristi ra vwẹ ẹwẹn ọfuanfon jẹreyọ?
ỌYINKỌN Pọl de si: “We hirhe oma phihọ ohwo rẹ akpọ nana ọvo-o.” (Rom 12:2) Pọl si eta yena vwo rhe Inenikristi rẹ ẹgbukpe ujorin rẹsosuọ. Diesorọ ọ vwọ vwẹ orhọesio ọgangan yena vwọ kẹ eshare vẹ eya re vwomakpahotọ kẹ Ọghẹne, ra je vwẹ ẹwẹn ọfuanfon jẹreyọ nure?—Rom 1:7.
2-3. Die yen Eshu vwo ruiruo rere ọ sa vwọ nẹrhẹ avwanre chukoku Jihova, mavọ yen e se vwo si “ẹgba egangan” re vwẹ owọ muotọ vwevunrẹ ubiudu rẹ avwanre no?
2 Ẹwẹn kpokpo Pọl kidie orharhe rẹ iroro kugbe iyono rẹ akpọ rẹ Eshu na titẹ ọke yena djobọte Inenikristi evo. (Ẹfe. 4:17-19) Ọyena je sa phia kẹ avwanre. Eshu rọ dia ọghẹnẹ rẹ akpọ nana reyọ ena sansan vwo ruiruo rere ọ sa vwọ nẹrhẹ avwanre chukoku Jihova. Kerẹ udje, avwanre da dia ihwo re vwẹ ọdavwẹ romobọ vwọ kobaro, kọ reyọ vwo ruiruo. Ọ sa tobọ reyọ erọnvwọn re yonori vwẹ asan rẹ avwanre dia, isikuru, yẹrẹ mie ihwo efa vwo wene iroro rẹ avwanre kpo ọrọyen.
3 Avwanre ghini se ghwie “ẹgba egangan” yẹrẹ iroro re vwẹ owọ muotọ vwevunrẹ ubiudu rẹ avwanre no? (2 Kọr. 10:4) Vwo oniso rẹ ẹkpahọnphiyọ rẹ Pọl: “Avwanre guọghọ aphro kugbe eyan ri hirhe phihọ ukọn kẹ erianriẹn rẹ Ọghẹnẹ, rọ da vwẹ iroro kiroro ru ọviẹn re e vwo jẹ ọghọ emuo kẹ Kristi.” (2 Kọr. 10:5) Womarẹ ukẹcha rẹ Jihova, avwanre se wene iroro re chọre. Kirobo rẹ uhuvwun sivwin ọga ye, ọtiọyen Ota rẹ Ọghẹnẹ ji sivwin avwanre vwo nẹ iroro ebrabra rẹ akpọ rẹ Eshu na.
“WENE IRORO RẸ UDU RẸ OVWAN”
4. Ewene vọ yen buebun rẹ avwanre ruru ọke ẹsosuọ e vwo rhiabọreyọ uyota na?
4 Rhoma roro kpahen ewene ro fori nẹ wo ru ọke ẹsosuọ wo vwo rhiabọreyọ uyota rẹ Ota rẹ Ọghẹnẹ, ji brorhiẹn wọ vwọ ga Jihova. A sa vwọ ga Jihova, buebun rẹ avwanre de siobọnu erọnvwọn ebrabra rẹ avwanre ruẹ. (1 Kọr. 6:9-11) Oma vwerhen avwanre nẹ Jihova vwẹ ukẹcha kẹ avwanre vwo siobọnu erọnvwọn ebrabra tiọyena!
5. Erọnvwọn ivẹ vọ yen Rom 12:2 tare nẹ avwanre ru?
5 Ẹkẹvuọvo, ẹ jẹ avwanre roro nẹ o rhe fo nẹ e ru ewene efa-a. Dede nẹ avwanre dobọ umwemwu egangan rẹ avwanre ruẹ ji nu tavwen e ki bromaphiyame, o ji fo nẹ avwanre kẹnoma kẹ kemu kemu rọ cha nẹrhẹ avwanre rhoma rhivwin kpo erọnvwọn re siobọnu re. Mavọ yen avwanre se vwo ru ọtiọyen? Pọl da kpahenphiyọ: “We hirhe oma phihọ ohwo rẹ akpọ nana ọvo-o ẹkẹvuọvo gbe wene iroro rẹ udu rẹ ovwan phihọ ọkpokpọ.” (Rom 12:2) Ọtiọyena, ofori nẹ e ru erọnvwọn ivẹ. Ọrẹsosuọ, avwanre “hirhe oma phihọ ohwo rẹ akpọ” nana-a. Ọrivẹ, avwanre “wene iroro rẹ udu rẹ” avwanre.
6. Die yen avwanre yonori vwo nẹ eta rẹ Jesu ra niyẹnrẹn rọyen vwẹ Matiu 12:43-45?
6 Ewene rẹ Pọl ta ota kpahen na vrẹn e di vwo wene ugboma rẹ avwanre. O djobọte oka rẹ ohwo rẹ avwanre hepha eje. (Ni ekpeti na “Ewene Gbanẹ Omeru?”) Ofori nẹ avwanre wene iruemu, Matiu 12:43-45. (Se.) Eta rẹ Jesu na kanrunumu uyota ọghanghanre nana: O teri re vwo si erharhe rẹ iroro nẹ udu rẹ avwanre-e, ofori nẹ avwanre wene ayen vẹ iroro rẹ Ọghẹnẹ.
iroro, vẹ ojevwe rẹ avwanre kare kare. Ọtiọyena ofori nẹ a nọ oma rẹ avwanre onọ nana: ‘Ewene ri mi ruẹ me sa vwọ dia Onenikristi na, ọ rẹ omeru gbanẹ o ghini nẹ otọ rẹ udu mẹ rhe?’ Jesu dje obo ro fori nẹ avwanre ru vwẹ eta rọyen ra niyẹnrẹn vwevunrẹ‘OVWAN VWẸ ỌKENEJE VWO RU ẸGBA IRORO OVWAN PHIYỌ ỌKPOKPỌ’
7. Mavọ yen avwanre se vwo wene oka rẹ ohwo avwanre hepha vwẹ obevun?
7 Avwanre ghini se wene iroro yẹrẹ oka rẹ ohwo rẹ avwanre hepha vwẹ obevun? E. Baibol na da ta: ‘Rere ovwan vwẹ ọkeneje vwo ru ẹgba iroro ovwan phiyọ ọkpokpọ, re we ku ohwo ọkpokpọ na phiyọ, ra mare vwo nene ọhọre rẹ Ọghẹnẹ vwẹ ọvwata rẹ uyota kugbe ẹfuọn.’ (Ẹfe. 4:23, 24, NW ) Ọtiọyena, e ghini se wene oka rẹ ohwo rẹ avwanre hepha vwẹ obevun, jẹ ọ lọhọre-e. Ofori avwanre vwo ru vrẹ a de vwọ họnre vwọso iruemu vẹ urhurusivwe echọchọ. Ofori avwanre vwo wene “ẹgba iroro” rẹ avwanre. Ọnana churobọ si e vwo wene iroro, ojevwe, iruemu vẹ obo ri mu avwanre vwo ru erọnvwọn. Ọnana guọnọ ẹgbaẹdavwọn rẹ ọkieje.
8-9. Mavọ yen ikuegbe rẹ oniọvo ọvo dje obo rọ ghanre te e vwo ru ewene vwẹ obevun?
8 E jẹ avwanre roro kpahen udje rẹ oniọvo ọshare ọvo rọ dia ọvwozighi jovwo. Ọke rọ vwọ dobọ rẹ udi ẹda vẹ ohọnre ji nu, o de bromaphiyame, kọ rhe dia omamọ rẹ udje vwẹ ekogho rọ dia. Ẹkẹvuọvo, ọmọke vwọ wan ro ghwe vwo bromaphiyame nu, vwẹ ovwọnvwọn rẹ ẹdẹ ọvo, o de hirharoku ọdavwini ọvo ro rhẹro rọye-en. Ọshare ọvo rọ dia ọgbaudi de bro rhe uwevwin nẹ ayen họnre. Ẹsosuọ, oniọvo rẹ avwanre na sen ọdavwini nana. Ẹkẹvuọvo, ọke rẹ ọshare na rhe vwọ harhen Jihova, ivun de miovwo oniọvo rẹ avwanre na te ẹdia o rhe se sun ophu rọye-en. O de hwe ọshare na. Diesorọ ọ vwọ họnre? Dede nẹ uyono rẹ Baibol vwẹ ukẹcha kẹ vwọ họnre vwọso ozighi, jẹ o ji se rhi wene ẹgba iroro rọye-en. Kọyen o ji se rhi wene oka rẹ ohwo rọ hepha vwẹ obevu-un.
9 Ẹkẹvuọvo, oniọvo nana je davwẹngba ro vwo ru ewene ghene. (Isẹ 24:16) Womarẹ uckẹha rẹ ekpako na, ọ da nabọ yan obaro. Ọ da rhe dia ọkpako. Ẹkẹvuọvo, vwẹ ovwọnvwọn ẹdẹ ọvo, vwẹ otafe rẹ Ọguan Ruvie, ọ da rhoma mrẹ oka rẹ ọdavwini ro hirharoku jovwo vwẹ ikpe evo re wanre. Ọgbaudi ọvo guọnọ nene ọkpako ọfa họnra. Die yen oniọvo rẹ avwanre na ruru? Ọ da vwomakpotọ nene ọgbaudi na ta ota vẹ ẹwẹn rẹ bọrọ bọrọ, ọnana da nẹrhẹ ẹwẹn rẹ ọgbaudi na totọ, o de ji suon kpo. Diesorọ oniọvo avwanre na vwo ru obo re fẹnẹre udje nana? Oniọvo rẹ avwanre na wene ẹgba iroro rọyen re. O rhi hirhephiyọ ohwo rẹ ufuoma vwẹ obevun re. Ọnana da ghwa ujiri rhe Jihova.
10. Die yen e ru rere e se vwo wene oka ohwo avwanre hepha vwẹ obevun?
10 Ewene nana ghwa vwomaphia siẹvuọvo-o, ọ guọnọ ẹgbaẹdavwọn. Avwanre sa “pharhe” vwẹ ikpe buebun. (2 Pita 1:5) Ewene nana cha vwomaphia kidie nẹ avwanre ga Jihova vwẹ ikpe buebun re-e. Avwanre cha davwẹngba vwo wene oka rẹ ohwo rẹ avwanre pha vwẹ obevun. O vwo owọẹjẹ evo re sa chọn avwanre uko vwo ru ewene nana. E jẹ a fuẹrẹn evo usun rayen
OBO RE SE VWO WENE ẸGBA IRORO AVWANRE
11. Mavọ yen ẹrhovwo vwẹ ukẹcha kẹ avwanre vwo wene ẹgba iroro avwanre?
11 Ẹrhovwo ọyen owọẹjẹ ẹsosuọ rọ pha ghanghanre. Ofori nẹ avwanre nẹrhovwo kirobo rẹ ọbuine na ruru rọ vwọ ta: “Ma udu ọfuanfon phihọ evun mẹ, E Ọghẹnẹ ru wo phi [“ẹwẹn,” NW] ọkpokpọ wẹn phihọ udu mẹ.” (Une 51:10) Avwanre mrẹvughe nẹ ofori e vwo wene ẹgba iroro avwanre, je nẹrhovwo rhe Jihova nẹ ọ chọn avwanre uko. Diesorọ o vwo mu avwanre ẹro nẹ Jihova cha vwẹ ukẹcha kẹ avwanre vwo ru ewene na? Oborẹ Jihova ve kẹ ihwo rẹ Izrẹl ri ru ubiudu gangan vwẹ ọke rẹ Izikiẹl se phiuduphiyọ avwanre awọ: “Ke me kẹ ayen udu ọvo, ki mi phi [“ẹwẹn,” NW ] ọkpokpọ phihọ evun rẹ ayen . . . me kẹ ayen udu rẹ uvwo,” kọyen udu rọ guọnọ nene odjekẹ rẹ Jihova. (Izi. 11:19) Jihova vwo owenvwe rọ vwọ vwẹ ukẹcha kẹ ihwo rẹ Izrẹl vwo wene, o ji vwo owenvwe rọ vwọ chọn avwanre uko nonẹna.
12-13. (a) Vwo nene Une Rẹ Ejiro 119:59, die yen avwanre che roro kpahen? (b) Enọ vọ yen wọ cha nọ oma wẹn?
12 Erorokodo ọyen owọẹjẹ rivẹ rọ je pha ghanghanre. Avwanre de se Ota rẹ Ọghẹnẹ kẹdẹ kẹdẹ, e jẹ a ghwọrọ ọke vwo roro kokodo kpahen iruemu vẹ iroro ro fori nẹ avwanre wene. (Se Une Rẹ Ejiro 119:59; Hib. 4:12; Jems 1:25) Ofori nẹ avwanre noso sẹ iroro rẹ akpọ nana djobọte iroro vẹ iruemu rẹ avwanre re. Ofori nẹ avwanre vwomakpotọ rhọnvwọ ovwiẹrẹ avwanre, rere a davwẹngba vwo phio kparobọ.
13 Kerẹ udje, nọ oma wẹn: ‘Omoka rẹ omaẹriọ hẹ ubiudu mẹ?’ (1 Pita 2:1) ‘Me kparoma fikirẹ asan ri mi nurhe, ẹbe ri mi yonori yẹrẹ fikirẹ igho ri mi vwori?’ (Isẹ 16:5) ‘Me vwẹ ẹro okueku vwo nẹ ihwo ri mi vwo bun vrẹn yẹrẹ ri nẹ asan ọfa rhe?’ (Jems 2:2-4) ‘Ekuakua rẹ akpọ rẹ Eshu nana si uvwe urhuru?’ (1 Jọn 2:15-17) ‘Erọnvwọn ra vwọ diotọ ri churobọ si ọfanrhiẹn vẹ ozighi yen je vwe?’ (Une 97:10; 101:3; Emọs 5:15) Ẹkpahanphiyọ wẹn vwọ kẹ enọ nana cha vwẹ ukẹcha kẹ wẹ vwọ riẹn asan ro fori nẹ wọ wian kpahen. Avwanre de se wene “ẹgba egangan” yẹrẹ iroro re vwẹ owọ muotọ vwẹ ubiudu rẹ avwanre, oma cha vwerhen Ọsẹ rẹ avwanre rọhẹ odjuvwu.—Une 19:14.
14. Diesorọ ọ vwọ ghanre mamọ avwanre vwọ sane uvi rẹ igbeyan?
14 A vwọ sane uvi rẹ igbeyan ọyen owọẹjẹ rerha. Owenẹ avwanre riẹnre, yẹrẹ e jẹ ẹriẹn, igbeyan djobọte avwanre. (Isẹ 13:20) Vwẹ iruo yẹrẹ isikuru, ihwo re cha sa vwẹ ukẹcha kẹ avwanre vwo vwo iroro rẹ Ọghẹnẹ-ẹ yen riariẹ avwanre phiyọ. Ẹkẹvuọvo, avwanre sa mrẹ uvi rẹ igbeyan vwevunrẹ ukoko na. Etiyin yen avwanre da jeje ohwohwo oma vwọrẹ “ẹguọnọ kugbe iruo esiri.”—Hib. 10:24, 25.
VWO “ESEGBUYOTA [RỌ] GHWOTỌ KOKOROKO”
15-16. Idjerhe vọ yen Eshu vwọ davwẹngba ro vwo wene iroro rẹ avwanre?
15 Karophiyọ nẹ Eshu davwẹngba ro vwo wene iroro rẹ avwanre. Ọ reyọ kiroro
kiroro vwo miovwo uyota rẹ Ota rẹ Ọghẹnẹ rẹ avwanre yonori.16 Eshu je nọ oka rẹ onọ rọ nọ Ivi vwẹ ogba rẹ Idẹn: “Ọghẹnẹ [ghene ta] nẹ . . . ?” (Jẹn. 3:1) Vwẹ akpọ rẹ Eshu nana, ọkieje yen avwanre vwo nyo ihwo re nọ enọ re nẹrhẹ avwanre vwo ẹwẹn ivivẹ kerẹ: ‘Ọghẹnẹ ghene sen orọnvwe rẹ ọshare vẹ ọshare? Ọghẹnẹ ghene guọnọ nẹ wọ re orẹ rẹ Krimasi vẹ ẹkarophiyọ rẹ ẹdẹ re vwiẹ ohwo-o? Ọghẹnẹ ghene guọnọ nẹ wọ sen ọbara re se phiyoma? Ọghẹnẹ rẹ ẹguọnọ na ghene guọnọ nẹ wọ kẹnoma kẹ igbeyan wẹn ra djẹ nẹ ukoko?’
17. Die yen avwanre che ru siẹrẹ a da nọ avwanre enọ re sa nẹrhẹ e vwo ẹwẹn ivivẹ, die yen Kọlose 2:6, 7 tare nẹ o se nẹ obuko rọyen rhe?
17 Ofori nẹ avwanre vwo imuẹro rẹ oborẹ avwanre segbuyota. Avwanre rha guọnọ ẹkpahọnphiyọ rẹ enọ ri kpokpo avwanre ẹwẹ-ẹn, e sa nẹrhẹ avwanre vwo ẹwẹn ivivẹ. Iroro ivivẹ tiọyena sa yanghan iroro rẹ avwanre, je guọghọ esegbuyota rẹ avwanre. Ọtiọyena, die yen ofori nẹ avwanre ru? Baibol na tare nẹ avwanre wene iroro rẹ udu rẹ avwanre, rere avwanre se vwo dje kẹ oma rẹ avwanre nẹ e “vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.” (Rom 12:2) Womarẹ uyono rẹ Baibol rẹ ọkieje, avwanre se dje uyota rẹ avwanre yono nẹ Baibol na rhe kẹ oma rẹ avwanre. Avwanre se vwo imuẹro nẹ iwan rẹ Jihova pha gbagba. Ọke yena, avwanre ke cha họhọ urhe rẹ awọ rọyen nabọ ruotọ, “esegbuyota rẹ [avwanre kọ] ghwotọ kokoroko.”—Se Kọlose 2:6, 7.
18. Die yen cha vwẹ ukẹcha kẹ avwanre vwọ họnre vwọso umiovwo rẹ akpọ rẹ Eshu na?
18 Avwanre ọvo yen se ru esegbuyota rẹ avwanre gan. Ọtiọyena, ru ẹgba rẹ iroro wẹn phiyọ ọkpokpọ ọkieje. Nẹrhovwo ọkeneje, wọ me je yarẹ ukẹcha rẹ ẹwẹn ọfuanfon rẹ Jihova. Nabọ roro kokodo rere wọ je vwẹ ọkieje vwọ fuẹrẹn iroro wẹn vẹ obo ri mu we vwo ru obo wo ruẹ. Sane uvi rẹ igbeyan re sa chọn wẹ uko vwo wene iroro wẹn. Wo de ru ọtiọyen, kẹ wo se sivwin oma wẹn vwo nẹ umiovwo rẹ akpọ rẹ Eshu nana, je “guọghọ aphro kugbe eyan ri hirhe phihọ ukọn kẹ erianriẹn rẹ Ọghẹnẹ.”—2 Kọr. 10:5.
UNE 50 Ẹrhovwo rẹ Omaẹvwọkpahotọ
^ e?ko. 5 Asan rẹ avwanre dia ghwanre djobọte iroro rẹ avwanre vwẹ idjerhe rẹ erhuvwu yẹrẹ umiovwo. Avwanre sa mrẹ nẹ iruemu evo rhe vwẹ owọ muotọ vwẹ oma rẹ avwanre re, ọtiọyena, kọ bẹn avwanre vwo siobọnu ayen. Uyono nana che yono avwanre obo re se vwo sun koka koka rẹ iroro rọ chọre ro rhe avwanre.