1. Diesorọ o vwo fo nẹ avwanre kerhọ rẹ orhọesio rẹ Jesu na?

JESU vwọ mraro kpahan ẹdẹ rẹ oba na, ọ da ta: “Kẹnoma wẹn ọ dia eriyi-in iroro wẹn da rhe vọn vẹ . . . ẹnwan rẹ akpọ nana.” (Luk 21:34) Ofori nẹ avwanre davwerhọn rẹ orhọesio yena. Diesorọ? Nonẹna, avwanre rhiẹromrẹ oka rẹ ebẹnbẹn rẹ ihwo efa ji rhiẹromrẹ.

2. Ẹdia rẹ ẹnwan vọ yen iniọvo rẹ avwanre hirharoku?

² Ọkiọvo, avwanre hirharokuẹ ebẹnbẹn sansan re sa so ẹnwa vwẹ uvwre ọke vuọvo. Roro kpahen idje nana. Oniọvo ọvo re se John, * rioja rẹ ọga re se multiple sclerosis. Ofu djere mamọ ọke rẹ aye rọ rọvwọnre ọsoso ẹgbukpe 19 vwọ djẹ jovwo. Ọyena vwọ wan nu, emetẹ rọyen ivẹ da dobọ rẹ ẹga rẹ Jihova ji. Aye gbe ọshare ọvo re se Bob vẹ Linda hirharoku ebẹnbẹn rọ fẹnẹ ọ rẹ John. Iruo rẹ aye gbe ọshare na va ayen abọ, ayen da kua nẹ uwevwin rẹ ayen hepha jovwo kpo uwevwin otete. A ta ọyena obọ, idọktọ rẹ Linda da vuẹ nẹ o vwo ọga rẹ udu ro se hwe vẹ ọga ọfa rọ guọghọ ẹgba rẹ ugboma na.

3. Imuẹro vọ yen Filipae 4:6, 7 kẹ avwanre?

³ Avwanre se vwo imuẹro nẹ Ọmemama rẹ avwanre Jihova vwo ẹruọ rẹ ebẹnbẹn rẹ avwanre hirharokuẹ. Ọ je guọnọ vwẹ ukẹcha kẹ avwanre vwo yerin ghene ayen. (Se Filipae 4:6, 7.) Baibol na vọnre vẹ ikuegbe buebun ri dje egbabọse rẹ idibo rẹ Jihova chirakon rayen. Ọ je vuẹ avwanre oborẹ Jihova chọn ayen uko vwo yerin ghene  egbabọse na. E jẹ avwanre fuẹrẹn evo usun rayen.

4. Egbabọse vọ yen Ilaija hirharoku, die yen ọ mrẹvughe kpahen Jihova?

⁴ Ọke rọ pha bẹnbẹn yen Ilaija da ga Jihova, o ji hirharoku egbabọse egangan. Ovie Ehab rọ dia ọvo usun rẹ ivie re fuevu-un vwẹ ikuegbe rẹ ihwo rẹ Izrẹl, rọvwọn Jẹzibẹl rọ ga edjọ re se Baal. Ayen ihwo ivẹ na de titi ẹga rẹ Baal vwẹ ẹkuotọ na, ji hwe emraro rẹ Jihova buebun. Ilaija da djẹ vabọ. Ọ je vabọ rẹ owẹnvwe ro firi kidie ọ vwẹroso Jihova. (1 Ivie 17:2-4, 14-16) Vwọba, Ilaija vwẹroso Jihova ọke ro vwo mudia vwọso emraro vẹ ihwo re vwẹ ẹga kẹ Baal. O phiuduphiyọ ihwo rẹ Izrẹl awọ nẹ ayen ga Jihova. (1 Ivie 18:21-24, 36-38) Ilaija mrẹ erọnvwọn sansan ri djerephia nẹ Jihova ghene chọn uko vwẹ ọke rẹ bẹnbẹn yena.

5-6. Vwo nene obo rehẹ 1 Ivie 19:1-4, ebẹnbẹn vọ yen Ilaija hirharoku, idjerhe vọ yen Jihova vwo djephia nẹ ọyen vwo ẹguọnọ rọyen?

⁵ Se 1 Ivie 19:1-4. Ẹkẹvuọvo oshọ mu Ilaija ọke rẹ Aye Ovie Jẹzibẹl vwọ djuguegue muo nẹ o che hwe. Ọ da djẹ kpo Beer-sheba. Ofu de dje te ẹdia rọ vwọ tanẹ “ọye ghwe ghwu siẹvo.” Diesorọ ofu vwo dje? Ilaija gbare-e, ọyen “ohwo kirobo rẹ avwanre epha na.” (Jems 5:17) Ọ sa dianẹ ẹnwan muro rọ, oma je rhọ. Ọhọhọ nẹ Ilaija roro nẹ ẹgbaẹdavwọn ro  vwo titi ẹga rẹ uyota ofefe, ihwo ri Izrẹl rhọnvwe ru ewene vuọvo-o. O ji se roro nẹ ọyen ọvo yen je ga Jihova. (1 Ivie 18:3, 4, 13; 19:10, 14) Uruemu rẹ ọmraro nana rọ fuevun na djephia, se gbe avwanre unu. Ẹkẹvuọvo Jihova vwo ẹruọ rẹ ebẹnbẹn rẹ Ilaija hirharoku na.

⁶ Ilaija vwọ ta obo re nẹrhẹ ofu dje phia, Jihova ghwọkuo-o. Ukperẹ ọtiọyen, ọ da bọn gan. (1 Ivie 19:5-7) Ọke vwọ yanran na, Jihova da kpọ iroro rẹ Ilaija vi womarẹ ẹgba rọyen ro dje kẹ. Jihova da je vuẹ nẹ ihwo ri te 7,000, re je ga Baal dẹvo-o, je herọ. (1 Ivie 19:11-18) Vwẹ idjerhe nana yen Jihova vwo djephia nẹ o vwo ẹguọnọ rẹ Ilaija.

7. Vwo nẹ idjerhe rẹ Jihova vwọ vwẹ ukẹcha kẹ Ilaija, imuẹro vọ yen rhe avwanre?

⁷ Ofu dje we fikirẹ ebẹnbẹn ọvo ru vwo hirharoku? Udu avwanre ganre ra vwọ riẹn nẹ Jihova vwo ẹruọ rẹ ebẹnbẹn rẹ Ilaija hirharoku! Ọnana kẹ avwanre imuẹro nẹ Jihova riẹn asan rẹ ẹgba rẹ avwanre teri. O vwo ẹruọ rẹ ebẹnbẹn rẹ avwanre nene muabọ, ọ tobọ riẹn oborẹ avwanre roro. (Une 103:14; 139:3, 4) Kerẹ Ilaija, avwanre da vwẹroso Jihova, ọ cha chọn avwanre uko vwo yerin ghene ebẹnbẹn re so ẹnwan.—Une 55:22.

8. Idjerhe vọ yen Jihova cha vwọ chọn wẹ uko vwo yerin ghene ẹnwan?

⁸ Ẹnwan sa nẹrhẹ wo roro erharhe rẹ iroro, re sa so ofudjevwe. Ọ da dia ọtiọyen kẹ wẹ, gba karophiyọ nẹ Jihova cha chọn wẹ uko vwo yerin ghene. Idjerhe vọ yen ọ cha vwọ chọn wẹ uko? Ọ tare nẹ wọ vuẹ ọyen ọdavwẹ wẹn. Ọ che nyo oviẹ wẹn vwọ kẹ ukẹcha. (Une 5:3; 1 Pita 5:7) Ọtiọyena, gba vwẹ ọkeneje vwọ vuẹ Jihova ebẹnbẹn wẹn vwẹ ẹrhovwo. Dede nẹ ọ cha ta ota kẹ wẹ phiogun kirobo rọ ta ota kẹ Ilaija-a, jẹ o che ruo womarẹ Baibol na rọ dia Ota rọyen kugbe ukoko rọyen. Obo wo seri vwẹ Baibol na se bru we uche, je kẹ wẹ iphiẹrophiyọ. Iniọvo wẹn je sa vwẹ uchebro kẹ wẹ.—Rom 15:4; Hib. 10:24, 25.

9. Mavọ yen ugbeyan ra vwẹroso sa vwọ vwẹ ukẹcha kẹ avwanre?

⁹ Jihova vuẹ Ilaija nẹ ọ reyọ iruo evo vwọ kẹ Ilaesha. Vwẹ idjerhe nana, Jihova kẹ Ilaija omamọ rẹ ugbeyan rọ vwẹ ukẹcha kẹ ọke rẹ ofu vwo dje. Vwẹ idjerhe vuọvo na, avwanre da vuẹ ugbeyan rẹ avwanre obo ri kpokpo avwanre ẹwẹn, ọ sa chọn avwanre uko yerin ghene ebẹnbẹn na. (2 Ivie 2:2; Isẹ 17:17) Wo de roro nẹ wo vwo ohwo vuọvo ru wọ sa ta ota kẹ-ẹ, gba nẹrhovwo rhe Jihova rere ọ chọn wẹ uko vwọ mrẹ Onenikristi ro tedje, rọ sa vwẹ uchebro kẹ wẹ.

10. Iphiẹrophiyọ vọ yen ikuegbe rẹ Ilaija kẹ avwanre, mavọ yen ive rọhẹ Aizaya 40:28, 29 sa chọn avwanre uko?

¹⁰ Jihova vwẹ ukẹcha kẹ Ilaija vwo yerin ghene ẹnwan, je fuevun ga ikpe buebun. Ikuegbe rẹ Ilaija na kẹ avwanre iphiẹrophiyọ. Ọkiọvo, ẹnwan se mu avwanre rọ te ẹdia rẹ ofu mi rhi dje avwanre, oma me je rhọ avwanre. Jẹ avwanre da vwẹroso Jihova, ọ cha kẹ avwanre ẹgba ra guọnọre a sa vwọ ga.—Se Aizaya 40:28, 29.

11-13. Mavọ yen ẹnwan mu idibo rẹ Ọghẹnẹ erha rọ wan?

¹¹ Ihwo efa re gbikun rayen vwẹ Baibol na ji hirharoku ẹnwan. Kerẹ udje, Hannah  chirakon rẹ ẹdia rẹ ẹgan rọ hepha vẹ ehwẹjẹ ro nẹ obọ rẹ ophrophro rọyen rhe. (1 Sam. 1:2, 6) Hannah ro ẹnwan te ẹdia rọ da viẹ, ọ rha sa riemu-u.—1 Sam. 1:7, 10.

¹² O ji vwo ọke sansan rẹ Ovie Devid vwọ ro ẹnwan. Roro kpahen egbabọse ro hirharoku. Ofu djere fikirẹ erọnvwọn buebun ro ru chọ. (Une 40:12) Absalọmu rọ dia ọmọ rọyen ro vwo ẹguọnọ kpahen gbe vwọsuọ, ọnana da rhe so ughwu rẹ Absalọmu. (2 Sam. 15:13, 14; 18:33) Ugbeyan rẹ Devid rọ kẹrerẹ mamọ ji kuophiyotọ. (2 Sam. 16:23–17:2; Une 55:12-14) Devid dje ofudjevwe rọyen vẹ ẹroẹvwọsuọ ọgangan ro vwo kpahen Jihova phia vwẹ ine buebun ro siri.—Une 38:5-10; 94:17-19.

¹³ Ọke vwọ yanran na, ọbuine ọvo kọ rioma kpahan akpeyeren rẹ irumwemwu. Ọ sa dianẹ uvwiẹ rẹ Asaf rọ dia ohwo rẹ Livae rọ gare vwẹ “asan ẹshẹ rẹ Ọghẹnẹ” yen ọbuine na nurhe. Ẹnwan mu ọbuine nana rọ te ẹdia rẹ oma rha vwerhọ-ọn, obo ro vwori rha je da ẹro-o. Ebruphiyọ rẹ Jihova vwọ kẹ rha tobọ te kẹ-ẹ.—Une 73:2-5, 7, 12-14, 16, 17, 21.

14-15. Die yen e yono vwo nẹ idje rẹ Baibol erha na kpahen obo re se vwo bru Jihova ra vwọ kẹ ukẹcha?

¹⁴ Idibo rẹ Jihova erha re yono kpahen na vwẹroso Jihova vwọ kẹ ukẹcha. Ayen nẹrhovwo rhe Jihova ọkieje kpahen ẹnwan rayen. Ayen vuẹrẹ oboresorọ ayen vwọ ro ẹnwan. Ayen dobọ rẹ ẹga rẹ Jihova ji-i.—1 Sam. 1:9, 10; Une 55:22; 73:17; 122:1.

¹⁵ Jihova nabọ kpahen kẹ ayen ohwo ọvuọvo. Ẹwẹn rẹ Hannah de rhi totọ. (1 Sam. 1:18) Devid de si: “Ukpokpogho  rẹ ọvwata ọpha buebu; ẹkẹvuọvo Ọrovwohwo na sivwo nẹ ayen ejobi.” (Une 34:19) Ọke vwọ yanran na, ọbuine na da rhe mrẹvughe nẹ Jihova “yọnrọn obọrhe” rọyen, rọ vwọ kẹ odjekẹ vwọrẹ ẹguọnọ. Ọtiọyena ọ da so: “Vwọ kẹ vwẹ o yoma mi vwo si kẹrẹ Ọghẹnẹ; me vwẹ Ọrovwohwo Ọghẹnẹ ru asan odjahọ mẹ.” (Une 73:23, 24, 28) Die yen avwanre yono vwo nẹ idje nana? Ọkiọvo, ebẹnbẹn se mu avwanre rọ te ẹdia rẹ ofu mi rhi dje avwanre hwe. Ẹkẹvuọvo, avwanre se yerin ghene ẹnwan siẹrẹ e de roro kpahen oborẹ Jihova vwẹ ukẹcha kẹ ihwo efa wan, vwẹrosuọ womarẹ ẹrhovwo, ji nyupho rọyen womarẹ e vwo ru obo rọ tare nẹ e ru.—Une 143:1, 4-8.

16-17. (a) Diesorọ avwanre vwo jẹ oma esio nẹ otu? (b) Mavọ yen avwanre sa vwọ rhoma mrẹ ogangan?

¹⁶ Idje erha na yono avwanre orọnvwọn ọfa; avwanre sioma nẹ Jihova vẹ ihwo rọye-en. (Isẹ 18:1) Nancy rẹ ofu djeri ọke rẹ ọshare rọyen vwọ djẹ jovwo da ta: “Ọke buebun me rhọnvwa mrẹ yẹrẹ ta ota kẹ ohwo vuọvọ-o. Ọyena ri mi ruẹ na da rhe nẹrhẹ omaemuophiyọ mẹ  ganphiyọ.” Erọnvwọn de rhi wene ọke rẹ Nancy vwọ guọnọ idjerhe rọ vwọ vwẹ ukẹcha kẹ ihwo efa rehẹ ẹdia rẹ ebẹnbẹn. Ọ da ta: “Me kerhọ ọke rẹ ihwo efa da vuẹ vwẹ ebẹnbẹn rẹ ayen nene muabọ. Me da rhe mrẹvughe nẹ ọke mi de phi oma phiyọ ẹdia rayen, me rha karophiyọ ebẹnbẹn mẹ-ẹ.”

¹⁷ Avwanre sa rhoma vwo ogangan siẹrẹ e de kpo uyono. Wọ dahẹ evunrẹ uyono, wọ kẹ Jihova uphẹn efa ọ vwọ “cha [wẹ] uko” ji “bru [we] uche.” (Une 86:17) Etiyin yen ọ da bọn avwanre gan womarẹ ẹwẹn ọfuanfon rọyen, Ota rọyen vẹ ihwo rọyen. Uyono nẹrhẹ avwanre se “ru esegbuyota rẹ ohwohwo gan.” (Rom 1:11, 12) Oniọvo aye re se Sophia da ta: “Jihova vẹ iniọvo rẹ ukoko na yen nẹrhẹ mi se chirakon. Uyono ẹra yen ma ghanre kẹ vwẹ. Me rhe mrẹvughe re nẹ aghwoghwo vẹ uyono ẹra chọn vwẹ uko vwo yerẹn ghene ebẹnbẹn mẹ.”

18. Siẹrẹ ofu de dje avwanre, die yen Jihova cha kẹ avwanre?

¹⁸ Ọke rẹ ofu de dje avwanre, e jẹ a karophiyọ nẹ Jihova che si erọnvwọn re nẹrhẹ ofu dje avwanre no ọke rọ cha vwẹ obaro na, ọ je cha chọn avwanre uko vwo yerin ghene ayen asaọkiephana. Ọ kẹ avwanre “owenvwe vẹ ẹgba” re se vwo yerin ghene ofudjevwe kugbe jẹ iphiẹrophiyọ evwo.—Fil. 2:13, NW.

19. Imuẹro vọ yen Rom 8:37-39 kẹ avwanre?

¹⁹ Se Rom 8:37-39. Ọyinkọn Pọl vwẹ imuẹro kẹ avwanre nẹ o vwo emu vuọvo rọ sa hẹriẹ avwanre vwo nẹ ẹguọnọ rẹ Ọghẹnẹ-ẹ. Mavọ yen avwanre sa vwọ vwẹ ukẹcha kẹ iniọvo rẹ ofu dje? Uyono rọ vwọ kpahen ọnana cha vuẹ avwanre obo ra sa vwọ vwẹrokere Jihova vwo dje erorokẹ, ji bicha iniọvo rẹ ofu dje.