1-2. (a) Die yen chọn avwanre uko vwo chirakon rẹ ebẹnbẹn? Djekpahọn. (b) Die yen a cha ta ota kpahen vwẹ uyono nana?

“ỌKE mi de roro kpahen ebẹnbẹn ri mi hirharoku, me riẹnre nẹ ọ dia ẹgba mẹ ọvo mi se vwo chirakon raye-en.” Wọ ta oka rẹ ota tiọyen jovwo re? Buebun avwanre tarọ jovwo re. Ọkiọvo wọ tarọ ọke ru wo vwo roro kpahen oborẹ wo se vwo yerin ghene ọga ọgangan ọvo yẹrẹ ughwu rẹ ohwo ru wo vwo ẹguọnọ kpahen. Wo vwo roro kpahen ebẹnbẹn na, ku wọ rhe mrẹvughe nẹ ẹwẹn ọfuanfon ri Jihova yen kẹ wẹ “ẹgba rọ vrẹ ẹgba” ru wo se vwo chirakon rọyen.—2 Kọr. 4:7-9, NW.

² Avwanre je guọnọ ukẹcha rẹ ẹwẹn ọfuanfon na ra sa vwọ sen ẹwẹn rẹ akpọ nana. (1 Jọn 5:19) Vwọba, a je guọnọ ẹgba ra sa vwọ họnre vwọso “otuofovwi rẹ [“ẹwẹn,” NW] umwemwu.” (Ẹfe. 6:12) Asaọkiephana, a cha ta ota kpahen idjerhe ivẹ rẹ ẹwẹn ọfuanfon na vwọ chọn avwanre uko vwo yerẹn ghene ebẹnbẹn. E de ru ọyena nu, ka cha ta ota kpahen obo ra sa vwọ mrẹ erere vọnvọn vwo nẹ ukẹcha rẹ ẹwẹn ọfuanfon na.

3. Ọrhọ yen idjerhe ọvo ri Jihova vwọ chọn avwanre uko vwo chirakon rẹ ebẹnbẹn?

³ Dede nẹ avwanre hirharokuẹ edavwini, ẹwẹn ọfuanfon ri Jihova kẹ avwanre ẹgba vwo ruẹ kemu kemu. Ọyinkọn Pọl mrẹvughe nẹ ọyen sa ga Jihova vwẹ ẹdia rẹ ebẹnbẹn rọyen, kidie ọ vwẹroso “ogangan ri Kristi.” (2 Kọr. 12:9) Vwẹ oyan rẹ imishọnare rọyen rivẹ, Pọl nabọ ghwọrọ ọke vwẹ iruo aghwoghwo na ji wian vwọ vwẹrote oma rọyen. Ọ dia uwevwin rẹ Akuila kugbe Prisila vwẹ Kọrẹnt. Ibọkpọ  ọyen ayen rhuon. Kidie nẹ Pọl je tona rẹ iruo nana, ko nene ayen wian nọke ra ruọke. (Iruo 18:1-4) Ẹwẹn ọfuanfon yen kẹ Pọl ẹgba vwọ wian vwọ vwẹrote oma rọyen ji ruiruo aghwoghwo na vọnvọn.

4. Vwo nene eta rehẹ 2 Kọrẹnt 12:7b-9, ebẹnbẹn vọ yen Pọl hirharoku?

⁴ Se 2 Kọrẹnt 12:7b-9. Vwẹ ẹkpo ri Baibol nana, die yen “unwe” ri Pọl tare nẹ e vwo duvwu ọyen na mudiaphiyọ? Unwe de vwirhin dje ohwo oma, omiamiavwe rọyen gan dẹn. Ọtiọyena, Pọl ta ota kpahen ọdavwini ọgangan ro hirharoku vwẹ ọke yena. Ọ vwẹ ebẹnbẹn rọyen na vwo dje “ikọn rẹ Idẹbono” ro “kpokpo.” Ọ sa dianẹ ọ dia Eshu yẹrẹ emekashe rọyen yen so unwe yẹrẹ ebẹnbẹn ri Pọl na-a. Ẹkẹvuọvo, ayen de vwo oniso rẹ “unwe” na, kẹ ayen rhoma nyẹ kirobo re se dje rere omiamiavwe ri Pọl na vwọ rhoma ganphiyọ. Die kọyen Pọl ruru?

5. Mavọ yen Jihova kpahenphiyọ ẹrhovwo ri Pọl?

⁵ Ẹsosuọ, Pọl guọnọre nẹ e si “unwe” na nẹ ọyen oma. Ọ da ta: “Asiarha soso me rẹ Ọrovwohwo . . . nẹ o sio nẹ uvwe oma.” Dede nẹ Pọl nẹrhovwo, Jihova si unwe na no oma rọye-en. Kẹ ọnana mudiaphiyọ nẹ Jihova rhe nyo ẹrhovwo ri Pọl na-a? Ẹjo, kakaka. O nyo ẹrhovwo na. Dede nẹ Jihova si ebẹnbẹn ri Pọl na no-o, jẹ ọ kẹ rẹ ẹgba vwo chirakon rọyen. Jihova da ta: “Vwẹ evun rẹ ovwiẹrẹ e de ru ogangan mẹ gba.” (2 Kọr. 12:8, 9) Womarẹ ukẹcha ri Jihova, Pọl da sa sẹro rẹ aghọghọ vẹ ẹwẹn ri dọe ro rhere!—Fil. 4:4-7.

6. (a) Idjerhe vọ yen Jihova wan kpahanphiyọ ẹrhovwo rẹ avwanre? (b) Mavọ yen ẹkpo ri Baibol rehẹ ẹkorota na bọn wẹ gan wan?

⁶ Kerẹ Pọl, wọ rẹ Jihova nẹ o si obẹnbẹn ọvo nu we oma jovwo re? Wo roro nẹ ivun wẹn miovwo Jihova, ọ da dianẹ wọ yare Jihova abọ buebun nẹ o si obẹnbẹn na no, jẹ ọ rhọnvwe no-o, ukperẹ ọtiọyen kọ rhoma braphiyọ? Ọ da dia ọtiọyen, gba karophiyọ udje ri Pọl. Jihova nyo ẹrhovwo rọyen, o ji che nyo ẹrhovwo wẹn! Ọ sa dianẹ Jihova che si ebẹnbẹn na no-o. Jẹ, ọ cha kẹ wẹ ẹgba womarẹ ẹwẹn ọfuanfon wo se vwo chirakon. (Une 61:3, 4) A sa “ghwiẹ” wẹ she dede, ẹkẹvuọvo, Jihova cha sen wẹ-ẹ.—2 Kọr. 4:8, 9; Fil. 4:13.

7-8. (a) Idjerhe vọ yen ẹwẹn ọfuanfon na vwọ họhọ odju? (b) Mavọ yen Pita djisẹ oborẹ ẹwẹn ọfuanfon na wian wan?

⁷ Die yen idjerhe ọfa rẹ ẹwẹn ọfuanfon na sa vwọ chọn avwanre uko? A sa vwẹ ẹwẹn ọfuanfon na vwo dje odju. Kirobo rẹ odju ọgangan ro djuẹ kpo ẹbẹre rẹ okuna biẹ ra sa vwẹ ukẹcha kẹ vwọ fobọ te asan rọ ra dede nẹ ọgbogho hẹ abadi na, eriyin ẹwẹn ọfuanfon na sa chọn avwanre uko vwọ ga Jihova bẹsiẹ ra vwọ ro akpọ kpokpọ na.

⁸ Ọyinkọn Pita riẹn erọnvwọn buebun kpahen obo re biẹ okọ, kidie ọyen ohwiyerin. Ọnana sa dia oboresorọ rọ vwọ vwẹ oborẹ ẹwẹn ọfuanfon na wian wan vwo dje oborẹ okọ biẹ wan vwẹ urhie. Pita de si: “Fikiridie o vwo aroẹmrẹ ọvuọvo ro nẹ obọ rẹ ohworakpọ rhe-e, ẹkẹvuọvo ihwo rẹ ẹwẹn ọfuanfon na muru yen ta ota ro nẹ obọ rẹ Ọghẹnẹ rhe.” Ubiota ri Grik ra fan phiyọ “muru” mudiaphiyọ re vwo “mu” orọnvwọn nene oma.—2 Pita 1:21, NW.

9. Tivọ yen Pita guọnọre nẹ ẹwẹn rẹ ihwo ra ọke rọ vwọ reyọ “mu” vwo ruiruo?

⁹ Tivọ yen Pita guọnọre nẹ ẹwẹn rẹ ihwo ra ọke rọ vwọ reyọ “mu” vwo ruiruo? Luk rọ dia ohwo ro si ọbe rẹ Iruo Rẹ Iyinkọn Na je reyọ ota rọ họhọ ọyena vwo djisẹ rẹ okọ ro “bo” yẹrẹ odju muẹ. (Iruo 27:15)  Ọshare ọvo ro yono Baibol na kodo tare nẹ, ota rọ cha nẹrhẹ ihwo roro kpahen okọ ro biẹ vwẹ urhie yen Pita vwo ruiruo, ọke rọ vwọ ta ota kpahen oborẹ ẹwẹn ọfuanfon na “mu” ihwo ri si Baibol na. Kọyen Pita tanẹ, kirobo rẹ odju muẹ okuna kpo asan rọ ra ye, eriyin ẹwẹn ọfuanfon na ji mu emraro vẹ ihwo ri si Baibol na rẹ ayen se vwo ruiruo rayen gba. Ọshare na da je ta: “Vwẹ idjerhe rẹ udje, a sa tanẹ emraro na rhie emwa rẹ okọ rayen phiyọ.” Jihova ru ẹkẹn rọyen. Ọ kẹ ayen “odju” yẹrẹ ẹwẹn ọfuanfon” na. Ihwo ri si Baibol na ji ru ẹkẹn rayen. Ayen nene odjekẹ rẹ ẹwẹn ọfuanfon na.

10-11. Erọnvwọn ivẹ vọ yen a guọnọre a ke sa mrẹ erere vwo nẹ ukẹcha rẹ ẹwẹn ọfuanfon na? Djudje rọyen.

¹⁰ Nonẹna ẹwẹn ọfuanfon ri Jihova rhe muẹ ihwo vwo si Baibo-ol. Ẹkẹvuọvo, Jihova je reyọ ẹwẹn ọfuanfon na vwo suẹn idibo rọyen. Jihova ji ruẹ ẹkẹn rọyen. Jẹ, mavọ yen a sa vwọ mrẹ erere vwo nẹ ukẹcha rẹ ẹwẹn ọfuanfon na? Ofori nẹ a davwẹngba vwo ru ẹkẹn rẹ avwanre. Mavọ yen e che ru ọnana wan?

¹¹ Roro kpahen udje nana. Odju na se vwo mu okọ na, ohwo ro biẹ okọ na che ru erọnvwọn ivẹ. Ẹsosuọ, ọ cha kpọ okọ na kpo ẹbẹre rẹ odju na djuẹ ra. Okọ na che bi-i siẹrẹ o de sheri kẹ asan rẹ odju na djuẹ ra. Ọrivẹ, ọ cha nabọ rhie emwa rẹ okọ na phiyọ. Otoro obo rẹ odju na dju te-e, okọ na che bi-i jokpanẹ odju na mu emwa rẹ okọ na. Vwẹ idjerhe vuọvo na, ukẹcha rẹ ẹwẹn ọfuanfon na yen cha nẹrhẹ a sa ga Jihova ọkieje. E che ru erọnvwọn ivẹ tavwen a ke sa mrẹ erere vwo nẹ ukẹcha rẹ ẹwẹn ọfuanfon na. Ẹsosuọ, avwanre che ruiruo rẹ ẹwẹn ọfuanfon na suẹn idibo rẹ Ọghẹnẹ vwo ruẹ nonẹna. Ọrivẹ, ofori nẹ avwanre nabọ “rhie emwa” rẹ avwanre phiyọ womarẹ re vwo muomaphiyọ iruo tiọyena. (Une 119:32) Avwanre  de se ru erọnvwọn ivẹ nana, ẹwẹn ọfuanfon na cha chọn avwanre uko vwọ ga Jihova bẹsiẹ ra vwọ ro akpọ kpokpọ na.

12. Die yen e che roro kpahen enẹna?

¹² Avwanre fuẹrẹn idjerhe ivẹ rẹ ẹwẹn ọfuanfon na vwọ chọn avwanre uko re. Ọ kẹ avwanre ẹgba, ọ je chọn avwanre uko vwọ fuevun chirakon rẹ edavwini. Ẹwẹn ọfuanfon na suẹn je chọn avwanre uko vwo ruiruo ri Jihova kẹ avwanre rọ cha nẹrhẹ e se vwo arhọ ri bẹdẹ. Enẹna, e je roro kpahen erọnvwọn ẹne re che ru vwọ mrẹ erere vọnvọn vwo nẹ ukẹcha rẹ ẹwẹn ọfuanfon na.

13. Vwo nene obo rehẹ 2 Timoti 3:16, 17, erere vọ yen a sa mrẹ vwo nẹ Baibol na rhe, kẹ die yen avwanre che ru tavwen?

¹³ Ẹsosuọ, yono Ota rẹ Ọghẹnẹ. (Se 2 Timoti 3:16, 17.) Ubiota ri Grik ra fan kpo “Ọghẹnẹ mu ihwo vwo si,” mudiaphiyọ “Ọghẹnẹ wẹn phiyọ.” Kọyen Ọghẹnẹ reyọ ẹwẹn ọfuanfon na vwọ “wẹn” yẹrẹ phi iroro rọyen phiyọ udu rẹ ihwo ri si Baibol na. Siẹrẹ e de se Baibol na ji roro kpahọn, eta rẹ Ọghẹnẹ na ke sa rọ ubiudu vẹ iroro rẹ avwanre. Eta na mi mu avwanre vwo ru ewene ra guọnọre e se vwo ru ọhọre ri Jihova. (Hib. 4:12) Jẹ, a sa vwọ mrẹ erere vọnvọn vwo nẹ ukẹcha rẹ ewẹn ọfuanfon na, a cha rhuẹrẹ ọke vwo se Baibol na ọkieje ji roro kokodo kpahen oborẹ avwanre se na. Ọke yena, Ota rẹ Ọghẹnẹ ko che sun eta vẹ uruemu rẹ avwanre eje.

14. (a) Diesorọ a sa vwọ tanẹ “odju na djuẹ” vwẹ emẹvwa rẹ avwanre? (b) Mavọ yen a sa vwọ mrẹ erere vọnvọn vwo nẹ ukẹcha rẹ ẹwẹn ọfuanfon na kerẹ emwa rẹ okọ ra nabọ rhiephiyọ?

¹⁴ Ọrivẹ, e je kuomakugbe ga Ọghẹnẹ. (Une 22:22) A sa tanẹ “odju na djuẹ” vwẹ emẹvwa rẹ avwanre. Ẹwẹn ọfuanfon ri Jihova hẹ emẹvwa rẹ avwanre. (Ẹvwọ. 2:29) Diesorọ a sa vwọ ta ọtiọyen? Kidie, avwanre vẹ iniọvo na dahẹ emẹvwa, avwanre nẹrhovwo vwọ kẹ ẹwẹn ọfuanfon na, suine rẹ Uvie na ra reyọ nẹ Baibol rhe je kerhọ rẹ eta ri nẹ Baibol rhe rẹ eshare ra vwẹ ẹwẹn ọfuanfon mu vwọphia. Ẹwẹn ọfuanfon vuọvo na yen ji chọn iniọvo eya uko vwo muegbe ji vwẹ eta ra ghare kẹ ayen vwọphia. Jẹ, a sa vwọ mrẹ erere vọnvọn vwo nẹ ukẹcha rẹ ẹwẹn ọfuanfon na, ofori nẹ e muegbe ji vwobọ vwẹ uyono na. Ọke yena, ka sa mrẹ erere vọnvọn vwo nẹ ukẹcha rẹ ẹwẹn ọfuanfon na kerẹ emwa rẹ okọ ra nabọ rhiephiyọ kẹ odju.

15. Mavọ yen ẹwẹn ọfuanfon wan chọn avwanre uko vwẹ iruo aghwoghwo na?

¹⁵ Ọrerha, vwobọ vwẹ iruo aghwoghwo na. A da reyọ Baibol na vwo ruiruo vwẹ aghwoghwo na, kọyen avwanre vwẹ uphẹn vwọ kẹ ẹwẹn ọfuanfon na nẹ ọ chọn avwanre uko. (Rom 15:18, 19) A sa vwọ mrẹ erere vwo nẹ ukẹcha rẹ ẹwẹn ọfuanfon na, ofori nẹ e rhe kpo aghwoghwo ọkieje je reyọ Baibol na vwo ruiruo vọnvọn. Idjerhe ọvo re se vwo ghwoghwo ota rọ da nabọ te ihwo ubiudu yen e de nene idje rẹ ena aghwoghwo rehẹ Ọbe Uyono rẹ Akpeyeren rẹ Avwanre vẹ Iruo Uvie Na.

16. Ọrhọ yen idjerhe rọ ma phẹre rẹ ẹwẹn ọfuanfon na se vwo te avwanre obọ?

¹⁶ Ọrẹne, nẹrhovwo rhe Jihova. (Mat. 7:7-11; Luk 11:13) Idjerhe rọ ma phẹre rẹ ẹwẹn ọfuanfon na se vwo te avwanre obọ yen a vwọ yarọ mie Jihova vwẹ ẹrhovwo. O vwo emu vuọvo rọ sa da ẹrhovwo rẹ avwanre ji, ro de jẹ Jihova e bro ra-a. Eshu yẹrẹ igbẹhẹ rẹ uwodi cha je sa dobọ rẹ ẹwẹn ọfuanfon na ji ro de jẹ avwanre obọ e te-e. (Jems 1:17) Mavọ yen a cha  nẹrhovwo wan rere a sa vwọ mrẹ erere vwo nẹ ukẹcha rẹ ẹwẹn ọfuanfon na? A vwọ riẹn ẹkpahọnphiyọ rẹ onọ na, e je roro kpahen udje ọvo ro shekpahen ẹrhovwo ra niyẹnrẹn rọyen phiyọ ọbe ri Luk. *

17. Die yen e se yono kpahen ẹrhovwo vwo nẹ itẹ ri Jesu ra niyẹnrẹn rọyen phiyọ Luk 11:5-9, 13?

¹⁷ Se Luk 11:5-9, 13. Itẹ ri Jesu na dje oborẹ a cha nẹrhovwo vwọ yare ukẹcha rẹ ẹwẹn ọfuanfon na. Vwevunrẹ Itẹ na, kidie nẹ ọshare na djẹ ọrivẹ rọyen “ovwerhẹ,” obo rọ guọnọ na de rhi te obọ. Dede nẹ uherevie ason yen o vwo brora, oshọ muro ro vwo dje ẹnẹnọ-ọ. Mavọ yen Jesu reyọ itẹ yena vwo dje ọghanrovwẹ rẹ ẹrhovwo? Ọ da ta: “Me ta kẹ wẹ, Nọ, ka vwọ kẹ wẹ; guọnọ, ko wọ mrẹ; hworo, ke rhie kẹ wẹn.” Die yen ọnana yono avwanre? Avwanre ke sa mrẹ ukẹcha rẹ ẹwẹn ofuanfon na, kẹ avwanre gbomavwra ẹrhovwo ẹnẹ.

18. Vwo nene udje ri Jesu na, diesorọ ro vwo mu avwanre ẹro nẹ Jihova cha kẹ avwanre ẹwẹn ọfuanfon na?

¹⁸ Udje ri Jesu na ji dje oboresorọ Jihova cha vwọ kẹ avwanre ẹwẹn ọfuanfon na. Ọshare re djunute vwẹ udje na guọnọ vwẹrote ọrhorha ro wonro. Ọ riẹnre nẹ ofori nẹ ọ vwẹ emu kẹ ọrhorha na, ẹkẹvuọvo o vwo emu vuọvo-o. Jesu tare nẹ oko rọyen na kẹrẹ emu na kidie o muomaphiyọ oyare na. Die yen ẹkpo rẹ udje ri Jesu na? Ohworakpọ ro jẹgba de se vwo owenvwe rọ vwọ chọn ọrivẹ rọyen uko, kọyen Ọsẹ avwanre rọhẹ odjuvwu cha kẹ avwanre ẹwẹn ọfuanfon na siẹrẹ e de gbomaphiyọ ẹyarọ. Ọtiọyena, o muẹro nẹ avwanre de fiudugberi yare Jihova, ọ cha kẹ avwanre ẹwẹn ọfuanfon na.—Une 10:17; 66:19.

19. Diesorọ o vwo mu avwanre ẹro nẹ e se chirakon rẹ omukpahen?

¹⁹ Avwanre se chirakon dede nẹ ọkieje yen Eshu vwo muẹkpahen avwanre. Diesorọ? Kidie ẹwẹn ọfuanfon na chọn avwanre uko vwẹ idjerhe ivẹ. Ẹsosuọ, ọ kẹ avwanre ẹgba vwo chirakon rẹ ebẹnbẹn. Ọrivẹ, ọ kẹ avwanre ẹgba ra sa vwọ ga Jihova enẹna rhinrin re te akpọ kpokpọ na. E jẹ avwanre brorhiẹn re vwo ru erọnvwọn re sa nẹrhẹ a mrẹ ukẹcha rẹ ẹwẹn ọfuanfon na!