VWẸ ọke re vwo si Baibol na, odibo ọyen ohwo rọ vwẹrote ekuakua yẹrẹ eyerẹn uwevwin rẹ ohwo ọfa.

Ọke ri Josẹf ọmọ ri Jekọp vwọ hẹ ọviẹn vwẹ Ijipt, ọ da rhe dia ohwo rọ vwẹrote ekuakua rẹ onini rọyen. Vwọrẹ uyota, onini rọyen vwẹ Ijipt tobọ “yan jobo ro vwori ejobi vwo ki Josẹf” nẹ ọ vwẹrote ayen. (Jẹn. 39:2-6) Ọke ri Josẹf rhe vwo dia osun vwẹ Ijipt, ọ da rha vwẹ ohwo mu nẹ ọ vwẹrote evwruwevwin rọyen.—Jẹn. 44:4.

Vwẹ ọke ri Jesu, edafe ri vwo idju dia irere ri sherabọ kẹ aghwa rayen. Ọtiọyena, ayen vwẹ idibo vwo muẹ re vwẹrote ewiowian re wian vwẹ udju na kẹdẹ kẹdẹ.

Oka rẹ ohwo vọ yen e vwo muẹ odibo? Osiọbe ri Rom ọvo vwẹ ẹgbukpe ujorin ẹsosuọ re se Columella tare nẹ, odibo re vwo mu rọ cha vwẹrote iruo rẹ aghwa na me dia ohwo rọ “nabọ tona rẹ iruo rẹ aghwa.” Ọ me dia “ohwo ro se mu ewiowian na vwo ruiruo rayen, ẹkẹvuọvo o shenyẹ aye-en.” Ọ da je tanẹ, “Jẹ emu ọvo ra ma guọnọ mie kọna; ọ nama roro nẹ ọyen ọvo yen riẹn iruo na-a, e jẹ o vwo ẹwẹn ro vwo yono mie ihwo efa ọkieje.”

Baibol na je reyọ owian rẹ odibo na vwo dje iruo evo re che ru vwevunrẹ ukoko na. Kerẹ udje, ọyinkọn Pita bru Inenikristi uche nẹ ayen reyọ okẹ yẹrẹ ena rẹ Ọghẹnẹ vwọ kẹ ayen vwo ruiruo kerẹ odibo “esiri rẹ Ọghẹnẹ rọ ghara ẹserọphẹ rọye.”—1 Pita 4:10.

Jesu komobọ reyọ udje rẹ odibo nana vwo ruiruo vwẹ itẹ ro kperi vwẹ Luk 16:1-8. Vwọba, Jesu vwọ mraro kpahen oka rẹ ẹcha rọyen kerẹ Ovie, ọ da vwẹ imuẹro nana vwọ kẹ idibo rọyen nẹ ọ cha reyọ “odibo esiri” vwo mu. Owian rẹ odibo nana che ru yen ọ vwọ reyọ Ota rẹ Ọghẹnẹ vwọ ghẹrẹ Inenikristi eje vwẹ ọke rẹ oba na. (Mat. 24:45-47; Luk 12:42) Oma vwerhen avwanre nẹ avwanre ọvo usun rẹ ihwo ri mrẹ erere vwo nẹ ẹbe sansan rẹ odibo esiri na teyanphia vwẹ akpọeje.