OHWO rọ ta oborẹ aruọke na cha dia ni orọnvwọn rẹ ayen vwọ fuẹrẹn aruọke na. Ọ da mrẹ ogiribo ro muoshọ rọ cha vwẹ ekogho rẹ ihwo buebun dia. Kidie nẹ o vwo ọdavwẹ rẹ ihwo na, ọ da davwẹngba rọyen eje vwo si ihwo na orhọ bẹsiẹ ogiribo na ke tonphiyọ.

Vwẹ idjerhe vuọvo na, Jihova ji siẹ ihworakpọ orhọ nonẹna kpahen “ogiribo” ọvo ro muoshọ gangan re ji nyo ọkpọ rọyen vwẹ iyẹnrẹn rẹ ihwo ri yono kpahen aruọke-e. Idjerhe vọ yen o vwo ru ọnana? Die yen sa nẹrhẹ avwanre vwo imuẹro nẹ ọ fobọ vwẹ orhọesio phia? E jẹ a fuẹrẹn erhọesio evo ri Jihova vwọphia vwẹ ọke awanre a sa vwọ mrẹ ẹkpahọnphiyọ na.

Vwẹ ọke awanre, Jihova vwẹ orhọesio rẹ “ogiribo” yẹrẹ ẹdjọeguo phia kpahen ihwo re vwẹ arogba vwọ churhi rọyen. (Isẹ 10:25; Jer. 30:23) Kọke kọke yen ọ vwọ fobọ vwẹ orhọesio phia vwọ kẹ ihwo na, ji vuẹ ayen nẹ ayen ru ewene ri shephiyọ ọhọre rọyen. (2 Ivie 17:12-15; Neh. 9:29, 30) Ọkieje yen ọ vwọ reyọ idibo rọyen ri fuevun vwẹ otọrakpọ na vwo si ayen orhọ rere ayen se vwo ru ewene ri fori kpakpata.—Emọs 3:7.

Noa ọyen ọvo usun rẹ idibo tiọyena. Ikpe buebun ọyen o fiudugberi ghwoghwo vwọ kẹ evwọfanrhiẹn vẹ inogbozighi rẹ ọke rọyen kpahen Oghwe rode ro che ku akpọ na. (Jẹn. 6:9-13, 17) Ọ je vuẹ ayen obo ro fori nẹ ayen ru rere ayen se vwo vwo usivwin. O ruro te ẹdia re vwo se oghwoghwota “rẹ ọvwata.”—2 Pita 2:5.

Dede nẹ Noa ghwoghwori, jẹ ihwo na rhọnvwe kerhọ rẹ orhọesio rẹ Ọghẹnẹ na-a. Ayen dje esegbuyota phia kakaka-a. Ọtiọyena, ayen de “divwi ghwu vwẹ evun rẹ oghwe na.” (Mat. 24:39; Hib. 11:7) Ayen vwo divwẹn yanran na, o muẹro nẹ ayen karophiyọ nẹ Ọghẹnẹ si ayen orhọ jovwo.

Vwẹ ọke efa, Jihova si ihwo orhọ ọmọke krẹn tavwen “ogiribo” rẹ ẹdjọeguo rọyen ke tuanphiyọ. Vwẹ ẹdia nana dede, o ji ruo rere ihwo re kerhọ rọyen vwọ mrẹ ọke vwọ djẹ vabọ. Kerẹ udje, ọ nabọ vwẹ orhọesio phia tavwen ihwo rẹ Ijipt ke rioja rẹ Etiekọ Ihwe na. Ọke ri Jihova cha vwọ reyọ otiekọ righwrẹn rọ dia osio rẹ imicho phia, o de ji Mosis vẹ Erọn re si Fero vẹ idibo rọyen orhọ. Rọ vwọ dianẹ ẹdẹ rọ vwọ kpahọn yen osio rẹ imicho na cha vwọ rhọ na, a sa tanẹ Ọghẹnẹ kẹ ayen ọke, rẹ ayen vwọ guọnọ asan de siomanu? Baibol na da ta: “Etiyin ohwo rọ djẹ oshọ rẹ ota rẹ Ọrovwohwo vwẹ usun rẹ idibo ri Fero na da vwẹ eviẹn rọye vẹ eranvwe rọye djẹ kpo iwevwi; ẹkẹvuọvo ohwo ro se ota rẹ Ọrovwohwo gbemu-u da yan jẹn eviẹn rọye vẹ uchuru rọye vwo vwẹ evun rẹ aghwa.” (Eyan. 9:18-21) Ophẹnre, Jihova kẹ ayen ọke, ọtiọyena ihwo ri brokpakpa ru obo ri Jihova tare rha rioja rẹ ọtiekọ yena-a.

A je vwẹ erhọesio phia kẹ Fero vẹ idibo rọyen tavwen a ke vwẹ ọtiekọ rihwe na phia. Ẹkẹvuọvo, ayen davwẹnrhọ-ọ. (Eyan. 4:22, 23) Ọtiọyena, emekpako rayen eje de ghwu. Ọ da ohwo mamọ! (Eyan. 11:4-10; 12:29) Ọke herọ rẹ ayen vwọ kerhọ rẹ orhọesio na jovwo? E! Ugege yena yen Mosis vwọ vwẹ orhọesio phia kẹ ihwo rẹ Izrẹl je vuẹ ayen oborẹ orua rayen se vwo  sivwinrhọ. (Eyan. 12:21-28) Brẹ ihwo yen kerhọ rẹ orhọesio ri Mosis na? Ihwo evo tare nẹ, ihwo rẹ Izrẹl ri te iduduru erha yen kerhọ, ji te “ọguagua” ri ihwo buebun re dia ihwo rẹ Izrẹ-ẹl vẹ ihwo rẹ Ijipt.—Eyan. 12:38.

Kirobo rẹ idje nana djephia, kọke kọke ri Jihova de si ihwo orhọ, ọ nabọ kẹ ayen ọke rẹ ayen vwọ kerhọ rọyen. (Urhi 32:4) Die yen mu Ọghẹnẹ vwo ru ọyena? Ọyinkọn Pita tare nẹ Ọghẹnẹ “guọnọre nẹ ohwo ọvuọvo ghwru-u, ẹkẹvuọvo nẹ ihwo ejobi kurhẹriẹ.” (2 Pita 3:9) Vwọrẹ uyota, Ọghẹnẹ davwerhọ rẹ ihwo. Ọ guọnọre nẹ ayen kurhẹriẹ ji ru nene ichebro rọyen tavwen ẹdjọeguo rọyen ki te.—Aiz. 48:17, 18; Rom 2:4.

O ji fo nẹ ihwo eje kerhọ rẹ orhọesio rẹ okpakpa re ghwoghwo vwẹ akpọ na nonẹna. Ọke ri Jesu vwọ hẹ otọrakpọ na, o si ihwo orhọ nẹ a cha ghwọrọ eyeren nana vwẹ uvwre ọke rẹ “ukpokpogho” rode na. (Mat. 24:21) Vwẹ aroẹmrẹ ri Jesu vwọphia, ọ da nabọ djisẹ rẹ oborẹ idibo rọyen che rhiẹromrẹ ọke rẹ edjọeguo yena vwo siẹkẹrẹ na. Eriyina, erọnvwọn re phia vwẹ akpọ na nonẹna, ghwa obo ri Jesu djisẹ rọyen.—Mat. 24:3-12; Luk 21:10-13.

Vwo nene aroẹmrẹ yena, Jihova si ihwo orhọ nonẹna nẹ, ayen vwomakpotọ kẹ usuon rọyen. Ọ guọnọre nẹ ihwo ri nyẹme yerin omamọ akpọ enẹna, ọtiọyen ji te ọke rọ cha obaro na vwẹ akpọ kpokpọ na. (2 Pita 3:13) Rere ihwo se vwo se ive na gbuyota, Jihova da reyọ ovuẹ rẹ usivwin phia, rọ dia “iyẹnrẹ esiri” rẹ Uvie na ri Jesu tare nẹ a “cha ta ota . . . [rọyen] wan akpọ na ejobi, rere ọ vwọ dia iseri kẹ ẹgborho na ejobi.” (Mat. 24:14) Jihova ru ọrhuẹrẹphiyotọ rere idibo rọyen vwọ dia “iseri” yẹrẹ ghwoghwo ovuẹ rọyen na vwẹ ẹkuotọ ri te omarẹ 240. Jihova guọnọre nẹ ihwo buebun kerhọ rẹ orhọesio na rere ayen sa vwọ vrabọ rẹ “ogiribo” rẹ ẹdjọguo rẹ ọvwata rọyen na.—Zẹf. 1:14, 15; 2:2, 3.

Ọ dianẹ sẹ Ọghẹnẹ fobọ si ihwo orhọ yen ota rọhẹ otọ na-a, kidie o muẹro nẹ ọkieje yen o vwo ruẹ ọtiọyen. Ẹkẹvuọvo, ota rọhẹ otọ na kọna: Ihwo cha kerhọ rẹ orhọesio Ọghẹnẹ ọke je vwọ herọ na? E jẹ avwanre davwẹngba vwọ chọn ihwo buebun uko vwo sivwin wan oba rẹ eyeren nana.