1, 2. (a) Idjerhe vọ yen a sa vwọ vwẹ akpọ nana vwo dje onogbozighi re brorhiẹn rẹ ughwu hwe? (Ni uhoho rẹsosuọ na.) (b) Die yen ihwo cha mrẹvughe siẹrẹ oghwọrọ na da wan nu?

“ORIVWIN RỌ YAN!” A ta ota nana ọke re vwo suẹn onogbozighi ọvo vwo nẹ uwodi. Diesorọ elọkpa ri suẹn ọshare na vwọ ta ota nana? Oma rẹ ọshare na ganre; ọ diẹ ọ muọga ro che hwe-e. Ẹkẹvuọvo, elọkpa na suon kpo asan ra da cha teyen ọshare nana hwe. Onogbozighi na ghwa họhọ ohwo ro ghwure kidie e brorhiẹn rẹ ughwu hwe nure. *

² Vwẹ ọhọ ọvo, akpọ nana pha kerẹ ọshare yena rọ yan kpo ughwu rọyen na. E brorhiẹn rẹ oghwọrọ hwe akpọ nana ọke grongron rọ wanre, oghwọrọ na ji sikẹre mamọ re. Baibol na da ta: “Akpọ na . . . wanvrẹn.” (1 Jọn 2:17) Vwọrẹ imuẹro, akpọ na che vwoba. Dedena, ofẹnẹ ọvo herọ uvwre rẹ oba rẹ akpọ na vẹ ọ rẹ onogbozighi yena. Ọke re de che hwe ọshare na, ihwo evo sa rhoma nọ enọ kpahen orhiẹn re bruru na, yẹrẹ tanẹ a dobọ rẹ ehwe  na ji emerha. Ẹkẹvuọvo, vwọ kẹ akpọ na, Osun rẹ akpọ vẹ odjuvwu yen brorhiẹn ọgbagba nana. (Urhi 32:4) A cha dobọ rẹ oghwọrọ na ji emerha-a, a je cha nọ enọ kpahen orhiẹn na-a. Oghwọrọ na da wan nu, kohwo kohwo ro che chekọ cha rhe mrẹvughe nẹ ọnana orhiẹn esiri. Omafuvwe rode kọ cha dia!

3. Die yen a cha fuẹrẹn vwẹ uyono nana?

³ Kẹ, die yen “akpọ na” rọ “wanvrẹn” na churobọ si? Erọnvwọn buebun rẹ ihwo roro nẹ e cha dia bẹdẹ bẹdẹ vwẹ akpọ na nonẹna, che no. Ọyen iyẹnrẹn ọbrabra? Kakaka! Ọyena tobọ ẹbẹre ọghanghanre ọvo rẹ “iyẹnrẹ esiri” rẹ Uvie na. (Mat. 24:14) E gbe jẹ a fuẹrẹn obo ri che no siẹrẹ Uvie rẹ Ọghẹnẹ da rhe. A cha ta ota kpahen ẹkpo ẹne: irumwemwu, ikoko ri ru umiovwo, erharhe uruemu, vẹ ẹdia akpeyeren rọ pha brabra. Vwẹ ẹkpo ọvuọvo, avwanre che yono kpahen (1) obo ro djobọte avwanre wan nonẹna, (2) oborẹ Jihova che ru kpahọn, kugbe (3) obo rọ cha vwẹ omamọ ẹdia vwo wene.

4. Idjerhe vọ yen erharhe ihwo vwo djobọte avwanre nonẹna?

⁴ Mavọ yen irumwemwu na djobọte avwanre wan nonẹna? Ẹwẹn ọfuanfon na vwo mu ọyinkọn Pọl vwo si nẹ avwanre che yerin vwẹ “ẹdẹ ebrabra” nu, o de ji si: “Ihwo umwemwu kugbe otu ri muẹ odẹ kẹ oma re miovwẹ phihọ.” (2 Tim. 3:1-5, 13) Wọ mrẹ orugba rẹ eta yena re? Buebun rẹ avwanre rhiẹromrẹ oja vwẹ abọ rẹ ihwo ri shenyẹ ihwo ekueku, ri vwo utuoma rẹ ihwo, vẹ inogbozighi ra ghẹmrẹ. Evo siomanẹ ruẹ umwemwu na-a; efa tobọ vwẹ odẹ rẹ ọvwata vwo rhurhu imwemwu rẹ ayen ruẹ. Ọ da tobọ dianẹ avwanre ji rhiẹromrẹ ẹdia nana komobọ-ọ, ihwo ebrabra tiọyen ji djobọte avwanre nonẹna. Ọ da ohwo mamọ siẹrẹ e de nyo kpahen erharhe erọnvwọn rẹ ayen ruẹ. Oborẹ ayen gboja kẹ emọ, ihwo re kpakore, vẹ ihwo efa ri vwo ọchuko-o, nẹrhẹ oshọ muẹ ohwo. Erharhe ihwo vwo uruemu rẹ eranvwe, ayen tobọ ruẹ kerẹ emekashe rẹ Idẹbono. (Jems 3:15) Oma vwerhen avwanre nẹ Baibol na vwẹ omamọ iyẹnrẹn vwo wene erharhe iyẹnrẹn tiọyena.

5. (a) Uphẹn vọ yen ji rhiẹphiyọ kẹ irumwemwu? (b) Die yen cha phia kẹ irumwemwu re rhọnvwe kurhẹriẹ-ẹ?

⁵ Die yen Jihova che ru? Asaọkiephana, Jihova vwẹ ọke kẹ irumwemwu na ayen vwo kurhẹriẹ. (Aiz. 55:7) E ji brorhiẹn rẹ ughwu hwe ayen ohwo vuọvo-o. Eyeren nana yen e brorhiẹn rẹ oghwọrọ hwe re. Ẹkẹvuọvo, kẹ ihwo re rhọnvwe kurhẹriẹ-ẹ, re ka ẹbẹre rẹ akpọ nana re te ọke rẹ ukpokpogho rode na vwo? Jihova veri nẹ ọyen che si erharhe ihwo nẹ otọrakpọ na bẹdẹ bẹdẹ. (Se Une Rẹ Ejiro 37:10.) Irumwemwu na se roro nẹ ayen cha vrabọ rẹ ẹdjọeguo. Buebun rayen siẹ oborẹ ayen ruẹ nẹ, ayen je vrabọ rẹ oja ro fori nẹ ayen re fikirẹ umwemwu rayen na. (Job 21:7, 9) Dedena, Baibol na karophiyọ avwanre nẹ, “ẹro rọye hẹ idjerhe rẹ ohwo rẹ akpọ, ọ mrẹ ichiyotọ rọye ejobi. Egho eyẹ ebri herọ rẹ iruimwemwu de sioma rẹ ayen nẹ-ẹ.” (Job 34:21, 22) Ayen che se siomanu kẹ  Jihova Ọghẹnẹ-ẹ. O vwo ohwo vuọvo rọ sa phiẹ-ẹn; o ji vwo ebri yẹrẹ asan okokodo vuọvo rẹ ẹro rẹ Ọghẹnẹ jẹ ẹmrẹ-ẹ. Amagidọn da wan nu, avwanre che ni asan rẹ irumwemwu dia, a rha cha mrẹ aye-en. A cha ghwọrọ ayen bẹdẹ bẹdẹ!—Une 37:12-15.

6. Amono yen cha reyọ ẹdia rẹ irumwemwu na, diesorọ ọnana vwọ dia iyẹnrẹn esiri?

⁶ Amono yen cha reyọ ẹdia rẹ irumwemwu? Jihova ve ive oyoyovwin nana: “Ihwo dẹndẹn ri che vwo otọ na, vwẹ evun rẹ oyovwe rode kọye ayen da gọlọ.” Asan ọfa vwẹ une yena da je tanẹ, “Ọvwata cha re ughwẹ rẹ otọ na, kọ dia enu rọye bẹdẹ.” (Une 37:11, 29) Amono yen “ihwo dẹndẹn” kugbe “ọvwata” na? Ihwo dẹndẹn na yen ihwo ri rhiabọreyọ iyono vẹ odjekẹ rẹ Jihova; evwata ke rha hẹ ihwo ri vwo ẹguọnọ rẹ ayen vwo ru obo ri yoma vwẹ ẹro rẹ Jihova Ọghẹnẹ. Vwẹ akpọ na nonẹna, irumwemwu bun vrẹ evwata shesheri. Ẹkẹvuọvo, vwẹ akpọ kpokpọ rọ cha na, ihwo dẹndẹn kugbe evwata na ọvo yen cha dia otọrakpọ na. Ihwo nana yen che ru akpọ na phiyọ iparadaisi!

7. Idjerhe vọ yen ikoko ri ru umiovwo vwo djobọte avwanre nonẹna?

⁷ Idjerhe vọ yen ikoko ri ru umiovwo vwo djobọte avwanre nonẹna? Ikoko sansan yen ruẹ umiovwo buebun ra mrẹ vwẹ akpọ na nonẹna, ọ dia ihworakpọ-ọ. Kerẹ udje ẹga sansan yono efian kpahen oborẹ Ọghẹnẹ hepha, ẹroẹvwọsuọ rẹ Baibol na, obo re cha phia kẹ ihworakpọ vẹ otọrakpọ na, kugbe eta efa buebun. Kẹ ogangan rẹ usuon ri titi ofovwin vẹ ozighi, ri shenyẹ ivwiogbere vẹ ihwo ri vwo ọchuko-o, ra jẹ udi kẹ, ri ji nẹ ihwo ruẹ vwo? Kẹ ikọmpini ride ri miovwo odju na vwo, re guọghọ erọnvwọn Ọghẹnẹ ma phiyọ otọrakpọ na, ri gborho ihwo re dẹ erọnvwọn mie ayen rere ayen vwo fe, jẹ oduduru rẹ ihwo hẹ ẹdia rẹ ọbẹnvwẹ? Aphro herọ-ọ, ikoko nana yen tobọ sua ojaẹriọ rọ vọn akpọ na nonẹna.

8. Kirobo rẹ Baibol na tare, die yen cha phia kẹ ikoko re pha kerẹ igbenu vẹ ibrotọ nonẹna?

⁸ Die yen Jihova che ru? Ukpokpogho rode na cha tonphiyọ ọke rẹ usuon rẹ akpọ na da cha vwọso ẹga efian ejobi, re vwo dje igberadja re se Babilọn Rode na. (Ẹvwọ. 17:1, 2, 16; 18:1-4) A cha ghwọrọ ikoko rẹ ẹga na eje no riẹriẹriẹ. Kẹ ikoko ichekọ ri ji ruẹ umiovwo vwo? Baibol na vwẹ ikoko nana vẹ ogangan rayen vwo dje igbenu vẹ ibrotọ re niri nẹ e che se ghwie-e. (Se Ẹvwọphia 6:14.) Baibol na tare nẹ e che ghwie usuon rẹ akpọ na vẹ ikoko re vwẹroso ayen eje. Ukpokpogho rode na che kuphiyọ vẹ oghwọrọ rẹ usuon rẹ akpọ na kugbe ihwo re ka ẹbẹre rayen. (Jer. 25:31-33) A rha cha mrẹ ikoko tiọyena ọfa kakaka-a!

9. Die yen kẹ avwanre imuẹro nẹ akpọ kpokpọ na cha dia ọ rẹ ufuoma?

⁹ Die yen cha reyọ ẹdia rẹ ikoko ri ru umiovwo na? Amagidọn da wan nu, ukoko ọvo je cha dia otọrakpọ na? Baibol na da ta: “Ẹkẹvuọvo kirobo rẹ ive rọye epha avwanre hẹrhẹ idjuvwu ekpokpọ kugbe akpọ rẹ ọvwata cha dia.” (2 Pita 3:13) Odjuvwu vẹ akpọ awanre, rọ dia usuon ri ru umiovwo vẹ ihwo rehẹ otọ rayen, che no kare kare. Die yen cha reyọ  ẹdia rayen? Ota na “idjuvwu ekpokpọ kugbe akpọ” kpokpọ na mudiaphiyọ nẹ usuon kpokpọ cha dia vẹ ihwo re cha dia otọ rẹ usuon na. Ozighi cha kanre Uvie rẹ Jesu che sun na kidie Jihova Ọghẹnẹ dia ohwo rẹ ozighi-i. (1 Kọr. 14:33) Kọyen “akpọ” kpokpọ na cha dia ọ rẹ ufuoma. Emamọ eshare re cha vwẹrote ẹdia sansan cha dia. (Une 45:16) Ayen che nene odjekẹ rẹ Kristi vẹ ihwo 144,000 na. Vwẹ ẹro roro obo rọ cha dia siẹrẹ a da vwẹ ukoko vuọvo rọ pha yoyovwin vwo wene ikoko eje ri ruẹ umiovwo nonẹna!

10. Erharhe iruemu vọ yehẹ asan wọ dia, kẹ mavọ ọnana djobọte we vẹ orua wẹn?

¹⁰ Idjerhe vọ yen erharhe iruemu vwo djobọte avwanre nonẹna? Avwanre yerẹn vwẹ akpọ rọ vọnre vẹ erharhe iruemu. Ọfanrhiẹn, jẹ evun-ẹfuọn, vẹ ozighi rọ vrẹka vọn akpọ nana. Esẹ vẹ ini davwẹngba ayen vwọ sẹro rẹ emọ rayen vwo nẹ abọ rẹ iruemu nana. Erọnvwọn ra vwọ diotọ tobọ titi koka koka rẹ erharhe iruemu, ayen vwẹ irhi rẹ Jihova vwọ jehwẹ. (Aiz. 5:20) Inenikristi rẹ uyota davwẹngba vwọ kẹnoma kẹ ayen. Ayen davwẹngba ayen vwọ sẹro rẹ ọyọnregan rayen vwevunrẹ akpọ ro muọghọ kẹ irhi rẹ Jihova-a.

11. Die yen orhiẹn rẹ Jihova bru hwe Sodọm vẹ Gomora na yono avwanre?

¹¹ Die yen Jihova che ru kpahen erharhe iruemu nana? Roro kpahen obo ro ruru ọke rẹ umwemwu vwọ vọn Sodọm vẹ Gomora. (Se 2 Pita 2:6-8.) Ofu dje Lọt mamọ fikirẹ umwemwu rọ riarierẹ vẹ orua rọyen phiyọ. Jihova ghwọrọ akpọ yena, o vwo phi oba phiyọ umwemwu. Ẹkẹvuọvo o ji ruo ọ “vwọ dia oniru kẹ ayen ihwo umwemwu.” Kirobo rẹ Jihova phi oba phiyọ erharhe iruemu rẹ ọke yena, ọtiọyen o ji che phi oba phiyọ umwemwu rẹ akpọ nana.

12. Erọnvwọn vọ yen wọ rhẹro rọyen nẹ wo che ru vwẹ akpọ kpokpọ na?

¹² Die yen che wene erharhe iruemu? Omamọ erọnvwọn yen e che ru vwẹ Iparadaisi na. Roro kpahen iruo re che vwo wene akpọ na phiyọ iparadaisi kugbe ra cha vwọ bọn iwevwin kẹ oma avwanre vẹ ihwo rẹ avwanre vwo ẹguọnọ kpahen. Vwẹ ẹro roro aghọghọ rọ cha dia ọke re de che dede iduduru rẹ ihwo ri ghwuru ra rhọnvwọn nushi, re ji che vwo yono ayen kpahen idjerhe rẹ Jihova vẹ obo ro ru kẹ ihworakpọ. (Aiz. 65:21, 22; Iruo 24:15) Akpeyeren avwanre kọ cha vọn vẹ erọnvwọn sansan re cha kẹ avwanre aghọghọ je hwarhiẹ ujiri bru Jihova!

13. Die yen nẹ obuko rẹ ẹvwọsuọ rẹ Eshu, Adam, vẹ Ivi rhe?

¹³ Mavọ yen ẹdia akpeyeren rọ pha brabra djobọte avwanre nonẹna? Irumwemwu, ikoko ri ru umiovwo, vẹ erharhe iruemu; enana eje nẹrhẹ akpeyeren dia gangan nonẹna. Ono yen sa tanẹ ofovwin, ọbẹnvwẹ, yẹrẹ utuoma rẹ ẹkuotọ djobọte ọye-en? Kẹ ọga vẹ ughwu vwo? Avwanre ihwo ejobi rhiẹromrẹ erọnvwọn nana. Eshu, Adam, vẹ Ivi re vwọso Jihova yen ghwa erọnvwọn nana eje rhe. O vwo ohwo vuọvo rọ sa vrabọ rẹ obo ri nẹ obuko rẹ ẹvwọsuọ rayen na rhe-e.

14. Die yen Jihova che ru kpahen ẹdia akpeyeren rọ pha brabra na? Djunute udje ọvo.

 ¹⁴ Die yen Jihova che ru kpahen ẹdia rẹ akpeyeren na? Kerẹ udje, ofovwin. Jihova veri nẹ ọyen che phi oba phiyọ ofovwin bẹdẹ bẹdẹ. (Se Une Rẹ Ejiro 46:8, 9.) Kẹ ọga vwo? O che siono. (Aiz. 33:24) Ughwu vwo? Jihova che muo rọ bẹdẹ! (Aiz. 25:8) O ji che si ọbẹnvwẹ no. (Une 72:12-16) Ọtiọyen o ji che ru kpahen erọnvwọn efa re nẹrhẹ akpọ na bẹn avwanre eyeren nonẹna. O che phi oba phiyọ orharhe ‘odju’ rẹ akpọ nana, kidie ẹwẹn rẹ Eshu vẹ emekashe rọyen ri kpokpo ihwo nonẹna che no.—Ẹfe. 2:2.

15. Erọnvwọn vọ yen che no ọke rẹ ofovwin Amagidọn da wan nu?

¹⁵ Vwẹ ẹwẹn roro obo rọ cha dia ọke rẹ ofovwin, ọga, yẹrẹ ughwu de nẹ akpọ na. Di roro; a rha cha mrẹ isodje-e! Ekuakua rẹ ofovwin rha cha dia-a. Họspito, idọktọ, inọsu, imọshuare, ughworivwin, yẹrẹ asan rẹ shi ihwo phiyọ rha cha dia-a! Ọ vwọ dianẹ ozighi rha herọ na-a, a rha cha mrẹ ihwo re rhẹrẹ asan yẹrẹ elọkpa-a, ọkiọvo e rhe che vwo isiaphrẹ dede-e! Vwẹ ẹro roro oka rẹ ẹwẹn re dọe ro che rhe ihwo ọke yena!

16, 17. (a) Die yen cha phia kẹ ihwo re cha wanvrẹn Amagidọn? Djudje rọyen. (b) Mavọ yen avwanre se vwo vwo imuẹro nẹ e che nene akpọ nana ghwọrọ-ọ?

¹⁶ Mavọ yen akpọ na cha dia ọke rẹ ẹdia akpeyeren ọbrabra nana de no nu? Ọ cha bẹn ra vwọ vwẹ ẹwẹn roro. Akpọ nana vọnre vẹ oja mamọ, kọ ghwa họhọ nẹ oja na riẹnriẹn avwanre oma re. Kerẹ udje, edo rẹ itreni sa riẹnriẹn ihwo re dia kẹrẹ asan ra da ro itreni oma ayen de jẹ edo na e no sua, ọtiọyen ji te ihwo re dia kẹrẹ erhurhu, ọnrhe na sa riẹnriẹn ayen oma ayen rha cha riẹn sẹ asan na gbo-on. Ẹkẹvuọvo, ayen da kua kpo asan ọfa, kẹ ayen cha mrẹ nẹ ughwu yen ayen hepha jovwo!

¹⁷ Die yen cha reyọ ẹdia rẹ oja avwanre ria nonẹna? Une Rẹ Ejiro 37:11, da kpahen: “Vwẹ evun rẹ oyovwe rode kọye ayen da gọlọ.” Eta yena vwerhen owẹ oma? Ọnana yen oborẹ Jihova guọnọ vwọ kẹ wẹ. Ọtiọyena, gba davwẹngba wẹn eje wo vwo tinka mu Jihova Ọghẹnẹ vẹ ukoko rọyen vwẹ ẹdẹ ebrabra re koba nana! Ni iphiẹrophiyọ wẹn ghanghanre, roro kpahọn kokodo, vwẹ ẹwẹn wẹn vwo roro kpahen obo rọ cha dia, wo ji ghwoghwo vwọ kẹ ihwo efa! (1 Tim. 4:15, 16; 1 Pita 3:15) Ọke yena, ku wo se vwo imuẹro nẹ wo che nene akpọ ọbrabra nana ghwọrọ-ọ. Wọ cha dia vẹ omavwerhovwẹn bẹdẹ bẹdẹ!