VWẸ ukpe rọ wanre na, a vwẹ iniọvo eshare buebun vwo mu ẹdia rẹ ekpako vẹ idibo rowian vwẹ ikoko sansan vwẹ akpọneje. Wọ da dia ọvo usun rẹ iniọvo nana, o muẹro dẹn nẹ oma nabọ vwerhen owẹ fikirẹ uphẹn rẹ ẹga kpokpọ ro te we obọ na.

Jẹ, ọkiọvo oshọ se mu we. Jason rọ dia eghene re vwo mu ọkpako, da ta: “Ra vwọ reyọ ovwẹ vwo mu ọkpako, mi de no nẹ oghwa na họhọ nọ kẹ vwẹ.” Ọke rẹ Jihova vwọ vwẹ iruo kpokpọ kẹ Mosis vẹ Jerimaya, eriyin ayen ji no nẹ ayen muwan vwọ kẹ iruo na-a. (Eyan. 4:10; Jer. 1:6) Oka rẹ ẹwẹn tiọna de rhe we, mavọ yen wo se vwo phio kparobọ rere wọ sa vwọ yan obaro? Roro kpahen udje rẹ Timoti.​—Iruo 16:1-3.

Ọ sa dianẹ Timoti hẹ omarẹ ẹgbukpe 20 ọke rẹ Pọl vwo durhie nẹ o rhi nene ọyen wian kugbe. Rọ vwọ dianẹ eghene yen Timoti ruẹ ọke yena, ọ sa dianẹ oshọ muro ẹsosuọ, o ji siomauko vwọ kẹ erọnvwọn evo ro fori nẹ o ru vwẹ iruo kpokpọ ra vwọ kẹ na. (1 Tim. 4:11, 12; 2 Tim. 1:1, 2, 7) Ẹkẹvuọvo, ẹgbukpe ihwe vwọ wan nu, Pọl da vuẹ iniọvo rehẹ ukoko rẹ Filipae: “Mi phiẹrohọ vwẹ evun rẹ Ọrovwohwo Jesu nẹ mi che ji Timoti rhe phẹrẹkpẹ . . . Me rha vwẹ ẹro so ohwo ọfa rọ sa vwẹ ẹro te ovwan kerẹ ọye-e.”​—Fil. 2:19, 20.

Die yen nẹrhẹ Timoti dia uvi ọkpako? E je roro kpahen erọnvwọn esan re se yono nẹ udje rọyen.

1. O vwo ọdavwẹ rẹ ihwo. Pọl da ta kẹ iniọvo rehẹ Filipae: “[Timoti cha] vwẹ ẹro te ovwan.” (Fil. 2:20) Vwọrẹ uyota, Timoti vwo ọdavwẹ rẹ ihwo. Kidie nẹ o vwo ọdavwẹ kpahen oyerinkugbe rayen vẹ Jihova, ọ da vwomakpahotọ vwọ chọn ayen uko.

Wọ dia kerẹ ohwo rọ djẹ ofa, rọ djẹ jẹ ihwo ro che mu fikiridie nẹ ọ vwọtua ọke-e. William rọ ga kerẹ ọkpako vwẹ ikpe re vrẹ 20 re na, vwẹ uchebro nana kẹ eshare re vwo mu: “Vwo ẹguọnọ rẹ iniọvo na. Tẹnrovi ọdavwẹ rayen ukperẹ iruo na.”

2. O phi ẹga rẹ Jihova phiyọ ẹdia rẹsosuọ. Rọ vwọ vwẹ udje rẹ Timoti vwọ vwanvwe e rẹ ihwo efa, Pọl da ta: “Ọ robọ rayen ọvo ayen ejobi na guọnọ, ọ dia ọ ri Kristi-i.” (Fil. 2:21) Rom yen Pọl hepha ọke ro vwo si ọbe nana rhe iniọvo na. O niroso nẹ ọdavwẹ romobọ rayen ọvo yen iniọvo rehẹ Rom vwọtua. Ayen muomaphiyọ iruo rẹ Uvie na vọnvọ-ọn. Jẹ, Timoti họhọ aye-en! Uphẹn vwo rhiephiyọ rọ vwọ hẹre iruo rẹ aghwoghwo rọyen phiyọ, o da vwẹrokere Aizaya rọ tare nẹ, “Mẹvwẹ na! Ji vwe.”​—Aiz. 6:8.

Mavọ yen wo se vwo mu oghwa rẹ ukoko ji vwẹrote ọdavwẹ romobọ wẹn? Ẹsosuọ, phi erọnvwọn ri fori phiyọ ẹdia rẹsosuọ. Pọl da ta: “Vughe obo ri yovwiri.” (Fil. 1:10) Vwẹ ọdavwẹ rẹ Uvie na vwọ kobaro. Ọrivẹ, yeren akpọ rẹ kekpe. Kẹnoma kẹ erọnvwọn re sa reyọ ọke  vẹ ẹgba wẹn. Pọl vwẹ uchebro nana kẹ Timoti: “Siobọ nẹ unuavwerhe rẹ ọke-emọ rere wo nene ọvwata, esegbuyota, ẹguọnọ, kugbe ufuoma.”​—2 Tim. 2:22.

3. O muomaphiyọ iruo rẹ ẹga na. Pọl vwẹ ẹkarophiyọ nana kẹ iniọvo rehẹ Filipae: “Ovwan riẹn obo ri Timoti ghare te, kirobo rẹ ọmọ ga ọsẹ eriyin ọ ga vwẹ vwẹ iyẹnrẹ esiri na.” (Fil. 2:22) Timoti dia ọvwiẹrẹ-ẹ. Kidie nẹ ọ nabọ nene Pọl wian gangan, ọ da nẹrhẹ oyerinkugbe rayen kpẹkpẹ mamọ.

Nonẹna, owian buebun vọn evun rẹ ukoko rẹ Jihova re kẹ ohwo omavwerhovwẹn, ji siẹ ohwo kẹrẹ iniọvo na. Ọtiọyena, gbe “dje ebuo-ebuo phihọ vwẹ iruo rẹ Ọrovwohwo.”​—1 Kọr. 15:58.

4. O ru nene obo ro yonori. Pọl de si rhe Timoti: “Wọ nabọ ni uyono mẹ so, uruemu mẹ, obo ri mi nẹ vwẹ akpọ eyere mẹ, esegbuyota mẹ, odiri mẹ, ẹguọnọ mẹ, emuẹdiagan mẹ.” (2 Tim. 3:10) Kidie nẹ Timoti ru nene obo ro yonori, o de rhi muwan vwọ kẹ uphẹn rẹ ẹga efa.​—1 Kọr. 4:17.

Wo vwo oniru vwevunrẹ ukoko na? Wo rhe vwo-o, gba guọnọ ọvo. Tom, rọ ga kerẹ ọkpako vwẹ ikpe buebun rhire na, da ta: “Ọkpako ọvo ro tedje se vwe te oma, ọ da nabọ yono uvwe. Ọkieje yen me vwọ nokpẹn rẹ uchebro mie, ki mi ji ruẹ nene. Ọnana kẹ vwẹ uduefiogbere.”

5. Ọkeneje yen o vwo yono oma rọyen. Pọl da vwẹ uchebro kẹ Timoti: “Yono oma wẹn phihọ uyoyovwi.” (1 Tim. 4:7) Ọdjonẹ se vwo ohwo ro yono, ẹkẹvuọvo, o ji fo nẹ o yono oma rọyen. Pọl da vuẹ Timoti: “Wo mie se ọbe ọfuanfon na, kugbe eghwoghwo rẹ ota na, kugbe uyono. . . . Nabọ yono imu nana rere e reria owẹ oma, rere ihwo vwọ mrẹ erhuvwu rẹ iruo wẹn vughe.”​—1 Tim. 4:13-15.

Ru ona rẹ uyono wẹn yovwinphiyọ ọkieje. Wo jẹ erianriẹn vẹ ẹruọ wẹn kpahen odjekẹ rẹ ukoko na mudje vwẹ asan ọvo yẹrẹ kpo awanre-e. Vwọba, wo roro nẹ wo vwo erianriẹn wọ vwọ rhuẹrẹ kota kota ro sheri phiyọ fikirẹ oborẹ wo rhiẹromrẹ vwẹ akpeyere-en; ru ehiahiẹ. Vwẹrokere Timoti, rere wọ “sẹro rẹ oma wẹn kugbe uyono wẹn.”​—1 Tim. 4:16.

6. Ọ vwẹroso ẹwẹn ọfuanfon rẹ Jihova. Vwọ kpahen iruo rẹ aghwoghwo rẹ Timoti, Pọl da ta kẹ: “Sẹro rẹ uyota na rẹ [“ẹwẹn,” NW ] ọfuanfon na vwọ kẹ wẹ yọnre na rọ dia evun rẹ avwanre na.” (2 Tim. 1:14) Ẹwẹn ọfuanfon rẹ Jihova yen sa chọn Timoti uko vwọ sẹro rẹ iruo rẹ aghwoghwo rọyen.

Donald rọ ga kerẹ ọkpako vwẹ ẹgbukpe buebun rhire na, da ta: “E jẹ eshare re vwo mu vwẹ ẹro ọghanghanre vwo ni oyerinkugbe rayen vẹ Ọghẹnẹ. Ihwo ri se ru ọtiọyen ‘che vwo ogangan.’ Ayen da nẹrhovwo vwọ kẹ ukẹcha rẹ ẹwẹn ọfuanfon rẹ Jihova, ji dje omamọ rọyen phia, kẹ ayen dia ebruphiyọ kẹ iniọvo rayen.”​—Une 84:7; 1 Pita 4:11.

Ọ vwerhoma ra vwọ mrẹ iniọvo eshare re vwo mu obọ, re yan obaro ọkieje. Jason re djunute vwẹ ọtonphiyọ rẹ uyovwinrota nana, da ta: “Mi yono erọnvwọn buebun vwẹ uvwre ọke nana ra vwọ reyọ ovwẹ vwo mu ẹdia rẹ ọkpako na, me da je rhe dia ohwo ro vwo uduefiogbere. Asaọkiephana, me riavwerhen rẹ iruo mẹ, mi ji no phiyọ okpuphẹn!”

Wọ guọnọre nẹ Jihova reyọ owẹ vwo ruiruo vọnvọn vwẹ ẹga rọyen? Brorhiẹn wo vwo yono mie Timoti. Wo de ru ọtiọyen, ku wọ dia ebruphiyọ kẹ ihwo rẹ Ọghẹnẹ.