Eta rẹ Hibru ra vwọ fan etiyin rẹ Baibol na sa wian vwẹ ọhọ ivẹ na. Jẹ, enana yen oboresorọ a vwọ fan phiyọ obo rọ hepha enẹna:

1. Efanfan rẹ ukuko na shephiyọ vẹ eta rẹ Hibru kugbe obo ra ta ayen wan. Ubiota rẹ Hibru re se asher ra vwọ ton owọ 12 na phiyọ yen cha chọn avwanre uko vwọ riẹn oborẹ Une Rẹ Ejiro 144:12-15 vẹ awọreta ra vwọ ton uyovwinrota na phiyọ vwo churobọ si ohwohwo. A sa fan ubiota re se Asher na vwẹ idjerhe sansan. Kerẹ udje, o se mudiaphiyọ “ono” yẹrẹ “amono.” Kidie nẹ a fanrọ phiyọ “ono” vwẹ efanfan ri jovwo na, ekuakua esiri re djunute vwẹ owọ 12 re te 14 de shekpahen irumwemwu re djunute tavwen a ke ta eta yena. Ẹkẹvuọvo, a je sa fan ubiota re se asher na phiyọ “ọtiọyena,” “kọyensorọ,” yẹrẹ “ukuotọ rọyen,” kerẹ asan ra da mrẹ obo ro nẹ obuko rẹ uruemu rẹ ohwo cha. Vwẹ New World Translation rẹ 2013 na vẹ efanfan rẹ Baibol efa, a fanrọ phiyọ “ukuotọ rọyen.”

2. Efanfan rẹ ukuko na, nẹrhẹ ẹkpo rẹ Baibol yena shephiyọ vẹ eta na eje rehẹ ọbe rẹ Une Rẹ Ejiro na. Ubiota na “ukuotọ rọyen” re vwo ruiruo vwẹ owọ 12 na sa nẹrhẹ a riẹn nẹ ebruphiyọ re djunute vwẹ owọ 12 re te 14 na shekpahen ihwo esiri ri kperẹ phia nẹ e ‘sivwin ayen’ vwo nẹ abọ rẹ ihwo umwemwu na (owọ 11). Ewene na je teyenphia vwẹ owọ 15 ra da vwẹ ubiota na “aghọghọ” vwo ruiruo abọ ivẹ, re vwo djisẹ rẹ ebruphiyọ ro che te ayen obọ. Ọtiọyena, evwata na ‘rẹ Jihova dia Ọghẹnẹ kẹ’ yen aghọghọ re djunute abọ ivẹ soso na shekpahen. Wọ me je karophiyọ nẹ e si eka re se vwo se eta phia gori gori phiyọ eta rẹ Hibru re vwo sio ẹsosuọ-ọ. Ọtiọyena, ihwo ri fan eta cha nabọ jomaotọ fuẹrẹn ona rẹ ihwo rẹ Hibru vwo siẹ ine aghwanre, eriyin ji te obo ra ta nẹ ọtonphiyọ rẹ uyovwinrota na rhe, kugbe ẹkpo rẹ Baibol efa ra da ta ọkpọ rẹ eta tiọyen.

3. Efanfan rẹ ukuko na shephiyọ vẹ ekpọ rẹ Baibol efa re de vuve rẹ ebruphiyọ kẹ idibo rẹ Ọghẹnẹ. Ewene re ru phiyọ ubiota re se asher na, nẹrhẹ eta rẹ awọreta yena shephiyọ vẹ iphiẹrophiyọ ọgangan rẹ Devid vwori nẹ Jihova de sivwin ẹgborho rẹ Izrẹl nu, kọ kẹ ayen omavwerhovwẹn vẹ ophikparobọ. (Liv. 26:9, 10; Urhi 7:13; Une 128:1-6) Kerẹ udje, Urhi Rivẹ 28:4 da ta: “Ke bruba kẹ emamọ rẹ oma rẹ ovwan ke ji bruba kẹ emamọ rẹ otọ rẹ ovwan, kugbe emọ rẹ eranvwe rẹ ovwan, ebuo rẹ uchuru rẹ ovwan, kugbe emọ rẹ igegede rẹ ovwan.” Ẹgborho na riavwerhen rẹ ufuoma vẹ ofuvwegbe ọke rẹ ọmọ rẹ Devid re se Solomọn vwo suẹn. Erọnvwọn evo rẹ ayen riavwerhen rọyen ọke yena, ke ghwa udje rẹ ebruphiyọ ro che te avwanre obọ vwẹ otọ rẹ usuon rẹ Mesaya na.​—1 Ivie 4:20, 21; Une 72:1-20.

Re vwo kuophiyọ, ewene re ru phiyọ Une Rẹ Ejiro 144 na djobọte ẹruọ rẹ avwanre kpahen iyono rẹ Baibol na-a. Ẹkẹvuọvo, ọ nẹrhẹ iphiẹrophiyọ rẹ idibo rẹ Jihova ra vwọphia vwẹ ọsoso rẹ une yena teyenphia kẹ ihwo mrẹ. Une na shekpahen oghwọrọ rẹ irumwemwu kugbe ufuoma vẹ ofuvwegbe rẹ evwata cha riavwerhen rọyen.​—Une 37:10, 11.