1, 2. (a) Vwẹ ọke rẹ ọyinkọn Pọl, diesorọ ihwo vwọ ta ota kpahen egbomọphẹ vẹ ẹdia rẹ ọviẹn? (b) Amono yen Pọl tare nẹ ọyen sa kẹ ihwo uvi rẹ egbomọphẹ?

INENIKRISTI rẹ ọke awanre diarọ ọke rẹ ihwo rehẹ otọ rẹ usuon rẹ Rom vwọ vwẹ irhi, iguẹdjọ vẹ egbomọphẹ rayen vwọ shoma. Jẹ, ọke yena eviẹn yen usuon rẹ Rom vwọ wiowian ọgangan. Eviẹn na de rhi bun te ẹdia rẹ asan rẹ ihwo erha hepha, ọvo rayen ọviẹn. O muẹro nẹ kirobo rẹ ihwo buebun ta ota kpahen egbomọphẹ rayen ọke yena, eriyin ayen ji ta ota vwọ kpahen ẹdia rẹ ọviẹn, ji te Inenikristi dede.

² Ọyinkọn Pọl ta ota kpahen egbomọphẹ mamọ vwevunrẹ ẹbe sansan ro siri. Ẹkẹvuọvo, ọ dia ẹwẹn ro vwo wene akpọ na, rọ dia oborẹ ihwo buebun davwẹngba vwo ru ọke yena yen muro vwo si kpahen egbomọphẹ-ẹ. Ukperẹ ọ vwọ vwẹroso ewene ro che nẹ obọ rẹ ihworakpọ rhe, Pọl vẹ iniọvo ichekọ na vuẹ ihwo kpahen Uvie rẹ Ọghẹnẹ kugbe ọghanrovwẹ rẹ izobo ọtanhirhe rẹ Jesu. Pọl vuẹ iniọvo na ohwo rọ dia Esiri rẹ uvi rẹ egbomọphẹ. Kerẹ udje, vwẹ ọbe rivẹ ro si vwo rhe Inenikristi rehẹ Kọrẹnt, ọ da ta: “Ọrovwohwo  na hẹ [“ẹwẹn,” NW ] na, asan rẹ [“ẹwẹn,” NW ] rẹ Ọrovwohwo na epha, etiyin egbemọphẹ epha.”​—2 Kọr. 3:17.

3, 4. (a) Die yen Pọl ta kpahen tavwen ọ ke ta eta rehẹ 2 Kọrẹnt 3:17? (b) Die yen avwanre che ru a sa vwọ riavwerhen rẹ egbomọphẹ ro nẹ obọ rẹ Jihova cha?

³ Vwẹ ọbe rivẹ ro si vwo rhe iniọvo rehẹ Kọrẹnt, Pọl ta ota kpahen urinrin rẹ Mosis ọke ro vwo wontọ nẹ Ugbenu rẹ Sinai rhe, rọ vẹ amakashe rẹ Jihova vwọ ta ota nu. Ihwo na ghwa vwọ mrẹ Mosis, oshọ de mu ayen, ọtiọyena Mosis da vwẹ oga vwo rhurhu opharo. (Ẹyan. 34:29, 30, 33; 2 Kọr. 3:7, 13) Pọl da ta: “Ẹkẹvuọvo ọke rẹ ohwo de hirhe oma ku Ọrovwohwo na ke si oga na no.” (2 Kọr. 3:16) Die yen ota rẹ Pọl na mudiaphiyọ?

⁴ Kirobo re yonori vwẹ uyono rẹsosuọ na, Jihova rọ ma erọnvwọn eje yen vwo egbomọphẹ rọ basa-an. Ọyena kọ sa nẹrhẹ a rhọnvwe nẹ “asan rẹ [“ẹwẹn,” NW ] rẹ Ọrovwohwo na epha,” etiyin egbemọphẹ je hepha. Tavwen a ke sa mrẹ erere vwo nẹ egbomọphẹ yena rhe, kẹ avwanre ‘bru Jihova ra’ yẹrẹ nene vwo omamọ rẹ oyerinkugbe. Ọke rẹ ihwo rẹ Izrẹl vwọ hẹ aton na, ayen sa vwẹ ẹro rẹ Jihova vwo nẹ emu ji vwo no-o. Ayen ghwe vwo vrẹn nẹ Ijipt, ayen da vwẹ egbomọphẹ rayen vwo ru obo ri je ayen. Kọ ghwa họhọ nẹ a vwẹ oga yẹrẹ amwa vwo rhurhu iroro vẹ ubiudu rayen kpoi.​—Hib. 3:8-10.

5. (a) Oka rẹ egbomọphẹ vọ yen ẹwẹn rẹ Ọghẹnẹ sa nẹrhẹ ohwo vwo? (b) Mavọ yen avwanre ru riẹn nẹ ohwo re mu phiyọ uwodi ji se vwo egbomọphẹ rọ nẹ obọ rẹ Jihova rhe? (c) Enọ vọ yen a cha kpahenphiyọ?

⁵ Egbomọphẹ ro nẹ obọ rẹ Ọghẹnẹ cha, yovwin nọ egbomọphẹ ro rhe ohwo re si nẹ uwodi, kidie o che si avwanre nẹ ọviẹn vwọ kẹ umwemwu kugbe ughwu, eriyin ji te ẹga rẹ efian vẹ iyono echọchọ rayen. (Rom 6:23; 8:2) Ọyena ghini uvi rẹ egbomọphẹ! Ohwo rọhẹ evunrẹ uwodi dede je sa riavwerhen rẹ oka rẹ egbomọphẹ nana. (Jẹn. 39:20-23) Ọnana phia kẹ Oniọvo Aye Nancy Yuen vẹ Oniọvo Ọshare Harold King re mu phiyọ uwodi vwẹ ikpe buebun fikirẹ esegbuyota rayen. Wọ sa mrẹ ividio rẹ ẹriẹnmie rayen vwẹ JW Broadcasting. (Kpo ẹbẹre rẹ ẸRIẸNMIE VẸ OBORERHIẸROMRẸ > AYEN CHIRAKON.) Enẹna, e gbe ja kpahenphiyọ enọ ivẹ nana: Mavọ yen e se vwo djephia nẹ avwanre vwẹ ẹro ọghanghanre vwo ni egbomọphẹ rẹ avwanre? Mavọ yen a sa vwọ vwẹ egbomọphẹ rẹ avwanre vwo ruiruo vwẹ idjerhe rẹ aghwanre?

6. Idjerhe vọ yen ihwo rẹ Izrẹl vwo djephia nẹ ayen vwo ọdavwaro kpahen egbomọphẹ rẹ Jihova vwọ kẹ aye-en?

⁶ Avwanre da riẹn ọghanrovwẹ rẹ okẹ ra kẹ avwanre, ka sa kpẹvwẹ oruẹse na. Ihwo rẹ Izrẹl sa riẹn ọghanrovwẹ rẹ egbomọphẹ rẹ Jihova vwọ kẹ ayen ọke ro vwo si ayen nẹ ẹdia rẹ ọviẹn vwẹ Ijipti-i. Emeranvwe evo vwọ wan nu, kẹ ayen brenu vwọ kpahen oborẹ Jihova vwọ ghẹrẹ ayen, kidie ayen karophiyọ emu vẹ udi ra vwọ kẹ ayen vwẹ Ijipt. Ayen da tobọ tanẹ ayen guọnọ rhivwin kpo oboyin. Di roro, ayen niro nẹ ‘iyeri, eyaọ, ikpogri, leek, ututa, vẹ igaliki’ rehẹ oboyin, yovwin nọ egbomọphẹ rẹ ayen vwọ ga Jihova odedede. Kọyensorọ Jihova vwo muophu gangan kpahen ayen. (Ukeri 11:5, 6, 10; 14:3, 4) Ọyena uvi uyono vwọ kẹ avwanre!

7. Idjerhe vọ yen Pọl vwo ru nene uchebro rọ vwọphia vwẹ 2 Kọrẹnt 6:1, kẹ mavọ yen a sa vwọ vwẹrokere?

⁷ Ọyinkọn Pọl bru Inenikristi uche  nẹ ayen vwẹ ẹro ọghanghanre vwo ni egbomọphẹ rẹ Jihova vwọ kẹ avwanre womarẹ Ọmọ rọyen Jesu Kristi. (Se 2 Kọrẹnt 6:1.) Karophiyọ nẹ ọyinkọn Pọl muomaphiyọ ọke rẹ ẹwẹn obrorhiẹn rọyen vwo kpokpo fikirẹ ẹdia rẹ ọviẹn rọ hepha vwọ kẹ umwemwu kugbe ughwu. Dedena, ọ da ta: “Me kpẹvwẹ Ọghẹnẹ fiki ri Jesu Kristi Ọrovwavwanre.” Diesorọ? Ọ da ta kẹ iniọvo na: “Kidie urhi rẹ [“ẹwẹn,” NW ] rẹ arhọ vwi Kristi Jesu rhe rhan vwẹ nẹ obọ rẹ urhi rẹ umwemwu vẹ ughwu.” (Rom 7:24, 25; 8:2) E jẹ avwanre vwẹrokere Pọl, rere a vwẹ ẹro ọghanghanre vwo ni oborẹ Jihova ruru ro vwo si avwanre nẹ ẹdia rẹ ọviẹn vwọ kẹ umwemwu kugbe ughwu. Womarẹ ọtanhirhe na, avwanre ke sa ga Ọghẹnẹ vẹ ẹwẹn obrorhiẹn ro fiotọ, ji mrẹ omavwerhovwẹn norhe.​—Une 40:8.

8, 9. (a) Orhọ-esio vọ yen ọyinkọn Pita vwọphia kpahen obo ra vwẹ egbomọphẹ vwo ruiruo wan? (b) Imuoshọ vọ yen avwanre hirharoku nonẹna?

⁸ Ofori nẹ avwanre dje ọdavwaro phia kpahen egbomọphẹ rẹ Jihova vwọ kẹ avwanre, a me je reyọ vwo ru obo ri yovwirin. Ọyinkọn Pita si avwanre orhọ nẹ, e ja vwẹ egbomọphẹ rẹ avwanre vwo ruẹ obo re brare-e. (Se 1 Pita 2:16.) Orhọ-esio yena nẹrhẹ a karophiyọ obo re phia kẹ ihwo rẹ Izrẹl ọke rẹ ayen vwọ hẹ aton. Avwanre je guọnọ oka rẹ orhọ-esio tiọyen, kidie obo re phia kẹ ayen na je sa phia kẹ avwanre. Eshu vẹ akpọ rọyen na choma rẹ ayen vwọ vwẹ osẹnvwe vẹ irhuon, emu vẹ udi, kugbe ehẹha vẹ erọnvwọn efa ri siẹ ohwo urhurhu, vwọ riẹriẹ avwanre. Ikọpini sansan vwẹ ihwo ri vwo erhuvwu vwọ kpare urhurusivwe rẹ avwanre vwọ kpahen ekuakua ri ghwe fiemu-u rẹ ayen shẹ. E rhe nomaso-o, ọyena sa nẹrhẹ a vwẹ egbomọphẹ rẹ avwanre vwo ru obo ri je fo!

⁹ Orhọ-esio rẹ Pita na ji shekpahen erọnvwọn efa re pha ghanghanre vwẹ akpeyeren rẹ ohwo, kerẹ ojẹ rẹ avwanre kpahen ẹbe eyono yẹrẹ iruo. Kerẹ udje, ighene buebun hirharoku ọnyẹ rẹ ayen vwo muomaphiyọ ẹbe ese rere ayen se vwo kpo isikuru ride. A vuẹ ayen nẹ isikuru ride cha nẹrhẹ ayen vwo omamọ iruo ra da hwa okposa kẹ ohwo. E ji dje ikekeri kẹ ayen, ra da vwẹ uche ihwo ri kpo isikuru ride vẹ obo ra hwa kẹ ayen vwọ vwanvwe ihwo re rare-e. Ọ lọhọre mamọ rẹ ighene vwo rhiabọreyọ obo re jiri kẹ ayen, kidie orhiẹn rẹ ayen che bru na che djobọte akpeyeren rayen. Ẹkẹvuọvo, die yen ofori nẹ ayen vẹ esẹ vẹ ini rayen karophiyọ?

10. Die yen ofori nẹ a kọn phiyọ ẹwẹn ọke ra da jẹ ojẹ romobọ?

¹⁰ Ihwo evo se roro nẹ ayen se ru oborẹ ayen guọnọre kidie ojẹ rayen te ihwo efa-a, takpe nẹ o shephiyọ vẹ ẹwẹn obrorhiẹn rayen. Ọ sa dianẹ ayen mu ẹwẹn kpahen ota nana rẹ Pọl ta kẹ Inenikristi rehẹ Kọrẹnt kpahen emuọre: “Die sorọ rẹ egbemọphẹ ri mi vwori rha dia obo rẹ ohwo ọfa wrẹn kpahe?” (1 Kọr. 10:29) Ghini uyota nẹ ohwo vuọvo yen cha jẹ ojẹ ro shekpahen iruo vẹ ẹbe eyono, jẹ ofori nẹ a karophiyọ nẹ o vwo asan rẹ egbomọphẹ rẹ avwanre bare. Vwọba, orhiẹn rẹ avwanre sa ghwa erhuvwu yẹrẹ umiovwo rhe. Ọnana yen sorọ rẹ Pọl vwọ vwẹ eta nana vwọ ton ota rọyen phiyọ: “Emu na ejobi wan urhi, ẹkẹvuọvo emu na ejobi fori-i. Emu na ejobi wan urhi, ẹkẹvuọvo emu na sa vwẹ ẹruọ kẹ ohwo-o.” (1 Kọr. 10:23) Ọyena chọn avwanre uko vwọ mrẹvughe nẹ ọ dia ọdavwẹ rẹ avwanre yen e che phi  phiyọ ẹdia rẹsosuọ siẹrẹ a da jẹ ojẹ romobọ-ọ.

11. Diesorọ Jihova vwo si avwanre nẹ ẹdia rẹ ọviẹn?

¹¹ Ọke rẹ Pita vwo si avwanre orhọ nẹ a vwẹ egbomọphẹ rẹ avwanre vwo ruẹ obo re chọre-e, ọ da je ta obo re che vwo ruiruo wan. Ọ vwẹ uchebro kẹ avwanre nẹ a reyọ vwo ruiruo “kerẹ idibo rẹ Ọghẹnẹ.” Ọyena gbare, kidie Jihova vwẹ Jesu vwo si avwanre nẹ ẹdia rẹ ọviẹn vwọ kẹ urhi rẹ umwemwu kugbe ughwu rere a sa vwọ vwomakpahotọ kẹ, ji yeren akpọ “kerẹ idibo rẹ Ọghẹnẹ.”

12. Udje vọ yen Noa vẹ orua rọyen phi phiyotọ kẹ avwanre?

¹² Idjerhe ro me yovwin ra sa vwọ reyọ egbomọphẹ rẹ avwanre vwo ru obo ri shephiyọ rere e vwo jẹ eviẹn ẹdia vwọ kẹ ojevwe rẹ akpọ na, ọyen ra vwọ vwẹ ọke vẹ ẹgba rẹ avwanre vwọ ga Jihova. (Gal. 5:16) Roro kpahen udje rẹ Noa vẹ orua rọyen. Ayen rhọnvwe vwẹrokere evwọfanrhiẹn vẹ inogbozighi re riariẹ ayen phiyọ-ọ. Die yen chọn ayen uko? Ayen nabọ muomaphiyọ iruo rẹ Jihova vwọ kẹ ayen, ro churobọ si okọ ẹkarọ kugbe ekoko rẹ emuọre rẹ ayen vẹ eranvwe na cha re, ayen de ji si ihwo orhọ kpahen Oghwe na. “Noa de ru ọna; o de ru emu ejobi rẹ Ọghẹnẹ dje kẹ nẹ o ru.” (Jẹn. 6:22) Ukuotọ rọyen, Noa vẹ orua rọyen de sivwinrhọ.​—Hib. 11:7.

13. Iruo vọ yen Jihova vwọ kẹ avwanre womarẹ Jesu?

¹³ Iruo vọ yen Jihova vwọ kẹ avwanre nonẹna? Kerẹ idibo rẹ Jesu, avwanre riẹnre nẹ ọ vuẹ avwanre nẹ e ghwoghwo ota kẹ ihwo. (Se Luk 4:18, 19.) Nonẹna, Idẹbono rhuẹro rẹ ihwo buebun, ayen tobọ riẹn nẹ ayen eviẹn vwọ kẹ ẹga rẹ efian, ẹvwọtua rẹ ekuakua rẹ akpeyeren, kugbe usuon rẹ akpọ na-a. (2 Kọr. 4:4) Avwanre vwo okpuphẹn ra vwọ vwẹrokere Jesu vwọ chọn ihwo uko vwọ riẹn Jihova rọ dia Ọghẹnẹ rẹ egbomọphẹ, ji vwẹ ẹga vwọ kẹ. (Mat. 28:19, 20) Iruo nana ghwa lọhọ-ọ, ọ vọnre vẹ egbabọse  buebun. Vwẹ ẹkuotọ evo, ihwo rhọnvwa kerhọ-ọ, evo tobọ djoma. Ọtiọyena, e jẹ avwanre ohwo vuọvo nọ oma rọyen onọ nana: ‘Me sa vwẹ egbomọphẹ mẹ vwọ nabọ bicha iruo rẹ Uvie na?’

14, 15. Oka rẹ ẹwẹn vo yen idibo rẹ Jihova vwo ruiruo rẹ aghwoghwo na? (Ni uhoho rẹsosuọ na.)

¹⁴ Ọ vwerhoma ra vwọ mrẹ idibo rẹ Ọghẹnẹ buebun ri ruẹ akpeyeren rayen lọhọ rere ayen sa vwọ ga kerẹ ekobaro. (1 Kọr. 9:19, 23) Evo ga kerẹ ekobaro vwẹ ukoko rayen, efa kpo asan ra da ma guọnọ ukẹcha. Iyẹnrẹn djerephia nẹ, ihwo re vrẹ 250,000 yen ton iruo rẹ ọkobaro phiyọ vwẹ uvwre rẹ ẹgbukpe iyorin rẹ wanvrẹ na. Ọtiọyena, ekobaro ọkieje re herọ asaọkiephana vrẹ 1,100,000. Ọnana djerephia nẹ ihwo buebun vwẹ egbomọphẹ rayen vwọ ga Jihova vwẹ idjerhe rẹ aghwanre!​—Une 110:3.

¹⁵ Die yen chọn iniọvo nana uko vwọ vwẹ egbomọphẹ rayen vwo ruiruo vwẹ idjerhe rẹ aghwanre? Jẹ a fuẹrẹn udje rẹ John vẹ Judith. Vwẹ uvwre rẹ ẹgbukpe 30 rhire na yen ayen vwọ ga vwẹ ẹkuotọ sansan. Ayen karophiyọ nẹ ọke ra vwọ vwẹ Isikuru rẹ Ekobaro na vwo mu vwẹ ukpe rẹ 1977, ukoko na nabọ kanrunumu uphẹn re vwo kpo asan ra da ma guọnọ ukẹcha. John tare nẹ ọyen wene iruo abọ buebun rere o se vwo yeren akpọ ọlọlọhọ, ji mu ẹwẹn phiyọ obo rọ tẹnrovi. Ukuotọ rọyen, ayen da kpare oma kpo ẹkuotọ ọrhorha ọvo. Jihova da je kpahenphiyọ ẹrhovwo rayen rọ vwọ chọn ayen uko vwo yono ephẹrẹ kpokpọ, ji wene akpeyeren rayen vwo nene aruọke vẹ ẹkuruemu rẹ asan na. Mavọ yen ikpe rẹ ayen ghwọrọ vwẹ oboyin na djobọte ayen wan? John da ta: “Oma vwerhen ovwẹ nẹ mi muomaphiyọ iruo ro me yovwin kparobọ vwẹ akpọ na, ke me rhe mrẹvughe nẹ Jihova ghini ọse mẹ. Kẹsiẹna me ke riẹn oborẹ Jems 4:8 mudiaphiyọ: ‘Si kẹrẹ Ọghẹnẹ, rere o si kẹre owẹ.’ Ke me ghwa riẹn nẹ akpọ rẹ omavwerhovwẹn ro si vwe urhuru na, te vwe obọ re.”

16. Mavọ yen ihwo uriorin buebun vwọ vwẹ egbomọphẹ rayen vwo ruiruo vwẹ idjerhe rẹ aghwanre?

¹⁶ Vwọ fẹnẹ John vẹ Judith, ihwo buebun vwo uphẹn rẹ ayen vwo ruiruo rẹ ẹga rẹ ọkieje na vwẹ ọke grongro-on. Dedena, buebun rayen vwobọ vwẹ iruo rẹ ebabọn rẹ ukoko na ruẹ vwẹ akpọneje. Kerẹ udje, iniọvo ri te omarẹ 27,000 yen vwomakpahotọ ọke ra vwọ bọn esiri rẹ ukoko rọhẹ Warwick, New York. Evo vwomakpahotọ vwọ wian vwẹ udughwrẹn ivẹ, efa wian te omarẹ ẹgbukpe ọvo yẹrẹ tobọ vrẹ ọtiọyen dede. Buebun rẹ iniọvo na vwẹ erọnvwọn buebun vwo ze, rere ayen se vwo vwobọ vwẹ iruo na. Ayen omamọ rẹ udje rẹ ihwo re vwẹ egbomọphẹ rayen vwo jiri ji brọghọ phiyọ Jihova oma, rọ dia Ọghẹnẹ rẹ egbomọphẹ!

17. Iphiẹrophiyọ vọ yen herọ vwọ kẹ ihwo ri vwẹ egbomọphẹ rayen vwo ruiruo vwẹ idjerhe rẹ aghwanre?

¹⁷ Ọ vwerhoma nẹ avwanre riẹn Jihova, avwanre je riavwerhen rẹ egbomọphẹ rẹ ẹga rẹ uyota ghwa cha. E jẹ avwanre brorhiẹn ro che djephia nẹ avwanre riẹn ọghanrovwẹ rẹ egbomọphẹ ro rhe avwanre na. E jẹ a reyọ vwọ ga Jihova vọnvọn ukperẹ a vwọ reyọ vwo ru obo ri je fo. E de ru ọtiọyen, ke se vwo iphiẹrophiyọ ra vwọ riavwerhen rẹ ebruphiyọ rẹ Jihova veri womarẹ aroẹmrẹ nana: “A cha rhan emama na nẹ ọviẹn vẹ egbo ko che vwo urinrin rẹ egbemọphẹ rẹ emọ rẹ Ọghẹnẹ.”​—Rom 8:21.