Diesorọ Jesu vwọ vwanriẹn eta rẹ Devid tare vwẹ Une Rẹ Ejiro 22:1 ọmọke krẹn tavwen o ki ghwu?

Ọvo usun rẹ eta rẹ Jesu tare o ki ghwu, e siro phiyọ Matiu 27:46: “Ọghẹnẹ mẹ, Ọghẹnẹ mẹ, die jabọ wọ vwọ sen vwẹ?” Womarẹ eta nana, Jesu de ru orugba rẹ eta rẹ ọbuine Devid tare vwẹ Une 22:1. (Mak 15:34) Ọ chọre siẹrẹ e de roro nẹ Jesu ta eta yena kidie nẹ esegbuyota rọyen doghori yẹrẹ kidie nẹ o rorori nẹ Jihova kuro phiyotọ. Jesu riẹn oboresorọ o vwo fo nẹ o ghwu, o ji muegbe ro vwo ru ọtiọyen. (Mat. 16:21; 20:28) Ọ je riẹn nẹ ọke ro che vwo ghwu na de te, Jihova rha cha “gba ogba yariẹ” phiyọ-ọ. (Job 1:10) Ọtiọyena, Jihova da vwẹ uphẹn kẹ Jesu nẹ o dje evun-ẹfuọn rọyen phia, o toro obo ro che ghwu wa-an.—Mak 14:35, 36.

Diesorọ Jesu vwọ ta eta rehẹ Une Rẹ Ejiro nana? Avwanre ghwa riẹ-ẹn, ẹkẹvuọvo a cha ta ota kpahen erọnvwọn evo re sa suọ. *

Ọ sa dianẹ Jesu ta eta nana vwo djephia nẹ Jihova cha chochọn rọyen nẹ ughwu-u. Jesu cha hwosa rẹ ọtanhirhe na ababọ rẹ ukẹcha ri Jihova. Ohworakpọ yen o ru, ofori nẹ o ghwu rere “ọ sa vwọ davwe ughwu kẹ ohwo kohwo.”—Hib. 2:9.

Ọ sa dianẹ Jesu vwanriẹn eta evo rehẹ une rẹ ejiro yena rere ihwo vwo mu ẹwẹn kpahen ọsoso rẹ une yena. Vwẹ ọke yena, ihwo ri Ju riẹn une rẹ ejiro buebun kuyovwin. E de ghwe djunute owọrota ọvo vwẹ  une rẹ ejiro ọvo, kẹ ayen ghwa karophiyọ ọsoso rẹ une yena. Ọ da dianẹ ọnana yen ọdavwẹ ri Jesu, kọyen ọ nẹrhẹ idibo rọyen re dia ihwo ri Ju karophiyo aroẹmrẹ buebun rehẹ une yena, ri shekpahen obo re cha phia vwẹ ọke rẹ ughwu rọyen. (Une 22:7, 8, 15, 16, 18, 24) Vwọba, e jiri Jihova ji djisẹ rọyen kerẹ Ovie rẹ akpọ na eje vwẹ awọreta re vwo ku une yena phiyotọ.—Une 22:27-31.

Jesu vwọ vwanriẹn eta ri Devid na, ko mudiaphiyọ nẹ e shenyẹ ekueku? Tavwen Jesu ki ghwu, aguare rẹ ihwo ri Ju brorhiẹn rẹ eku hwe nẹ ọ ta eta rẹ ẹgua. (Mat. 26:65, 66) Ayen siomakoko kpakpata vwẹ ason, vwo gun ẹdjọ na vwẹ idjerhe ro nene urhi-i. (Mat. 26:59; Mak 14:56-59) Ọ sa dianẹ Jesu nọre nẹ, “Ọghẹnẹ mẹ, Ọghẹnẹ mẹ, die jabọ wọ vwọ sen vwẹ?” rere ihwo vwọ riẹn nẹ o ru emu vuọvo e ki hwe na-a.

Ọ sa dianẹ Jesu guọnọ karophiyọ ihwo na nẹ dede nẹ Devid rioja, ọ dia ọyena ko mudiaphiyọ nẹ o rhe vwo aroesiri ri Jihova-a. Ọ dia jẹ esegbuyota evwo yen nẹrhẹ Devid nọ onọ yena-a. Rọ vwọ nọ onọ yena nu, ọ da tanẹ ọyen vwẹroso Jihova nẹ o che sivwin ihwo rọyen, Jihova je vwẹ ọkieje vwo bruba kẹ. (Une 22:23, 24, 27) Vwẹ idjerhe vuọvo na, dede nẹ Jesu rọ dia “Ọmọ ri Devid” rioja vwẹ urhe rẹ oja, ọ dia ọyen o vwo mudiaphiyọ nẹ o rhe vwo aroesiri ri Jihova-a.—Mat. 21:9.

Ọ sa dianẹ Jesu ta eta nana fikirẹ odjadja ro rhiẹromrẹ kidie nẹ Jihova si ochọnvwe rọyen reyọ rere o se vwo dje ọyọnregan rọyen phia. Ọ dia ọhọre ri Jihova jovwo rẹ Ọmọ rọyen vwọ rioja ji ghwu-u. O brorhiẹn nana ọke rẹ Adam vẹ Ivi vwo gbevwọsuọ nu. Jesu ru emuọvo rọ chọre-e, ẹkẹvuọvo ofori nẹ ọ rioja ji ghwu rere ọ sa vwọ kpahenphiyọ ẹnọ rẹ Eshu nọre je tan ihworakpọ hirhe. (Mak 8:31; 1 Pita 2:21-24) Jihova che si ochọnvwe rọyen reyọ vwẹ obọrẹsosuọ vwẹ akpeyeren ri Jesu, tavwen ọnana ki se rugba.

Ọ sa dianẹ Jesu guọnọ chọn idibọ rọyen uko vwọ tẹnrovi oboresorọ Jihova vwọ vwẹ uphẹn kẹ nẹ o ghwu vwẹ urhe rẹ oja. * Jesu riẹnre nẹ ughwu ro che ghwu vwẹ urhe rẹ oja kerẹ ohwo rọ churhi na, cha so ikprowọ kẹ ihwo buebun. (1 Kọr. 1:23) Idibo rọyen da tẹnrovi oboresorọ o vwo ghwu, kẹ ayen che vwo ẹruọ rẹ oborẹ ughwu rọyen mudiaphiyọ. (Gal. 3:13, 14) Kẹ ayen cha riẹn nẹ Osivwin yen o ruẹ, ọ dia oji-i.

O toro obo ri mu Jesu vwọ ta eta nana-a, ọ riẹnre nẹ ọyen ọhọre ri Jihova ro vwo ghwu vwẹ urhe rẹ oja na. Ọmọke krẹn rẹ Jesu vwọ vwanriẹn eta rẹ une nana nu, Ọ da ta: “O reri!” (Jọn 19:30; Luk 22:37) Kidie nẹ Jihova si ochọnvwe rọyen reyọ vwẹ ọmọke, ọ da nẹrhẹ Jesu se ruiruo eje ro muro rhe otọrakpọ na. Ọ je nẹrhẹ o se ru orugba rẹ obo ra mraro rọyen kpahọn “vwẹ evun rẹ Urhi ri Mosis kugbe Emraro na vẹ Ine rẹ Ejiro.”—Luk 24:44.