Vwẹ ẹdia ọtiọyena, iniọvo rehẹ ukoko na che no nẹ orọnvwe ri jovwo na vwoba vwẹ ọke rẹ ọshare na vwọ rhoma rọvwọn nu, ayen ji che no nẹ orọnvwe kpokpọ na ji nene urhi. A vwọ nabọ vwo ẹruọ rẹ oboresorọ ọ vwọ dia ọtiọyen, gbe jẹ a fuẹrẹn oborẹ Jesu ta kpahen orọnvwe ẹfan kugbe ẹrhoma rọvwọn.

Kirobo ra niyẹnrẹn rọyen phiyọ Matiu 19:9, Jesu djunute emuọvo kiriguo rẹ Baibol na rhọnvwephiyọ ro se mu ohwo vwọ fan orọnvwe. Ọ da ta: “kohwo kohwo ro siobọ nẹ ayen rọye, jokpa nẹ ko gbe ọfanrhiẹ, rẹ ọ da reyọ ọfa, yo gbe igberadja.” Vwo nẹ eta ri Jesu na rhe, e yonori nẹ, (1) ọfanrhiẹn ọvo yen sa nẹrhẹ a fan orọnvwe (2) ọshare rọ fan orọnvwe jẹ ọ dianẹ kẹ aye na gbe ọfanrhiẹn rhurho-o, ọ da ra rọvwọn ohwo ọfa jẹ o gbe igberadja. *

Kọyen Jesu vuẹ avwanre na nẹ Baibol na rhọnvwephiyọ nẹ ohwo ro gbe igberadja ọ da fan orọnvwe rọyen vwo ugbomọphẹ rọ vwọ rhoma rọvwọn? Ọ ghwa dia ọtiọye-en. Ọshare de gbe igberadja rhurhu aye rọyen, aye na yen che brorhiẹn sẹ ọyen che vwo ghovwo ọshare na. Ọ da sen ọshare na, ayen da je fan orọnvwe na vwo nene urhi, kọyen ota herọ siẹrẹ ayen ihwo ivẹ na da rhoma rọvwọ-ọn.

Ẹkẹvuọvo, aye na se vwo owenvwe rọ vwọ reyọ vwo ghovwo ọshare na rere orọnvwe na vwo jẹ ẹfan. Kẹ ọ da rha dianẹ ọshare ro gbe igberadja na guọnọ fan orọnvwe na kidie nẹ ọ sen evwoghovwo rẹ aye na vwo? Kidie nẹ aye na vwo owenvwe rọ vwọ reyọ vwo ghovwo ọshare na rere orọnvwe na vwo jẹ ẹfan, vwo nene odjekẹ ri Baibol na, ọshare na rhe vwo ugbomọphẹ rọ vwọ rhoma rọvwọ-ọn. Ọ da dianẹ ọshare na je gbaudu vwọso odjekẹ ri Baibol na ra rọvwọn ohwo ọfa, kọyen ọ rhoma gbe igberadja vwẹ obọ ọfa re, ọnana sa nẹrhẹ a rhoma vwẹ umẹ rẹ ẹdjọeguo vwo mu kẹ.—1 Kọr. 5:1, 2; 6:9, 10.

Siẹrẹ ọshare ro vwo ugbomọphẹ rọ vwọ rhoma rọvwọ-ọn da rọvwọn, ẹro vọ yen iniọvo rehẹ ukoko na che vwo ni orọnvwe ri jovwo na vẹ ọkpokpọ na? Vwo nene odjekẹ ri Baibol na, orọnvwe ri jovwo na je herọ? Aye na ji se brorhiẹn sẹ ọyen che vwo ghovwo ọshare rọyen ri jovwo na? Iniọvo rehẹ ukoko na cha vwẹ ẹro rẹ igberadja vwo ni orọnvwe kpokpọ na?

Vwẹ obuko jovwo, iniọvo rehẹ ukoko na nẹ orọnvwe ọkpokpọ na kerẹ ọ rẹ igberadja ọ da dianẹ aye na je hẹ akpọ yerẹn ọ je rhe rọvwọ-ọn yẹrẹ kẹ o gbe igberadja-a. Ẹkẹvuọvo, Jesu djunute ọ re gbe igberadja rhurhu na rọ vwọ ta ota rẹ orọnvwe ẹfan vẹ ẹrhoma rọvwọn na-a. Ukperẹ ọtiọyen, o djere fiotọ nẹ ọshare rọ fan orọnvwe rọyen je gbaudu vwọso odjekẹ ri Baibol na ra rọvwọn ohwo ọfa, o gbe igberadja. Vwẹ ẹdia ọtiọyena, orọnvwe rọ fanre na vẹ ẹrhoma rọvwọn na rẹ Jesu reyọ vwo dje igberadja egbe na, yen phioba phiyọ orọnvwe ri jovwo na.

Ohwo da fan orọnvwe je rhoma rọvwọn ohwo ọfa, uphẹn rẹ ọ re gbeku na vwọ reyọ vwo ghovwo  ọ ro gbe igberadja na rha herọ-ọ. Ọtiọyena, ẹwẹn rọyen rhe che kpokpo sẹ ọyen vwo ghovwo ọshare rọyen ri jovwo na-a. Vwọba, o rhe toro sẹ ọ re gbeku na ghwuru yẹrẹ ọ rhoma rọvwọn yẹrẹ ko gbe igberadja-a, oka rẹ ẹro rẹ ihwo rehẹ ukoko na vwo nẹ orọnvwe kpokpọ na yen ayen ji che vwo no. *

Vwẹ udje re vwo ruiruo vwẹ obenu na, ọshare na yen gbe igberadja rọ nẹrhẹ a fan orọnvwe na. Kẹ, ọ da rha dianẹ ọshare na gbe igberadja-a, jẹ ọ fan orọnvwe na ra rọvwọn ohwo ọfa vwo? Yẹrẹ kọ da je dianẹ ọshare na gbe igberadja tavwen ọ ke fan orọnvwe na-a, ẹkẹvuọvo ọ fan orọnvwe na nu tavwen o ki re gbe ọfanrhiẹn na je ra rọvwọn ohwo ọfa dede nẹ aye na ro gbeku na ji vwo owenvwe rọ vwọ reyọ vwo ghovwo vwo? Vwẹ idje nana eje re djunute na, orọnvwe ra fanre na kugbe ẹrhoma rọvwọn na rọ dia orọnvwe rẹ igberadja na, phioba phiyọ orọnvwe ri jovwo na. Orọnvwe kpokpọ na ọyen orọnvwe re ru nene urhi. Kirobo rẹ Uwevwin Orhẹrẹ ri November 15, 1979 aruọbe 32 tare, “ọshare na rọvwọn ohwo ọfa re, ọtiọyena, o rhe che se phioba phiyọ orọnvwe kpokpọ na-a rere o se vwo rhivwin bru aye rọyen ri jovwo na ra-a; orọnvwe ri jovwo na vwoba re kidie a fanrọ re, ọvo vwẹ usun rayen gbe igberadja je rhoma rọvwọn re.”

Ọ dia ewene kpokpọ nana mudiaphiyọ nẹ a vwẹ ẹro okueku vwo nẹ ọrhuẹrẹphiyotọ rẹ orọnvwe yẹrẹ vwẹ ẹro ri phovwin vwo ni igberadja egbe-e. A cha vwẹ umẹ rẹ ẹdjọeguo vwo mu vwọ kẹ ọshare rọ fan orọnvwe rọyen je gbaudu vwọso odjekẹ ri Baibol na ra rọvwọn ohwo ọfa. (Aye rọ rhoma rọvwọn na da dia Oseri ri Jihova, kẹ a je cha vwẹ umẹ rẹ ẹdjọeguo vwo mu vwọ kẹ kidie o gbe igberadja.) Dede nẹ a cha vwẹ ẹro rẹ igberadja vwo ni orọnvwe kpokpọ na-a, jẹ ọ dia ọyen ọ vwọ dia ọ ro nene odjekẹ ri Baibol na-a, vwẹ ikpe buebun, ọshare ọtiọyena che se muwan vwọ kẹ uphẹn rẹ ẹga vwẹ ukoko na-a, rhi vwo duvwun ọke rẹ odju rẹ obo ro ruru na vwo dju fọ. Tavwen ọshare ọtiọyena ki muwan vwọ kẹ uphẹn rẹ ẹga vwẹ ukoko na, ofori nẹ ekpako na fuẹrẹn ẹdia rẹ aye re gbeku na hepha vwẹ ọke yena, ọ da dianẹ ọ ro gbe igberadja na djẹ jẹ emọ vwo vwẹ ọke rọ vwọ fan orọnvwe na, o ji fo nẹ ekpako na je fuẹrẹn ẹdia rẹ emọ na hepha vwẹ ọke yena.—Mal. 2:14-16.

Fikirẹ obo ri se nẹ obuko rọyen cha siẹrẹ ohwo da fan orọnvwe vwẹ idjerhe rọ vwọso odjekẹ ri Baibol je rọvwọn ohwo ofa, e jẹ Inenikristi brorhiẹn aghwanre rẹ ayen vwọ vwẹrokere Jihova ji nẹ orọnvwe ghanghanre kirobo ro niro.—Aghwo. 5:4, 5; Hib. 13:4.