OBA rẹ November 1932 yen a hepha vwẹ Mexico City. Udughwrẹn rọ wanre na, yen e phi irhukpẹ rẹ itrafiki phiyọ idjerhe rẹ orere rode nana rọ vọnre vẹ ihwo re vrẹ oduduru ọvo. Jẹ, ọnana rha dia iyẹnrẹn kpokpọ-ọ. Enẹna, ihwo ri niyẹnrẹn vwẹ orere na, tẹnrovi obo re cha phia vwẹ udughwrẹn nana. Ayen mu ikamẹra kpo asan rẹ itreni de won, rẹ ayen vwọ hẹrhẹ ọrhorha oghẹresan ọvo. Ọrhorha na yen Joseph F. Rutherford, rọ dia ochidiagbara rẹ Watch Tower Society. Iniọvo re dia orere na, je nabọ choma rhe, rẹ ayen che vwo dede Oniọvo Rutherford ro bru ayen cha, fikirẹ ọghwẹkoko rẹ ẹdẹ erha re che ru vwẹ ẹkuotọ na.

Imagazini re se The Golden Age da ta: “O muẹro dẹn nẹ ọghwẹkoko nana cha sa chọrọ ihwo ẹro-o, kidie o che toroba etito rẹ Uyota na vwẹ ẹkuotọ rẹ Mexico.” Ẹkẹvuọvo, die yen nẹrhẹ e titi ọghwẹkoko nana rẹ omarẹ ihwo 150 ọvo cha ra?

Tavwen e ki ru ọghwẹkoko yena, imihwo krẹn yen dje uvi omavwerhovwẹn phia kpahen iruo rẹ Uvie na. Rhanvwẹ 1919 yen e vwo ruẹ emẹvwa itete vwẹ Mexico, jẹ ọke vwọ yanran na, unu rẹ ikoko na da rhoma kpotọ. A vwọ vwẹ Oghọn ukoko vwo mu vwẹ Mexico City ukpe rẹ 1929, ke rhi vwo ẹwẹn nẹ ekuakua che shephiyọ. Ẹkẹvuọvo, ebẹnbẹn evo da vwomaphia. Ukoko na vwọ tanẹ ekobaro na rha vwẹ iruo romobọ rayen vwọba aghwoghwo na-a, ophu de mu ọkobaro ọkieje ọvo, kọ dobọ rẹ ẹga na ji, ọ da vwẹ ẹko romobọ rọyen vwo mu. Vwọba, oniruo rẹ oghọn ukoko rẹ Mexico de ru obo re vwọso urhi Ọghẹnẹ, a da vwẹ oniọvo ọfa vwo wene. Idibo rẹ Ọghẹnẹ ri fuevun vwẹ Mexico, ghene guọnọ obicha ọke yena.

Oniọvo Rutherford nabọ phiuduphiyọ iniọvo na awọ, womarẹ eta ivẹ rọ vwọphia vwẹ ọghwẹkoko na, kugbe ota rotu iyorin rọ vwọphia vwẹ iredio. Ọyena yen obọ rẹsosuọ ra vwọ vwẹ iredio vwo ghwoghwo iyẹnrẹn esiri na vwẹ Mexico. E vwo ru ọghwẹkoko na nu, ka rhe vwẹ oniruo oghọn ukoko kpokpọ vwo mu rere ọ vwẹrote iruo na vwẹ ẹkuotọ rẹ Mexico. Jihova je chọn iniọvo ri vwo oruru uko, vwo ruiruo na sasasa vẹ uduefiogbere.

Eghwẹkoko ivẹ yen e ruru vwẹ ẹkuotọ na vwẹ ukpe rọ vwọ kpahọn. E ru ọvo vwẹ orere rẹ Veracruz rẹ ikuna de duvwun, e de rhe ru ọ ro chekọ na vwẹ Mexico City. Ẹgbaẹdavwọn rẹ iniọvo na da nẹrhẹ a rhe mrẹ omamọ rẹ iyẹnrẹn. Ighwoghwota 82 yen herọ vwẹ 1931. Ẹgbukpe ihwe vwọ wan nu, unu rẹ ighwoghwota na da vwẹ ọhwọhwọ ihwe vwo bun vrẹ ọtiọyen. Omarẹ ihwo 1000 yen rhe osikoko re ruru vwẹ ukpe rẹ 1941.

Vwẹ 1943, Iseri na mu ephapha vwọ djẹ egbada, rẹ ayen vwo durhie ihwo vwọ kẹ Osikoko rẹ “Free Nation’s” re ruru vwẹ irere 12 vwẹ  Mexico. * Iniọvo na vwẹ ifi vwo churu ephapha na ivivẹ si ohwohwo, rere e se ku ayen phiyọ igabọ, te obaro te obuko yen e si eta rẹ edurhie na phiyọ. Rhanvwe ukpe rẹ 1936 yen ukoko na ton oka rẹ edurhie nana phiyọ.

Imagazini re se La Nación vwọ ta ota kpahen erhuvwu ra mrẹ nẹ egbada-ẹdjẹ re ruru vwẹ Mexico City, ọ da ta: “Vwẹ ẹdẹ rẹsosuọ rẹ osikoko na, a da vuẹ Iseri na nẹ ayen durhie ihwo buebun rhe. Vwẹ ẹdẹ rọ vwọ kpahọn, otọ rẹ ọsikoko na da vọn chekọ.” Ivun de miovwo ihwo re kpo Ẹga rẹ Ifada, kẹ ayen davwẹngba rẹ ayen vwọ gbowọ phiyọ ẹgbada-ẹdjẹ na. Dede nẹ a vwọso ayen, iniọvo na djoshọ-ọ, ayen je ro irhuvwun na ghene. Imagazini na da je ta: “Orere na eje mrẹ ayen . . . te eshare te eya ri ku ‘ephapha re edurhie’ phiyọ.” E phi ihoho rẹ iniọvo sansan ri durhie ihwo vwẹ irhuvwun rẹ Mexico City phiyọ ọbe rẹ iyẹnrẹn na. E de si eta nana phiyọ obotọ rẹ ihoho na: “Ayen tue ro irhuvwun na.”

Iniọvo na vwẹ ekuakua buebun vwo ze tavwen ayen ki se kpo eghwẹkoko ibro re ruru vwẹ Mexico ọke yena. Emeko ri sherabọ rẹ itreni se te-e, yen buebun rẹ iniọvo na nu rhe, asan rẹ idjerhe hepha-a. Fikirẹ ọtiọyena, ihwo na ghwọrọ ẹdẹ evo vwọ yẹrẹ ro ekẹkẹtẹ kpo asan rẹ ayen da sa ro itreni ro che muẹ ayen kpo ọghwẹkoko na.

Buebun rayen igbere, ẹgbẹgba yen ayen sa vwọ tobọ hwosa rẹ omaẹfan te ọghwẹkoko na. Ọtiọyena, buebun rayen de nene iniọvo re dia kẹrẹ otọ rẹ ọghwẹkoko na dia uwevwin. I ri chekọ de sherhẹn Eguan Ruvie. O vwo ọkiọvo rẹ ihwo re te 90 vwọ dia oghọn ukoko na. Ayen da vwẹ “ikatọni 20 vwọ hwa otọ sherhẹn.” Yearbook na de dje nẹ, oma vwerhen erhorha na mamọ te ẹdia rẹ ayen vwọ tanẹ ayen sherhẹn “ehwa re lọhọ ji yovwin nọ otọ fefe.”

Iniọvo na niro nẹ aghọghọ rẹ ayen mrẹ vwo nẹ isikoko rẹ ayen rare na, ghanre vrẹ oborẹ ayen vwo ze. Ẹwẹn tiọyena yen ji rhe ighwoghwota rehẹ Mexico nonẹna, ri joma te oduduru ọvo re. * Vwẹ iyẹnrẹn ọvo ro nẹ oghọn ukoko rẹ Mexico rhe vwẹ 1949, a da ta: “Ọke ọgangan rẹ iniọvo na rhiẹromrẹ, nama nẹrhẹ oruru rayen shekpotọ-ọ, kiridie kọke kọke re de ruẹ ọghwẹkoko, ayen nabọ gbikun rẹ omavwerhovwẹn rẹ ayen mrẹ no rhe vwẹ ọke grongron. Kọke kọke yen ayen vwọ nọ, Ọke vọ yen e che vwo kpo osikoko ọfa?” Eta yena uyota nonẹna kirobo rọ je hepha ọke yena.​—Irueru avwanre vwẹ ọke obuko vwẹ Central America.