ẸWẸN rẹ Ọghẹnẹ mu ọyinkọn Pọl vwo si kpahen iruemu irhirin rẹ ohwo ro vwo ẹwẹn ọfuanfon na dje phia. (Gal. 5:22, 23) O djisẹ rayen kerẹ ẹko ọvo; o de se ayen “omamọ rẹ [ẹwẹn ọfuanfon] na.” * Omamọ nana jẹ ẹbẹre ọvo rẹ “ohwo ọkpokpọ na.” (Kọl. 3:10) Kirobo rẹ urhe mọ siẹrẹ a da nabọ vwẹrote, ọtiọyen ohwo ji che dje iruemu rẹ omamọ rẹ ẹwẹn na phia siẹrẹ ẹwẹn ọfuafon na da wian vwẹ akpeyeren rọyen.​—Une 1:1-3.

Ẹbẹre rẹsosuọ rẹ omamọ rẹ ẹwẹn na rẹ Pọl djunute yen ẹguọnọ. Mavọ yen ẹguọnọ ghanre te? Pọl tare nẹ vrabọ rẹ ẹguọnọ, ọyen “ohwo diodi.” (1 Kọr. 13:2) Ẹkẹvuọvo die yen ẹguọnọ, kẹ mavọ yen e se vwo vwo uruemu nana, ji djephia kẹdẹ kẹdẹ?

Dede nẹ e che se djisẹ rẹ ẹguọnọ fiotọ-ọ, jẹ Baibol na nabọ ta ota kpahen obo re se vwo djephia. Kerẹ udje, ọ tare nẹ ẹguọnọ vwo “odiri kugbe aruẹdọ.” Ọ je tanẹ ẹguọnọ “ghọghọ gbe obo ri yovwiri,” o “chiri emu ejobi, o se emu ejobi gbuyota, o phiẹrohọ emu ejobi, o chirẹ emu ejobi.” Ẹguọnọ ji churobọ si, e vwo dje ọdavwẹ okokodo kẹ ihwo efa, je nabọ siẹkẹrẹ ayen. Ẹkẹvuọvo ẹguọnọ ra hẹ asa-an, iruemu kerẹ omaẹriọ, omaephuo, jodojodo, urhuru evwo, ophu kugbe ihri ẹriọ, keyen a mrẹ vwọ. Vwọ fẹnẹ erharhe rẹ iruemu yena, ẹguọnọ rẹ avwanre guọnọ vwo na, “ghwe churu obọ muẹ ọrọye ọvo-o.”​—1 Kọr. 13:4-8.

“Ọghẹnẹ hẹ ẹguọnọ.” Vwọrẹ uyota, ẹguọnọ yen obo re vwo vughe Jihova. (1 Jọn 4:8) A mrẹ ẹguọnọ rọyen womarẹ obo rọ mare kugbe obo ro ruẹ eje. O ru udje rẹ ẹguọnọ rọ ma rho kparobọ ọke ro vwo ji Jesu rhe, rhi ghwu kẹ avwanre. Ọyinkọn Jọn da ta: “Vwẹ ọnana kọye ẹguọnọ rẹ Ọghẹnẹ vwọ phia vwẹ ohri rẹ avwanre, nẹ Ọghẹnẹ ji Ọmọ rọye Ọvuọvo na rhe akpọ na, rere avwanre vwọ wan oma rọye rhọ. Ọnana hẹ ẹguọnọ, ọ dianẹ kẹ avwanre re guọnọ Ọghẹnẹ-ẹ ẹkẹvuọvo ọye re guọnọ avwanre o de ji Ọmọ rọye rhe rhe rhuẹrẹ arhuẹrẹ fiki rẹ imwemwu rẹ avwanre.” (1 Jọn 4:9, 10) Fikirẹ ẹguọnọ rẹ Ọghẹnẹ, kẹ avwanre sa mrẹ evwoghovwo, ji vwo iphiẹrophiyọ kugbe arhọ.

Jesu dje ẹguọnọ kẹ ihworakpọ womarẹ owenvwe ro djephia, ro vwo ru oborẹ Ọghẹnẹ guọnọre. Ọyinkọn Pọl de si: “[Jesu] ta nẹ, Nighe, me rhere rhi ru ọhọre wẹn. . . . Vwẹ oma rẹ ọhọre yena a wan ru avwanre fon fiki rẹ [“izobo,” NW ] ri Jesu Kristi vwẹ ugboma rọye [ze] ẹsiẹvo kẹ ihwo ejobi.” (Hib. 10:9, 10) O vwo ohworakpọ vuọvo ro se dje ẹguọnọ rọ rho vrẹ ọnana-a. Jesu da ta: “Ẹguọnọ rẹ ohwo vwori rọ rhonọ ọnana gbe herọ-ọ, rẹ ohwo da vwẹ arhọ rọye kpahe otọ kẹ igbeyan rọye.” (Jọn 15:13) Ẹkẹvuọvo, ihworakpọ ri  jẹgba sa vwẹrokere Jihova vẹ Jesu vwo dje ẹguọnọ phia? E! E jẹ a mrẹ obo re se ruo wan.

Pọl bru avwanre uche nẹ, “ovwan gba vwẹ ẹro kere Ọghẹnẹ, kerẹ emọ re ghare re wan yan vwẹ evun rẹ ẹguọnọ, kirobo ri Kristi guọnọ avwanre ro de siobọ nẹ oma rọye vwọ kẹ avwanre.” (Ẹfe. 5:1, 2) Avwanre “yan vwẹ evun rẹ ẹguọnọ” siẹrẹ e de dje uruemu nana phia vwẹ kẹdia kẹdia rẹ akpeyeren. Avwanre dje ẹguọnọ phia womarẹ uruemu, ọ ghwa dia ota rẹ unu ọvo-o. Jọn de si: “Emọ na, we vwo ẹguọnọ rẹ unu ọvo-o eyẹ unu ẹrarọ-ọ ẹkẹvuọvo ọ rẹ uruemu kugbe uyota.” (1 Jọn 3:18) Kerẹ udje, siẹrẹ a da yan vwẹ ẹguọnọ rẹ Ọghẹnẹ kugbe irivẹ avwanre, ọyena che mu avwanre vwo ghwoghwo “iyẹnrẹ esiri” rẹ Uvie na. (Mat. 24:14; Luk 10:27) A je sa yan vwẹ ẹguọnọ siẹrẹ e de vwo edirin rẹ ihwo, ru ẹse kẹ ayen, ji vwo ghovwo ayen. Kọyensorọ Baibol na vwo bru avwanre uche nẹ, “kirobo rẹ Ọrovwohwo vwo ghovwo na, eriyin we ji vwo ghovwo rhe.”​—Kọl. 3:13.

Ẹguọnọ yena fẹnẹ arodọnvwẹ ghevweghe. Kerẹ udje, ọmiọvwọ se ru kemu kemu rẹ ọmọ rayen guọnọre, rere oviẹ rẹ ọmọ na vwọ dobọji. Ẹkẹvuọvo, ọmiọvwọ ro ghini vwo ẹguọnọ rẹ ọmọ rọyen, cha nabọ reyọ ọkpọvi ro fori vwọ kẹ. Ọtiọyen Ọghẹnẹ ji hepha, dede nẹ Ọghẹnẹ hẹ ẹguọnọ, jẹ “ohwo rẹ ivun rọye vwerha Ọrovwohwo ọye ọ ghwọ kuẹ.” (Hib. 12:6) Avwanre da yan vwẹ ẹguọnọ, avwanre ke je vwẹ ọkpọvi ro fori kẹ ihwo efa. (Isẹ 3:11, 12) Jẹ, ofori nẹ avwanre karophiyọ nẹ avwanre gbare-e, avwanre ji ruẹ chọ ọkiọvo. Ọtiọyena, avwanre eje se ru yovwinphiyọ vwẹ ẹguọnọ rẹ avwanre djephia. Mavọ yen e se vwo ruo? E jẹ a fuẹrẹn idjerhe erha.

Ẹsosuọ, nokpẹn rẹ ẹwẹn ọfuanfon mie Ọghẹnẹ. Kidie ẹguọnọ, ọyen ẹbẹre ọvo rẹ omamọ rẹ ẹwẹn na. Jesu tare nẹ Jihova che siobọnu “[ẹwẹn ọfuanfon, NW ] kẹ otu re nọrọ” mie. (Luk 11:13) Avwanre da nokpẹn rẹ ewẹn ọfuanfon na, je davwẹngba vwọ “yan vwẹ evun” rọyen, ke se dje ẹguọnọ phia vrẹ obo ri jovwo. (Gal. 5:16) Kerẹ udje, wọ da dia ọkpako rẹ ukoko, wọ sa nokpẹn rẹ ẹwẹn ọfuanfon na rere ọ chọn wẹ uko vwọ nabọ vwẹ Baibol na vwo bru ihwo uche vwẹ idjerhe rẹ ẹguọnọ. Wọ da dia ọmiọvwọ, wọ sa nokpẹn rẹ ẹwẹn ọfuanfon na rere ọ chọn wẹ uko vwọ ghwọku emọ wẹn vwẹ idjerhe rẹ ẹguọnọ ukperẹ ophu.

Ọrivẹ, roro kpahen oborẹ Jesu dje ẹguọnọ phia tobọ vwẹ ọke re vwo gbeku. (1 Pita 2:21, 23) Ofori nẹ e roro kpahen udje rẹ Jesu, ma rho kẹ ọke re de gbe avwanre ku yẹrẹ shenyẹ avwanre. A sa nọ oma rẹ ohwo uvi rẹ onọ nana, ‘Die yen Jesu rhe ru vwẹ ẹdia nana?’ Oniọvo aye Leigh tare nẹ onọ nana nẹrhẹ o se roro tavwen o ki ruẹ. Ọ da je ta: “O vwo ọke ọvo rẹ ohwo me vẹ ọyen gba wian, vwo si iyẹnrẹn ebrabra kpahen ovwẹ vẹ obo me wian wan phiyọ imel vwo rhe ihwo efa re vẹ avwanre gba wian. Obo ro ruru na da vwẹ mamọ. Ẹkẹvuọvo me da nọ oma mẹ, ‘Mavọ me sa vwọ vwẹrokere Jesu vwẹ ẹdia nana? Mi roro kpahen oborẹ Jesu rhe ru, ọyena da nẹrhẹ mi brorhiẹn me vwọ kpairoro vrẹ ota na. Ukuotọ rọyen, mi de rhi nyo nẹ ọrivẹ mẹ yena hẹ ẹdia rẹ ofudjevwe fikirẹ ọga ro nene muabọ. Mi de no nẹ, obo ro siri na nẹ ẹwẹn rọyen rhe-e. Mi vwo roro kpahen oborẹ Jesu dje ẹguọnọ phia tobọ vwẹ ọke re vwo gbeku, ọyena nẹrhẹ mi se dje ẹguọnọ kẹ ọrivẹ mẹ na.” Aphro herọ-ọ, avwanre da vwẹrokere Jesu, ke se dje ẹguọnọ phia ọkeneje.

Ọrerha, vwo uvi rẹ ẹguọnọ rọ dia oka re vwo vughe Inenikristi rẹ uyota. (Jọn 13:34, 35) Baibol na bru avwanre uche nẹ, e vwo oka rẹ “iroro” ro rhe Jesu. Jesu nẹ obo odjuvwu rhe otọrakpọ na, ọ da “vwẹ oma kpotọ” fikirẹ avwanre, tobọ “re te ughwu.” (Fil. 2:5-8) Avwanre vwọ vwẹrokere ẹguọnọ rẹ Jesu na, iroro vẹ ọdavwẹ avwanre ke je cha họhọ e rọyen. Ọyena che mu avwanre vwọ vwẹ  ọdavwẹ rẹ ihwo vwọ kobaro kẹ ọ rẹ avwanre. Erere efa vọ yen che te avwanre obọ siẹrẹ e de vwo ẹguọnọ?

Erere buebun yen a cha mrẹ siẹrẹ e de dje ẹguọnọ phia. Roro kpahen idje ivẹ:

• INIỌVO RẸ AKPỌEJE: Fikirẹ ẹguọnọ rẹ avwanre vwo kpahen ohwohwo, avwanre riẹnre nẹ o toro ukoko rẹ avwanre rare vwẹ otọrakpọ na-a, iniọvo na cha nabọ dede avwanre sasasa. Ọyena obọdẹn rẹ ebruphiyọ ra vwọ mrẹ ẹguọnọ rọhẹ uvwre rẹ ‘iniọvo rẹ avwanre rehẹ akpọneje’! (1 Pita 5:9) Vwẹ ohri rẹ idibo rẹ Ọghẹnẹ ọvo yen a da sa mrẹ oka rẹ ẹguọnọ tiọna.

• UFUOMA: Kidie nẹ avwanre “chirakon rẹ ohwohwo vwẹ evun rẹ ẹguọnọ,” kẹ avwanre nabọ riavwerhen rẹ “ẹguọnọ rẹ ufuoma.” (Ẹfe. 4:2, 3) Avwanre mrẹ ufuoma nana vwẹ uyono, isikoko kugbe eghwẹkoko rẹ avwanre. Wo se noso nẹ ufuoma nana, ọyen orọnvwọn oghẹresan vwẹ akpọ nana rọ vọnre vẹ omaẹfẹnẹ? (Une 119:165; Aiz. 54:13) Siẹrẹ avwanre vẹ ihwo de yerẹn vwọrẹ ufuoma, ọyena odjephia nẹ avwanre vwo ẹguọnọ rayen. Ẹguọnọ tiọyena nẹrhẹ oma vwerhen Jihova.​—Une 133:1-3; Mat. 5:9.

Pọl de si: “Ẹguọnọ kpọ ohwo viẹ.” (1 Kọr. 8:1) Vwẹ idjerhe vọ? Pọl dje oborẹ ẹguọnọ sa vwọ kpọ ohwo viẹ, vwẹ uyovwin 13 rẹ ileta rẹsosuọ ro si rhe Inenikristi rehẹ Kọrẹnt, rẹ ihwo evo seri nẹ, “Une rẹ Ẹguọnọ.” Ẹguọnọ, vwẹ erhuvwu rẹ ihwo efa vwọ kobaro. (1 Kọr. 10:24; 13:5) Vwọba, ẹguọnọ se si orua koko, ji toroba omamọ rẹ oyerinkugbe vwevunrẹ ukoko na, kiridie ẹguọnọ dje erorokẹ kẹ ihwo efa, vwo edirin, ji ruẹse.​—Kọl. 3:14.

Ẹguọnọ rẹ avwanre vwo kpahen Ọghẹnẹ, ọyen ẹguọnọ rọ ma ghanre kparobọ. Fikirẹ ẹguọnọ tiọyena, ihwo re nẹ ẹkuotọ vẹ ephẹrẹ sansan rhe, ki se “ku evun gbe ọvo vwọ ga” Jihova vẹ omavwerhovwẹn. (Zẹf. 3:9) E jẹ avwanre brorhiẹn re vwo dje uruemu nana rọ dia ẹbẹre ọvo rẹ omamọ rẹ ẹwẹn ọfuanfon na phia, vwẹ akpeyeren re kẹdẹ kẹdẹ rẹ avwanre.