ỌGBOGHO rẹ abadi rẹ Atlantic na teyen okọ na ro kpo Europe. George Young rọ dia ọvo usun rẹ ihwo rehẹ okọ na, roro kpahen omavwerhovwẹn rọ mrẹre vwẹ aghwoghwo ro ghwe ru nu vwẹ Brazil. * E ji vwo biẹ okọ na yanran na, Oniọvo George Young de rhi mu ẹwẹn kpahen ẹkuotọ kpokpọ rọ ra, rọ dia asan rẹ obọ je te vwẹ Spain vẹ Portugal. O phiẹrophiyọ nẹ ọyen de te oboyin, o che ru ọrhuẹrẹphiyotọ rẹ Oniọvo J. F. Rutherford vwọ ta ota rotu, ọ me je ghare itrati ri te 300,000 kẹ ihwo na!

Oniọvo Young vwo te Lisbon vwẹ ukpe rẹ 1925, ọ da rhe mrẹvughe nẹ asan na eje yanghanre. Ewene rọ vwomaphia vwẹ 1910 de phioba phiyọ usuon rọ herọ ọke yena, ji si ẹgba rẹ Ishọshi rẹ Ifada kpotọ. Ọnana da nẹrhẹ ihwo buebun vwevunrẹ ẹkuotọ na vwo egbomọphẹ, ẹkẹvuọvo ozighi jehẹ asan eje.

Ọke rẹ Oniọvo Young vwo ruẹ ọrhuẹrẹphiyotọ vwọ kẹ ota rẹ Oniọvo Rutherford cha ta, usuon na da ghwẹ isodje vọn asan eje fikirẹ ẹko rẹ ihwo evo re guọnọ vwẹ ogangan reyọ usuon. Oniọvo Young nabọ fiudugberi muomaphiyọ ọrhuẹrẹphiyotọ na, dede nẹ osiọbe rẹ ukoko rẹ British and Foreign Bible Society vwẹ orhọ-esio kẹ nẹ ihwo buebun cha vwọsuọ. Oniọvo Young de si ọbe vwọ yare afieha rẹ Camões Secondary School ra da sasa oma, a da je rhọnvwe kẹ!

O de rhi te ẹdẹ 13 rẹ May, rọ dia ẹdẹ ra rhuẹrẹ vwọ kẹ ota rẹ otu rẹ Oniọvo Rutherford cha ta. Ihwo buebun ke rhẹro rẹ obo re cha phia! A vwẹ ẹbe ra vwọ tamuẹ igbẹhẹ vẹ evuẹ re si phiyọ ẹbe re ghwa iyẹnrẹn vwo ghwoghwo uyovwinrota rẹ ota rotu na rọ dia, “How to Live on the Earth Forever” kẹ ihwo. Ẹga re vwọsua avwanre de brokpakpa teyen uyovwinrota ọvo phia vwẹ ẹbe iyẹnrẹn rayen, rẹ ayen vwo si ihwo orhọ kpahen “emraro rẹ efian” re ghwa ro orere na. Otu re vwọsua avwanre na de mudia otafe rẹ afieha na, rẹ ayen vwọ ghare ẹbe ri te uriorin buebun vwọ kẹ ihwo. Ẹbe na ta eta re vwọsua iyono rẹ Oniọvo Rutherford vwọphia.

Dedena, ihwo ri te omarẹ 2,000 de keke oma ro afieha na, a da je mrẹ ihwo ri te omarẹ 2,000 efa re mrẹ asan ro-o. Ihwo evo mudia egbada ra vwẹ ifi ru, rehẹ orhoma rẹ afieha na, efa de rhe chidia enu rẹ ekuakua ra vwọ sasa oma.

Ihwo re vwọsua na dino yangha ọrhuẹrẹphiyotọ na. Kẹ ayen do, je guọghọ egbara. Dedena, Oniọvo Rutherford djoshọ-ọ, o de yerin enu rẹ imẹjẹ rere ihwo na eje se vwo nyo upho rọyen. Ro vwo ku ota rọyen phiyọ omarẹ uherevie rẹ ason nu, ihwo re vrẹ 1,200 ri dje omavwerhovwẹn phia, de si edẹ vẹ adrẹsi rayen phiyotọ rere a sa vwọ vwẹ ẹbe rhe ayen. Vwẹ ẹdẹ rivẹ, a da teyen uyovwinrota ọvo ro shekpahen ota rotu rẹ Oniọvo Rutherford tare na, phiyọ ọbe ọvo rọ ghwa iyẹnrẹn re se O Século.

Vwẹ September 1925, a da ton ẹteyọn rẹ Uwevwin  Orhẹrẹ na phiyọ vwẹ Portuguese. (A je teyen Uwevwin Orhẹrẹ ọvo phia dẹvure vwẹ Portuguese vwẹ Brazil.) Uvwre rẹ ọke yena yen Virgílio Ferguson rọ dia ọvo usun rẹ Emọ-uyono rẹ Baibol na vwẹ Brazil, vwọ ton egbemuọ phiyọ rọ vwọ kua kpo Portugal ra vwẹ ukẹcha phia. O ke nene Oniọvo Young wian kugbe vwẹ oghọn ukoko otete rẹ Emọ-uyono rẹ Baibol na vwori vwẹ Brazil ọke yena. O kriri-i, Virgílio vẹ aye rọyen Lizzie da kua yanran ra vwomaba Oniọvo Young. Ọke rẹ Oniọvo Ferguson vwọ rhe na shephiyọ, kidie Oniọvo Young che kpo asan efa kẹrẹkpẹ re ruiruo rẹ aghwoghwo na, ji te Soviet Union dede.

Ẹvwọsuọ na da rhe ganphiyọ ọke rẹ usuon rẹ Portugal vwo wene kpregede vwo kpo ọ rẹ isodje. Dedena, Oniọvo Ferguson de fiudugberi chọchọn rẹ ẹmẹko rẹ Emọ-uyono rẹ Baibol na, je kọn oruru rẹ aghwoghwo na phiyọ ayen oma. Ọ da je nọ sẹ e se ru uyono vwẹ uwevwin rọyen. A da rhọnvwe kẹ vwẹ October 1927.

Omarẹ ihwo 450 yen durhie phiyọ Uwevwin Orhẹrẹ na vwẹ ephẹrẹ rẹ Portugal vwẹ ukpe rẹ isodje vwọ ton usuon phiyọ. Vwọba, a da je vwẹ itrati vẹ ẹbe itete vwọ hra uyota na ro ubrakpọ rẹ Angola, Azores, Cape Verde, East Timor, Goa, Madeira, kugbe Mozambique, re dia asan rehẹ otọ rẹ usuon rẹ Portugal.

Vwẹ 1929, ohwo rẹ Portugal ọvo ra riẹn phiyọ Manuel da Silva Jordão rọ vwẹrote idodo, da kua rhe Lisbon. Rọ vwọ hẹ Brazil, ọ kerhọ kẹ ota rotu ọvo rẹ Oniọvo Young tare. Kpakpata o de rhiabọreyọ uyota na, o de ji dje owenvwe phia rọ vwọ chọn Oniọvo Ferguson uko vwọ hẹre iruo rẹ aghwoghwo na phiyọ. Rere o se vwo ru ọtiọyen, Manuel da ton iruo rẹ ọkobaro phiyọ. Uvi rẹ ọrhuẹrẹphiyotọ re vwo mu ọke yena, ra vwọ nabọ teyan je ghara ẹbe rẹ ukoko na, da nẹrhẹ ukoko kpokpọ rọhẹ Lisbon yan obaro sasasa!

Vwẹ 1934, Oniọvo Ferguson vẹ aye rọyen de rhivwin kpo Brazil. Ẹkẹvuọvo, a kọn ubi rẹ uyota na nure. Iniọvo rehẹ Portugal nabọ fuevun ga Jihova ọke rẹ ofovwin vwọ vwomaphia vwẹ Spain, kugbe ọke re vwo phi Ofovwin Akpọeje II. Uvwre rẹ ọke evo, iniọvo na ghwa họhọ imwerhanre re vwara. Ẹkẹvuọvo, erhanre na da nabọ riẹn la ọke rẹ Oniọvo John Cooke rọ dia imishọnare ẹsosuọ re ji bru ayen ra, vwo te oboyin vwẹ ukpe rẹ 1947. Oniọvo John Cooke kpo isikuru rẹ Gilead. Nẹ ọke yena yanran, ighwoghwota na ke buẹnphiyọ kọke kọke. Usuon na vwọ tobọ dobọ rẹ iruo rẹ Iseri rẹ Jihova ji vwẹ ukpe rẹ 1962, uchunu rẹ ighwoghwota na shekpotọ-ọ. December 1974 yen usuon na vwọ rhọnvwe kẹ Iseri rẹ Jihova nẹ ayen ga ẹga rayen odedede. Ọke yena, jẹ ighwoghwota rehẹ ẹkuotọ na vrẹ 13,000 re.

Enẹna, ighwoghwota re vrẹ 50,000 yen ghwoghwo iyẹnrẹn esiri rẹ Uvie na vwẹ Portugal vẹ ibrotọ sansan rẹ ame riariẹ phiyọ ra da jẹ Portuguese, kerẹ Azores vẹ Madeira. Evo usun rẹ ighwoghwota rehẹ oboyin enẹna, ayen uvwiẹ rerha rẹ evo usun rẹ ihwo ri kerhọ kẹ ota rotu rẹ Oniọvo Rutherford vwẹ 1925.

Avwanre kpẹvwẹ Jihova vẹ iniọvo yena ri fuevun, re nabọ fiudugberi kobaro rẹ iruo ‘re vwo ghwoghwo kpahen Jesu Kristi vwọ kẹ ẹgborho na.’​—Rom 15:15, 16.​—Irueru avwanre vwẹ ọke obuko vwẹ Portugal.