1. Diesorọ omaebrophiyame vwọ dia owọẹjẹ ọghanghanre? (Ni uhoho rẹsosuọ na.)

KUKPE kukpe yen ihwo uriorin buebun vwo bromaphiyame. Buebun rayen ighene. Ọkiọvo, evunrẹ ukoko na yen e de vwiẹ ayen. Wẹwẹ ọvo usun rayen? Ọ da dia ọtiọyen, kọyen wọ davwenre. Omaebrophiyame, ọyen ọvo usun rẹ erọnvwọn re sa nẹrhẹ Onenikristi vwo usivwin.​—Mat. 28:19, 20; 1 Pita 3:21.

2. Diesorọ oshọ rẹ omaẹvwọkpahotọ wo juwe emuo?

² Dede nẹ omaebrophiyame ghwa ebruphiyọ buebun cha, o ji vwo oghwa ro nene. Vwẹ idjerhe vọ? Ẹdẹ wo bromaphiyame na, a nọ wẹ onọ nana: “Vwọ kpahen izobo rẹ Jesu Kristi, wo kuobọ rhẹriẹ nẹ imwemwu wẹn re, wọ da vwẹ oma wẹn kpahotọ kẹ eruo rẹ ọhọre rẹ Jihova?” Wọ da kpahenphiyọ nẹ, e. Omaebrophiyame wẹn na, ọyen odjephia nẹ wọ vwomakpahotọ kẹ Jihova. Wo ve kẹ nẹ wo che vwo ẹguọnọ rọyen, je vwẹ ọhọre rọyen vwọ kobaro ọkieje. Ive yena pha  ghanghanre. Kẹ, ofori nẹ wọ viẹ idiekpọvwẹ fiki rọyen? Ẹjo. Omaẹvwọkpahotọ wẹn kẹ Jihova, dia ojẹ rọ chọre kakaka-a. Roro kpahen akpeyeren rẹ ohwo rọ rhọnvwe vwomakpahotọ kẹ Jihova-a. Ohwo otiọyena hẹ otọ rẹ usuon rẹ Eshu ukperẹ Jihova. Idẹbono guọnọre nẹ wo vwo usivwi-in. Vwọrẹ uyota, oma cha vwerhọn siẹrẹ uphẹn rẹ arhọ rẹ bẹdẹ bẹdẹ da va wẹ abọ kidie nẹ wo chukoku Jihova.

3. Ebruphiyọ vọ yen te we obọ, wọ vwọ vwomakpahotọ kẹ Jihova nure na?

³ Roro kpahen oborẹ Jihova bruba kẹ wẹ kidie nẹ wọ vwomakpahotọ kẹ, ji bromaphiyame. Wọ vwọ vwẹ arhọ wẹn kẹ Jihova nure na, ku wọ sa ta vẹ imuẹro nẹ, “Ọrovwohwo vẹ ovwẹ vwọ obọ na me gbe djẹ oshọ-ọ. Kidie ohwo se ru vwe?” (Une 118:6) O vwo emu ọfa rọ rho vrẹ uphẹn ra vwọ ka ẹbẹre rẹ Jihova, je mrẹ ẹroesiri rọye-en.

4, 5. (a) Idjerhe vọ yen omaẹvwọkpahotọ vwọ dia oghwa romobọ? (b) Egbabọse vọ yen kohwo kohwo se hirharokuẹ?

⁴ Wo vwo bromaphiyame nure na, ofori nẹ wo vwo oyerinkugbe romobọ vẹ Jihova, wọ cha sa vwẹ oma rẹrẹ ọsẹ vẹ oni wẹ-ẹn. Wẹwẹ ọvo yen cha wian vwọ kẹ usivwin wẹn, ọ da tobọ dianẹ wọ je dia uwevwin rẹ ọsẹ wẹn. Diesorọ o vwo fo nẹ wọ karophiyọ ọnana? Kidie wọ riẹn egbabọse re cha obaro na-a. Kerẹ udje, ọ da dianẹ ọkiemọ yen wo vwo bromaphiyame, wọ da ghwanre te emeghene re, ku wo che hirharoku egbabọse kpokpọ re fẹnẹre. Emeghene ọvo da ta: “Omotete cha sa sen uphẹn rọ vwọ dia Oseri rẹ Jihova, fikirẹ urhurusivwe rẹ ikeki re vwo ruẹ ẹkarophiyọ rẹ ẹdẹ re vwiẹ ohwo-o. Ẹkẹvuọvo, ikpe evo da wan nu, urhurusivwe rẹ ovwerhẹn rẹ aye gbẹ ọshare da rhe gan mamọ re, o se she, jokpanẹ ko vwo imuẹro kokoroko nẹ irhi rẹ Jihova vọnre vẹ erere ọkieje.”

⁵ Vwọrẹ uyota, ọ dia ighene ọvo yen hirharokuẹ egbabọse kpokpọ-ọ. Imiragua ri bromaphiyame re, ji hirharokuẹ edavwini rẹ ayen vwẹro roro-o. Edavwini tiọyena se churobọ si orọnvwe, omakpokpọ, yẹrẹ iruo. Ọtiọyena, kohwo kohwo se hirharoku ẹdia rọ cha dia ọdavwini kẹ evun-ẹfuon rọyen kẹ Jihova.​—Jems 1:12-14.

6. (a) Idjerhe vọ yen omaẹvwọkpahotọ wẹn kẹ Jihova wọ dia ọ ro che se wene-e? (b) Die yen wo se yono nẹ Filipae 4:​11-13?

⁶ Rere wọ sa vwọ fuevun vwẹ kẹdia kẹdia ru wọ hepha, karophiyọ nẹ wo che se wene oborẹ wo ve kẹ Jihova na-a. Wo ve kẹ Jihova nẹ ọyen wọ cha ga, ọ da tobọ dianẹ igbeyan yẹrẹ ọsẹ vẹ oni wẹn dobọ rẹ ẹga rayen ji. (Une 27:10) Otoro edia ru wọ hepha-a, Jihova sa chọn wẹ uko vwo yerin mu omaẹvwọkpahotọ wẹn.​—Se Filipae 4:11-13.

7. Die yen o mudiaphiyọ wọ vwọ vwẹ “oshọ vẹ ophariẹ” vwọ wian vwọ kẹ usivwin wẹn?

⁷ Jihova guọnọre nẹ wọ dia ugbeyan rọyen. Ẹkẹvuọvọ, ọ guọnọ ẹgbaẹdavwọn wọ ke sa sẹro rẹ oyerinkugbe yena, je wian vwọ kẹ usivwin wẹn. Filipae 2:12 da ta: “Gba vwẹ oshọ vẹ ophariẹ vwọ wian owian rẹ esivwo [wẹn] phia.” Roro kpahen oborẹ wọ sa vwọ sẹro rẹ oyerinkugbe wẹn vẹ Jihova, ji fuevun kẹ, o toro ebẹnbẹn wo hirharoku-u. Wo ghwe roro nẹ emu vuọvo che se kpogho uwe-e. Kidie idibo rẹ Jihova evo sheri, dede nẹ ayen ga krẹre. Ọtiọyena, owọẹjẹ vọ yen sa chọn wẹ uko vwọ wian vwọ kẹ usivwin wẹn?

8. Die yen uyono romobọ churobọ si, kẹ diesorọ ọ vwọ ghanre?

⁸ Ofori nẹ avwanre kerhọ kẹ Jihova, je ta ota kẹ, siẹrẹ avwanre da guọnọ dia igbeyan rọyen. Uyono rẹ Baibol romobọ, ọyen idjerhe ọvo kiriguo ra sa vwọ kerhọ kẹ Jihova. O churobọ si isese vẹ erorokodo rẹ Baibol na vẹ ẹbe sansan rẹ ukoko na teyenphia, re sa chọn ohwo uko vwo vwo erianriẹn rẹ Ọghẹnẹ. Ẹkẹvuọvo, ọnana dia ọ re di vwo se eta kuyovwin kerẹ ohwo ro muegbe ro che vwo si ọdavwini rẹ isikuru-u. Ukperẹ ọyena, omamọ rẹ uyono rẹ Baibol churobọ si ehiahiẹ okokodo rọ sa chọn ohwo uko vwọ riẹn Jihova kpobaro phiyọ. Ọ cha chọn wẹ uko vwo sikẹrẹ Jihova, Jihova ko ji sikẹrẹ owẹ.​—Jems 4:8.

9. Erhọ yen erọnvwọn evọ re chọn wẹ uko vwẹ uyono romobọ wẹn?

⁹ Ukoko rẹ Jihova kẹ avwanre erọnvwọn sansan re sa chọn ohwo uko vwo vwo omamọ ọrhuẹrẹphiyotọ rẹ uyono rẹ Baibol romobọ. Kerẹ udje, “Bible Study Activities” rehẹ ẹbẹre rẹ “Ighene” vwẹ jw.org, sa chọn wẹ uko vwo yono emu buebun nẹ Baibol na. Vwọba, study guides re mu kpahen ọbe rẹ “What Does the Bible Really Teach?” vwẹ jw.org sa chọn wẹ uko vwo ru imuẹro wẹn ganphiyọ, ji nabọ djisẹ rẹ oborẹ wo segbuyota fiotọ kẹ ihwo efa. Wọ je sa mrẹ iroroẹjẹ efa vwẹ uyovwinrota na “Young People Ask . . . How Can I Make Bible Reading Enjoyable?” rọhẹ Awake! rẹ April 2009. Uyono vẹ erorokodo pha ghanghanre mamọ, kidie e sa chọn wẹ uko vwọ wian vwọ kẹ usivwin wẹn.​—Se Une Rẹ Ejiro 119:105.

10. Diesorọ o vwo fo nẹ ohwo ro bromaphiyame nure muomaphiyọ ẹrhovwo ẹnẹ?

¹⁰ Kirobo ra kerhọ kẹ Jihova womarẹ uyono rẹ Baibol ye, ọtiọyen a je ta ota kẹ womarẹ ẹrhovwo. Wo roro nẹ ẹrhovwo ghwa obo re di ruẹ, yẹrẹ ‘inehweri’ rọ nẹrhẹ akpọ yovwin ohwo-o. Ukperẹ ọtiọyen, ẹrhovwo yen idjerhe vuọvo ra sa vwọ ta ota kẹ Ọmemama rẹ avwanre. Jihova guọnọ nyo oborẹ wọ cha ta. (Se Filipae 4:6.) Siẹrẹ wo de hirharoku ebẹnbẹn, Baibol na tare nẹ  wo “mu oghwa wẹn nyẹ Ọrovwohwo.” (Une 55:22) Ọyena muwẹro? Wọ da nọ iniọvo buebun, ayen cha vuẹ wẹ oborẹ uchebro yena chọn ayen uko. Ọ je sa chọn wẹ uko!

11. Diesorọ o vwo fo nẹ wọ kpẹvwẹ Jihova ọkieje?

¹¹ Ọ dia ọke rẹ avwanre vwọ guọnọ ukẹcha ọvo, yen a vwọ nẹrhovwo rhe Jihova-a. Baibol na da ta: “Ovwan gba kpẹvwẹ.” (Kọl. 3:15) Ọkiọvo avwanre se kuẹrofia kẹ ebruphiyọ buebun ri te avwanre obọ fikirẹ ebẹnbẹn rẹ avwanre tẹnrovi. Ọtiọyena, gba davwen wo roro kpahen erọnvwọn erha rẹ Jihova ru kẹ wẹ, ri se mu we vwọ kpẹvwẹ kẹdẹ kẹdẹ. Eghene ọvo re se Abigail, ro bromaphiyame ọke rọ vwọ hẹ ẹgbukpe 12, da ta: “Jihova yen me fo ohwo ra kpẹvwẹ. Ofori nẹ a vwẹ kuphẹn kuphẹn ro rhiephiyọ vwọ kpẹvwẹ Jihova fikirẹ erọnvwọn sansan rọ vwọ kẹ avwanre. Onọ nana mi nyori cha sa chọrọ ovwẹ ẹro-o: Ọ da dianẹ oborẹ wọ vwẹ fiki rọyen kpẹvwẹ Jihova odẹ ro kpori na yen wọ cha mrẹ vwẹ urhiọke ri nonẹna, die wo se rhẹro rọyen wo de vrẹn?” *

12, 13. Diesorọ o vwo fo nẹ wo roro kpahen oborẹ Jihova ru kẹ wẹ re?

¹² Ovie Devid rẹ Jihova sivwin nẹ ukpokpogho buebun, da ta: “E davwe re wọ mrẹ nẹ Ọrovwohwo yoma! Aghọghọ dia kẹ ohwo ro sioma nu vwẹ evun rọye!” (Une 34:8) Eta yena dje ọghanrovwẹ rẹ oborerhiẹromrẹ. Ikuegbe rẹ oborẹ Jihova vwẹ ukẹcha kẹ idibo rọyen ri fuevun, vọn evunrẹ Baibol na kugbe ẹbe rẹ ukoko na teyenphia. Wo ji se nyo ikuegbe tiọyena siẹrẹ wo de kpo uyono. Ẹkẹvuọvo, oyerinkugbe wẹn vẹ Jihova vwọ ganphiyọ na, ku wọ cha mrẹ obo rọ chọn wẹ uko wan. Wọ davwen uyoyovwin rẹ Jihova obọ ọvo re?

¹³ O vwo idjerhe ọvo rẹ Inenikristi eje vwọ rhiẹromrẹ uyoyovwin rẹ Jihova. Ọghẹnẹ durhie avwanre nẹ e sikẹrẹ vẹ Ọmọ rọyen. Jesu da ta: “Ohwo ọvuọvo se bru uvwe rhe-e jọkpa nẹ Ọsẹ na ro ji vwe na siro.” (Jọn 6:44) Wo rorori nẹ Jihova si we te oma? Eghene se roro, ‘ọsẹ vẹ oni mẹ yen Jihova si te oma, mi di nene ayen.’ Ẹkẹvuọvo, ọke wọ vwọ vwomakpahotọ kẹ Jihova ji bromaphiyame, wẹ vẹ Jihova de rhi vwo oyerinkugbe oghẹresan. Asaọkiephana, Jihova nabọ riẹn wẹ re. Baibol na kẹ avwanre imuẹro nana: “Ohwo da guọnọ Ọghẹnẹ, kọ riẹn ohwo yena.” (1 Kọr. 8:3) Vwẹ ẹro ọghanghanre vwo ni ẹdia wẹn ọkieje vwẹ ukoko rẹ Jihova.

14, 15. Mavọ yen iruo rẹ aghwoghwo na sa vwọ bọn esegbuyota wẹn gan?

¹⁴ Iruo rẹ aghwoghwo na, ọyen ẹdia ọfa rẹ wọ da sa rhiẹromrẹ uyoyovwin rẹ Jihova. Jihova sa chọn wẹ uko vwo ruiruo rẹ aghwoghwo na, tobọ vwẹ isikuru. Ọ sa bẹn kẹ wẹ wo vwo ghwoghwo ota kẹ emọ isikuru wẹn, kidie wọ riẹn ẹro rẹ ayen che vwo ni we-e. Wọ riẹnre sẹ ayen cha kerhọ-ọ. Ọ lọhọre wo vwo ghwoghwo ota kẹ ọmọ isikuru wẹn, vwọ vrẹ otu buebun. Die yen sa chọn wẹ uko?

¹⁵ Ẹsosuọ, roro kpahen oboresorọ esegbuyota wẹn vwo muwẹro. Study guides hẹ jw.org vwẹ ephẹrẹ wẹn? O rhe muwẹro-o, wọ sa ra hiẹ guọnọ ayen vwẹ wẹbsaiti na. E ru ayen rere e vwọ chọn wẹ uko vwo roro kpahen oborẹ wo segbuyota, oboresorọ wo vwo se ayen gbuyota, kugbe oborẹ wo se vwo dje  imuẹro wẹn fiotọ kẹ ihwo. Wọ da nabọ vwo imuẹro rẹ oborẹ wo segbuyota na, je nabọ muegbe phiyotọ, ọyena che mu we vwọ vuẹ ihwo efa kpahen Jihova.​—Jer. 20:8, 9.

16. Die yen sa chọn wẹ uko vwo phi oshọ wo vwo ghwoghwo ota kparobọ?

¹⁶ Oshọ ji se mu we, ọ da tobọ dianẹ wo muegbe phiyotọ wo vwo ghwoghwo. Oniọvo aye rọhẹ ẹgbukpe 18, ro bromaphiyame ọke rọ vwọ hẹ ẹgbukpe 13, da ta: “Esegbuyota mẹ muvwẹro, ẹkẹvuọvọ ọ pha bẹnbẹn me sa vwọ ta phia.” Mavọ yen o se vwo phi ebẹnbẹn nana kparobọ? Ọ da ta: “Me vwẹ eta rẹ Baibol vwọba otaẹtakuẹgbe rẹ avwanre. Emọ rẹ iklasi mẹ nabọ ta ota kpahen erọnvwọn rẹ ayen ruru. O fori nẹ me je ta ọmẹ. Avwanre vwo gbikun yanran na, mi se ghwe do ota ọvo phiyọ. Kerẹ udje, me sa ta, ‘mi vwo yono ohwo ọvo Baibol na ẹdẹ ọvo, . . . ’ Ke me rhoma ta eta efa rhurho. Dede nẹ mi djunute ẹkpo rẹ Baibo-ol, ota mi do phiyọ na, me nẹrhẹ ayen vwo ẹwẹn rẹ ayen vwọ riẹn obo mi ruẹ, ọke me da vwẹ Baibol vwo yono ihwo. Ọkiọvo ayen me nọ vwẹ enọ. Ona nana nẹrhẹ ọ lọhọ kẹ vwẹ mi vwo soseri kẹ ihwo. Ọ je nẹrhẹ oma vwerhen ovwẹ!”

17. Mavọ yen imuẹro wẹn sa vwọ chọn wẹ uko ọke ru wo de ghwoghwo ota kẹ ihwo?

¹⁷ Wo de muọghọ kẹ ihwo efa ji djephia nẹ wo vwo ọdavwẹ rayen, kẹ ayen sa kerhọ kẹ wẹ. Olivia rọhẹ ẹgbukpe 17, ro bromaphiyame tavwen ọ ke tobọ te ẹgbukpe 13, da ta: “Oshọ mu vwe nẹ, me da ta ota kpahen Baibol na ọke re de gbikun, a cha tanẹ mi mu ẹga kpahen uyovwin.” Ọke vwọ yanran na, iroro rọyen ko rhi wene. Ukperẹ o vwo mu ẹwẹn kpahen obo re nẹrhẹ oshọ muo na, o de roro: “Ighene buebun riẹn emu vuọvo kpahen Iseri rẹ Jihova-a. Avwanre ọvo yen Iseri rẹ Jihova rẹ ayen riẹnre. Ọtiọyena, uruemu rẹ avwanre djephia sa nẹrhẹ ayen kerhọ. Oma da vo avwanre, oshọ de mu avwanre, yẹrẹ avwanre da phariẹ ọke re de ghwoghwo ota kẹ ayen, ayen se no nẹ avwanre vwo omavwerhovwẹn kpahen oborẹ avwanre ruẹ-ẹ. Ọyena sa tobo nẹrhẹ ayen hanrhe avwanre, kidie avwanre se fiudugberi-i. Ẹkẹvuọvo, avwanre da ta ota kẹ ayen dẹndẹn vẹ imuẹro, kerẹ ihwo ri nene igbeyan gbikun, ayen che muọghọ kẹ avwanre.”

18. Die yen o churobọ si wọ vwọ wian vwọ kẹ usivwin wẹn?

¹⁸ Kirobo ra mrẹre, ọyen oghwa rode ra vwọ wian vwọ kẹ esivwo rẹ ohwo. Wo se vwo ru ọnana, ofori ne wo se Baibol ji roro kokodo kpahen obore wo se. O ji fo nẹ wọ nẹrhovwo ọkieje, ji roro kpahen idjerhe sansan rẹ Jihova vwo bruba kẹ wẹ. Enana cha nẹrhẹ wo vwo imuẹro ọgangan kpahen oyerinkugbe wẹn vẹ Jihova. Ọyena ko ju che mu we vwọ ta ota kpahen esegbuyota wẹn.​—Se Une Rẹ Ejiro 73:28.

19. Diesorọ o vwo fo nẹ wọ wian vwọ kẹ usivwin wẹn?

¹⁹ Jesu da ta: “Ohwo da guọno nẹ ọye nene uvwe, e jọ sen oma rọye re o mu [“urhe rẹ oja,” NW ] rọye re o nene uvwe.” (Mat. 16:24) Vwọrẹ uyota, omaẹvwọkpahotọ vẹ omaebrophiyame, ọyen obo ra guọnọ mie we kerẹ Onenikristi. Ọ cha nẹrhẹ wọ mrẹ ebruphiyọ buebun asaọkiephana kugbe arhọ rẹ bẹdẹ bẹdẹ vwẹ akpọ kpokpọ rọ cha na. Ọtiọyena, gba vwẹ ọkieje vwọ wian vwọ kẹ usivwin wẹn!