Wọ nabọ frẹkotọ se ọbe Uwevwin Orhẹrẹ rẹ emeranvwe evo re wanre na? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Diesorọ o vwo fo nẹ emiọvwọn re dia asan ọrhorha nabọ roro kpahen ephẹrẹ rẹ ayen sa vwọ chọn emọ rayen uko vwo sikẹrẹ Jihova?

Emọ wẹn che yono ephẹrẹ rẹ asan na vwẹ isikuru vẹ ekogho rayen. Erere herọ siẹrẹ ayen da riẹn ephẹrẹ ọfa vwọba ọwẹn na. E jẹ emiọvwọn nabọ fuẹrẹn sẹ ukoko ra da jẹ ephẹrẹ rayen, yẹrẹ ọ ra da jẹ ephẹrẹ rẹ asan na yen uyota na da sa fobọ te ubiudu rẹ emọ na, rere ayen sa vwọ yan obaro vwẹ ukoko na. E jẹ emiọvwọn vwẹ ọdavwẹ rẹ emọ na vwọ kobaro kẹ ọ rayen.​—w17.05, aruẹbe 9-11.

Die yen “enana” rẹ Jesu rionbọ phiyọ, ọke rọ vwọ nọ Pita: “Wọ guọnọ ovwẹ nọ enana?” (Jọn 21:15)

Ọ sa dianẹ Jesu rionbọ phiyọ iyerin re hweri na, yẹrẹ iruo rẹ iyerin ehwe. Jesu vwo ghwu nu, Pita de rhivwin kpo iruo rẹ iyerin ehwe ro ruẹ jovwo. Ofori nẹ Inenikristi vwo oniso rẹ asan rẹ iruo hepha vwevunrẹ ubiudu rayen.​—w17.05, aruẹbe 22-23.

Die nẹrhẹ Ebraham vuẹ Sara nẹ ọ ta kẹ ihwo na nẹ ọyen oniọvo rọyen? (Jẹn. 12:10-13)

Vwọrẹ uyota Sera ọmọsẹ rẹ Ebraham. Mane kẹ Sera vuẹ ayen nẹ ọyen aye rọyen, ayen rhe hwe Ebraham. Ọyena da phia, ayen rhe che se vwiẹ ọmọ rẹ Jihova vuve rọyen kẹ Ebraham na-a.​—wp17.3, aruẹbe 14-15.

Ona vọ yen Elias Hutter vwọphia rọ chọn ihwo uko vwo yono ephẹrẹ rẹ Hibru?

Ọ guọnọ chọn ihwo re yono ephẹrẹ na uko rere ayen se vughe esiri rẹ ibieta rẹ Hibru re vwo si Baibol na, kugbe eta efa ra vwọba obaro vẹ obuko rayen. Ọ vwẹ ibieta ri muru vwo si eta rẹ Hibru na, ọ da rha vwẹ ibieta ri muru-u vwo si eta ra vwọba ayen. New World Translation of the Holy Scriptures​—With References je reyọ ona nana vwo ruiruo vwẹ eta rehẹ obotọ rọyen.​—wp17.4, aruẹbe 11-12.

Die yen se djobọte ẹro rẹ Onenikristi vwo ni ọhwunu ra vwọ chochọn rẹ oma rẹ ohwo vwo nẹ abọ rẹ ihworakpọ?

Enana evo usun rayen: Arhọ pha ghanghanre kẹ Jihova. Jesu vuẹ idibo rọyen nẹ ayen mu ọlọkọ vwọ choma fikirẹ ochọnvwe-e. (Luk 22:36, 38) A guọnọre nẹ avwanre duvwu elọkọ rẹ avwanre phihọ ighwro. Arhọ ghanre vrẹ ekuakua rẹ akpeyeren. Avwanre muọghọ kẹ ẹwẹn obrorhiẹn rẹ ihwo efa, avwanre je guọnọ dia omamọ rẹ udje. (2 Kọr. 4:2)​—w17.07, aruẹbe 31-32.

Diesorọ iyẹnrẹn rẹ Matiu vẹ Luk kpahen ọtonphiyọ rẹ akpeyeren rẹ Jesu vwẹ otọrakpọ na vwọ fẹnẹ ohwohwo?

Ikuegbe ro churobọ si Josẹf yen Matiu tẹnrovi. Ọ ta ota kpahen uruemu rẹ Josẹf djephia ọke rọ vwọ riẹn nẹ Meri mrevun, oborẹ amakashe vwọ vuẹ nẹ ọ djẹ kpo Ijipt kugbe obo rọ rhoma vwọ vuẹ nẹ o rhivwin. Iyẹnrẹn rẹ Luk tẹnrovi Meri mamọ; kerẹ udje, ọ ta ota kpahen ọke rẹ Meri vwọ kọn bru omoni rọyen Ẹlizabẹt ra, kugbe obo rọ tare ọke rẹ ayen vwọ mrẹ Jesu vwẹ uwevwin rẹ ẹga na.​—w17.08, aruọbe 32.

Erhọ yen erọnvwọn evo rẹ Ota rẹ Ọghẹnẹ mudia vwọso?

Vwẹ uvwre rẹ ikpe nana eje na, eta rẹ Baibol na ji rhi wene-e. Ewene rọ vwomaphia vwẹ usuon, djobọte ephẹrẹ rẹ ihwo buebun jẹ. Ihwo je reyọ vwọso efanfan rẹ Baibol na vwo kpo ephẹrẹ rẹ ihwo buebun jẹ.​—w17.09, aruẹbe 19-21.

O vwo amakashe rọ chochọn rẹ avwanre?

Ẹjo. Jesu tare nẹ emakashe rẹ idibo rọyen mudia obaro rẹ Ọghẹnẹ. (Mat. 18:10) Ota rọyen na mudiaphiyọ nẹ emekashe na davwerhọn rẹ kohwo kohwo rọ dia odibo rọyen.​—wp17.5, aruọbe 5.

Ẹguọnọ vọ yen ma kenu

Ẹguọnọ rẹ a·gaʹpe rọ dia ẹguọnọ re mu kpahen urhi, yen ẹguọnọ rọ ma kenu. O churobọ si ọdavwẹ ọgangan re vwo kpahen ohwo. O se mu ohwo vwo ru emu esiri kẹ ihwo efa.​—w17.10, aruọbe 7.