Wọ Karophiyọ?
Wọ nabọ frẹkotọ se ọbe Uwevwin Orhẹrẹ rẹ emeranvwe evo re wanre na? Ọ da dia ọtiọyen, gba davwẹngba sẹ wọ sa kpahenphiyọ enọ nana:
Ẹkpo rẹ Baibol vọ yen djerephia nẹ Ọghẹnẹ re ehrọre rẹ avwanre?
Ọghẹnẹ vwo oniso rẹ oja vẹ ukpokpogho rẹ ihwo rẹ Izrẹl ọke rẹ ayen vwọ hẹ eviẹn vwẹ Ijipt. (Eyan. 3:7; Aiz. 63:9) Ọghẹnẹ ma ohworakpọ họhọ oma rọyen, kọyensorọ avwanre vwọ re ehrọre rẹ ihwo efa. Ọ re ehrọre rẹ avwanre, ọ da tobọ dianẹ avwanre no nẹ e muwan rẹ ẹguọnọ rọye-en.—wp18.3, aruẹbe 8-9.
Mavọ yen iyono rẹ Jesu vwo chọn ihwo uko vwo phi omaẹfẹnẹ kparobọ?
Ihwo rẹ Ju buebun vwẹ ọke rẹ Jesu fẹnẹ oma. Jesu kanrunumu oboresorọ o vwo fo nẹ a vwomakpotọ, ọ da vwọso uruemu rẹ omaẹkparọ rọ ghwa omaẹfẹnẹ cha. Ọ vwẹ uchebro kẹ idibo rọyen nẹ ayen vwẹ ẹro rẹ iniọvo vwo ni ohwohwo.—w18.06, aruẹbe 9-10.
Die yen avwanre yono vwo nẹ oboresorọ Ọghẹnẹ vwọ sen nẹ Mosis ro Otọ rẹ Uve na-a?
Mosis vwo uvi rẹ oyerinkugbe vẹ Jihova. (Urhi 34:10) Vwẹ okuphiyọ rẹ oyan rẹ ẹgbukpe 40 rayen vwẹ aton na, ihwo na da rhoma brenu obọ rivẹ kpahen ame. Ọghẹnẹ da vuẹ Mosis nẹ ọ ta ota kẹ oragha na. Je, ukperẹ o vwo ru ọtiọyen, Mosis da vwẹ ọkpọ rọyen teyọ. Ọ sa dianẹ Jihova muophu gangan kpahen Mosis kidie o nene odjekẹ rọye-en, yẹrẹ kidie ọ vwẹ urinrin na kẹ ọyen ro ru emu igbevwunu na-a. (Ukeri 20:6-12) Ọnana nẹrhẹ a riẹn obo rọ ghanre te re vwo nyupho rẹ Jihova je vwẹ urinrin kẹ.—w18.07, aruẹbe 13-14.
Diesorọ ọ vwọ chọ re vwo ni opharo rẹ ihwo vwo gun ayen ẹdjọ?
Erọnvwọn erha nana se djobọte ẹro rẹ avwanre vwo nẹ ihwo: asan rẹ ohwo nurhe, efe, kugbe ikpe. Ofori nẹ avwanre vwẹ ẹro rẹ Jihova vwo nẹ ihwo, ji vwo ni ayen! (Iruo 10:34, 35)—w18.08, aruẹbe 8-12.
Erhọ yen idjerhe evo rẹ Inenikristi re kpakore sa vwọ vwẹ ukẹcha kẹ ihwo efa?
Jihova vwẹ ẹro ọghanghanre vwo ni Onenikristi rọ kpakore ro siobọnu iruo evo, rọ je vwẹ ukẹcha kẹ ihwo efa. Ọ sa vwẹ ukẹcha kẹ eshare yẹrẹ eya rẹ orivẹ orọnvwe rayen ọvo hẹ ukoko na, yẹrẹ vwẹ ukẹcha kẹ ihwo re dobọ rẹ aghwoghwo ji, vwẹ Baibol vwo yono ihwo, je hẹre iruo rẹ aghwoghwo rọyen phiyọ.—w18.09, aruẹbe 8-11.
Die yen Inenikristi vwori vwevunrẹ Ekpeti rẹ Uyono rayen?
Ikadi re se vwo kpo jw.org vẹ ẹmẹbe rẹ edurhie hẹ evun rọyen. Eriyin ji te itrati ẹrenren ra sa vwọ ton otaẹtakuẹgbe phiyọ phẹphẹre, kugbe Uwevwin Orhẹrẹ vẹ Awake! Vwọba, ibroshọ evo je herọ, ẹbe ivẹ re vwo yono ihwo, kugbe ividio ẹne rẹ ọvo rọyen dia Diesorọ E Vwo Yono Baibol Na?—w18.10, aruọbe 16.
Idjerhe vọ yen Onenikristi sa vwọ “dẹ uyota reyọ” kirobo rẹ Isẹ 23:23 tare?
WỌ dia igho yen a cha vwọ dẹ uyota na-a. Ẹkẹvuọvo, ọ guọnọ ọke vẹ ẹgbaẹdavwọn e ki se vwo.—w18.11, aruọbe 4.
Die yen avwanre se yono vwo nẹ oborẹ Hosia nene Goma yerin wan?
Goma gbe ọfanrhiẹn abọ ibro, ẹkẹvuọvo Hosia vwo ghovwo, ọ fan orọnvwe na-a. Siẹrẹ Onenikristi de gbe ọfanrhiẹn, ọrivẹ rẹ orọnvwe rọyen se vwo ghovwo. Siẹrẹ o de nene ọrivẹ rọyen vwerhẹn nu, o rhe vwo emu vuọvo rọ sa nẹrhẹ ọ fan orọnvwe na ọfa-a.—w18.12, aruọbe 13.