Urhi nana djerephia nẹ aye na riase. Vwo oniso rẹ awọreta re riariẹ ẹkpo ri Baibol yena.

Awọreta ri ka obenu na ta ota kpahen ọshare ro du aye ra sa phiyotọ vwẹ “evun rẹ orere.” Ọshare na gbe igberadja kidie e ni aye ra sa phiyotọ tiọyena kerẹ ohwo rọ rọvwọn nure. Kẹ aye na vwo? Evunrẹ orere ọmọtẹ na hepha “yẹ o kperi nẹ a rhe chọ ọye uko-o.” Manẹ kọ ru ọtiọyen, ihwo re nyo, ayen me rhe chọn uko. Jẹ, o kperi phia-a. Ọtiọyena ayen ihwo ivẹ na riabe rẹ ọfanrhiẹn.—Urhi 22:23, 24.

Urhi na ji djisẹ rẹ ẹdia ọfa: “Ẹkẹvuọvo ọ da dianẹ evun rẹ aghwa ọshare na da vwa ọmọtẹ ra sahotọ na, ọshare na de muo ro de duo, ọshare na ro duro na ọvo kọyen ghwu. Ẹkẹvuọvo e ru ọmọtẹ na emuọvo-o; oruchọ vuọvo ro fu ughwu ọ hẹ ọma rẹ aye na-a, kidie ota nana họho ohwo rọ vwọ tua ọrivẹ rọye o de hwe ghwu, fikiridie evun rẹ aghwa ọ da vwa, owenẹ a sa aye na phiho ọtọ dede ọke ro vwo kperi a mrẹ ohwo rọ rhere rhi sivwo-o.”—Urhi 22:25-27.

Vwẹ ẹdia nana, iguẹdjọ na se aye na gbuyota. Vwẹ idjerhe vọ? A reyerọ nẹ aye na “kperi [jẹ] a mrẹ ohwo rọ rhere rhi sivwo-o.” Ọtiọyena aye na gbe ọfanrhiẹ-ẹn. Ọshare na gbe igberadja kidie ọ gba aye ra sa phiyotọ na, o “de duo.”

Kọyen, dede nẹ urhi na tare nẹ aye na riase, ikuegbe na djerephia nẹ ọshare na gbe igberadja, o ji gbe aye na ẹgua. O muẹro nẹ iguẹdjọ na cha nabọ “vwẹ oma kpotọ guọnọ” otọ rẹ obo re phiare na ji brorhiẹn nene urhi rẹ Ọghẹnẹ phi phiyọ otọ je vwanriẹ kẹ ayen abọ buebun na.—Urhi 13:14; 17:4; Eyan. 20:14.