“Ovwan Kpẹvwẹ Vwi Kẹdia Kẹdia”
WẸWẸ ohwo rọ kpẹvwẹ ẹse? Ọnana onọ ro fori nẹ ohwo ọvuọvo roro kpahen. Baibol na tare nẹ vwẹ ọke re de yeren na ihwo “gbe cha riẹn ẹse-e.” (2 Tim. 3:2) Ọkiọvo, wọ mrẹ ihwo evo rẹ emu daro-o. Ayen no nẹ ofori rẹ ayen vwo dje ọdavwaro phia fikirẹ oborẹ ihwo ruẹ kẹ aye-en. Wọ cha rhọnvwe nẹ ọ bẹn re vwo nene ihwo tiọyena yerin.
Vwọ fẹnẹ ayen, a vuẹ idibo ri Jihova nẹ ayen “kpẹvwẹ” ẹse. Avwanre “kpẹvwẹ vwi kẹdia kẹdia” rẹ avwanre hepha ejobi. (Kọl. 3:15; 1 Tẹsa. 5:18) Vwọrẹ uyota, ofori nẹ avwanre vwo ẹwẹn rẹ akpẹvwẹ. O vwo iroro buebun re sorọ.
URUEMU RẸ AKPẸVWẸ NẸRHẸ OMA VWERHEN OHWO
Iroro ọvo kiriguo rọ sorọ re vwo vwo ẹwẹn rẹ akpẹvwẹ yen, ọ nẹrhẹ oma vwerhen avwanre. Oma cha vwerhen ohwo rọ kpẹvwẹ ẹse na ọtiọyen ji te ohwo ra kpẹvwẹ na. Diesorọ uruemu ra vwọ kpẹvwẹ ẹse vwọ nẹrhẹ oma vwerhen avwanre vẹ ihwo efa? Kerẹ udje, oma cha vwerhen owẹ siẹrẹ ihwo de ru erọnvwọn kẹ wẹ kidie ayen niro nẹ wo muwan rọyen. Ayen vwo ẹguọnọ wẹn. Siẹrẹ wọ da mrẹ enana eje, oma kọ vwerhen owẹ. Ọnana yen obo re phia kẹ Rutu. Boaz ruẹse kẹ Rutu. O muẹro nẹ ẹse ri Boaz ru kẹ Rutu na nẹrhẹ oma vwerhọn.—Rutu 2:10-13.
Ofori nẹ avwanre kpẹvwẹ Ọghẹnẹ. Aphro herọ-ọ nẹ ọkievo, avwanre se roro kpahen okẹ rẹ Ota rọyen vẹ ẹse efa re rhiẹromrẹ ro ruẹ kẹ avwanre. (Urhi 8:17, 18; Iruo 14:17) Ukperẹ e di vwo roro kpahen ẹse rẹ Ọghẹnẹ ru kẹ avwanre ọmọke krẹn, ofori nẹ a frẹkotọ roro kpahen kemu kemu ri Jihova ru kẹ avwanre vẹ ihwo rẹ avwanre vwo ẹguọnọ kpahen. Wo de roro kpahen uruemu rẹ ẹse-eruo rẹ Ọmemama wẹn na, ọdavwaro ru wo vwo kpahọn kọ cha ganphiyọ. Ọnana je cha kpuriẹnphiyọ imuẹro ru wo vwori nẹ o vwo ẹguọnọ vẹ ọdavwẹ wẹn.—1 Jọn 4:9.
E jẹ avwanre roro kpahen oborẹ Jihova ruẹ kẹ avwanre, a me je kpẹvwẹ fikirẹ uyoyovwin rọyen. (Une 100:4, 5) Ihwo tare nẹ “avwanre da kpẹvwẹ ihwo, oma kọ vwerhen ayen phiyọ.”
URUEMU RẸ AKPẸVWẸ SI AVWANRE KẸRẸ OHWOHWO PHIYỌ
Iroro ọfa rọ nẹrhẹ wo vwo uruemu rẹ akpẹvwẹ yen, ọ kpuriẹnphiyọ oyerinkugbe. Avwanre eje guọnọre nẹ e dje ọdavwaro kẹ avwanre. Siẹrẹ wọ da kpẹvwẹ ohwo fikirẹ ẹse ro ru kẹ wẹ, kẹ ovwan cha dia uvi rẹ ugbeyan. (Rom 16:3, 4) Vwọba, ihwo re kpẹvwẹ ẹse vwo ẹwẹn rẹ ayen vwọ chọn ihwo efa uko. Ayen da mrẹ ẹse rẹ ihwo ru kẹ ayen, ọnana ko mu ayen vwo ruẹse kẹ ihwo efa. Aphro herọ-ọ, a vwọ chọn ihwo efa uko nẹrhẹ oma vwerhen ohwo. Ọna rhọnvwephiyọ eta ri Jesu nana: “Ẹrhovwo herọ kẹ ọkokẹ nọ ohwo ra kẹ.”—Iruo 20:35.
Robert Emmons rọ dia ọvo usunrẹ ihwo re vwẹrote ehiahiẹ re ru kpahen uruemu rẹ akpẹvwẹ vwẹ Iyunivasiti ri California tare nẹ, “A vwọ dia ohwo rọ kpẹvwẹ ẹse, ofori ra vwọ riẹn nẹ avwanre guọnọ ukẹcha rẹ ohwohwo. Okiọvo avwanre yen chọn ihwo uko, vwẹ ọkiefa, ihwo me rha chọn avwanre uko.” A sa vwọ dia akpọ ji vwo omavwerhovwẹn, avwanre guọnọ ukẹcha rẹ ihwo efa vwẹ idjerhe buebun. Kerẹ udje, ọkiọvo ihwo efa yen chere emu rẹ avwanre ria yẹrẹ vwẹrote avwanre siẹrẹ avwanre da muọga. (1 Kọr. 12:21) Ohwo rọ kpẹvwẹ ẹse dje ọdavwaro phia kpahen oborẹ ihwo efa ru vwọ kẹ. Ọtiọyena, wo vwo ẹkuruemu wọ vwọ kpẹvwẹ ihwo fikirẹ oborẹ ayen ru kẹ wẹ?
URUEMU RẸ AKPẸVWẸ SE WENE ẸRO RE VWO NI AKPEYEREN
Iroro ọfa rọ nẹrhẹ e vwo uruemu rẹ akpẹvwẹ yen, ọ chọn avwanre uko vwọ tẹnroviẹ obo ri yovwirin ukperẹ obo re brare. Ọtiọyena iroro rẹ avwanre họhọ ifita. Uruemu rẹ akpẹvwẹ cha nẹrhẹ wọ tẹnrovi erọnvwọn iyoyovwin re phia riariẹ owẹ phiyọ, wọ me kpairoro vrẹ e re brare. Uruemu nana sa nẹrhẹ a kpairoro vrẹ ebẹnbẹn rẹ akpeyeren. Uruemu rẹ akpẹvwẹ wẹn vwo kodophiyọ ye, erọnvwọn iyoyovwin keyen wọ je cha tẹnrovi, ọnana kọ cha nẹrhẹ ọdavwaro wẹn je ganphiyọ. Uruemu rẹ akpẹvwẹ rẹ ọkieje cha nẹrhẹ wo se ru oborẹ ọyinkọn Pọl jiri kẹ avwanre rọ vwọ ta: “Ghọghọ vwẹ evun rẹ Ọrovwohwo kẹdẹ kẹdẹ.”—Fil. 4:4.
Uruemu rẹ akpẹvwẹ cha nẹrhẹ wọ kẹnoma kẹ iroro ebrabra. Ubiudu rẹ ohwo cha sa vọn vẹ akpẹvwẹ ọ me je vwẹ ọke vuọvo na vwọ rioma, muomaphiyọ yẹrẹ phi ota phiyọ evu-un. Ihwo ri vwo uruemu rẹ akpẹvwẹ vwọtua ekuakua rẹ akpeyere-en. Ayen vwo ọdavwaro kpahen oborẹ ayen vwori ji yeren akpọ ri kekpe.—Fil. 4:12.
KERE EBRUPHIYỌ WẸN!
Kerẹ Onenikristi, riẹn nẹ Eshu guọnọre nẹ wo muomaphiyọ fikirẹ ebẹnbẹn ru wo hirharokuẹ vwẹ ẹdẹ rẹ oba na. Oma cha vwerhọn siẹrẹ wo de vwo uruemu re vwo brenu. Uruemu tiọyena sa so ukprowọ kẹ iyẹnrẹn esiri ru wo ghwoghwo na. Uruemu rẹ akpẹvwẹ churobọ si omamọ rẹ ẹwẹn ọfuanfon na. Kerẹ udje, ọ kẹ avwanre aghọghọ siẹrẹ a da mrẹ erọnvwọn iyoyovwin rẹ Ọghẹnẹ vwọ kẹ avwanre, kugbe esegbuyota rẹ avwanre vwo kpahen ive rọyen.—Gal. 5:22, 23.
Idibo ri Jihova vwo imuẹro nẹ obo ra ta kpahen uruemu rẹ akpẹvwẹ na gbare. Ẹkẹvuọvo, ọlọhọre re vwo vwo je sẹro rẹ uruemu nana-a. Wo jẹ onana si udu nẹ owẹ awọ-ọ. Avwanre se vwo je sẹro rẹ uruemu rẹ akpẹvwẹ. Vwẹ idjerhe vọ? Vwẹ kẹdi kẹdẹ vwo roro kpahen erọnvwọn evo vwẹ akpeyeren wẹn re sa nẹrhẹ wo dje ẹwẹn rẹ akpẹvwẹ phia. Wo de ru ọtiọyen, uruemu rẹ akpẹvwẹ kọ cha re dia ẹkuruemu wẹn. Ọnana cha nẹrhẹ wo vwo omavwerhovwẹn vrẹ ihwo re tẹnroviẹ ebẹnbẹn rayen. Roro kpahen erọnvwọn iyoyovwin rẹ Ọghẹnẹ kugbe ihwo efa ruru re kẹ wẹ omavwerhovwẹn. Wọ sa tobọ si ayen phiyotọ. Wo se si erọnvwọn ivẹ yẹrẹ erha ru wọ cha kpẹvwẹ ẹse rọyen vwẹ ẹdẹ yena.
Ihwo evo ri yono kpahen uruemu rẹ akpẹvwẹ tare nẹ, “avwanre de vwo ẹkuruemu ra vwọ kpẹvwẹ ẹse, o che wene idjerhe rẹ afọnrhe avwanre wian wan, kọ cha lọhọ rẹ oma vwọ vwerhen avwanre.” Ohwo ro vwo uruemu ra vwọ kpẹvwẹ ẹse, ọyen oma ma vwerhan. Ọtiọyena, gbe kere ebruphiyọ wẹn, riavwerhen rẹ emu iyoyovwin re phia vwẹ akpeyeren wẹn rere wọ dje ẹwẹn rẹ akpẹvwẹ phia! Ukperẹ wọ vwọ vwẹ ẹro ri phovwin vwo ni emu iyoyovwin re phia vwẹ akpeyeren wẹn, gba “vwẹ ẹkpẹvwẹ kẹ Ọrovwohwo” kidie o yovwinrin. E, “kpẹvwẹ vwi kẹdia kẹdia rẹ ovwan epha ejobi.”—1 Ikun 16:34; 1 Tẹsa. 5:18.