Ẹjo, o vwo asan vuọvo vwẹ Baibol na yẹrẹ ẹbe rẹ ikuegbe ro djerephia nẹ e ru emu tiọye-en.

Obo ra fan owọrota nana wan vwẹ Baibol buebun nẹrhẹ ihwo evo roro nẹ vwẹ ọke ri Pọl e bru ihwo phiyame vwọ kẹ erere rẹ ihwo ri ghwuru. Kerẹ udje, vwẹ New International Version, o de se: “Ọ da dianẹ evrẹnushi herọ-ọ, kẹ die yen ihwo re bruphiyame vwọ kẹ ihwo ri ghwuru che ru?”

Ẹkẹvuọvo, vwo oniso rẹ oborẹ ihwo ivẹ ri yono Baibol kodo tare. Dr. Gregory Lockwood tare nẹ o vwo asan vuọvo vwẹ Baibol na yẹrẹ ẹbe rẹ ikuegbe ro djerephia nẹ e bru ohwo phiyame vwẹ ẹdia rẹ ohwo ro ghwuru-u. Professor Gordon D. Fee da je tanẹ o vwo asan vuọvo re se mu omaebrophiyame tiọyena kpahen vwẹ ẹbe rẹ ikuegbe yẹrẹ Baibol na-a, e djunute kakaka vwẹ Ọphọ Ọkpokpọ na-a, o ji vwo emu vuọvo ro djerephia nẹ Inenikristi rẹ ẹgbukpe ujorin ẹsosuọ yẹrẹ ishọshi efa ru ọtiọyen ọke rẹ iyinkọn na ghwe vwo ghwu nu-u.

Baibol na tare nẹ Inenikristi che “gbe idibo rẹ ihworakpọ na ejobi, . . . bru ayen phiyọ ame . . . , yono ayen vwọ riẹn otọ rẹ imu na ejobi” rẹ Jesu ji iji rọyen. (Mat. 28:19, 20, NW) Tavwen ohwo ki se bromaphiyame kerẹ odibo ri Jesu, o che yono, vwo esegbuyota kpahen, ji nyẹme ri Jihova kugbe Ọmọ rọyen. Ohwo ro ghwuru rọhẹ evunrẹ ushi che se ru ọtiọye-en; Onenikristi rọhẹ akpọ ji che se ruo vwọ kẹ-ẹ.—Aghwo. 9:5, 10; Jọn 4:1; 1 Kọr. 1:14-16.

Kẹ die yen ota ri Pọl na mudiaphiyọ?

Ihwo ri Kọrẹnt evo tare nẹ a cha kpare ihwo ri ghwuru vrẹ-ẹn. (1 Kọr. 15:12) Pọl vwọso iroro yena. O djere nẹ ọyen “ghwẹ kẹdẹ kẹdẹ,” dede nẹ ọ jehẹ akpọ vwẹ ọke yena. Jẹ, o toro imuoshọ ro hirharoku-u, o vwo imuẹro dẹn nẹ ọyen de ghwu, a cha kpare ọyen vrẹn nushi kpo odjuvwu kirobo re ru kẹ Jesu.—1 Kọr. 15:30-32, 42-44.

Ofori nẹ ihwo ri Kọrẹnt mrẹvughe nẹ kerẹ Inenikristi ra jẹreyọ, ayen che hirharoku edavwini kẹdẹ kẹdẹ ji ghwu tavwen a ke sa rhọvwọn ayen nushi. “[“Omaebrophiyame,” NW] vwẹ odẹ ri Jesu Kristi,” churobọ si “[“omaebrophiyame,” NW] vwọ kẹ ughwu rọye.” (Rom 6:3) Otọ rọyen, kerẹ Jesu, ayen che rhiẹromrẹ edavwini ji ghwu tavwen a ke rhọvwọn ayen nushi vwo kpo odjuvwu.

Jesu vwo bromaphiyame vrẹ ẹgbukpe ivẹ nu, ọ da vuẹ ivẹ usun rẹ iyinkọn rọyen: “Obo re bruvwephiyame na eriyin e ji che bru ovwan phiyame.” (Mak 10:38, 39, NW) Ọ dia ọke re vwo bru Jesu phiyame yen ọ vwọ ta ota yena-a. Ota rọyen mudiaphiyọ nẹ ughwu yen cha dia okuphiyotọ rẹ ọyọnregan rọyen. Pọl siri nẹ otu ra jẹreyọ na cha “re oja” kugbe, rere ayen sa vwọ “ghọghọ kugbe.” (Rom 8:16, 17; 2 Kọr. 4:17) Ọtiọyena, ayen ji che ghwu rere a sa vwọ rhọvwọn ayen nushi vwo kpo odjuvwu.

Kọyen a sa fan eta ri Pọl na gbagba enẹ: “Ọ rha dia ọtiọye-en, erere vọ yen herọ vwọ kẹ ihwo re bruphiyame vẹ ẹwẹn nẹ ayen che ghwu? Ọ da dianẹ a cha rhọvwọn ihwo ri ghwuru nushi kakaka-a, kẹ diesorọ e vwo brẹ ayen phiyame fikirẹ iroro yena?”