MAVỌ yen oma ru we siẹrẹ ugbeyan wẹn de si ileta rẹ uchebro rhe we? Ọyinkọn Pọl si oka rẹ ileta tiọyena rhe Timoti, ra rhe riẹn phiyọ ọbe ri 2 Timoti vwẹ Baibol na enẹna. Aphro herọ-ọ, o muẹro nẹ Timoti guọnọ asan rọ fọre ro de se se oborẹ ugbeyan rọyen si rhe na. Ọkiọvo Timoti se roro: ‘Oma ri Pọl ganre? Ọ guọnọ kẹ vwẹ uchebro kpahen iruo mẹ? Ileta nana sa nẹrhẹ mi ruiruo rẹ aghwoghwo mẹ fiotọ phiyọ je chọn ihwo efa uko?’ Kirobo ra cha mrẹ obọ, Timoti mrẹ ẹkpahọnphiyọ rẹ enọ nana vẹ evuẹ efa vwẹ ileta ọghanghanre nana. Ẹsosuọ, e jẹ a tẹnrovi uchebro evo re sa vwẹ ukẹcha kẹ avwanre vwẹ ileta nana.

Ugege rẹ Timoti vwọ ton ese rẹ ileta na phiyọ, ọ da mrẹ oborẹ Pọl ghini vwo ẹguọnọ rọyen te. Pọl sere “ọmọ mẹ rọ ghare.” (2 Tim. 1:2) Ileta na te Timoti obọ omarẹ ukpe ri 65 C.E., ọ họhọre nẹ ọ vrẹ ẹgbukpe 30 re vwẹ ọke yena, ọ je ga krẹre kerẹ ọkpako. Ọ vrẹ ẹgbukpe ihwe rọ vẹ Pọl vwọ wian kuẹgbe re, o ji yono erọnvwọn buebun mie re.

O muẹro nẹ Timoti mrẹ uduephiophiyawọ rọ vwọ riẹn nẹ Pọl fuevun chirakon rẹ ukpokpogho. A vwẹ igoni kanre Pọl vwẹ Rom; o rhe che kri-i ke che hwe. (2 Tim. 1:15, 16; 4:6-8) Timoti mrẹvughe nẹ Pọl fiudugberi kidie ọ tare nẹ, “Mi chiri kemu kemu.” (2 Tim. 2:8-13) Kerẹ Timoti, udje rẹ akoechiron ri Pọl ji se ru avwanre gan.

Pọl vuẹ Timoti nẹ ọ vwẹ ẹro ọghanghanre vwo ni iruo rọyen vwẹ ẹga rẹ Ọghẹnẹ. Pọl guọnọre nẹ Timoti “rhiọ” yẹrẹ koko erhanre phiyọ “okẹ” rẹ Ọghẹnẹ rọhẹ oma rọyen. (2 Tim. 1:6) Pọl reyọ ubiota ri Grik na khaʹri·sma ro mudiaphiyọ “okẹ” vwo ruiruo. Ubiota ri Grik yena mudiaphiyọ ẹserọphẹ. A vwẹ okẹ nana kẹ Timoti ọke ra vwọ reyọ vwo mu rere ọ ga vwẹ ukoko na vwẹ idjerhe oghẹresan.—1 Tim. 4:14.

Die yen Timoti cha reyọ okẹ na vwo ru? Ro vwo se eta na “rhiọ” yẹrẹ koko erhanre phiyọ na, ọ sa dianẹ o roro kpahen oborẹ irhe re koko phiyọ erhanre sa ton te ẹdia ri de hirhephiyọ imwerhanre. Ofori nẹ e phi irhe phiyọ erhanre tiọyena rere ọ sa vwọ nabọ riẹn la. Ọbe ọvo rọ fan eta tare nẹ ubiota ri Grik (a·na·zo·py·reʹo) rẹ Pọl vwo ruiruo na mudiaphiyọ “koko erhanre phiyọ, dju erhanre,” ọtiọyena, Pọl ta ota  kpahen “re vwo ruiruo vẹ oruru.” Kọyen Pọl vwẹ uchebro kẹ Timoti nẹ, ‘Ruiruo wẹn vẹ oruru!’ Nonẹna, ofori nẹ avwanre ji ruiruo rẹ avwanre vẹ oruru.

Timoti vwo se ileta na yanran, ọ da mrẹ ota ọfa rọ cha vwẹ ukẹcha kẹ vwo ruiruo rẹ aghwoghwo rọyen fiotọ. Pọl de si: “Sẹro rẹ uyota na rẹ Erhi [“ẹwẹn,” NW] ọfuanfon na vwọ kẹ wẹ yọnre na rọ dia evun rẹ avwanre na.” (2 Tim. 1:14) Die yen uyota yena? Die yen a vwọ kẹ Timoti yọnre? Vwẹ owọrota 13 Pọl ta ota kpahen “omamọ rẹ uyono,” rọ dia uyota rọhẹ Baibol na. (2 Tim. 1:13) Kerẹ Onenikristi re vwo mu, ofori nẹ Timoti ghwoghwo uyota na kẹ iniọvo na vẹ ihwo efa rehẹ ekogho ro de ghwoghwo. (2 Tim. 4:1-5) Vwọba, a je reyọ Timoti vwo mu ọkpako rere ọ vwẹrote igodẹ rẹ Ọghẹnẹ. (1 Pita 5:2) Timoti sa sẹro uyota na ro che yono ihwo efa siẹrẹ ọ da vwẹroso ẹwẹn ọfuanfon na kugbe Ota rẹ Ọghẹnẹ.—2 Tim. 3:14-17.

Nonẹna, a je vwẹ uyota rẹ avwanre ghwoghwo na vwọ kẹ avwanre yọnre. (Mat. 28:19, 20) Ofori nẹ a nẹrhovwo je fuẹrẹn Ota rẹ Ọghẹnẹ ọkieje rere a sa vwọ vwẹ ẹro ọghanghanre vwo ni uyota ra vwọ kẹ avwanre yọnre na. (Rom 12:11, 12; 1 Tim. 4:13, 15, 16) Ọkiọvo uphẹn ra vwọ dia ọkobaro yẹrẹ ga kerẹ ọkpako ji se te ohwo obọ. Ofori nẹ iruo ọghanghanre tiọyena nẹrhẹ avwanre vwomakpotọ je nokpẹn rẹ ukẹcha mie Ọghẹnẹ. Avwanre sa sẹro rẹ obo ra vwọ kẹ avwanre yọnre siẹrẹ e de no ghanghanre je vwẹroso Jihova vwọ kẹ ukẹcha.

Ọ dia Timoti ọvo yen che ruiruo ra vwọ kẹ na-a, o ji che yono ihwo efa phiyọ. Ọyena yen sorọ rẹ Pọl vwọ vuẹ Timoti nẹ, “Obo ru wo nyo mie vwe . . . vwẹ ayen yono ihwo ri vwo esegbuyota re je sa vwẹ ayen yono ihwo efa rhe.” (2 Tim. 2:2) Pọl karophiyọ Timoti nẹ o yono iniọvo na erọnvwọn eje ro yonori. Nonẹna, o ji fo nẹ ekpako ukoko eje davwẹngba vwo ru ọtiọyen. Uvi rẹ oniruo siẹ erianriẹn ro vwori kpahen iruo evo nẹ-ẹ. Ukperẹ ọtiọyen, o yono ihwo efa rere ayen sa vwọ tẹn ona rẹ iruo na. Oshọ muo nẹ ayen cha riẹn iruo na yẹrẹ ruo fiotọ vrẹ ọye-en. Kọyen, ọ dia obo ro fori nẹ ayen riẹn kpahen iruo na ọvo yen o yono aye-en. Ọ je vwẹ ukẹcha kẹ ayen vwo ruẹ oyerinkugbe rayen vẹ Jihova ganphiyọ. Vwẹ idjerhe ọtiọyena, “ihwo ri vwo esegbuyota” ro yonori na ke sa nabọ vwẹ ukẹcha kẹ ukoko na.

Aphro herọ-ọ, oma vwerhen Timoti mamọ kpahen ileta rẹ Pọl si rhe na. Avwanre sa vwẹ ẹwẹn roro uche abọ rọ vwariẹn ileta na se ro vwo roro kpahen idjerhe ro me yovwin rọ sa vwọ reyọ uchebro ọghanghanre rọhẹ evun rọyen vwo ruiruo.

Avwanre je guọnọ reyọ uchebro nana vwo ruiruo. Vwẹ idjerhe vọ? Avwanre sa sẹro rẹ uyota na, davwẹngba vwọ reyọ okẹ rẹ avwanre vwo ruiruo vẹ oruru kerẹ imwerhanre re phi irhe phiyọ, je reyọ oborẹ avwanre riẹnre vwo yono ihwo efa. E de ru ọtiọyen, ke se “gbe odibo [avwanre] gba” kirobo rẹ Pọl vuẹ Timoti.—2 Tim. 4:5.