Wọ nabọ frẹkotọ se ọbe Uwevwin Orhẹrẹ na eje ra teyenphia vwẹ enukpe na? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Ẹro vọ yen ofori nẹ e vwo ni ihwo ra jẹreyọ na?

Avwanre vwẹ ẹro ọghanghanre vwo nẹ esegbuyota rayen, ẹkẹvuọvo e titi ayen gan nọ-ọ. Ofori nẹ a kẹnoma kẹ uruemu re vwo “brugun hẹ ihwo oma.” (Jud 16) A nọ ayen kpahen obo ra jẹ ayen reyọ wa-an.—w20.01, aruọbe 29.

Die yen ofori nẹ ọ kẹ wẹ imuẹro nẹ Jihova ni we sua?

Baibol na djerephia nẹ Jihova vughe uwe tavwen e ki vwiẹ wẹ. Ọ kerhọ rẹ ẹrhovwo wẹn. Ọ riẹn ọdavwẹ vẹ iroro rehẹ udu wẹn, uruemu wẹn ji djobọte. (1 Ikun 28:9; Isẹ 27:11) O si we te oma.—w20.02, aruọbe 12.

Erhọ yen udje evo rẹ ọke ra vwọ ta ota vẹ ọke ra vwọ fọ?

Avwanre vuẹ ihwo efa kpahen Jihova vẹ omavwerhovwẹn. Avwanre ta ota siẹrẹ a da mrẹ ohwo rọ guọnọ ruẹ obo re chọre. Ekpako vwẹ uchebro phia vwẹ ọke ro fori. Avwanre vuẹ ihwo efa kpahen obo re ruiruo rẹ avwanre wan vwẹ ẹkuotọ ra da dobọ rẹ iruo avwanre ji-i. Avwanre vwẹ evuẹ rẹ odjahọn phia-a.—w20.03, aruẹbe 20-21.

Idjerhe vọ yen igurube rehẹ uyovwin 2 rẹ ọbe ri Joẹl vwọ fẹnẹ e rehẹ uyovwin 9 rẹ ọbe rẹ Ẹvwọphia?

Joẹl 2:20-29 tare nẹ Ọghẹnẹ cha djẹ igurube na, o ji ve nẹ ọyen cha hwosa rẹ oghwọrọ rẹ igurube na soro. Ọyena da wan nu, ko ku ẹwẹn rọyen ku ihwo. Ọyena rugba ọke rẹ ihwo ri Babilọn vwọ rhe họnre Izrẹl kugbe ọke ọfa. Ẹvwọphia 9:1-11 djisẹ rẹ idibo ri Jihova ra jẹreyọ re pha kerẹ igurube. Ayen ghwoghwo ẹdjọeguo rẹ Ọghẹnẹ kpahen akpọ umwemwu nana, ọtiọyena, ẹwẹn ko kpokpo ihwo re ka ẹbẹre rẹ akpọ na.—w20.04, aruẹbe 3-6.

Ono yen ovie rẹ obohwẹre ọnre na nonẹna?

Russia vẹ ẹkuotọ ri biẹcha. Ayen vwọso idibo rẹ Ọghẹnẹ ọke rẹ ayen vwọ dobọ rẹ iruo rẹ aghwoghwo na ji, ji dje utuoma rayen phia kpahen Iseri ri Jihova. Ovie rẹ obohwẹre ọnre na nene ovie rẹ obọrhen ọnre na họnra.—w20.05, aruọbe 13.

Iruemu re djunute vwẹ Galesha 5:22, 23 (NW) na ọvo yen “omamọ rẹ ẹwẹn na”?

Ẹjo. Ẹwẹn ọfuanfon na sa chọn avwanre uko vwo vwo iruemu iyoyovwin efa, kerẹ ọvwata. (Ẹfe. 5:8, 9)—w20.06, aruọbe 17.

Ọrhọ yen imuoshọ ọvo rọ herọ siẹrẹ wo de phi eta, ifoto, yẹrẹ ividio rẹ oma wẹn phiyọ intanẹti?

Oborẹ wo phi phiyọ intanẹti sa nẹrhẹ e no nẹ wẹwẹ ohwo rọ kparoma, ukperẹ ohwo rọ vwomakpotọ.—w20.07, aruẹbe 6-7.

Die yen inenikristi se yono mie ihwiyerin re tẹn ona?

Ayen wian vwẹ ọke vẹ asan rẹ ayen da sa mrẹ iyerin hwe. E yono ayen oborẹ ayen sa vwọ reyọ ekuakua ri fori vwo ruiruo. Ayen fiudugberẹ nuẹ nene iruo na. Eriyin avwanre ji ruẹ vwẹ iruo rẹ aghwoghwo rẹ avwanre.—w20.09, aruọbe 5.

Erhọ yen idjerhe evo re se vwo ru ẹguọnọ rẹ ihwo rẹ avwanre yono vwori kpahen Ọghẹnẹ ganphiyọ?

Avwanre se jiro kẹ ayen nẹ ayen se Baibol na kẹdẹ kẹdẹ ji roro kpahen oborẹ ayen seri. E ji se yono ayen obo ra nẹrhovwo.—w20.11, aruọbe 4.

Amono yen ota nana shekpahen: “Vwẹ oma ri Kristi ihwo ejobi ke cha rhọ”?—1 Kọr. 15:22.

Ọ dia ọyinkọn Pọl tanẹ a cha rhọvwọn ihworakpọ eje-e. Ọ ta ota kpahan Inenikristi ra jẹreyọ, re dia “ihwo re rufon vwẹ evun ri Kristi Jesu.” (1 Kọr. 1:2; 15:18)—w20.12, aruẹbe 5-6.

Die yen Inenikristi ra jẹreyọ na che ru ọke rẹ ayen de ‘wene vwẹ ẹroẹbrẹ vwẹ ọke rẹ owanre rẹ obo oba na’ nu?—1 Kọr. 15:51-53.

Ayen che nene Jesu wiankugbe vwọ reyọ ọkpọ rẹ utehru vwo sun ẹgborho na. (Ẹvwọ. 2:26, 27)—w20.12, aruẹbe 12-13.