Wọ nabọ frẹkotọ se ọbe Uwevwin Orhẹrẹ na eje ra teyenphia vwẹ enukpe na? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Imuẹro vọ yen Une Rẹ Ejiro 103:8 vwọ kẹ avwanre rọ vwọ tanẹ Jihova “vọnre vẹ arodọvwẹ vẹ ehrọre”?

Kidie nẹ Jihova vọnre vẹ arodọvwẹ na, avwanre riẹnre nẹ o vwo owenvwe ro vwo ghovwo echobọ rẹ avwanre. Une Rẹ Ejiro 103:8 kẹ avwanre imuẹro nẹ Jihova vọnre vẹ ehrọre, o ji muegbe rọ vwọ chọn avwanre uko. Ofori nẹ a vwẹrokere.—w21.01, p. 21.

Diesorọ Jihova vwọ vwẹ ọrhuẹrẹphiyotọ ọgbuyovwin na vwo mu?

Ẹguọnọ yen muro vwo ruo. Ọrhuẹrẹphiyotọ nana nẹrhẹ orua rọyen yerẹn vwọrẹ ufuoma kugbẹ okugbe. Kohwo kohwo vwẹ orua na ro nene ọrhuẹrẹphiyotọ nana riẹn ohwo ro fori nẹ o brorhiẹn rẹ obo che ru vẹ obo re che ruo wan.—w21.02, p. 3.

Diesorọ Inenikristi vwọ jomaotọ kpahen ẹreyọ vwo ruiruo rẹ aplikeshọni sansan ra vwọ vwẹ evuẹ rhe ihwo efa?

Ohwo de brorhiẹn rọ vwọ reyọ aplikeshọni tiọyen vwo ruiruo, ofori nẹ ọ sane igbeyan ro muẹ vwẹ etiyin. Jẹ, ọnana cha bẹn eruo siẹrẹ ihwo na de bun. (1 Tim. 5:13) Imuoshọ efa je herọ kpahen ra vwọ hwarhiẹ evuẹ ri muẹro-o vẹ ra vwọ vwẹ iniọvo rehẹ ukoko na vwọ chueki.—w21.03, p. 31.

Diesorọ Ọghẹnẹ vwọ vwẹ uphẹn kẹ Jesu nẹ ọ rioja ji ghwu?

Emu ọvo rọ sorọ yen, a kanre Jesu mu urhe rẹ oja rere o se vwo sivwin ihwo ri Ju vwo nẹ ekan ọvo kiriguo. (Gal. 3:10, 13) Ọrivẹ yen ọ guọnọ muegbe rẹ Jesu hẹrhẹ ọke rọ cha vwọ dia Orherẹn Rode. Ọrerha yen Jesu vwo djephia nẹ ihworakpọ ri jẹgba sa fuevun ke Jihova siẹrẹ ayen de hirharoku ọdavwini ọgangan. (Job 1:9-11)—w21.04, pp. 16-17.

Die wo se ru siẹrẹ wọ da mrẹ bẹnbẹn wọ vwọ mrẹ ihwo ghwoghwo kẹ vwẹ iruo rẹ aghwoghwo na?

Wọ sa davwẹngba vwo bru ayen ra vwẹ ọke wo rori nẹ a da sa mrẹ ayen vwẹ uwevwin. Wọ sa davwẹngba vwo ghwoghwo vwẹ ekogho ọfa rọ fẹnẹre. Wọ je sa davwen ena efa kerẹ re vwo siẹ ileta.—w21.05, pp. 15-16.

Die yen otọ rẹ ota nana rẹ Pọl tare: “Me wan oma rẹ urhi na ghwu kẹ urhi”? (Gal. 2:19)

Urhi ri Mosis na nẹrhẹ jẹgba rẹ ihworakpọ teyenphia ji sun ihwo rẹ Izrẹl vwo bru Kristi. (Gal. 3:19, 24) Ọnana yen nẹrhẹ Pọl rhiabọreyọ Kristi. Ro vwo ru ọtiọyen, Pọl de “ghwu kẹ urhi”; ọ rha dia ọviẹn vwọ kẹ-ẹ.—w21.06, p. 31.

Idjerhe vọ yen Jihova vwo djudje rẹ uruemu rẹ akoechiron phia vwọ kẹ avwanre?

Jihova chirakon rẹ odẹ rọyen re gbeku, ẹvwọsuọ rẹ usuon rọyen, ẹvwọsuọ rẹ emọ rọyen evo, efian rẹ Idẹbono guẹn ọkieje, ojaẹriọ rẹ idibo rọyen, ughwu rẹ igbeyan rọyen, ihwo ebrabra re vwẹ oja ria ihwo efa kugbe ihwo re ghwọrọ akpọ rọ mare na.—w21.07, pp. 9-12.

Uvi rẹ udje rẹ akoechiron vọ yen Josẹf phiyọto?

O chirakon rẹ oshenyẹ rẹ iniọvo rọyen. Ọnana da nẹrhẹ e gun efian nyẹ ji muo phiyọ uwodi vwẹ Ijipt vwẹ ikpe buebun.—w21.08, p. 12.

Oka rẹ ekpogho rẹ udje vọ yen Haggai 2:6-9, 20-22 mraro rọyen phiyotọ?

Ihwo rẹ ẹgborho na sen ovuẹ rẹ Uvie na, jẹ ihwo buebun mrẹ uyota na vughe re. O rhe che kri-i, ẹgborho na eje che kpogho ọke ra da ghwọrọ ayen ejobi re.—w21.09, pp. 15-19.

Diesorọ ofu rẹ iruo rẹ aghwoghwo na vwo jẹ avwanre edje?

Jihova mrẹ ẹgbaẹdavwọn rẹ avwanre, ọnana kẹ omavwerhovwẹn. Avwanre che vwo arhọ ri bẹdẹ siẹrẹ oma rha rhọ avwanre-e.—w21.10, pp. 25-26.

Mavọ yen Livitikọs uyovwin 19 vwọ chọn avwanre uko vwọ riẹn obo ra sa vwọ vwẹ uchebro na: “Ovwan gba fon vwẹ oma rẹ ovwan vwẹ uruemu rẹ ovwan ejobi” vwo ruiruo? (1 Pita 1:15)

Ọ sa dianẹ Livitikọs 19:2 yen owọrota yena nurhe. Uyovwin 19 djudje buebun rẹ obo ra sa vwọ reyọ uchebro rọhe 1 Pita 1:15 vwo ruiruo vwẹ akpeyeren re kẹdẹ kẹdẹ rẹ avwanre.—w21.12, pp. 3-4.