VWẸ March 26, 1937, oma ghwọrọ eshare ivẹ re djẹ imoto awanre rayen vwo kpo Sydney, obẹ Australia. Rhavwen ọke ayen vwo vrẹn nẹ orere na omarẹ ẹgbukpe ọvo rọ wanre, ayen djẹ iroko 19,300 kpo asan ri sherabọ vwẹ ubrakpọ rẹ Australia. Enana dia ihwo re de guọnọ riẹn oborẹ asan na hepha-a. Arthur Willis vẹ Bill Newlands hẹ usun rẹ ekobaro ri vwo oruru, ri muegbe ayen vwọ hwarhiẹ iyẹnrẹn esiri rẹ Uvie na ro asan ri sherabọ vwẹ Australia.

Tavwen a ke mrẹ ukpe rẹ 1930, Emọ-uyono rẹ Baibol na * rehẹ Australia ghwoghwo ota na vwevunrẹ irere ride buebun re kẹrẹ ame. Asan rẹ ayen ji ghwoghwo ota te-e, rho vrẹ Nigeria na ako esan. Ẹkẹvuọvo, iniọvo na riẹnre nẹ idibo rẹ Jesu che se oseri “te oba rẹ akpọ na,” ji te asan ri sherabọ vwẹ Australia. (Iruo 1:8) Mavọ yen ayen se vwo ruiruo rode nana? Vẹ esegbuyota kokoroko nẹ Jihova che ku ebruphiyọ ku ẹgbaẹdavwọn rayen, ayen de muegbe ayen vwo ru asan rẹ ẹgba rayen teri.

Vwẹ 1929, ikoko rehẹ Queensland vẹ Western Australia da nabọ muegbe rẹ imoto ride sansan rere ayen se vwo ghwoghwo ota vwẹ ibrotọ na. Ekobaro ri vwo ẹgba yen djẹ imoto na rere ayen sa vwọ rhuẹrẹ siẹrẹ ọ de miovwin kidiẹ asan na pha chohri chohri. Ekobaro nana te asan buebun rẹ iyẹnrẹn esiri na ji te dẹvo-o.

Ekobaro re sa dẹ imoto-o, ke vwẹ idjighere vwo kpo asan tiọyena. Kerẹ udje, vwẹ 1932, Bennett Brickell rọhẹ ẹgbukpe 23 djẹ idjighere rọyen nẹ Rockhampton, vwẹ Queensland, kpo asan ri sherabọ rẹ ubrotọ na; o ruiruo aghwoghwo na oboyin vwẹ emeranvwe iyorin. Ọ ghwa itiani, iwun, emu vẹ ẹbe buebun nene oma. Itaya rẹ idjighere na da tobọ fi, udu bro-o, o vwo imuẹro nẹ Jihova cha sẹro rọyen. Vwẹ oyan rọ koba rọyen, o ghoriẹ idjighere na omarẹ iroko ri te 320, wan asan rẹ urhuru rẹ ame de hwe ihwo ghwu jovwo re. Vwẹ ẹgbukpe 30 efa, Oniọvo Brickell vwẹ idjighere, imotosaikoro, vẹ imoto vwo kpo asan ri sherabọ vwẹ Australia, asan ri sheri te iroko uriorin buebun. Ọyen ton iruo  aghwoghwo na phiyọ vwẹ asan rẹ ihwo rẹ Aborigine dia, ọ je vwẹ ikoko kpokpọ vwo mu, ọ da rhe dia ohwo re muọghọ kẹ ra nabọ riẹn vwẹ ekogho yena eje.

Ihwo rehẹ Australia ghwe bu-un, ma rho kẹ ẹbẹre ri sherabọ na. Ọtiọyena, idibo rẹ Jihova choma ayen vwo ghwoghwo ota kẹ ihwo rehẹ asan ri sherabọ vwẹ ẹkuotọ nana.

Stuart Keltie vẹ William Torrington, eyen ekobaro ri dje oruru ọgangan tiọna phia. Vwẹ 1933, ayen shariẹ Simpson Desert, rọ dia aton rẹ ekpẹn rọyen bunrun mamọ, vwo kpo Alice Springs re ghwoghwo ota. Ọke rẹ imoto rayen vwo miovwin, ayen da yan jovwo, ẹkẹvuọvo Oniọvo Keltie, ro vwo owọ rẹ urhe, je vwẹ ekẹtẹkẹtẹ vwo ruiruo aghwoghwo na kpobarophiyọ! Ekobaro na mrẹ erere vwẹ iruo aghwoghwo na ọke rẹ ayen vwọ mrẹ Charles Bernhardt rọ dia ohwo rọ vwẹrote ihotẹ vwẹ William Creek, asan rẹ itreni de mu ihwo. Ọshare nana rhiabọreyọ uyota na, ọ da shẹ ihotẹ rọyen, ọ da rhe dia ọkobaro vuọvo rọ hẹro vwẹ ẹgbukpe 15 ro vwo ghwoghwo vwẹ asan re pha yaya ri ji me sherabọ vwẹ Australia.

Ekobaro ẹsosuọ na ghene guọnọ uduefiogbere vẹ oruru ayen se vwo phi egbabọse rayen eje kparobọ. Ọke rẹ ayen vwo ghwoghwo vwẹ asan ri sherabọ vwẹ Australia, Arthur Willis vẹ Bill Newlands, re djunute vwẹ ọtonphiyọ na, ghwọrọ udughwrẹn ivẹ soso ayen ki se te asan ro sheri te iroko 32 kidie osio ọgangan nẹrhẹ aton na hirhe phiyọ egbọdọ. Ọkiọvo, oma ghwọrọ ayen mamọ, ọdja je dja ayen, rẹ ayen vwọ yan wan iyara re vọnre vẹ ikuta kugbe asan rẹ irhie kpọ nu; o ji vwo ọke rẹ ayen vwo gere imoto rayen wan ubu. Imoto rayen miovwẹn ọke buebun, ọtiọyena kẹ ayen vwẹ owọ yan yẹrẹ djẹ idjighere kpo orere rọ kẹrẹ asan na ra hẹrhẹ ọke ra vwọ rhuẹrẹ imoto na, ọnana sa reyọ idughwrẹn evo. Ayen tẹnrovi iruo aghwoghwo na dede nẹ ayen rhiẹromrẹ egbabọse nana eje. Arthur Willis vwọ ta eta rehẹ imagazini re se The Golden Age, ọ da ta: “O vwo idjerhe ro miovwin nọ yẹrẹ ro sheri nọ vwọ kẹ Iseri rẹ Jihova-a.”

Charles Harris rọ dia ọkobaro ọke grongron re, tare nẹ ebẹnbẹn ro rhiẹromrẹ vẹ ẹdia rẹ ọruvwohwo rọ hepha vwẹ asan ri sherabọ na siro kẹrẹ Jihova. Ọ da je ta: “Ofori nẹ ohwo krun eghwa buebun nyẹ oma-a. Jesu de se muegbe ro vwo sherhẹn otafe, o ji fo nẹ e ru ọtiọyen vẹ omavwerhovwẹn siẹrẹ iruo na da guọnọ.” Ọtiọyen ekobaro buebun ruru. Womarẹ ẹgbaẹdavwọn rayen ọyen iyẹnrẹn esiri na vwọ ro kasan kasan vwẹ ubrakpọ yena, ayen vwọ vwẹ ukẹcha kẹ ihwo buebun vwo rhiabọreyọ Uvie rẹ Ọghẹnẹ.