1-2. Diesorọ Jihova vwo rhie idjerhe phiyọ rere avwanre sa vwọ dia ẹbẹre ọvo rẹ orua rọyen, kẹ mavọ yen o ruro wan?

JIHOVA durhie avwanre rhe dia ẹbẹre ọvo rẹ orua rẹ ihwo re vwẹ ẹga kẹ. Ọnana uphẹn rode! Orua nana vọnre vẹ ihwo re vwomakpahotọ kẹ Ọghẹnẹ ri ji vwo esegbuyota kpahen izobo ọtanhirhe rẹ Ọmọ rọyen. Oma vwerhen ihwo rehẹ orua rẹ avwanre na. Avwanre yeren omamọ rẹ akpọ enẹna je rhẹro rẹ arhọ ri bẹdẹ vwẹ obaro na, owenẹ ọ dia obodjuvwu yẹrẹ otọrakpọ na.

² Ẹguọnọ yen mu Jihova vwo ru ọrhuẹrẹphiyoto nana, ọ dia uku rẹ erọnvwọn yen o vwo ze rere avwanre se vwo vwo arhọ na-a. (Jọn 3:16) O “vwo unuigho ra dẹ” avwanre. (1 Kọr. 6:20) Womarẹ ọtanhirhe na, Jihova ruro rere avwanre vẹ ọyen se vwo vwo uvi rẹ oyerinkugbe. Avwanre vwo okpuphẹn re vwo se Ohwo rọ ma rho vwẹ akpọ vẹ odjuvwu, Ọsẹ rẹ avwanre. Jihova yen Ọsẹ ro me yovwin kirobo re yonori vwẹ uyono rọ wanre na.

3. Enọ vọ yen avwanre sa nọ oma avwanre? (Ni ekpeti na, “ Jihova Ni Vwe Sua?”)

³ Avwanre se vwo ọkpọ rẹ ẹwẹn ro rhe ọbuine na rọ vwọ so: “Kidie me kẹ Ọrovwohwo na fiki rẹ ẹse buebu ro ru kẹ vwẹ?” (Une 116:12) Vwọrẹ uyota, avwanre cha sa hwosa rẹ ẹse na-a. Ẹkẹvuọvo ẹguọnọ rọyen na yen mu avwanre vwo vwo ẹguọnọ rọyen rhivwin. Ọyinkọn Jọn de si: “Avwanre guọnerọ, fikiridie ọye re ka guọnọ avwanre.” (1 Jọn 4:19) Mavọ yen e se vwo dje kẹ Ọsẹ rẹ avwanre rọhẹ obodjuvwu na nẹ avwanre ghini vwo ẹguọnọ rọyen?

4. Vwo nene oborẹ Jems 4:8 tare, diesorọ ro vwo fo nẹ a davwẹngba vwo sikẹrẹ Jihova?

⁴ Jihova guọnọre nẹ avwanre sikẹrẹ ọyen ji nene ta ota kugbe. (Se Jems 4:8.) Ọ vuẹ avwanre nẹ avwanre “gbe ẹdẹ rẹ ẹrhovwo-o.” (Rom 12:12) Oma cha sa ghwọrọ yẹrẹ iruo che buon abọ nọ ro de jẹ ẹrhovwo rẹ avwanre enyo-o. Avwanre me rha kerhọ kẹ womarẹ ese rẹ Baibol kugbe ẹbe rẹ ukoko na re fan otọ rẹ Baibol na kẹ avwanre. Avwanre je kerhọ rọyen siẹrẹ a da nabọ kerhọ vwẹ emẹvwa. Kirobo rẹ otaẹtakuẹgbe siẹ emọ kẹrẹ esẹ vẹ ini rayen, ọtiọyen otaẹtakuẹgbe ji che si avwanre kẹrẹ Jihova.

5. Die yen e ru rere ẹrhovwo rẹ avwanre vwọ ghwotọ?

⁵ Roro kpahen oborẹ ẹrhovwo wẹn ghwotọ te. Jihova guọnọre nẹ avwanre ta ẹwẹn rẹ avwanre eje kẹ vwẹ ẹrhovwo. (Une 62:8) Ofori nẹ a nọ oma rẹ avwanre: ‘Obo re ghwa dje ro ẹwẹn mẹ yen me nẹrhovwo kpahan kerẹ ohwo rọ printi ileta re si phiyọ otọ jovwore, gbanẹ ẹrhovwo mẹ họhọ ileta ra vwẹ obọ si rẹ ovuẹ rọyen nẹ otọ rẹ udu rhe.’ O muẹro nẹ wo vwo ẹguọnọ ri Jihova mamọ, wọ je guọnọ ru oyerinkugbe wẹn vẹ ọrọyen ganphiyọ. Ọtiọyena ko fori nẹ wo nene ta ota kugbe ọkieje. Vuẹ oborẹ oma ru we wan. Vuẹ aghọghọ vẹ ọmiaovwẹ rọhẹ udu wẹn. Jẹ o muwẹro nẹ wọ sa nokpẹn rẹ ukẹcha rọyen.

6. Die yen e ru rere avwanre se vwo tinka mu Ọsẹ rẹ avwanre rọhẹ obodjuvwu?

⁶ Uruemu rẹ akpẹvwẹ cha chọn avwanre uko vwo tinka mu Ọsẹ avwanre na ọkieje. Avwanre rhọnvwephiyọ eta rẹ ọbuine na siri ne, “E Ọrovwohwo Ọghẹnẹ mẹ, wọ rhoma rhi ru bu phihọ, iruo rẹ igbunu wẹn kugbe iroro wẹn kẹ avwanre; a sa mrẹ ohwo re vwo dje we-e. a da tanẹ e gbe ikun rẹ ayen, i bunọ obo re se keri!” (Une 40:5) Ọ dianẹ e che di vwo ẹwẹn rẹ ẹkpẹvwẹ-ẹ, e che djephia kẹ Jihova womarẹ eta vẹ uruemu rẹ avwanre. Ọnana yen nẹrhẹ avwanre fẹnẹ ihwo rẹ akpọ na nonẹna. Avwanre yerẹn vwẹ akpọ rẹ ihwo rhe dje ọdavwaro phia fikirẹ oborẹ Jihova ruẹ kẹ aye-en. Vwọrẹ uyota, ọvo usun rẹ eka ri djerephia nẹ “oba rẹ ẹdẹ na” yen avwanre de yerẹn na yen, ihwo gbe cha riẹn ẹse-e. (2 Tim. 3:1, 2) E jẹ avwanre vwo oka rẹ uruemu yena-a!

7. Die yen Jihova guọnọre nẹ avwanre ru, kẹ diesorọ?

⁷ Emiọvwọn guọnọ nẹ emọ rayen họnre omoma raye-en, ẹkẹvuọvo ayen guọnọ nẹ emọ na dia igbeyan. Ọtiọyena, Jihova je guọnọ nẹ ihwo eje re vwẹ ẹga kẹ yerinkugbe wurhiewurhie. Vwọrẹ uyota, ẹguọnọ rẹ avwanre che dje kẹ ohwohwo yen ihwo cha vwọ riẹn nẹ avwanre ghene Inenikristi rẹ uyota. (Jọn 13:35) Avwanre rhọnvwephiyọ eta rẹ ọbuine na ro siri nẹ, “Nighe, mavọ oyovwi te rọ vwerhe te rẹ iniọvo da dia kugbe vwẹ okugbe!” (Une 133:1) Avwanre de vwo ẹguọnọ rẹ iniọvo rẹ avwanre, kọyen avwanre djephia kẹ Jihova nẹ avwanre vwo ẹguọnọ rọyen. (1 Jọn 4:20) Oma vwerhen avwanre nẹ avwanre ẹbẹre ọvo rẹ orua rẹ iniọvo ri “ni arodọvwẹ kẹ ohwohwo,” ri ji siẹ ohwohwo aro-o!—Ẹfe. 4:32.

8. Vwo nene eta rehẹ 1 Jọn 5:3, ọrhọ yen iroro ọvo kiriguo rọ nẹrhẹ avwanre nyẹme ri Jihova?

⁸ Kirobo rẹ Jihova guọnọre nẹ emọ nyẹme rẹ esẹ vẹ ini rayen, ọtiọyen ọ je guọnọ nẹ e nyẹme rọyen. (Ẹfe. 6:1) Jihova muwan rẹ ẹmienyo rẹ avwanre kidie ọyehẹ Ọmemama vẹ Ohwo rọ Sẹro rẹ  arhọ rẹ avwanre, ọ ke je ghwanre nọ emiọvwọn rehẹ akpọ na eje. Ẹkẹvuọvo, iroro ọvo kiriguo rọ nẹrhẹ avwanre nyẹme ri Jihova yen ẹguọnọ re vwo kpahọn. (Se 1 Jọn 5:3.) Dede nẹ o vwo iroro buebun re sorọ avwanre vwo nyẹme ri Jihova, jẹ ọ gba avwanre ruẹ ọtiọye-en. Jihova kẹ avwanre okẹ rẹ ugbomọphẹ, ọtiọyena oma kọ vwerhọn siẹrẹ avwanre ọvo de brorhiẹn re vwo nyẹme rọyen.

9-10. Diesorọ rọ vwọ ghanre ra vwọ riẹn ji yeren akpọ vwo nene iwan ri Jihova?

⁹ Emiọvwọn guọnọ sẹro rẹ emọ rayen. Ọnana yensorọ rẹ ayen vwo jẹ irhi sansan kẹ emọ na. Ọke rẹ emọ na de nene irhi na, kẹ ayen djephia nẹ ayen vwẹroso emiọvwọn na ji muọghọ kẹ ayen. Ọtiọyena, mavọ yen ọ ghanre te ra vwọ riẹn irhi vẹ iwan rẹ Ọsẹ rẹ avwanre rọhẹ obodjuvwu ji yeren akpọ nene. Avwanre de ru ọtiọyen, ke se djephia nẹ avwanre vwo ẹguọnọ ri Jihova ji muọghọ kẹ. Ọnana che fierere kẹ avwanre. (Aiz. 48:17, 18) Ẹkẹvuọvo, ihwo re sen Jihova vẹ irhi rọyen so ukuoma kẹ oma rayen.—Gal. 6:7, 8.

¹⁰ Avwanre de yeren akpọ nene iwan ri Jihova, ọnana cha sẹro rẹ avwanre vwo nọ omaẹwan rẹ ugboma, ọ rẹ iroro vẹ obo ri che miovwo oyerinkugbe rẹ avwanre vẹ Jihova. Jihova riẹn obo ri me yovwin kẹ avwanre. Aurora rọ dia United States da ta: “Me riẹnre nẹ siẹrẹ a da kerhọ ri Jihova, avwanre che yeren uvi rẹ akpọ.” Ota yena ghene uyota dẹn. Erere vọ yen  wọ mrẹ re, rẹ wo vwo nene odjekẹ ri Jihova?

11. Mavọ yen ẹrhovwo chọn avwanre uko wan?

¹¹ Ẹrhovwo chọn avwanre uko vwo nyẹme, ọ da tobọ bẹn re vwo ru ọtiọyen. Ọkiẹvo, ọ bẹn re vwo nyupho ri Jihova kidie nẹ avwanre gbare-e, ẹkẹvuọvo ofori nẹ a davwẹngba re vwo nyupho rọyen ọkieje. Ọbuine na rẹ Jihova nẹ: “Kẹ vwẹ ẹruọ, rere me vwọ yọnrọn urhi wẹn re me vwẹ udu mẹ ejobi vwọ sẹro rọye.” (Une 119:34) Denise rọ dia ọkobaro da ta: “Ọke rọ da bẹn kẹ vwẹ ri mi vwọ yọnrọn iji rẹ Ọghẹnẹ, ke me nẹrhovwo rhe Jihova nẹ ọ kẹ vwẹ ẹgba mi vwo ru obori yoma.” Avwanre se vwo imuẹro nẹ Jihova cha kpahenphiyọ ẹrhovwo tiọyena.—Luk 11:9-13.

12. Vwo nene eta rehẹ Ẹfesọs 5:1, die yen ofori nẹ ru?

¹² Se Ẹfesọs 5:1. Avwanre davwẹngba vwọ vwẹrokere Jihova kerẹ “ẹmọ re ghare.” Avwanre vwẹrokere siẹrẹ e de dje ẹguọnọ vẹ uruemuesiri kẹ ihwo efa kugbe ọke re de vwo ghovwo ayen. Omamọ rẹ uruemu rẹ avwanre se mu ihwo re riẹn Ọghẹnẹ-ẹ vwo yono kpahọn. (1 Pita 2:12) E jẹ emiọvwọn re dia Inenikristi davwẹngba vwo nene emọ rayen yerin vwẹ idjerhe ri Jihova nene avwanre yerẹn wan. Ayen de ru ọtiọyen, emọ na ki che vwo ẹwẹn rẹ ayen vwọ dia ugbeyan ri Jihova.

13. Die yen avwanre ru e se vwo fiudugberi?

¹³ Omotete vwẹ ọsẹ rọyen yoma. Oma  je vwerhọn rọ vwọ vuẹ ihwo efa kpahen ọsẹ rọyen. Ọtiọyen yen oma rẹ Ọsẹ avwanre rọhẹ odjuvwu na vwerhen avwanre, avwanre je guọnọ nẹ ihwo efa ji rhi yono kpahọn. Avwanre vwo oka rẹ iroro ro rhe Ovie Devid rọ tare nẹ, “Erhi mẹ vwẹ Ọrovwohwo yan eyan.” (Une 34:2) Kẹ, ọ da rha dianẹ avwanre ihwo rẹ oma vua vwo? Mavọ yen e se vwo fiudugberi? E se fiudugberi siẹrẹ e de roro kpahen oborẹ oma cha vwerhen Jihova te siẹrẹ a da vuẹ ihwo efa kpahọn kugbe erere ro che te ihwo ri yono kpahọn obọ. Jihova cha chọn avwanre uko vwo fiudugberi. Ọ vwẹ ukẹcha kẹ Inenikristi rẹ ẹgbukpe ujorin ẹsosuọ, ọ je cha chọn avwanre uko.—1 Tẹsa. 2:2.

14. Diesorọ owian re vwo ru idibo na vwọ ghanre?

¹⁴ Jihova ghwẹ oma phiyọ ẹbẹre ọvo jẹ ọvo vwo-o, ọtiọyena oma vwerhọn siẹrẹ avwanre de dje ẹguọnọ kẹ ihwo eje, o toro asan rẹ ayen nurhe-e. (Iruo 10:34, 35) Ọvo vwẹ usun rẹ idjerhe ro me yovwin re se vwo dje ẹguọnọ kẹ ihwo efa yen e vwo ghwoghwo iyenrẹn esiri na kẹ ayen. (Mat. 28:19, 20) Ukẹcha vọ yen iruo nana sa vwọphia? Ihwo re kerhọ rẹ ovuẹ na se yerin omamọ rẹ akpọ enẹna ji vwo iphiẹrophiyọ rẹ arhọ ri bẹdẹ vwẹ obaro na.—1 Tim. 4:16.

15-16. Die yen nẹrhẹ oma vwerhen avwanre?

¹⁵ Jihova ọyen Ọsẹ vẹ ẹguọnọ, ọtiọyena, ọ guọnọre nẹ oma vwerhen orua rọyen. (Aiz. 65:14) Dede nẹ avwanre hirharokuẹ ebẹnbẹn sansan, o vwo oboresorọ rẹ oma vwọ vwerhen avwanre enẹna. Kerẹ udje, o mu avwanre ẹro nẹ Ọsẹ rẹ avwanre rọhẹ obodjuvwu na vwo ẹguọnọ rẹ avwanre, o ji ni avwanre ghanghanre. Avwanre vwo erianriẹn ọgbagba ri Baibol na. (Jer. 15:16) Avwanre jẹ ẹbẹre ọvo rẹ orua ri vwo ẹguọnọ ri Jihova, iwan ọgbagba rọyen kugbe iniọvo rẹ avwanre.—Une 106:4, 5.

¹⁶ Oma sa vwerhen avwanre kidie avwanre vwo imuẹro dẹn nẹ akpọ che yovwin vwẹ obaro na. Avwanre riẹnre nẹ Jihova che si irumwemwu na no kẹrẹkpẹ, kọ cha reyọ Uvie rọyen vwo wene akpọ na phiyọ Iparadaisi. Avwanre ji vwo iphiẹrophiyọ nẹ a cha kpare ihwo ri ghwuru nushi rhe rhi nene avwanre dia. (Jọn 5:28, 29) Unu che se gbikun rẹ aghọghọ rẹ avwanre ọke yena-a! Ọ rọ marho, o rhe che kri-i, kohwo kohwo vwẹ odjuvwu vẹ akpọ ke cha vwẹ urinrin, ujiri vẹ ẹga vwọ kẹ Ọsẹ rẹ avwanre Jihova, kidie ọyen ri muwan rọyen.