1-2. (a) Diesorọ ọ vwọ bẹn kẹ ihwo evo rẹ ayen vwọ vwẹroso ẹgba rẹ usuon? (b) Die yen a cha fuẹrẹn vwẹ uyono nana?

 NONẸNA ihwo buebun mrẹ bẹnbẹn ayen vwọ vwẹroso ẹgba rẹ usuon. Ayen mrẹvughe nẹ irhi kugbe isuesun rẹ akpọ na yovwẹn edafe vẹ ihwo ri vwo ogangan rẹ usuon, jẹ e sa chochọn rẹ ivwiogbere na-a. Baibol na da ta: “Ohwo  . . tua ohwo muotọ kẹ umiovwo rọye.” (Aghwo. 8:9) Vwọba, ilori rẹ ẹga evo ji ruẹ obo re brare, fikirẹ ọnana ihwo evo rha vwẹroso Ọghẹnẹ-ẹ. Ọtiọyena, ohwo da rhọnvwe nẹ e yono ọyen Baibol na, ko fori nẹ a chọn uko vwọ vwẹroso Jihova kugbe ihwo ro vwo mu nẹ e vwẹrote ukoko rọyen vwẹ otọrakpọ na.

² Vwọrẹ uyota, ọ dia ihwo re yono Baibol na ọvo yen fori nẹ e vwẹroso Jihova vẹ ukoko rọye-en. Ọ da tobọ dianẹ avwanre hẹ ukoko na krire, o ji fo nẹ e noso nẹ oborẹ Jihova ruẹ erọnvwọn wan yen me yovwin. Ọkievo, erọnvwọn evo re phia sa davwen ẹroẹvwọsuọ rẹ avwanre ni. Vwẹ uyono nana, a cha fuẹrẹn ẹdia erha re sa davwen ẹroẹvwọsuọ re vwo kpahen Jihova ni: (1) ọke e de se ikuegbe ri Baibol evo, (2) ukoko ri Jihova da vwẹ odjekẹ phia kẹ avwanre, kugbe (3) e de hirharoku egbabọse evo vwẹ obaro na.

3. Mavọ yen ikuegbe ri Baibol evo sa vwọ davwen ẹroẹvwọsuọ re vwo kpahen Jihova ni?

 ³ Oborẹ Jihova nene ihwo evo yerin wan vẹ oboresorọ o vwo brorhiẹn evo se gbe avwanre unu ọke e de se Baibol na. Kerẹ udje, vwẹ ọbe rẹ Ukeri, e de se mrẹ nẹ Jihova brorhiẹn rẹ ughwu hwe ohwo rẹ Izrẹl ọvo kidie nẹ o koko irhe vwẹ ẹdẹ urovwoma na. Vwẹ Samuẹl rivẹ, e de rhe se mrẹ nẹ ikpe buebun vwọ wan nu, Jihova de rhe vwo ghovwo Ovie Devid  ro gbe igberadja ji dẹ ozighẹ. (Ukeri 15:32, 35; 2 Sam. 12:9, 13) E se roro, ‘Diesorọ Jihova vwọ reyọ vwo ghovwo Devid ro gbe igberadja ji dẹ ozighẹ jẹ o brorhiẹn rẹ ughwu vwo hwe ọshare ochekọ na fikirẹ umwemwu ro tumuku-u?’ A vwọ kpahenphiyọ onọ nana, roro kpahen erọnvwọn erha ro fori nẹ a karophiyọ ọke e de se Baibol na.

4. Mavọ yen Jẹnẹsis 18:20, 21 kugbe Urhi Rivẹ 10:17 vwo ru imuẹro rẹ avwanre vwo kpahen orhiẹn-ebro riJihova ganphiyọ?

⁴ Ọ dia ọkieje yen Baibol na ghwa vwọ vuẹ avwanre obo re phiare vwẹ ikuegbe na eje-e. Kerẹ udje, Avwanre riẹnre nẹ oborẹ Devid ruru na darọ, o de ji kurhẹriẹ. (Une 51:2-4) Kẹ, oka rẹ ohwo vọ yen ohwo rọ churhi rẹ ẹdẹ urovwoma na hepha? Obo ro ruru na darọ? Ọ churhi ri Jihova vwẹ ọke evo re wanre? O chukoku yẹrẹ sen orhọ-esio vwẹ ọke evo re wanre? Baibol na ghwa vuẹ avwanre-e. Ẹkẹvuọvo, o mu avwanre ẹro nẹ Jihova dia ohwo “umwemwu-u.” (Urhi 32:4) O muẹ orhiẹn-ebro rọyen kpahen obo ri muẹro, ọ dia obo ro nyo rẹ ihwo ta, asan rẹ ohwo na nurhe yẹrẹ fikirẹ erọnvwọn efa ọtiọyen re sa nẹrhẹ ohwo vwẹ ẹro ọchọchọ vwo ni emu-u. (Se Jẹnẹsis 18:20, 21; Urhi Rivẹ 10:17.) E vwo yono kpahen Jihova phiyọ ye, ka cha rhe vwẹrosuọ phiyọ. Ọ da tobọ dianẹ e se ẹkpo ri Baibol ọvo ra ghwa nabọ vwo ẹruọ rọyen enẹna-a, avwanre riẹnre dẹn nẹ Ọghẹnẹ rẹ avwanre ohwo “ọsoso vwẹ idjerhe rọye ejobi.”—Une 145:17.

5. Idjerhe vọ yen jẹgba se vwo gbowọphiyọ orhiẹn-abavo rẹ avwanre? (Ni ekpeti na “ Jẹgba se Gbowọphiyọ Ẹro re Vwo nẹ Orhiẹn-Abavo.”)

⁵ Avwanre che se brorhiẹn rọ gbare ọkieje-e kidie avwanre komobọ gbare-e. Ọghẹnẹ ma avwanre họhọ oma rọyen, ọtiọyena, avwanre rha guọnọ shenyẹ ihwo efa-a. (Jẹn. 1:26) Ẹkẹvuọvo, ọ vwọ dianẹ avwanre gbare-e na, a sa vwẹ ẹro rọ chọre vwo ni ihwo efa ọ da tobọ dianẹ avwanre rorori nẹ a riẹn emu eje re phiare. Karophiyọ udje ri Jona, oma vwerhenrọ ọke rẹ Jihova vwọ reyọ vwo ghovwo ihwo ri Ninive-e. (Jona 3:10–4:1) Dedena, roro kpahen obo ri nẹ obuko rọyen rhe. Ihwo ri Ninive re vrẹ 120,000 ri kurhẹriẹ na de sivwin rhọ. Vwẹ okuphiyotọ rọyen, Jona kọyen guọnọ ọkpọvi, ọ dia Jihova-a.

6. Diesorọ Jihova rha vuẹ avwanre oboresorọ o vwo brorhiẹ-ẹn?

⁶ Ofori Jihova vwọ vuẹ avwanre oboresorọ o vwo brorhiẹ-ẹn. Vwọrẹ uyota,  Jihova vwẹ uphẹn vwọ kẹ idibo rọyen rẹ ọke rẹ awanre nẹ ayen ta ẹwẹn rayen kpahen orhiẹn evo ro bruru kugbe e rọ guọnọ bru. (Jẹn. 18:25; Jona 4:2, 3) Vwẹ ọkievo, o dje fiotọ oboresorọ o vwo brorhiẹn. (Jona 4:10, 11) Dedena, ọ dia ọyen o vwo mudiaphiyọ nẹ ofori Jihova vwọ vuẹ avwanre oboresorọ o vwo brorhiẹ-ẹn. Kidie nẹ ọyehẹ Ọmemama rẹ avwanre, o rhe fo nẹ Ọ nọ mie avwanre tavwen O ki brorhiẹn yẹrẹ O de brorhiẹn nu-u.—Aiz. 40:13, 14; 55:9.

7. Egbabọse vọ yen avwanre se hirharoku, kẹ diesorọ?

⁷ Aphro herọ-ọ, avwanre eje rhọnvwere nẹ ọkieje yen Jihova vwo ruẹ obo ri yovwinrin. Emuọvo rọ sa dia egbabọse vwọ kẹ avwanre yen a vwọ vwẹroso ihwo ro vwo mu vwẹ otọrakpọ na. Ọkievo, e se roro sẹ ihwo re vwo mu vwẹ ukoko ri Jihova ghini ruẹ nene odjekẹ ri Jihova yẹrẹ ọ romobọ rayen. Ọyena sa dia oborẹ ihwo evo rorori vwẹ ọke rẹ awanre. Roro kpahen idje ra vwọphia vwẹ  ẹkorota 3 na. Ohwo rẹ orua rẹ ọshare na rọ churhi rẹ ẹdẹ urovwoma na se roro sẹ Mosis ghene nọ mie Jihova tavwen ọ ke tanẹ e hwe ọshare na. Ugbeyan rẹ Yuraya ohwo ri Het ji se roro nẹ Devid vwẹ ẹdia rọyen kerẹ ovie vwọ vrabọ rẹ ughwu ro fori nẹ o ghwu jovwo fikirẹ umwemwu ro ruru ro vwo nene aye rẹ Yuraya gbe igberadja. Vwọrẹ uyota, a rha vwẹroso ihwo ri Jihova vwo mu vwẹ ukoko na-a, a cha sa tanẹ a vwẹroso Jihova-a kidie enana ihwo Ọ vwẹroso.

8. Idjerhe vọ yen obo ra niyẹnrẹn rọyen phiyọ Iruo Rẹ Iyinkọn Na 16:4, 5 vẹ oborẹ ukoko ri Jihova hepha nonẹna vwọ họhọ ohwohwo?

⁸ Nonẹna, Jihova womarẹ “odibo esiri na” vwo suẹn ukoko rọyen rọhẹ otọrakpọ na. (Mat. 24:45) Kerẹ Ẹko Rọvwẹrote rọ herọ vwẹ ẹgbukpe ujorin rẹsosuọ, odibo nana vwẹrote ihwo rẹ Ọghẹnẹ vwẹ akpọneje je vwẹ odjekẹ vwọ kẹ ekpako rẹ ukoko na. (Se Iruo Rẹ Iyinkọn Na 16:4, 5.) Ekpako na ke rha vwẹ odjekẹ ọtiọyena vwọphia kẹ iniọvo rehẹ ukoko na rere ayen vwọ yan nene. E djephia nẹ a vwẹroso oborẹ Jihova ruẹ erọnvwọn wan siẹrẹ a da yan nene odjekẹ rọ vwọ kẹ avwanre womarẹ ukoko rọyen vẹ ekpako na.

9. Ọke vọ yen a da sa mrẹ bẹnbẹn re vwo bicha orhiẹn-ebro rẹ ekpako na, kẹ diesorọ?

⁹ Ọkievo, a sa mrẹ bẹnbẹn re vwo bicha orhiẹn-ebro rẹ ekpako na. Kerẹ udje, vwẹ ikpe evo rhire na, a rhoma rhuẹrẹ ikoko vẹ ikinriariẹ buebun phiyọ. Vwẹ ẹdia evo, ekpako na vuẹ ighwoghwota evo nẹ ayen ra vwẹ ukẹcha kẹ ukoko ọfa a sa vwọ mrẹ nẹ a nabọ vwẹ Ọguan Ruvie na vwo ruiruo vọnvọn. A sa mrẹ bẹnbẹn a vwọ yan jẹ igbeyan vẹ ihwo rẹ orua avwanre vwo siẹrẹ a da vuẹ avwanre nẹ a vwomaba ukoko ọfa. Jihova yen vuẹ ekpako na ukoko re che wene oniọvo ọvuọvo ra? Ẹjo. Ọnana emu ọvo rọ sa nẹrhẹ ọ bẹn e vwo nene odjekẹ a vwọ kẹ avwanre. Ẹkẹvuọvo, Jihova vwẹroso ekpako na nẹ ayen che brorhiẹn ro fori vwẹ ẹdia nana, o ji fo nẹ avwanre vwẹroso ayen. *

10. Vwo nene obo rehẹ Hibru 13:17, diesorọ o vwo fo nẹ e nene odjekẹ rẹ ekpako na?

¹⁰ Diesorọ a vwọ rhọnvwephiyọ ji bicha orhiẹn-ebro rẹ ekpako na ọ da tobọ dianẹ orhiẹn na ghwe shephiyọ ọhọre rẹ  avwanre-e? Kidie e de ru ọtiọyen, jẹ a sẹro rẹ okugbe rọ herọ vwẹ ohri rẹ ihwo rẹ Ọghẹnẹ. (Ẹfe. 4:2, 3) Ukoko na cha yan phiaro siẹrẹ ihwo eje da vwomakpotọ ru nene orhiẹn-ebro rẹ ekpako na. (Se Hibru 13:17.) Ma rho kparobọ, avwanre djephia nẹ a vwẹroso Jihova siẹrẹ e de nene odjekẹ rẹ ihwo ro vwo mu nẹ e vwẹrote avwanre.—Iruo 20:28.

11. Die yen sa kpuriẹnphiyọ ẹroẹvwọsuọ re vwo kpahen orhiẹn-ebro rẹ ekpako na?

¹¹ A sa kpuriẹnphiyọ ẹroẹvwọsuọ re vwo kpahen orhiẹn-ebro rẹ ekpako na siẹrẹ a da karophiyọ nẹ ekpako na nẹrhovwo vwọ kẹ odjekẹ rẹ ẹwẹn ọfuanfon na ọke rẹ ayen de che brorhiẹn ro shekpahen ukoko na. Ayen je nabọ fuẹrẹn iyono ri Baibol sansan kugbe odjekẹ rẹ ukoko ri Jihova vwọphia ri shekpahen oborẹ ayen ta ota kpahan na. Ọdavwẹ rayen ọyen ayen vwo ru obo re vwerhen Jihova oma je vwẹrote ihwo rọyen kirobo rẹ ẹgba rayen muru. Eshare re fuevun nana riẹnre nẹ Jihova vwo ọdavwaro kpahen oborẹ ayen vwẹrote ihwo rọyen wan. (1 Pita 5:2, 3) Gbe roro kpahen ọnana: Vwevunrẹ akpọ rẹ ohẹriẹ hepha fikirẹ ẹkuotọ sansan rẹ ihwo nurhe, ẹga sansan kugbe ihwo ri sivwẹn oseghe rẹ usuon, ihwo ri Jihova ji kuomagbe vwọ ga Ọghẹnẹ rẹ uyota na. E se ruẹ ọnana kidie Jihova brẹba vwọ kẹ ukoko rọyen na.

12. Die yen ekpako na nabọ frẹkotọ fuẹrẹn tavwen ayen ki brorhiẹn sẹ ohwo na ghini kurhẹriẹ?

¹² Jihova vwẹ owian ọghanghanre ọvo rọ dia re vwo ru ukoko na fon vwọ kẹ ekpako na. Siẹrẹ ohwo de ru umwemwu ọgangan, Jihova rhẹro rọyen nẹ ekpako na che brorhiẹn sẹ ohwo tiọyena dajẹ ukoko na yẹrẹ a djẹ vwo nẹ ukoko. Ọvo vwẹ usun rẹ erọnvwọn evo rẹ ekpako na che ni so yen, sẹ ohwo na ghini kurhẹriẹ vwo nẹ umwemwu ro ruru na. Ọ sa tanẹ ọyen kurhẹriẹ re ẹkẹvuọvo, o ghini vwo utuoma kpahen obo ro ruru na? O vwo owenvwe o vwo jẹ umwemwu na ẹvwariẹn? Ọ da dianẹ orharhe rẹ ọyankugbe yen sunro vwo ru umwemwu na, kẹ o vwo owenvwe rọ vwọ dobọ rẹ ọyankugbe na ji? Ekpako na nẹrhovwo rhe Jihova, nabọ fuẹrẹn obo re phiare na, oborẹ Baibol na ta kpahọn kugbe uruemu rẹ ohwo na djephia kpahen obo ro ruru na. Ayen de ru ọyena nu, kẹ ayen che brorhiẹn sẹ ohwo na cha daji ukoko na yẹrẹ a cha djẹ. Vwẹ ẹdia evo, o fori nẹ a djẹ ohwo na nẹ ukoko na.—1 Kọr. 5:11-13.

13. Die yen e se roro ọ da dianẹ a djẹ ohwo rẹ orua yẹrẹ ugbeyan rọ kẹrẹ avwanre vwo nẹ ukoko?

¹³ Die yen sa davwen ẹroẹvwọsuọ re vwo kpahen ekpako na ni? Ọ sa lọhọ a vwọ rhọnvwephiyọ orhiẹn-ebro rẹ ekpako na ọ da dianẹ ohwo ra djẹre na dia ohwo rẹ orua yẹrẹ ugbeyan rọ kẹrẹ avwanre-e. Kẹ, ọ da rha dianẹ ohwo rọ kẹrẹ avwanre kọyen a djẹ nẹ ukoko vwo? Avwanre se roro nẹ ekpako na nabọ fuẹrẹn obo re phiare na fiotọ-ọ, yẹrẹ ayen tobọ brorhiẹn na kirobo rẹ Jihova guọnerọ-ọ. Die yen sa chọn avwanre uko vwọ vwẹ ẹro abavo vwo ni orhiẹn na?

14. Die yen sa chọn avwanre uko ọ da dianẹ ekpako na brorhiẹn nẹ a djẹ ohwo rẹ orua yẹrẹ ugbeyan rọ kẹrẹ avwanre vwo nẹ ukoko na?

¹⁴ E jẹ avwanre karophiyọ nẹ a vwọ djẹ ohwo nẹ ukoko, ọyen ẹbẹre ọvo rẹ ọrhuẹrẹphiyotọ ri Jihova, o fierere vwọ kẹ ukoko na, o ji se fierere vwọ kẹ ohwo ro ru umwemwu na. A da fọ kẹ orumwemwu nẹ ọ daji ukoko na, ọ sa riẹriẹ ihwo efa vwo ru umwemwu. (Gal. 5:9) Vwọba, ọ sa dianẹ o che vwo ẹruọ rẹ oborẹ umwemwu ro ruru na gan te-e, ọ je sa dianẹ o che  no kerẹ obo ri fori o vwo wene iroro vẹ iruemu rọyen rere ọ sa vwọ rhoma bọn oyerinkugbe rọyen vẹ Jihova ga-an. (Aghwo. 8:11) O muẹro dẹn nẹ ekpako na vwẹ ẹro ọghanghanre vwo nẹ owian rẹ ayen wian vwẹ ọke rẹ ayen de brorhiẹn sẹ a djẹ ohwo nẹ ukoko na. Ekpako na riẹnre nẹ kerẹ iguẹdjọ rẹ ihwo rẹ Izrẹl rẹ ọke rẹ awanre, “ọ dia ohwo [ayen] guẹ kẹ-ẹ, ẹkẹvuọvo Ọrovwohwo na.”—2 Ikun 19:6, 7.

15. Diesorọ o vwo fo a vwọ yan nene odjekẹ ri Jihova enẹna vrẹ obo ri jovwo?

¹⁵ Oba rẹ eyeren nana vwo siẹkẹrẹ na, ofori nẹ avwanre vwẹroso oborẹ Jihova ruẹ erọnvwọn wan enẹna vrẹ obo ri jovwo. Diesorọ? Vwẹ ọke rẹ ukpokpogho rode na, a sa kẹ avwanre odjekẹ evo re cha dia gedegede vwọ kẹ avwanre, a sa tobọ no nẹ a cha sa vwẹ ayen vwo ruiruo dede-e. Vwọrẹ uyota, Jihova cha ta ota kẹ avwanre komobọ-ọ. Ẹkẹvuọvo, ọ cha womarẹ ihwo ro vwo mu vwẹ ukoko na vwọ vwẹ odjekẹ kẹ avwanre. Ọyena rha cha dia ọke e che vwo vwo ẹwẹn ivivẹ kpahen odjekẹ a cha vwọphia yẹrẹ ni ayen gedegede-e, yẹrẹ kẹ ọke a cha vwọ vwẹ ẹwẹn roro sẹ, ‘Obọ ri Jihova yen odjekẹ nana ghini nurhe gbanẹ iniọvo re vwo mu na yen vwẹ ayen phia komobọ?’ Wọ cha vwẹroso Jihova vẹ ukoko rọyen vwẹ ọke ọgangan yena? Oka rẹ ẹro ru wo vwo nẹ odjekẹ ro nẹ ukoko ri Jihova cha enẹna yen cha chọn wẹ uko vwọ kpahenphiyọ onọ nana. Wọ da dia ohwo rọ vwẹrosua odjekẹ ro te avwanre obọ je yan nene ayen nonẹna, ku wo ji se ru ọtiọyen vwẹ ọke rẹ ukpokpogho rode na.—Luk 16:10.

16. Idjerhe vọ yen a sa vwọ davwen ẹroẹvwọsuọ re vwo kpahen Jihova ni vwẹ obaro na?

¹⁶ Ẹdia ọfa o ji fo nẹ e roro kaphen yen ẹdjọeguo ri Jihova vwẹ oba rẹ eyeren na. Enẹna, avwanre rhẹro rọyen nẹ ihwo buebun tobọ ji te ihwo rẹ orua rẹ avwanre re ga Jihova-a cha rhe vwomaba avwanre ga tavwen oba na ki rhi te. Ẹkẹvuọvo, vwẹ Amagidọn, Jihova cha womarẹ Jesu vwo brorhiẹn rọkoba kpahen ayen. (Mat. 25:31-33; 2 Tẹsa. 1:7-9) Ọ dia avwanre yen che brorhiẹn rẹ ohwo rẹ Jihova che gbe arodọnvwẹ kẹ vẹ ihwo ro che jẹ arodọnvwẹ e gbe kẹ-ẹ. (Mat. 25:34, 41, 46) Avwanre cha vwẹroso orhiẹn-ebro ri Jihova gbanẹ a cha dobọ rẹ ẹga rọyen ji kidie nẹ orhiẹn-ebro evo ghwe je avwanre-e? O phẹnre dẹn nẹ o fori a vwọ kpuriẹnphiyọ ẹroẹvwọsuọ re vwo kpahen Jihova enẹna rere a sa vwọ vwẹrosuọ kpai tototo vwẹ obaro na.

17. Idjerhe vọ yen a cha vwọ mrẹ erere vwo nẹ ẹdjọeguo ri Jihova rhe vwẹ oba rẹ eyeren nana?

 ¹⁷ Vwẹ ẹwẹn roro oborẹ oma che ru avwanre vwẹ akpọ kpokpọ na siẹrẹ a da mrẹ obo ri nẹ obuko rẹ ẹdjọeguo ri Jihova rhe. Vwẹ ọke yena, ẹga rẹ efian rha cha dia-a, ọtiọyen ji te ineki ride re ghwa ihwo ria kugbe ihwo ri sivwẹn oseghe rẹ usuon ri shenyẹ ihwo re je sua ọmiaovwẹ vwẹ akpọ na. Ọga, ọghwo, kugbe ughwu rẹ ihwo re vwo ẹguọnọ kpahen rha cha dia ọfa-a. A cha kanre Eshu vẹ emekashe rọyen ẹgbukpe uriorin ọvo. Ọmiaovwẹ ro nẹ egbevwọsuọ rayen rhe rha cha dia-a. (Ẹvwọ. 20:2, 3) Ọ cha dia emu rẹ omavwerhovwẹn vwọ kẹ avwanre nẹ a vwẹroso oborẹ Jihova ruẹ erọnvwọn wan!

18. Die yen e se yono vwo nẹ udje rẹ ihwo rẹ Izrẹl na rhe kirobo ra niyẹnrẹn rọyen phiyọ Ukeri 11:4-6 kugbe 21:5?

¹⁸ Ọ je sa dianẹ e che hirharoku ebẹnbẹn evo vwẹ akpọ kpokpọ na re cha davwen ẹroẹvwọsuọ re vwo kpahen oborẹ Jihova ruẹ erọnvwọn wan ni? Roro kpahen udje rẹ obo re phiare ọmọke krẹn e ghwe vwo siobọnu ihwo rẹ Izrẹl vwo nẹ eviẹn vwẹ ẹkuotọ rẹ Ijipt nu. Evo vwẹ usun rayen ki brenu kidie ayen rhoma roro kpahen emu rẹ ayen ria jovwo vwẹ Ijipt, ẹro okueku kọyen ayen vwo nẹ imana rẹ Jihova vwọ kẹ ayen na. (Se Ukeri 11:4-6; 21:5.) E ji se vwo oka rẹ iroro ọtiọyena ọke rẹ ukpokpogho rode na de rhi vwoba nu? A ghwa riẹn oborẹ owian re che ru vwo ru akpọ na fon ji ruo phiyọ iparadaisi cha dia-a. Ọ sa dianẹ ọ dia ọmọrhiẹ owian yen a cha wian vwẹ ọke yena-a, ọ je sa dianẹ akpeyeren je cha ghwa sa dia lọlọhọ vwẹ ẹsosuọ-ọ. Avwanre che brenu kpahen oborẹ Jihova cha vwọ kẹ avwanre vwẹ ọke yena? Emuọvo ro muẹro kọna: E de vwo ọdavwaro kpahen oborẹ Jihova vwọ kẹ avwanre enẹna, ọnana cha nẹrhẹ ọdavwaro re che vwo kpahen oborẹ ọ cha vwọ kẹ avwanre vwẹ ọke yena ganphiyọ.

19. Mavọ wọ sa vwọ djẹ ẹkpo eghanghanre rehẹ uyono nana koko?

¹⁹ Idjerhe ri Jihova ruẹ erọnvwọn wan yen me yovwin ọkieje. Ofori nẹ ọnana mu avwanre ẹro. O ji fo nẹ a vwẹroso ihwo rẹ Jihova vwẹroso nẹ e vwẹ odjekẹ rọyen kẹ avwanre na. Wo jẹ eta rẹ Jihova tare womarẹ ọmraro rọyen Aizaya chọrọ owẹ ẹro-o: “Vwẹ oma ehwemuẹ kugbe ẹro ẹvwọ suọ ọye ogangan rẹ ovwan epha.”—Aiz. 30:15.