IKUEGBE rọhẹ Jẹnẹsis 22:6 djerephia nẹ fikirẹ izobo rẹ Ebraham che ze vwẹ asan oshesheri, ọ “da reyọ ekrirhe rẹ . . . izobo rẹ ẹtorhẹ na, o de muo kpahọ ọmọ rọye Aizik; ọ da yọnrọn utuerhanre kugbe aphia vwẹ obọ. Kọye ayen ivẹ na de ku usun phihọ.”

Baibol na vuẹ avwanre oborẹ ihwo rẹ ọke awanre vwẹ erhanre muẹ wa-an. Vwọ kpahen ikuegbe nana, ohwo ọvo tare nẹ “ọ bẹn ra sa vwọ sẹro rẹ erhanre vwẹ oyan ogrongron tiọyena” rẹ Ebraham vẹ Aizik yanre na. Ọtiọyena, ọ sa dianẹ erọnvwọn re vwo muẹ erhanre yen ayen ghwa nene oma.

Ihwo efa ke rha tanẹ, ọ ghwa lọhọ ra vwọ vwẹ erhanre mu ọke awanre-e. Ihwo sa tobọ mrẹ lọhọ ayen vwọ yare imwerhanre mie ihwo re dia kẹrẹ ayen siẹrẹ ọ da herọ ukperẹ ayen vwọ guọnọ oborẹ ayen sa vwọ vwẹ erhanre robọ rayen vwo mu. Ihwo evo ri yono ẹbe kodo tare nẹ ọ sa dianẹ omochẹ ro vwo ufi ra vwọ yọnrọn, ọyen Ebraham ghwẹ imwerhanre rẹ ayen kokori ason rọ wanre na phiyọ, ayen de muo nene oma. (Aiz. 30:14) A sa vwẹ imwerhanre tiọyena vwo mu erhanre siẹrẹ ayen da ghwẹ phiyọ enu rẹ ephrẹphrirhe ayen vwọ hẹ idjerhe na.