Oniọvo Kpokpọ ra Vwọba Ẹko Rọvwẹrote Na
OMA vwerhen iniọvo rehẹ orua rẹ Bẹtẹl rẹ Canada vẹ United States ọke re vwo ghwoghwo kẹ ayen vwẹ urhiọke rẹ Wednesday, January 24, 2018 nẹ a vwẹ Oniọvo Kenneth Cook, Jr., vwọba Ẹko Rọvwẹrote Iruo rẹ Iseri rẹ Jihova re.
E vwiẹ Oniọvo Cook vwẹ orere rẹ Pennsylvania rọhẹ U.S.A. Ọmọ rẹ iklasi rọyen yen yoniro uyota na ọmọke krẹn tavwen o ki wontọ nẹ kọleji, o de bromaphiyame vwẹ June 7, 1980. Ọ da ton iruo rẹ ọkobaro ọkieje phiyọ vwẹ September 1, 1982. Ẹgbukpe ivẹ vwọ wan nu, vwẹ October 12, 1984, e de durhie kpo Bẹtẹl rọhẹ Wallkill, New York.
Oniọvo Cook gare vwẹ akon iruo sansan vwẹ uvwre rẹ ẹgbukpe 25 nẹ ọke yena rhe, ọ gare vwẹ Asan ra da Teyen Ẹbe vẹ Akon Iruo Rọvwẹrote Orua rẹ Bẹtẹl. Oniọvo Cook rọvwọn aye rọyen Jamie vwẹ 1996. Ayen ihwo ivẹ na da ga kugbe vwẹ Bẹtẹl rọhẹ Wallkill. Vwẹ December 2009, e de mu ayen kpo Watchtower Educational Center vwẹ Patterson, New York. Etiyin kọyen Oniọvo Cook da ga vwẹ Akon Iruo rọ Kpahanphiyọ Enọ rẹ Ihwo Nọ (Writing Correspondence Department). Ayen ghwe vwo nẹ oboyin rhe Bẹtẹl rọhẹ Wallkill nu, vwẹ April 2016 e de mu Oniọvo Cook vẹ aye rọyen kpo Bẹtẹl rọhẹ Brooklyn, New York. Emeranvwe iyorin vwọ wan nu, ayen de kpo esiri ukoko rọhẹ Warwick, New York. Vwẹ January 2017, a da vwẹ Oniọvo Cook vwo mu ọ rọ vwẹ ukẹcha kẹ Umẹ Rosiẹ rẹ Ẹko Rọvwẹrote Na.