1-2. (a) Die yen Jihova mrẹ siẹrẹ iduduru rẹ ihwo de siomakoko vwọ kẹ Emu Ovwọnvwọn rẹ Orovwori Na? (Ni uhoho rọhẹ opharo ọbe na.) (b) Die yen a cha fuẹrẹn vwẹ uyono nana?

VWẸRO roro oborẹ Jihova mrẹ ọke rẹ iduduru rẹ ihwo vwẹ akpọneje de siomakoko vwọ kẹ Emu Ovwọnvwọn rẹ Orovwori Na. Ọ dia otu buebun na ọvo yen ọ mrẹ-ẹ, o ji vwo oniso rẹ ohwo vuọvo rọ rhe irueru na. Kerẹ udje, ọ mrẹ otu re cha kukpe kukpe. Evo usun rayen hirharoku ẹvwọsuọ ọgangan. Efa ghwa cha emẹvwa rẹ avwanre ọkieje-e, ẹkẹvuọvo ayen gbẹdẹ rẹ Ẹkarophiyọ na-a, kidie ayen niro nẹ ọ pha ghanghanre. Jihova ji vwo oniso rẹ ihwo re rhe Ẹkarophiyọ na obọrẹsosuọ, ọkiọvo kidie ayen guọnọ riẹn obo re ruo wan.

² Oma vwerhen Jihova mamọ siẹrẹ ọ da mrẹ ihwo buebun re cha irueru rẹ Ẹkarophiyọ na. (Luk 22:19) Obo ri mu ayen rhe yen ma ghanre kẹ Jihova, ọ dia uche ihwo re rhere-e. Vwẹ uyono nana, a cha fuẹrẹn onọ ọghanghanre nana: Diesorọ avwanre vwo kpo irueru rẹ Ẹkarophiyọ na re ruẹ kukpe kukpe kugbe emẹvwa rẹ kudughwrẹn kudughwrẹn rẹ Jihova vwo yono ihwo ri vwo ẹguọnọ rọyen?

3-4. (a) Diesorọ avwanre vwo kpo emẹvwa? (b) Die yen emẹvwa rẹ avwanre ra na djephia kpahen avwanre? (c) Vwo nene oborẹ 1 Kọrẹnt 11:23-26 tare, diesorọ o vwo fo nẹ avwanre kpo Ẹkarophiyọ na?

³ Obo re ma ghanre rọ nẹrhẹ avwanre kpo emẹvwa, ọyen kidie nẹ emẹvwa ọyen ẹbẹre ọvo rẹ ẹga rẹ avwanre. Etiyin Jihova de ji yono avwanre. Ihwo ri phuoma guọnọre nẹ e yono ayen emu vuọvo-o. (3 Jọn 9) Ẹkẹvuọvọ, avwanre guọnọre nẹ Jihova yono avwanre womarẹ ukoko rọyen.—Aiz. 30:20; Jọn 6:45.

 ⁴ Emẹvwa rẹ avwanre ra na, ọyen odjephia nẹ avwanre vwomakpotọ, avwanre je guonọ nẹ Jihova yono avwanre. Ọ dia avwanre di kpo Ẹkarophiyọ rẹ ughwu rẹ Jesu kidie ọyena obo ro fori nẹ e ru-u, ẹkẹvuọvo avwanre ra rere e se vwo ru nene iji rẹ Jesu nana: “Ru ọnana vwọ karohọ ovwẹ.” (Se 1 Kọrẹnt 11:23-26.) Omẹvwa yena nẹrhẹ iphiẹrophiyọ rẹ avwanre kpahen obaro na gan, ọ je nẹrhẹ a riẹn oborẹ Jihova vwo ẹguọnọ rẹ avwanre te. Ẹkẹvuọvo, Jihova riẹnre nẹ ọ dia uchebro vẹ uduephiophiyawọ rẹ obọ ọvo ẹgbukpe yen avwanre guọnọre-e. Ọtiọyena, kọ vwẹ emẹvwa rẹ kudughwrẹn kudughwrẹn na vwo yono avwanre, ọ je vuẹ avwanre nẹ e rhe vwobọ vwẹ ayen. Omaevwokpotọ yen che mu avwanre vwọ kerhọ rọyen. Avwanre ghwọrọ unọke evo kudughwrẹn kudughwrẹn vwo muegbe ji kpo emẹvwa.

5. Diesorọ ihwo re vwomakpotọ vwo rhiabọreyọ edurhie rẹ Jihova?

⁵ Kukpe kukpe yen Jihova vwo durhie ihwo re vwomakpotọ nẹ ayen yanrhe rere o yono ayen. Ihwo buebun rhiabọreyọ edurhie rọyen. (Aiz. 50:4) Ọke buebun na, Ẹkarophiyọ na yen ayen ka ra, tavwen ayen ki kpo emẹvwa efa rẹ avwanre ruẹ. (Zek. 8:20-23) Oma vwerhen avwanre nẹ Jihova rọ dia “ọchuko kugbe osivwi [rẹ avwanre]” yen yono avwanre, je kpọ avwanre viẹ. (Une 40:17) O vwo emu ọfa rọ vwerhen je ghanre vrẹ re vwo rhiabọreyọ edurhie rẹ Jihova vẹ Ọmọ rọyen Jesu Kristi vwọ kẹ avwanre-e.—Mat. 17:5; 18:20; 28:20.

6. Mavọ yen omaevwokpotọ vwọ nẹrhẹ ọshare ọvo kpo Ẹkarophiyọ na?

⁶ Avwanre davwẹngba vwo durhie ihwo buebun kpo Ẹkarophiyọ rẹ ughwu rẹ Jesu kukpe kukpe. Ihwo buebun re vwomakpotọ nabọ mrẹ ebruphiyọ gbidiki kidie ayen rhiabọreyọ edurhie na. Roro kpahen udje nana. Vwẹ ikpe evo re wanre, ọshare ọvo rhiabọreyọ ọbe rẹ edurhie rẹ Ẹkarophiyọ na mie oniọvo ọvo, ẹkẹvuọvo ọ da vuẹ oniọvo na nẹ ọyen cha mrẹ uphẹn vwọ rhe-e. Jẹ, o gbe oniọvo na unu rọ vwọ mrẹ ọshare na ọke rọ vwọ ro Ọguan Ruvie na vwẹ ason rẹ Ẹkarophiyọ na. Oborẹ iniọvo na dede ọshare na wan gbere unu mamọ, te asan rọ vwọ ton uyono ẹra rẹ kudughwrẹn kudughwrẹn phiyọ. Abọ erha ọvo yen o jẹ uyono vwo vwẹ uvwre rẹ ẹgbukpe ọvo. Die nẹrhẹ o se brorhiẹn ro vwo kpo emẹvwa rẹ avwanre kudughwrẹn kudughwrẹn? Omaevwokpotọ yen nẹrhẹ o se wene ẹwẹn ro vwori jovwo kpahen emẹvwa rẹ avwanre. Oniọvo ro durhire na tare nẹ “ọshare na ohwo rọ vwomakpotọ mamọ.” Aphro herọ-ọ, Jihova yen si ọshare na rhe ẹga rọyen, enẹna ọshare na bromaphiyame re.—2 Sam. 22:28; Jọn 6:44.

7. Mavọ yen oborẹ avwanre yono vwẹ emẹvwa vẹ obo re se vwẹ Baibol na sa vwọ chọn avwanre uko vwọ vwomakpotọ?

⁷ Oborẹ avwanre yono vwẹ emẹvwa vẹ oborẹ avwanre se vwẹ Baibol na cha nẹrhẹ e se vwo uruemu rẹ omaevwokpotọ. Udje rẹ Jesu vẹ uruemu rẹ omaevwokpotọ ro djephia rọ vwọ vwẹ arhọ rọyen vwọ tan ihwo hirhe, yen a ma tẹnroviẹ vwẹ emẹvwa rẹ avwanre udughwrẹn evo tavwen e ki ru Ẹkarophiyọ na. E mi rhe jiro kẹ avwanre nẹ e se ẹkpo rẹ Baibol sansan ri shekpahen ughwu vẹ evrẹnushi rẹ Jesu, ẹdẹ ibro tavwen e ki ru Ẹkarophiyọ na. Oborẹ avwanre yono vwẹ emẹvwa vẹ ẹkpo rẹ Baibol sansan rẹ avwanre se vwẹ uvwre ọke yena nẹrhẹ ọdavwaro rẹ avwanre vwo kpahen izobo rẹ Jesu na kodophiyọ. Ko muẹ avwanre vwọ vwẹrokere uruemu rẹ omaevwokpotọ rọyen, je ruẹ ọhọre rẹ Jihova vwẹ kẹdia kẹdia.—Luk 22:41, 42.

8. Idjerhe vọ yen Jesu vwo dje uduefiogbere phia?

⁸ Avwanre je davwẹngba vwọ vwẹrokere uduefiogbere rẹ Jesu. Roro kpahen uduefiogbere ro djephia ẹdẹ evo tavwen o ki ghwu. Ọ riẹnre dẹn nẹ ọyen cha rioja rẹ ophọphọvwe vwẹ obọ rẹ ivwighrẹn, ayen mi ji hwe ọyen ghwu. (Mat. 20:17-19) Dedena, ọ choma ro vwo ghwu. Ọke na vwo te, ọ da ta kẹ iyinkọn rọyen ri fuevun vwẹ asan ọvo re se Gẹtsimani: “We vrẹn ra yanran: nighe, ọ rọ cha shẹ vwẹ na te etinẹ nure.” (Mat. 26:36, 46) Otu buebun na vwọ rhe vẹ ikpokpo kugbe erọnvwọn efa rẹ ayen muru, Jesu da vwẹ oma phia kẹ ayen, ọ da je vuẹ isodje na nẹ ayen jẹ iyinkọn rọyen yanran. (Jọn 18:3-8) Vwọrẹ uyota, Jesu ghini dje obọdẹn rẹ uduefiogbere phia! Nonẹna, Inenikristi ra jẹreyọ vẹ igegede efa na davwẹngba vwọ vwẹrokere udje rẹ uduefiogbere rẹ Jesu. Vwẹ idjerhe vọ?

9. (a) Diesorọ ọ vwọ guọnọ uduefiogbere e ki se kpo emẹvwa ọkieje? (b) Mavọ yen udje rẹ avwanre se vwo djobọte iniọvo rẹ avwanre rehẹ uwodi?

⁹ Ọ guọnọ uduefiogbere e ki se kpo emẹvwa ọkieje, ma rho vwẹ ọke rẹ ebẹnbẹn. Iniọvo avwanre evo kpo emẹvwa ọkieje dede nẹ ayen rioja rẹ ebẹnbẹn kerẹ omaemuophiyọ, ofudjevwe, yẹrẹ jẹ omakpokpọ evwo. Efa fiudugberi kpo emẹvwa dede nẹ ayen rhiẹromrẹ omukpahen ọgangan vwo nẹ obọ ihwo rẹ orua yẹrẹ ihwo ri suẹn. Di roro oborẹ udje rẹ avwanre djobọte iniọvo rẹ avwanre re mu phiyọ uwodi fikirẹ esegbuyota rayen. (Hib. 13:3) Ayen de nyo nẹ avwanre je ga Jihova dede nẹ avwanre rhiẹromrẹ edavwini, ọyena cha nẹrhẹ ayen se fiudugberi je sẹro rẹ ọyọnregan vẹ esegbuyota rayen. Ọyinkọn Pọl rhiẹromrẹ oka rẹ ẹdia tiọyen. Kerẹ udje, ọke rọ vwọ hẹ uwodi vwẹ Rom, kọke kọke yen oma vwọ vwerhọn siẹrẹ o de nyo nẹ iniọvo na fuevun ga Jihova. (Fil. 1:3-5, 12-14) E ghwe vwo siobọno nu, Pọl de si ọbe rhe iniọvo rẹ Hibru. Vwevunrẹ ọbe yena, ọ da vuẹ Inenikristi ri fuevun nẹ “e jẹn ẹguọnọ [rayen] dje ebuoebuo,” ayen me je vwẹ ẹro ọghanghanre vwo ni emẹvwa.—Hib. 10:24, 25; 13:1.

10-11. (a) Ono yen avwanre se durhie rhe Ẹkarophiyọ na? (b) Mavọ yen Ẹfesọs 1:7 vwọ chọn avwanre uko vwọ riẹn oboresorọ e vwo ru ọtiọyen?

¹⁰ Avwanre dje uduefiogbere phia siẹrẹ e de durhie ihwo rẹ orua, ihwo rẹ avwanre vẹ ayen gba wian, kugbe e re dia kẹrẹ avwanre kpo Ẹkarophiyọ na. Diesorọ avwanre vwo durhie ayen? Fikirẹ ọdavwaro rẹ avwanre vwo kpahen oborẹ Jihova vẹ Jesu ru kẹ avwanre. Avwanre guọnọre nẹ ayen riẹn oborẹ ayen komobọ sa vwọ mrẹ erere nẹ “ẹserọphẹ” rẹ Jihova womarẹ ọtanhirhe na.—Se Ẹfesọs 1:7; Ẹvwọ. 22:17.

¹¹ Avwanre de fiudugberi kpo emẹvwa, ke se dje uruemu ọghanghanre ọfa phia, rọ dia uruemu rẹ Ọghẹnẹ vẹ Ọmọ rọyen djephia gbagba.

12. (a) Mavọ yen emẹvwa sa vwọ nẹrhẹ ẹguọnọ rẹ avwanre vwo kpahen Jihova vẹ Jesu kodophiyọ? (b) Die yen 2 Kọrẹnt 5:14, 15 vuẹ avwanre nẹ avwanre ru rere a sa vwọ vwẹrokere Jesu?

¹² Ẹguọnọ rẹ avwanre vwo kpahen Jihova vẹ Jesu yen muẹ avwanre vwo kpo emẹvwa. Obo re yono avwanre vwẹ emẹvwa, kọ nẹrhẹ ẹguọno rẹ avwanre vwo kpahen Jihova vẹ Ọmọ rọyen kodophiyọ. Vwevunrẹ uyono na kọyen a da karophiyọ avwanre oborẹ ayen ru kẹ avwanre. (Rom 5:8) Ẹkarophiyọ na nẹrhẹ avwanre karophiyọ oborẹ ẹguọnọ rayen kodo te, tobọ vwọ kẹ ihwo ri se ọtanhirhe na gbemu-u. Fikirẹ ọdavwaro re avwanre vwori, kẹ avwanre davwẹngba vwọ vwẹrokere Jesu womarẹ oborẹ avwanre yeren akpeyeren rẹ kẹde kẹde rẹ avwanre wan. (Se 2 Kọrẹnt 5:14, 15.) Vwọba, ubiudu rẹ avwanre vọnre vẹ akpẹvwẹ vwọ kẹ Jihova fikirẹ ọtanhirhe na. Idjerhe ọvo rẹ avwanre sa vwọ kpẹvwẹ Jihova ọyen ra vwọ kpahanphiyọ enọ vwẹ emẹvwa.

13. Mavọ yen e se vwo dje oborẹ ẹguọnọ rẹ avwanre vwo kpahen Jihova vẹ Ọmọ rọyen kodo te? Djekpahọn.

¹³ Avwanre se dje oborẹ ẹguọnọ rẹ avwanre kpahen Jihova vẹ Ọmọ rọyen kodo te siẹrẹ a da choma ra vwọ vwẹ erọnvwọn vwo ze fikirẹ ayen. Vwẹ ọke buebun na, avwanre vwẹ erọnvwọn sansan vwo ze rere avwanre se vwo kpo emẹvwa. Ovwọnvwọn rẹ ihwo vwo nẹ iruo te uwevwin yen ikoko buebun vwo ruẹ uyono rẹ uvwre udughwrẹn rayen. Ọke yena jẹ oma ghwọrọ ihwo buebun re. Ọke rẹ ihwo buebun vwo rovwonma, kọyen e vwo ruẹ uyono rẹ oba rẹ udughwrẹn. Kẹ Jihova mrẹ ẹgbaẹdavwọn rẹ avwanre vwo kpo uyono dede nẹ oma ghwọrọ avwanre re? Dẹn! Vwọrẹ uyota, ẹguọnọ rẹ Jihova vwo kpahen avwanre cha ganphiyọ siẹrẹ avwanre da davwẹngba vwo kpo uyono ọkieje.—Mak 12:41-44.

14. Mavọ yen Jesu vwo dje obo re se vwo dje ẹguọnọ rẹ omaevwoze phia?

¹⁴ Jesu phi uvi rẹ udje phiyotọ kpahen obo re se vwo dje ẹguọnọ rẹ omaevwoze phia. Ọ choma rọ vwọ vwẹ ọdavwẹ rẹ idibo rọyen vwọ kobaro kẹ erọyen te ẹdia ro vwo ghwu kẹ ayen dede. Kerẹ udje, o nene idibo rọyen ta ota dede nẹ oma ghwọrerọ mamọ yẹrẹ vwẹ ọke rẹ ẹwẹn rọyen vwọ yanghan. (Luk 22:39-46) Ọ tẹnrovi obo rọ  sa vwọ kẹ ihwo efa, ọ dia obo ro che mie aye-en. (Mat. 20:28) Ẹguọnọ rẹ avwanre vwo kpahen Jihova vẹ iniọvo rẹ avwanre da gan, kẹ avwanre cha davwẹngba vwo kpo Ẹkarophiyọ na kugbe emẹvwa rẹ kudughwrẹn kudughwrẹn rẹ avwanre.

15. Amono yen avwanre me vwo owenvwe ra vwọ vwẹ ukẹcha kẹ?

¹⁵ Avwanre hẹ ukoko rẹ Inenikristi rẹ uyota, oma je vwerhen avwanre fikirẹ ọke buebun rẹ avwanre ghwọrọ vwo durhie ihwo nẹ ayen rhe vwomaba avwanre. Jẹ, “otu re hẹ evwruwevwi rẹ esegbuyota na” re dobọ rẹ iruo rẹ ẹga rayen ji yen avwanre me vwo owenvwe ra vwọ vwẹ ukẹcha kẹ. (Gal. 6:10) Avwanre dje ẹguọnọ rẹ avwanre phia siẹrẹ e de jiro kẹ ayen nẹ ayen kpo emẹvwa, ma rho kẹ Ẹkarophiyọ na. Kerẹ Jihova vẹ Jesu, oma vwerhen avwanre siẹrẹ ohwo rọ dobọ rẹ iruo rẹ ẹga na ji de rhivwin bru Jihova rhe, kidie ọyehẹ Ọsẹ kugbe Osuigodẹ rẹ avwanre.—Mat. 18:14.

16. (a) Mavọ yen avwanre se vwo phiuduphiyọ ohwohwo awọ, kẹ ukẹcha vọ yen emẹvwa sa vwọ kẹ avwanre? (b) Diesorọ ọnana vwọ dia omamọ rẹ ọke ra vwọ karophiyọ eta rẹ Jesu rehẹ Jọn 3:16?

¹⁶ O rhe che kri-i, ke che durhie ihwo buebun nẹ ayen rhe Ẹkarophiyọ na vwẹ ovwọnvwọn rẹ Friday, April 19, 2019. (Ni ekpeti na “Wo Che Durhie Ayen?”) E gbe jẹ avwanre phiuduphiyọ ohwohwo awọ womarẹ e vwo kpo emẹvwa rẹ avwanre rẹ kudughwrẹn kudughwrẹn rẹ Jihova de yono avwanre. Emẹvwa rẹ avwanre cha chọn avwanre uko vwọ dia ihwo re vwomakpotọ, fiudugberẹ, ji dje ẹguọnọ phia ọkieje vwevunrẹ eyeren nana ro sikẹre oba rọyen re na. (1 Tẹsa. 5:8-11) E jẹ avwanre vwẹ ubiudu rẹ avwanre ejobi vwo dje ọdavwaro phia kpahen ẹguọnọ rẹ Jihova vẹ Ọmọ rọyen dje kẹ avwanre!—Se Jọn 3:16.