Uyono 1
“Wo jẹ Ofu Dje We-e, Kidie Mẹvwẹ Ọghẹnẹ Wẹn”
“Wọ djẹ oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn; Me kẹ wẹ ogangan, Me cha wẹ uko.”—AIZ. 41:10.
UNE 7 Jihova, Ọyehẹ Ogangan rẹ Avwanre
ỌDJẸKOKO *
1-2. (a) Mavọ yen Aizaya 41:10 djobọte oniọvo Yoshiko wan? (b) Amono yen Jihova vwẹ fiki rọyen sẹro rẹ ovuẹ yena?
ONIỌVO aye ọvo re se Yoshiko nyo iyẹnrẹn ọbrabra. Idọktọ rọyen vuẹrẹ nẹ emeranvwe ibro yen chekọ ro che yerin tavwen o ki ghwu. Die yen Yoshiko ruru? Ọ da karophiyọ Aizaya 41:10 (Se) rọ dia ẹkpo rẹ Baibol rọ vwerhọn mamọ. Ọ da vwẹ ẹwẹn kpotọ vuẹ idọktọ na nẹ oshọ mu ọye-en, kidie Jihova yọnrọn obọ rọyen. * Ovuẹ rẹ onẹrhẹvwe rọhẹ ẹkpo rẹ Baibol yena, chọn oniọvo rẹ avwanre nana uko vwọ vwẹroso Jihova karekare. Ẹkpo rẹ Baibol yena je sa chọn avwanre uko vwo vwo ẹwẹn re dọe siẹrẹ e de hirharoku edavwini egangan. Re vwo vwo ẹruọ rẹ oboresorọ a vwọ ta ọtiọyen, e jẹ a ka fuẹrẹn obo re nẹrhẹ Jihova vwẹ ovuẹ yena kẹ Aizaya.
2 Ẹsosuọ, Jihova vuẹ Aizaya nẹ o si eta rẹ onẹrhẹvwe yena phiyotọ fikirẹ ihwo rẹ Ju re che mu kpo eviẹn vwẹ Babilọn. Jihova da je sẹro rẹ ovuẹ yena vwọ kẹ erere rẹ ihwo rẹ ọke rẹ avwanre nana. (Aiz. 40:8; Rom 15:4) Ọke nana yen a ma vwọ guọnọ uchebro rọhẹ ọbe rẹ Aizaya na, kidie avwanre yerẹn vwẹ “ẹdẹ ebrabra” enẹna.—2 Tim. 3:1.
3. (a) Ive vọ yehẹ Aizaya 41:10 rọ dia ẹkpo rẹ Baibol re mu uyovwinrota rẹ ukpe rẹ 2019 kpahen? (b) Diesorọ avwanre vwọ guọnọ ive tiọyena?
3 Vwevunrẹ uyono nana, avwanre cha tẹnrovi ive erha rẹ Jihova vwọphia vwẹ Aizaya 41:10 re sa bọn avwanre gan: (1) Jihova vẹ avwanre herọ, (2) ọyehẹ Ọghẹnẹ rẹ avwanre, kugbe (3) ọ cha vwẹ ukẹcha kẹ avwanre. Kerẹ oniọvo Yoshiko, avwanre guọnọ eta rẹ uduephiophiyawọ tiọna, * kidie avwanre ohwo vuọvo ji hirharokuẹ edavwini. O ji vwo ebẹnbẹn ebrabra efa vwẹ akpọ na rẹ avwanre nene muabọ. Iniọvo rẹ avwanre evo tobọ chirakon rẹ omukpahen ọgangan ro nẹ obọ rẹ usuon cha. E gbe jẹ a fuẹrẹn ive nana ọvuọvo.
“ME VẸ OWẸ HERỌ”
4. (a) Die yen ive rẹsosuọ re che roro kpahen? (Ni eta rehẹ obotọ na.) (b) Idjerhe vọ yen Jihova vwo dje ẹguọnọ rọyen kẹ avwanre? (c) Mavọ yen eta rẹ Jihova djobọte we wan?
4 Ẹsosuọ, Jihova phiuduphiyọ avwanre awọ vẹ eta nana: “Wọ djẹ oshọ-ọ, kidie me vẹ owẹ herọ.” * Jihova djerephia nẹ ọyen vẹ avwanre herọ kidie o vwo ọdavwẹ rẹ avwanre, o ji dje ẹguọnọ kẹ avwanre. Jokaphiyọ obo rọ ta kpahen ẹguọnọ vẹ ọdavwẹ ro vwo kpahen avwanre. Ọ da ta: “Wẹ ọghaghare kẹ vwẹ, wẹ ro vwo ọghọ, ivun wẹn da vwerhe ovwẹ.” (Aiz. 43:4) O vwo ẹgba vuọvo vwẹ akpọ vẹ odjuvwu rọ sa dobọ rẹ ẹguọnọ rẹ Jihova vwo kpahen avwanre ji-i. Ẹguọnọ ro jẹ rhẹriẹ ro vwo kpahen avwanre ji che se kpogho-o. (Aiz. 54:10) Ẹguọnọ ro djephia vẹ oyerinkugbe rẹ avwanre vẹ ọyen vwori nẹrhẹ udu rẹ avwanre gan. Ọ cha sẹro rẹ avwanre nonẹna, kirobo ro ru kẹ ugbeyan rọyen Ebram (Ebraham). Jihova da ta kẹ: “Wọ djẹ oshọ-ọ, Ebram, mẹvwẹ ekpọfia wẹn.”—Jẹn. 15:1.
Jihova cha chọn avwanre uko vwo chirakon rẹ edavwini re pha kerẹ urhie yẹrẹ erhanre (Ni ẹkoreta 5-6) *
5-6. (a) Mavọ avwanre ru riẹn nẹ Jihova guọnọ chọn avwanre uko vwẹ ọke rẹ ebẹnbẹn? (b) Die yen avwanre yono nẹ udje rẹ Yoshiko rhe?
5 Avwanre riẹnre nẹ Jihova guọnọ chọn avwanre uko vwẹ ọke rẹ ebẹnbẹn, kidie o ve ive nana kẹ ihwo rọyen: “Ọke wọ da wan ame vrẹn ye Me vẹ owẹ herọ; Ọ da dia evun rẹ urhie dede, o che re we-e; wọ da yan erhanre vrẹn ọ cha torhẹ owẹ-ẹ; ogidi erhanre na cha ghwọrọ owẹ-ẹ.” (Aiz. 43:2) Die yen eta nana mudiaphiyọ?
Aiz. 41:13) Oniọvo aye Yoshiko re djunute siẹvure, mrẹ ọnana vughe. Ọmọtẹ rọyen da ta: “Uruemu rẹ oni avwanre djephia gbe avwanre unu mamọ. Avwanre niroso nẹ Jihova kẹ rẹ ẹwẹn re dọe. Rhi te ọke ro vwo ghwu yen ọ vwọ vuẹ inọsu vẹ ihwo re rhe omaesivwo vwẹ etiyin kpahen Jihova vẹ ive rọyen.” Die yen avwanre yono nẹ udje rẹ Yoshiko rhe? Siẹrẹ avwanre da vwẹroso ive rẹ Jihova nẹ “Me vẹ owẹ herọ,” ke se fiudugberi chirakon rẹ ebẹnbẹn.
6 Ọ dia ebẹnbẹn rẹ avwanre yen Jihova veri nẹ ọyen che si no-o, ẹkẹvuọvo ọ cha rhọnvwe nẹ ebẹnbẹn re vwo dje “urhie” na mu avwanre rọ-ọ, yẹrẹ edavwini re vwo dje “erhanre” ghwọrọ avwanre-e. Ọ kẹ avwanre imuẹro nẹ ọ vẹ avwanre herọ, ọ cha chọn avwanre uko vwọ “wan” edavwini yena. Die yen Jihova che ru? O che si oshọ rẹ avwanre kpotọ rere a sa vwọ fuevun kẹ, ọ da tobọ dianẹ avwanre hirharoku ughwu dede. (“MẸVWẸ ỌGHẸNẸ WẸN”
7-8. (a) Die yen ive rivẹ na, kẹ die yen o mudiaphiyọ? (b) Diesorọ Jihova vwọ vuẹ ihwo rẹ Ju rehẹ eviẹn nẹ e “jẹ ofu dje” aye-en? (c) Eta vọ vwẹ Aizaya 46:3, 4 yen nẹrhẹ udu rẹ ihwo rẹ Ju na totọ?
7 Vwo oniso rẹ ive rivẹ rẹ Aizaya si kpahen: “Wo jẹ ofu dje we-e, kidie Mẹvwẹ Ọghẹnẹ wẹn.” Die yen ota nana ro shekpahen ofudjevwe na mudiaphiyọ? Vwẹ ephẹrẹ rẹsosuọ re vwo si etinẹ rẹ Baibol na, a fan ubiota na ‘ofudjevwe’ vẹ ọhọ rẹ ohwo ro “nẹ obuko ọkeneje vẹ oshọ nẹ ohwo yẹrẹ orọnvwọn ọvo cha wan ọyen oma.”
8 Diesorọ Jihova vwọ vuẹ ihwo rẹ Ju re che mu kpo eviẹn vwẹ Babilọn nẹ e “jẹ ofu dje” aye-en? Kidie ihwo rẹ otọ yena yen oshọ che mu. Diesorọ? Vwẹ oba rẹ ẹgbukpe 70 rẹ ihwo rẹ Izrẹl cha dia eviẹn te na, otuofovwin rẹ Mid vẹ Pẹsha cha kpare ofovwin rhe Babilọn. Jihova kọ vwẹ ayen vwo si ihwo rọyen nẹ eviẹn. (Aiz. 41:2-4) Ihwo rẹ Babilọn vẹ ẹgborho re riariẹ ayen phiyọ na vwo nyo nẹ ivwighrẹn na cha, kẹ ayen davwẹngba vwo phiuduphiyọ ohwohwo awọ, rẹ ayen vwọ ta: “Jẹ udu wẹn gan.” Ayen da ma ema buebun, vẹ ẹwẹn nẹ ema na che sivwin ayen. (Aiz. 41:5-7) Ẹkẹvuọvo, Jihova vwẹ uchebro kẹ ihwo rẹ Ju rehẹ eviẹn womarẹ eta nana: “Wẹ, Izrẹl, [rọ fẹnẹ ẹgborho efa na] odibo mẹ . . Wo jẹ ofu dje we-e, kidie Mẹvwẹ Ọghẹnẹ wẹn.” (Aiz. 41:8-10) Jokaphiyọ oborẹ Jihova tare: “Mẹvwẹ Ọghẹnẹ wẹn.” Jihova vwẹ eta yena vwọ vwẹ imuẹro kẹ idibo rọyen ri fuevun nẹ, ayen je rhe chọrọ ọyen ẹro-o, ọyen Ọghẹnẹ rayen, ayen jẹ ihwo rọyen. Ọ da ta kẹ ayen: “Me je ghwa . . . ki mi sivwo.” Eta yena ghene bọn ihwo rọyen gan.—Se Aizaya 46:3, 4.
9-10. Diesorọ oshọ vwo jẹ avwanre emuo? Djudje rọyen.
9 Nonẹna, ihwo buebun ro ẹnwan vrẹ obo ri jovwo fikirẹ ebẹnbẹn rẹ akpọ re rhoma ganphiyọ. Vwọrẹ uyota, ebẹnbẹn rẹ akpọ na ji te avwanre oma. Jẹ ofori nẹ oshọ mu avwanre-e, kidie Jihova ve kẹ avwanre nẹ, “Mẹvwẹ Ọghẹnẹ wẹn.” Diesorọ ota yena sa vwọ nẹrhẹ ẹwẹn rẹ ohwo totọ?
10 Roro kpahen udje nana: Jim vẹ Ben ro aropleni. Aropleni na vwọ rhan yanran, odju ọgangan ko djuẹ. Aropleni na ko phieghe cha phieghe kpo, ohwo rọ gua aropleni na da vwẹ agborho vwọ ta ota rhe ihwo na: “Ovwan vwẹ umuehun rehẹ egbara na vwo mu ehun, kidie aruọke na pha brabra.” Oshọ da ro Jim oma. Ọ rọ gua aropleni na da rhoma ta: “We jẹ oshọ
mu ovwa-an. Ovwan vwẹroso vwẹ.” Jim de “kpogho uyovwin” rọ vwọ ta, “Die yen ọ ta na?” Ẹkẹvuọvo, Jim vwo noso nẹ oshọ mu Ben kakaka-a, ọ da nọ: “Die kẹ wẹ udu nana?” Vẹ opharo ehwẹ, Ben da ta: “Kidie mi vughe ohwo rọ gua aropleni na. Ọsẹ mẹ!” Ọ da rhoma ta: “Ju vwe gbikun rẹ ọsẹ mẹ kẹ wẹ. Wo de nyo ikuegbe rọyen vẹ obo rọ nabọ tẹn ona rẹ iruo nana, oshọ rhe che mu we ọfa-a.”11. Die yen e se yono vwo nẹ udje rẹ ihwo ivẹ re ro aropleni?
11 Die yen avwanre yono nẹ udje nana rhe? Kerẹ Ben, udu rẹ avwanre totọ kidie avwanre nabọ riẹn Jihova rọ dia Ọsẹ rẹ avwanre. Avwanre riẹnre nẹ ọ cha chọn avwanre uko vwo chirakon rẹ ebẹnbẹn sansan re che hirharoku vwẹ ẹdẹ re koba nana. (Aiz. 35:4) Avwanre vwẹroso Jihova, ọtiọyena ẹwẹn rẹ avwanre sa dia dọe, ọ da tobọ dianẹ oshọ mu ihwo buebun. (Aiz. 30:15) Avwanre je sa dia kerẹ Ben siẹrẹ a da vuẹ irivẹ rẹ avwanre kpahen oboresorọ avwanre vwọ vwẹroso Jihova. Ayen komobọ ke sa vwẹrosuọ nẹ o toro oborẹ ebẹnbẹn rayen gan te-e, Jihova cha chọn ayen uko.
“ME KẸ WẸ OGANGAN, ME CHA WẸ UKO”
12. (a) Die yen ive rerha na? (b) Die yen “igbabọ” rẹ Jihova re djunute na nẹrhẹ avwanre karophiyọ?
12 Roro kpahen ive rerha rẹ Aizaya si kpahen: “Me kẹ wẹ ogangan, me cha wẹ uko.” Aizaya djisẹ rẹ oborẹ Jihova bọn ihwo rọyen gan, yẹrẹ kẹ ayen ogangan jovwo re, rọ vwọ ta: “Ọghẹnẹ ra cha vẹ ẹgba, igbabọ rọye ri suẹn kẹ.” (Aiz. 40:10) Baibol na reyọ “igbabọ” vwo djisẹ rẹ ẹgba ọke buebun. Ọtiọyena eta nana, “igbabọ rọye ri suẹn” na, nẹrhẹ a karophiyọ nẹ Jihova ọyen Ovie ro vwo ẹgba mamọ. Kirobo rọ reyọ ẹgba rọyen ra mrẹ vwo dje-e na, vwọ chochọn rẹ idibo rọyen vwẹ ọke awanre, ọtiọyen ọ je reyọ vwọ chochọn rẹ idibo rọyen je bọn ayen gan nonẹna.—Urhi 1:30, 31; Aiz. 43:10.
O vwo orọnvwọn vuọvo re duvwu vwọso igbabọ rẹ usivwin rẹ Jihova ro che phikparobọ-ọ (Ni ẹkoreta 12-16) *
13. (a) Ọke vọ yen Jihova me vwo ru ive rọyen gba? (b) Ive vọ yen bọn avwanre gan je kẹ avwanre uduefiogbere?
13 Ọke rẹ ivwighrẹn de muẹkpahen avwanre yen Jihova me vwo ru ive nana gba: “Me kẹ wẹ ogangan.” Vwẹ ẹkuotọ evo nonẹna, ivwighrẹn davwẹngba rẹ ayen vwọ dobọ rẹ iruo rẹ ukoko na yẹrẹ aghwogwo rẹ avwanre ji. Dedena, avwanre ro ẹnwan rẹ omukpahen na-a. Ive rẹ Jihova bọn avwanre gan je kẹ avwanre uduefiogbere. Ọ da ta: “Orọvwọ re duvwu vwọ so owẹ se yovwi-i.” (Aiz. 54:17) Ota yena nẹrhẹ avwanre karophiyọ erọnvwọn erha re pha ghanghanre.
14. Diesorọ omukpahen ro nẹ obọ rẹ ivwighrẹn cha, rhe gbe avwanre unu-u?
14 Ọrẹsosuọ, kerẹ idibo rẹ Jesu, avwanre riẹnre nẹ e che vwo utuoma kpahen avwanre. (Mat. 10:22) Jesu tarọphiyotọ jovwo nẹ e che mukpahen idibo rọyen mamọ vwẹ ọke rẹ oba na. (Mat. 24:9; Jọn 15:20) Ọrivẹ, Aizaya mraro rọyen nẹ, vwọ vrẹ utuoma re che vwo kpahen avwanre, ivwighrẹn je cha reyọ ena sansan vwọ họnre avwanre. Evo usun rẹ ena nana yehẹ ophiẹnvwe, efian, vẹ omukpahen ọgangan. (Mat. 5:11) Jihova cha dobọ rẹ ena nana rẹ ayen vwọ họnre avwanre na ji-i. (Ẹfe. 6:12; Ẹvwọ. 12:17) Jẹ ofori nẹ oshọ mu avwanre-e. Diesorọ?
15-16. (a) Die yen orọnvwọn rerha ra cha karophiyọ, ke mavọ yen Aizaya 25:4, 5 vwo dje ọnana phia? (b) Mavọ yen Aizaya 41:11, 12 vwo djisẹ rẹ obo re cha phia kẹ ivwighrẹn avwanre ukuotọ rọyen?
15 Ọrerha kọna, Jihova tare nẹ “orọvwọ re duvwu” vwọso avwanre “se yovwi-i.” Kirobo rẹ igbẹhẹ sẹro rẹ avwanre nẹ ogiribo ọgangan ye, eriyin Jihova je sẹro rẹ avwanre vwo nẹ “ova rẹ ohwo ogbarogba.” (Se Aizaya 25:4, 5.) Ivwighrẹn cha sa so omaẹwan re bẹdẹ kẹ avwanre-e.—Aiz. 65:17.
16 Jihova nẹrhẹ udu rẹ avwanre ganphiyọ, rọ vwọ vuẹ avwanre obo re cha phia kẹ “ihwo re vwọ so” avwanre ukuotọ rọyen. (Se Aizaya 41:11, 12.) O vwo oborẹ ohọnre rẹ ivwighrẹn rẹ avwanre gan te-e, orọnvwọn vuọvo yen cha phia kẹ ayen eje: Ivwighrẹn rẹ Ọghẹnẹ eje cha “ghwọrọ kufia.”
OBORẸ ẸROẸVWỌSUỌ RẸ AVWANRE KPAHEN JIHOVA SA VWỌ GANPHIYỌ
Ẹroẹvwọsuọ rẹ avwanre kpahen Jihova sa ganphiyọ siẹrẹ e de se Baibol na ọkieje (Ni ẹkoreta 17-18) *
17-18. (a) Mavọ yen isese rẹ Baibol sa vwọ nẹrhẹ ẹroẹvwọsuọ rẹ avwanre kpahen Jihova ganphiyọ? Djudje ọvo. (b) Mavọ yen re vwo roro kpahen uyovwinrota rẹ ukpe rẹ 2019 sa vwọ chọn avwanre uko?
17 Ẹroẹvwọsuọ avwanre kpahen Jihova sa ganphiyọ siẹrẹ e de yono kpahọn kpobarophiyọ. Ra vwọ nabọ ghwọrọ ọke vwo se Baibol je roro kpahọn kokodo yen idjerhe vuọvo re se vwo ru ọtiọyen. Baibol na vọnre vẹ ikuegbe rẹ oborẹ Jihova sẹro rẹ ihwo rọyen wan vwẹ ọke awanre. Ikuegbe tiọyena kẹ avwanre imuẹro nẹ ọ je cha sẹro rẹ avwanre.
18 Roro kpahen eta rẹ udje rẹ Aizaya vwo djisẹ rẹ oborẹ Jihova sẹro rẹ avwanre wan. Ọ reyọ Jihova vwo dje osuigodẹ, ọ da rha vwẹ idibo rọyen vwo dje igodẹ. Vwọ kpahen Jihova, Aizaya da ta: “O mu emọ rẹ igodẹ na phihọ igbabọ rọye, o mu ayen phihọ agbada rọye.” (Aiz. 40:11) Ubiudu rẹ avwanre che totọ siẹrẹ avwanre da vwẹ ẹwẹn roro nẹ Jihova mu avwanre phiyọ obọ. Rere ubiudu avwanre sa vwọ dia dọe vwẹ ogidi rẹ ebẹnbẹn, odibo rọ fuevun rọ je ghwanre na sane Aizaya 41:10 nẹ ọyen cha dia uyovwinrota ro che sun ukpe rẹ 2019, “Wo jẹ ofu dje we-e, kidie Mẹvwẹ Ọghẹnẹ wẹn.” Nabọ roro kpahen eta yena ri phiuduphiyọ ohwo awọ na. E cha bọn wẹ gan vwo hirharoku ebẹnbẹn re cha obaro.
UNE 38 Ọ Cha Bọn Wẹ Gan
^ e?ko. 5 Uyovwinrota rẹ ukpe rẹ 2019 cha kanrunumu erọnvwọn erha re sa nẹrhẹ o mu avwanre ẹro nẹ e se vwo ẹwẹn re dọe, o toro erọnvwọn ebrabra re phia vwẹ akpọ na yẹrẹ vwẹ akpeyeren avwanre-e. Uyono nana cha fuẹrẹn erọnvwọn yena, ọ je cha chọn avwanre uko vwo si ẹnwan rẹ avwanre kpotọ je vwẹroso Jihova. Roro kpahen uyovwinrota rẹ ukpe na. Se ku uyovwin, ọ da dia obo wo se ru. Ọ cha kẹ wẹ ẹgba wo se vwo chirakon rẹ ebẹnbẹn re cha vwẹ obaro na.
^ e?ko. 3 OBORẸ OTA NANA MUDIAPHIYỌ: Ive ọyen ota rọ dia uyota, ro djerephia nẹ obo ra tare na che jẹ phia-a. Ive rẹ Jihova sa chọn avwanre uko vwo yerin ghene ebẹnbẹn re sa vwomaphia vwẹ akpeyeren rẹ avwanre.
^ e?ko. 4 E djunute eta na “wọ djẹ oshọ-ọ” abọ erha vwẹ Aizaya 41:10, 13, vẹ 14. Owọrota ọvo reyọ ota na “me” yẹrẹ mẹvwẹ (vwọ ta ota kpahen Jihova) abọ buebun. Diesorọ ẹwẹn ọfuanfon rẹ Jihova vwo mu Aizaya vwọ reyọ ubiota na “me” yẹrẹ mẹvwẹ vwo ruiruo vwẹ idjerhe tiọyen? Oboresorọ kọna: Siẹrẹ a da vwẹroso Jihova, oshọ rhe che mu avwanre-e.
^ e?ko. 52 IDJEDJE RẸ UHOHO: Ihwo rẹ orua ri chirakon rẹ ebẹnbẹn sansan: jẹ omakpokpọ evwo, vẹ ẹvwọsuọ vwẹ obẹ iruo, aghwoghwo, kugbe isikuru
^ e?ko. 54 IDJEDJE RẸ UHOHO: Elọkpa rhi mu iniọvo ri ruẹ uyono vwẹ uwevwin ọvo, ẹkẹvuọvo oshọ mu aye-en.
^ e?ko. 56 IDJEDJE RẸ UHOHO: Ẹga Orua rẹ ọkieje chọn avwanre uko vwo chirakon.