1-2. Ẹdia vọ yen ihwo ri Jihova buebun hirharokuẹ nonẹna, mavọ yen ọnana djobọte ayen wan?

RORO kpahen idje nana: Eghene ọshare ọvo mwa okpọga rọ cha ra guọghọ oma na ememerha. Ọgbowian rẹ ọshare ọvo rọ vrẹ ẹgbukpe 50 ra djẹ nẹ iruo guọnọ iruo jẹ ọ je rhe mrẹ-ẹ. Oniọvo aye ọvo rọ kpakore rọ ga Jihova ikpe buebun re, rhe se ruẹ te asan ro ruẹ te jovwo-o.

² Ẹdia wẹn da họhọ ọvo usun re djunute na, wo se ni oma wẹn nẹ o rhe vwo obo ra cha reyọ owẹ vwo ru ọfa-a. Ẹdia na sa nẹrhẹ aghọghọ wẹn shekpotọ, ọ sa nẹrhẹ wọ vwẹ ẹro okueku vwo ni oma wẹn ji gbowọphiyọ oyerinkugbe wẹn vẹ ọ rẹ ihwo efa.

3. Ẹro vọ yen Eshu vẹ ihwo ro suẹn vwo nẹ arhọ?

³ Ẹro rẹ Eshu vwo ni arhọ yen akpọ na ji vwo no. Eshu vwẹ ikabọ vwo muẹ ihworakpọ kerẹsiẹ ra da mrẹ nẹ ayen fiemu vuọvo-o. Eshu vuẹ Ivi nẹ o che vwo ugbomọphẹ siẹrẹ o de churhi ri Jihova, dede nẹ ọ riẹnre nẹ ughwu yen che nẹ obuko rọyen rhe. Eshu yen suẹn ekiẹchuọ, usuon vẹ ẹga rẹ efian rẹ akpọ na. Ọnana yensorọ rẹ ineki, ihwo ri sivwẹn oseghe rẹ usuon vẹ ilori ega buebun rhe brọghọ phiyọ ihwo oma yẹrẹ ni arhọ ghanghanre-e.

4. Die yen a cha fuẹrẹn vwẹ uyono nana?

⁴ Vwọ fẹnẹ Eshu, Jihova guọnọre nẹ a riẹn nẹ o ni avwanre ghanghanre, o ji biẹcha avwanre siẹrẹ e de hirharoku ẹdia re nẹrhẹ e ni oma rẹ avwanre kueku. (Une  136:23; Rom 12:3) Vwẹ uyono nana, a cha fuẹrẹn oborẹ Jihova chọn avwanre uko vwẹ ẹdia erha nana: (1) Ọke rẹ avwanre da muọga, (2) ọke re de hirharoku uwenre ọgangan, kugbe (3) siẹrẹ ẹdia rẹ ọghwo rẹ avwanre da nẹrhẹ e roro nẹ avwanre rhe fiemu vwẹ ẹga ri Jihova-a. Ẹsosuọ, e jẹ a fuẹrẹn oboresorọ ro vwo mu avwanre ẹro nẹ Jihova ni avwanre ọvuọvo ghanghanre.

5. Mavọ wo ru riẹn nẹ Jihova ni ihworakpọ ghanghanre?

⁵ Dede nẹ ekpẹn yen a vwọ ma avwanre, jẹ avwanre ghanre vwo nẹ ibiekpẹn rẹ otọ na. (Jẹn. 2:7) Di roro kpahen iroro evo re sorọ avwanre ru riẹn nẹ Jihova ni avwanre ghanghanre. Ọ ma avwanre vẹ ẹgba re se vwo dje iruemu rọyen phia. (Jẹn. 1:27) Ọnana ri Jihova ruru na nẹrhẹ a riẹn nẹ o ni ihworakpọ ghanre vrẹ emama rọyen eje rọhẹ otọrakpọ na. Ọ vwẹ ohworakpọ vwo mu ovie vwẹ enu rẹ emama na eje kugbe eranvwe.—Une 8:4-8.

6. Iroro ọfa vọ yensorọ avwanre vwọ riẹn nẹ Jihova vwẹ ẹro ọghanghanre ni ihworakpọ ri jẹgba?

⁶ Adam vwo ru umwemwu nu dede, Jihova je vwẹ ẹro ọghanghanre vwo ni ihworakpọ. O ni avwanre ghanre te ẹdia ro vwo ji ọmọ ọghanghanre rọyen Jesu Kristi rhi vwo ghwu fikirẹ umwemwu rẹ avwanre. (1 Jọn 4:9, 10) Fikirẹ izobo rẹ ọtanhirhe na, Jihova cha rhọvwọn “ihwo ọsoso te i ri jẹ ọsoso ẹdia” nushi. (Iruo 24:15) Baibol na djerephia nẹ avwanre pha ghanghanre kẹ Jihova owenẹ avwanre hirharokuẹ ẹdia rẹ ogbere, ọghwo yẹrẹ avwanre vwo omakpokpọ-ọ—Iruo 10:34, 35.

7. Erhọ yen iroro efa re sorọ rẹ idibo rẹ Ọghẹnẹ vwo vwo imuẹro nẹ ayen ghanre kẹ Ọghẹnẹ?

⁷ O ji vwo iroro ọfa rọ nẹrhẹ avwanre riẹn nẹ Jihova ni avwanre ghanghanre. O si avwanre te oma, o ji vwo oniso oborẹ avwanre kpahenphiyọ iyẹnrẹn esiri na. (Jọn 6:44) Avwanre vwo siẹkẹrẹ Jihova ye, ko ji che sikẹrẹ avwanre. (Jems 4:8) Jihova je ghwọrọ ọke vẹ ẹgba vwo yono avwanre ro djerephia nẹ avwanre ghanre vwọ kẹ. Ọ riẹn oka rẹ ohwo rẹ avwanre ọvuọvo hepha enẹna vẹ oborẹ avwanre se vwo ru yovwinphiyọ. Ọ je ghwokuẹ avwanre kidie nẹ o vwo ẹguọnọ rẹ avwanre. (Isẹ 3:11, 12) Aphro herọ-ọ nẹ Jihova ghini ni avwanre ghanghanre!

8. Mavọ yen eta rehẹ Une Rẹ Ejiro 18:27-29 sa vwọ chọn avwanre uko vwo wene ẹro re vwo ni ebẹnbẹn rẹ avwanre?

⁸ Ihwo evo niro nẹ o vwo obo ra cha reyọ Ovie Devid ru-u, jẹ ọ riẹnre nẹ Jihova ji vwo ẹguọnọ rọyen je chọn ọyen uko. Ọnana nẹrhẹ Devid chirakon rẹ ebẹnbẹn rọyen na vẹ iphiẹrophiyọ. (2 Sam. 16:5-7) Siẹrẹ ẹwẹn rẹ avwanre da kuọrọn yẹrẹ e de hirharoku ebẹnbẹn, Jihova sa chọn avwanre uko vwo wene ẹro rẹ avwanre vwo ni ẹdia na ji phio kparobọ. (Se Une Rẹ Ejiro 18:27-29.) Jihova da hẹ obuko rẹ avwanre, o vwo emu vuọvo rọ sa dobọ rẹ avwanre ji e vwo jẹ ẹga vẹ aghọghọ-ọ. (Rom 8:31) E gbe jẹ a fuẹrẹn ẹdia erha yena ro de me fo nẹ a karophiyọ nẹ Jihova vwo ẹguọnọ ji ni avwanre ghanghanre.

9. Ẹro vọ yen ohwo se vwo ni oma rọyen fikirẹ ọga?

⁹ Ọga sa nẹrhẹ ẹwẹn rẹ avwanre tighi ku, e mi rhi roro nẹ o rhe vwo oborẹ ihwo efa cha vwẹ avwanre ru-u. Oma  sa vua avwanre siẹrẹ ihwo da riẹn nẹ avwanre họnvwan ọka rẹ ọga ọvo yẹrẹ a da guọnọ ukẹcha rẹ ihwo ọkieje e ki se ru erọnvwọn. Ọ da dianẹ ihwo efa riẹn kpahen oka rẹ ọga rẹ avwanre họnvwan na-a, oma je sa vua avwanre kidie nẹ obọ avwanre rha gba emuọvo ruẹ-ẹ. Vwẹ ọke rẹ ofudjevwe tiọyena, Jihova bọn avwanre gan. Vwẹ idjerhe vọ?

10. Vwo nene eta rehẹ Isẹ 12:25, die yen sa chọn avwanre uko siẹrẹ a da muọga?

¹⁰ Ọke ra da muọga, “ota esiri” sa kẹ avwanre ẹgba. (Se Isẹ 12:25.) Baibol na vọnre vẹ eta esiri buebun re kẹ avwanre imuẹro nẹ Jihova nẹ avwanre ghanghanre owenẹ avwanre muọga dede. (Une 31:19; 41:3) Siẹrẹ e de dje Baibol na esese, Jihova cha chọn avwanre uko vwo phi iroro echọchọ re kọn ro ẹwẹn rẹ avwanre fikirẹ ọga na kparobọ.

11. Mavọ yen oniọvo ọshare ọvo wan rhiẹromrẹ ukẹcha ri Jihova?

¹¹ Di roro kpahen ikuegbe rẹ oniọvo Jorge. O de mu okpọga ọvo ro miovwẹnphiyọ miovwẹnphiyọ, ọtiọyena ko roro nẹ o rhe vwo obo ra cha vwẹ ọyen ru-u. Jorge da ta: “Me vwẹro roro nẹ oma mẹ na cha rhẹriẹ kpregede ọtiọna-a, me da mrẹ ihwo buebu ri ni vwe fikirẹ oma mẹ na, oma kọ vo vwẹ. Oma na vwo miovwẹnphiyọ na, ki mi roro oborẹ akpeyeren mẹ che wene wan. Ẹwẹn mẹ da rhe hra totọ, ke me rẹ Jihova nẹ ọ chọn vwẹ uko.” Mavọ yen Jihova chọn rọ uko wan? Jorge da ta: “Rọ vwọ dianẹ iroro mẹ fobọ tighẹ na, ke jiriro kẹ vwẹ nẹ mi rhe se ẹmẹkpo krẹkrẹ vwẹ ọbe rẹ Une Rẹ Ejiro ri dje oborẹ Jihova vwẹrote idibo rọyen wan. Kẹdi kẹdẹ kọyen me vwanriẹ ẹkpo ri Baibol nana se, ọtiọyen  yen e je bọn vwẹ gan. Ememerha na, ihwo ki rhi noso nẹ me hwẹ mamọ. Ayen tobọ vuẹ vwẹ nẹ ehwẹ mẹ na bọn ayen gan. Me da rhe mrẹvughe nẹ Jihova ghene kpahenphiyọ ẹrhovwo mẹ na re! Ọ chọn vwẹ uko vwo wene oka rẹ ẹro mi vwo ni oma mẹ. Ke mẹ tẹnroviẹ oborẹ Ota rọyen ta kpahen oka rẹ ẹro ro vwo ni vwe dede nẹ me mwa oka rẹ ọga tiọyena.”

12. Die wo se ru vwọ mrẹ ukẹcha ri Jihova siẹrẹ wọ da muọga?

¹² Siẹrẹ wo de nene ọga muabọ, vwo imuẹro nẹ Jihova riẹn oborẹ wo hirharokuẹ. Nẹrhovwo rhe nẹ ọ chọn vwẹ uko vwọ vwẹ ẹro abavo vwo ni ẹdia wẹn na. Gba guọnọ eta rẹ uduephiophiyawọ ri Jihova sẹro rọyen phiyọ Baibol na fiki wẹn. Tẹnrovi ẹkpo sansan ri djunute ẹro ọghanghanre ri Jihova vwo ni idibo rọyen. Wo de ru ọtiọyen, ku wọ mrẹ nẹ Jihova si emuesiri vuọvo nẹ kẹ ihwo re fuevun ga-a.—Une 84:11.

13. Ẹro vọ yen ọgbuyovwin orua se vwo ni oma rọyen siẹrẹ iruo rọyen da vabọ?

¹³ Igbuyovwin orua eje vwo ọdavwẹ rẹ ayen vwọ wian rere ayen sa vwọ vwẹrote erua rayen. Kẹ, siẹrẹ iruo rẹ oniọvo ọshare na da vabọ kpregede vwo? Ọ guọnọ iruo guọnọ guọnọ jẹ ọ mrẹ re-e. Ẹdia nana sa nẹrhẹ o roro nẹ o rhe vwo obo ra cha vwẹ ọyen ru-u. Mavọ yen ra vwọ tẹnroviẹ ive ri Jihova sa vwọ chọn uko?

14. Diesorọ Jihova vwo ruẹ ive rọyen gba?

¹⁴ Jihova ruẹ ive rọyen gba ọkieje. (Jos. 21:45; 23:14) O vwo iroro sansan ro muo vwo ruẹ ọtiọyen. Ẹsosuọ, fikirẹ odẹ  ọfuanfon rọyen na. Jihova veri nẹ ọyen cha vwẹrote idibo rọyen ri fuevun, o ji no kerẹ oghwa ro tere ro vwo ru ive rọyen na gba. (Une 31:1-3) Vwọba, Jihova riẹnre nẹ ofu che dje avwanre siẹrẹ ọ rha vwẹrote avwanre re dia ẹbẹre ọvo rẹ orua rọyena na-a. O veri nẹ ọyen cha kẹ avwanre obo ra cha vwọ vwẹrote oma vẹ obo re sa nẹrhẹ avwanre fuevun ga Jihova. O vwo emu vuọvo rọ cha dobọ rọyen ji, ro de jẹ ive nana eruo gba-a!—Mat. 6:30-33; 24:45.

15. (a) Egbabọse vọ yen Inenikristi rẹ ẹgbukpe ujorin ẹsosuọ hirharoku? (b) Imuẹro vọ yen Une Rẹ Ejiro 37:18, 19 kẹ avwanre?

¹⁵ Avwanre se fiudugberi nene uweren ọgangan muabọ siẹrẹ a da karophiyọ oboresorọ Jihova vwọ sẹro ive rọyen. Roro kpahen udje rẹ obo re phia kẹ Inenikristi rẹ ẹgbukpe ujorin ẹsosuọ. Ọke rẹ omukpahen ọgangan vwo te iniọvo rehẹ Jerusalẹm oma, “ayen ejobi da hra . . . jokpa rẹ iyinkọn na ọvo.” (Iruo 8:1) Roro kpahen oborẹ ọyena sa ghwa rhe. Uweren ọgangan! Inenikristi na rhe vwo iwevwin yẹrẹ eki rẹ ayen chua-a. Dedena, Jihova kpairoro vrẹn ayen yẹrẹ kẹ aghọghọ rayen va ayen abọ-ọ. (Iruo 8:4; Hib. 13:5, 6; Jems 1:2, 3) Jihova chọn iniọvo yena uko, ọ je cha chọn avwanre uko.—Se Une Rẹ Ejiro 37:18, 19.

16. Ẹdia vọ yen sa nẹrhẹ avwanre roro sẹ Jihova ji ni avwanre ghanghanre?

¹⁶ A vwọ ghwa na, e se roro nẹ emerha ẹga ra vwọ kẹ Jihova rhe fiẹmu ọvo-o. Iroro ọtiọyena ji se kpokpo Ovie Devid ẹwẹn ọke ọghwo vwo te oma. (Une 71:9) Mavọ yen Jihova sa vwọ chọn avwanre uko?

17. Die yen avwanre se yono vwo nẹ udje rẹ oniọvo aye re se Jheri?

 ¹⁷ Roro kpahen udje rẹ oniọvo rẹ aye re se Jheri. E durhire kpo uyono rẹ ẹroevwote rẹ iwevwin rẹ ukoko na vwẹ Ọguan Ruvie rẹ avwanre, ẹkẹvuọvo ọ guọnọ ra-a. Ọ da ta: “Mẹvwẹ ọmare, me ke je dia ayeuku. Mi ji vwo ona rẹ iruo nana vuọvo-o. O vwo obo ra cha vwẹ ovwẹ ru ọfa-a.” Ason e ki rhi ru uyono na, oniọvo na da nẹrhovwo rhe Jihova. Ọke vwo rhie, o rhi vwo te Ọguan Ruvie, ẹwẹn rọyen ko kpokpo nẹ ofori rọ vwọ rhe uyono na jovwo-o. Re vwo ru uyono na, ọtota ọvo da kanrunumuo nẹ ona ra ma guọnọ yen owenvwe rẹ ohwo vwọ vwomakpahotọ nẹ Jihova yono ọyen. Jheri da ta: “Mi rori nẹ, ‘Mi vwo ona yena!’ Me da viẹ me vwọ mrẹ oborẹ Jihova kpahenphiyọ ẹrhovwo mẹ. Ọ kẹ vwẹ imuẹro nẹ dajẹ mi vwo orọnvwọn oyoyovwin me sa vwọ kẹ Jihova. O vwo owenvwe ro vwo yono uvwe iruo esiri!” Jheri vwo ni kpuko ọ da ta: “Me vwọ ro Ọguan Ruvie na je udu mẹ teyan kpekpe vẹ oshọ. Me rhe vwọ ro otafe, me da rhe mrẹ nẹ me je ghanre, uyono na bọn vwẹ gan, udu mẹ ki koi!”

18. Mavọ yen Baibol na wan djephia nẹ Jihova vwẹ ẹro ọghanghanre vwo ni ẹga rẹ avwanre ra vwọ ghwa yanran na?

¹⁸ Avwanre vwọ ghwa na, e jẹ o mu avwanre ẹro nẹ Jihova ji vwo obo rọ cha vwẹ avwanre vwo ru. (Une 92:12-15) Jesu yono avwanre nẹ Jihova vwẹ ẹro ọghanghanre vwo nẹ oborẹ avwanre se ru vwẹ ẹga rọyen, ọ da tobọ dianẹ avwanre komobọ ni ayen kueku. (Luk 21:2-4) Ọtiọyena, gba tẹnrovi oborẹ wo se ru. Kerẹ udje, wọ sa ta ota kpahen Jihova, nẹrhovwo vwọ kẹ iniọvo na, rere wo ji phiuduphiyọ ihwo efa awọ vwo mudiagan. Karophiyọ nẹ ọ dia fikirẹ obo ru wo ruru yen Jihova vwo kere phiyọ nẹ wo nene ọyen wiankugbe-e, ẹkẹvuọvo, fikirẹ owenvwe vẹ omaevwokpotọ wẹn.—1 Kọr. 3:5-9.

19. Imuẹro vọ yen Rom 8:38, 39 kẹ avwanre?

¹⁹ Mavọ oma vwerhen avwanre te ra vwọ ga Jihova, rọ dia Ọghẹnẹ ro ni ihwo re ga ghanghanre! Ọ ma avwanre rere e vwo ru ọhọre rọyen. Ẹga rẹ uyota yen nẹrhẹ avwanre yeren uvi rẹ akpọ rọ vọnre vẹ omavwerhovwẹn. (Ẹvwọ. 4:11) Dede nẹ akpọ na se ni avwanre kueku, oma rẹ avwanre vua Jihova-a. (Hib. 11:16, 38) Siẹrẹ ọga, uweren, yẹrẹ ọghwo da nẹrhẹ ofu dje avwanre, e jẹ a karophiyọ nẹ o vwo emu vuọvo rọ sa hẹriẹ avwanre vwo nẹ ẹguọnọ ri Jihova rọ dia Ọsẹ rẹ avwanre na-a.—Se Rom 8:38, 39.