1. Kerẹ Ovie Devid, onọ vọ yen idibo ri Jihova evo sa nọ?

AVWANRE eje guọnọ yeren akpọ ro fuoma. Ohwo vuọvo guọnọ ro ẹnwa-an. Ẹkẹvuọvo avwanre sa ro ẹnwan ọkievo. Kọyensorọ idibo ri Jihova evo sa vwọ nọ onọ nana rẹ Ovie Devid nọ Jihova: “Mavọ mi chirako rẹ odjadja vwẹ erhi mẹ krite, ri mi de vwo ọdavwẹ vwẹ udu mẹ vwẹ ọke ejobi?”—Une 13:2.

2. Die yen a cha ta ota kpahen vwẹ uyono nana?

² Dede nẹ a cha sa kẹnoma kẹ ẹnwa-an, jẹ e se siobọ rọyen kpotọ. Vwẹ uyono nana, a cha ta ota kpahen erọnvwọn evo re sa nẹrhẹ avwanre ro ẹnwan. E de ru ọyena nu, kẹ a cha ta ota kpahen idjerhe esan re se vwo hwe oma mu vwẹ ọke re de nene ebẹnbẹn muabọ.

3. Erọnvwọn vọ yen sa nẹrhẹ a ro ẹnwan, kẹ a sa dobọ rayen ji?

³ Erọnvwọn buebun yen sa nẹrhẹ avwanre ro ẹnwan. Jẹ a cha sa dobọ rẹ evo ji-i. Kerẹ udje, a cha sa dobọ rẹ igho ra vwọ dẹ emu, iwun, je hwosa rẹ uwevwin ro kpenu kọke kọke ji-i. O ji vwo obo re se ru kpahen uchabọ rẹ ihwo rẹ iruo yẹrẹ emọ rẹ isikuru cha davwẹngba vwọ riẹriẹ avwanre vwo gun efian yẹrẹ gbe ọfanrhiẹ-ẹn. A je cha sa dobọ rẹ ihwo re churhi vwẹ ekogho avwanre  ji-i. Avwanre hirharoku ebẹnbẹn nana eje kidie ihwo buebun muẹ orhiẹn-ebro rayen kpahen uchebro ri Baibol na-a. Eshu rọ dia osun rẹ akpọ nana riẹnre nẹ ihwo evo cha vwẹ uphẹn kẹ “ẹnwan rẹ akpọ” nana nẹ ọ dobọ rẹ ẹga rẹ ayen vwọ kẹ Jihova ji. (Mat. 13:22; 1 Jọn 5:19) Ọnana yen sorọ ebẹnbẹn vwọ vọn akpọ na!

4. Die yen sa phia siẹrẹ a da ro ẹnwan kpahen ebẹnbẹn avwanre?

⁴ Avwanre sa ro ẹnwan te ẹdia ro de mu avwanre rọ. Kerẹ udje, a sa ro ẹnwan nẹ a cha mrẹ igho ro che te vwọ dẹ obo ra guọnọre-e yẹrẹ nẹ e che shero ọga rọ cha nẹrhẹ iruo va avwanre abọ. A je sa ro ẹnwan nẹ a cha sa yọnregan ọke re de hirharoku ọdavwini ra vwọ churhi rẹ Ọghẹnẹ-ẹ. O rhe che kri-i, Eshu kọ cha nẹrhẹ otu ro suẹn vwọso ihwo rẹ Ọghẹnẹ, ọtiọyena a sa ro ẹnwan kpahen obo re che ru vwẹ ọke yena. Avwanre sa nọ, ‘Ọ chọre a vwọ ro ẹnwan kpahen erọnvwọn tiọyena?’

5. Die yen Jesu mudiaphiyọ rọ vwọ tanẹ “wọ rua ẹnwan kẹ oma wẹ-ẹn”?

⁵ Avwanre riẹnre nẹ Jesu vuẹ idibo rọyen nẹ “wọ rua ẹnwan kẹ oma wẹ-ẹn.” (Mat. 6:25) Ọnana ko mudiaphiyọ nẹ Jesu vuẹ avwanre nẹ a ro ẹnwan kpahen emu vuọvo-o? Ẹjo! Idibo ri Jihova evo vwẹ ọke awanre ro ẹnwan, jẹ Jihova muophu kpahen aye-en. * (1 Ivie 19:4; Une 6:3) Uchebro yen Jesu vwọ kẹ avwanre. Ọ guọnọre nẹ a ro ẹnwan te ẹdia re de mu ẹga ri Jihova nyẹ-ẹ. Die yen e se ru siẹrẹ a da ro ẹnwan?—Ni ekpeti na “ Obo re Che Ruo Wan.”

6. Vwo nene obo rehẹ Filipae 4:6, 7, die yen sa nẹrhẹ avwanre vwo ufuoma?

⁶ (1) Nẹrhovwo ọkieje. Onenikristi rọ ro ẹnwan sa nẹrhovwo rhe Jihova vwọ kẹ ukẹcha. (1 Pita 5:7) Jihova sa kpahenphiyọ ẹrhovwo rọyen womarẹ ọ vwọ kẹ “ufuoma” rọyen “rọ nọ ẹruọ [rẹ ihworakpọ] ejobi.” (Se Filipae 4:6, 7.) Jihova kẹ avwanre ufuoma womarẹ ẹwẹn ọfuanfon rọyen.—Gal. 5:22.

7. Die yen ofori nẹ a karophiyọ a da nẹrhovwo rhe Jihova?

⁷ Wọ da nẹrhovwo rhe Jihova, ta obo rehẹ ẹwẹn wẹn ejobi vwọ kẹ. Djunute obo wọ guọnọ na dẹn. Vuẹ kpahen ebẹnbẹn na, kugbe obo rọ da wẹ te. Ọ da dianẹ o vwo obo wo se ru kpahọn, gba vuẹ nẹ ọ kẹ wẹ aghwanre vẹ ẹgba wo vwo ruo. Ọ da dianẹ wo che se ru emuọvo kpahọ-ọn, gba vuẹ nẹ ọ chọn wẹ uko vwọ kẹnoma kẹ ẹnwan okamuka. Wo de djunute obo wọ ghene guọnọ dẹn vwẹ ẹrhovwo, kẹ wọ sa nabọ mrẹ oborẹ Jihova kpahenphiyọ wan. Ọ da tobọ dianẹ Jihova kpahenphiyọ ẹrhovwo wẹn ugege wọ vwọ nẹ-ẹ, wo jẹ oma rhọ wẹ-ẹ. Jihova guọnọre nẹ wo djunute obo wọ guọnọ na dẹn je gbomavwra oyare na ọkieje.—Luk 11:8-10.

8. Die yen ofori nẹ a vwọba ẹrhovwo avwanre?

⁸ Wọ da nẹrhovwo rhe Jihova kpahen ẹnwan wẹn, ofori nẹ wọ vwẹ ẹkpẹvwẹ ba. A da tobọ hẹ ẹdia rọ brare mamọ, o ji fo nẹ a kpẹvwẹ Jihova fikirẹ emu esiri re phia kẹ avwanre. Jẹ die yen wo se ru ọ da dianẹ wọ riẹn oborẹ wọ sa vwọ ta ẹwẹn wẹn kẹ Jihova-a? Gba karophiyọ nẹ Jihova cha kpahenphiyọ  ẹrhovwo wẹn ọ da tobọ dianẹ obo wọ sa ta yen ‘Biko chọn vwẹ uko!’—2 Ikun 18:31; Rom 8:26.

9. Mavọ yen a sa vwọ mrẹ uvi rẹ ochọnvwe?

⁹ (2) Vwẹroso aghwanre ri Jihova, ọ dia ọ romobọ wẹ-ẹn. Vwẹ ọke rẹ ọmraro Aizaya, oshọ mu ihwo rẹ Juda nẹ ihwo rẹ Asiria cha rhe vwọso ayen. Ihwo rẹ Juda guọnọre nẹ ihwo rẹ Asiria phi ayen kparobọ-ọ, ọtiọyena, kẹ ayen ra yare ukẹcha mie Ijipt. (Aiz. 30:1, 2) Jihova da vuẹ ayen nẹ ayen che rhiẹromrẹ okpetu fikirẹ Ijipt rẹ ayen vwẹroso na. (Aiz. 30:7, 12, 13) Jihova da womarẹ Aizaya vuẹ ayen oborẹ ayen sa vwọ mrẹ uvi rẹ ochọnvwe. Ọ da ta: “Oma ehwemuẹ kugbe ẹro ẹvwọ suọ [ri Jihova] ọye ogangan rẹ ovwan epha.”—Aiz. 30:15b.

10. Erhọ yen ẹdia evo re de se djephia nẹ a vwẹroso Jihova?

¹⁰ Mavọ yen e se vwo djephia nẹ a vwẹroso Jihova? Roro kpahen idje evo. Vwẹ ẹwẹn roro nẹ wọ mrẹ iruo ọvo ra da cha hwa okposa kẹ wẹ rọ cha reyọ ọke buebun mie we ji gbowọphiyọ ọrhuẹrẹphiyotọ rẹ ẹga wẹn. Yẹrẹ ohwo ọvo vwẹ asan wo de ruiruo rọ dia oseri-i vuẹ wẹ nẹ wo je ọyen. Yẹrẹ vwẹ ẹwẹn roro nẹ ohwo rẹ orua wẹn ọvo rẹ wo vwo ẹguọnọ kpahen mamọ vuẹ wẹ nẹ ọyen cha sen wẹ siẹrẹ wọ rha dobọ rẹ ẹga ri Jihova ji-i. Vwẹ ẹdia ọvuọvo yena, wo hirharoku orhiẹn rode wo che bru, ẹkẹvuọvo Jihova cha vwẹ odjekẹ rẹ wọ guọnọre vwọ kẹ wẹ. (Mat. 6:33; 10:37; 1 Kọr. 7:39) Onọ ọvo kọna, wọ cha vwẹroso Jihova ji nene odjekẹ rọyen?

11. Ikuegbe ri Baibol vọ yen sa chọn avwanre uko vwo hwe oma mu vwẹ ọke rẹ omukpahen?

¹¹ (3) Yono vwo nẹ omamọ vẹ orharhe rẹ idje. Baibol na vọnre vẹ ikuegbe re kanrunumu obo rọ ghanre te re vwo hwe oma mu je vwẹroso Jihova. Wo vwo se ikuegbe na, roro kpahen obo re chọn idibo rẹ Ọghẹnẹ uko vwo hwe oma mu vwẹ ọke rẹ omukpahen ọgangan. Kerẹ udje, ọke rẹ aguare rode rẹ ihwo ri Ju vwo jurhi kẹ iyinkọn na nẹ ayen dobọ rẹ aghwoghwo ji, oshọ mu iyinkọn na-a. Ukperẹ ọtiọyen, ayen fiudugberi ta: “Avwanre se mu ọghọ kẹ Ọghẹnẹ nọ ihwo rẹ akpọ.” (Iruo 5:29) A vwọ tobọ fa ayen nu, oshọ ji mu aye-en. Diesorọ? Kidie ayen riẹnre nẹ Jihova vẹ ayen herọ. Ivun rayen vwerhọn. Ọtiọyena, ayen rha dobọ rẹ aghwoghwo ji-i. (Iruo 5:40-42) Eriyin ọ je pha ọke rẹ odibo Stivin vwo hirharoku ughwu, o hwe oma mu te ẹdia rẹ opharo rọyen da họhọ “opharo rẹ amakashe.” (Iruo 6:12-15) Diesorọ? Kidie ọ riẹnre nẹ ivun rọyen vwerhen Jihova.

12. Vwo nene obo rehẹ 1 Pita 3:14 vẹ 4:14, diesorọ oma vwọ vwerhen avwanre siẹrẹ e de muẹkpahen avwanre?

¹² Iyinkọn na mrẹ obo re kẹ ayen imuẹro nẹ Jihova vẹ ayen herọ. Ọ kẹ ayen ẹgba rẹ ayen vwo ru igbevwunu. (Iruo 5:12-16; 6:8) Jihova kẹ avwanre ẹgba re vwo ru igbevwunu nonẹna-a. Dedena, ọ kẹ avwanre imuẹro womarẹ Ota rọyen nẹ ivun avwanre vwerhen ọyen siẹrẹ a da rioja fikirẹ ọvwata. (Se 1 Pita 3:14; 4:14.) Ukperẹ a vwọ ro ẹnwan kpahen obo re che ru ọke re de che mukpahen avwanre vwẹ obaro na, e jẹ a davwẹngba vwo ru esegbuyota avwanre kpahen Jihova ganphiyọ enẹna nẹ o  se bicha, ji sivwin avwanre. Kerẹ idibo rẹ Jesu vwẹ ẹgbukpe ujorin rẹsosuọ, ofori nẹ a vwẹroso ive ri Jesu nana: “Me cha kẹ ovwan unu kugbe aghwanre, rẹ udu rẹ ukọn rẹ ovwan cha sa gba eyẹ phro-o.” Ọ je vuẹ avwanre nẹ, “Akoechiro wẹn wọ cha vwọ mrẹ arhọ wẹn reyọ.” (Luk 21:12-19) Wọ me je karophiyọ ọkieje nẹ Jihova karophiyọ emu ejobi rẹ idibo rọyen re fuevun te ẹdẹ ughwu ruru. Ọ cha rhọvwọn ayen nushi.

13. Erere vọ yen se te avwanre obọ siẹrẹ e de yono kpahen udje rẹ ihwo re rhọnvwe hwe oma mu je vwẹroso Jihova-a?

¹³ Avwanre ji se yono vwo nẹ udje rẹ ihwo re rhọnvwe hwe oma mu je vwẹroso Jihova-a. E de yono kpahen udje rayen, ọyena cha nẹrhẹ a kẹnoma kẹ oka rẹ echobọ rayen. Kerẹ udje, vwẹ ọtonphiyọ rẹ usuon rọyen, Ovie Asa ri Juda vwẹroso Jihova ọke rẹ otuofovwin rode rhi vwo nene họnre, Jihova da chọn uko vwo phikparobọ. (2 Ikun 14:9-12) Ọke vwọ yan obaro, otuofovwin rẹ Ovie Baasha rọ hanvwe vrẹ ọrẹsosuọ de rhi nene Asa họnre, Asa da hwosa kẹ isodje ri Siria nẹ ayen rhe chọn ọyen uko, ukperẹ ọ vwọ vwẹroso Jihova vwọ kẹ usivwin kirobo ro ruru vwẹ ẹsosuọ. (2 Ikun 16:1-3) O ji vwo shero ọga vwẹ oba rẹ akpeyeren rọyen, ọ je vwẹroso Jihova vwọ kẹ ukẹcha-a.—2 Ikun 16:12.

14. Die yen e se yono vwo nẹ echobọ rẹ Asa?

¹⁴ Ẹsosuọ, Asa vwẹroso Jihova ro vwo hirharoku ebẹnbẹn. Ọke vwọ yan obaro, ukperẹ o vwo bru Jihova ra vwọ kẹ ukẹcha, o de ru obo rehẹ ẹwẹn rọyen. Ẹsosuọ, e se no nẹ oborẹ Asa ruru na shephiyọ. Ẹkẹvuọvo, ufuoma rẹ ihwo rẹ Juda na tọnre-e. Jihova da womarẹ ọmraro ọvo vuẹ eta nana: “Fikiridie wọ vwẹ ẹro so ovie ri Siria, wọ gbe rha vwẹ ẹro so Ọrovwohwo Ọghẹnẹ wẹ-ẹn, unuofovwi rẹ ovie ri Siria va wẹ abọ djẹ nure.” (2 Ikun 16:7) E jẹ a kẹnoma kẹ uruemu ra vwọ vwẹroso omobọ ohwo te ẹdia re de roro nẹ a sa rhuẹrẹ ebẹnbẹn phiyọ ababọ rẹ ukẹcha ri Jihova. A da tobọ hirharoku ẹdia rọ guọnọ orhiẹn-ebro okpakpa, e jẹ e hwe oma mu vwẹroso Jihova, ọ cha chọn avwanre uko vwo brorhiẹn rẹ aghwanre.

15. Die yen e se ru ọke re de se Baibol na?

¹⁵ (4) Riẹn ẹkpo ri Baibol evo kuyovwin. Wo de se mrẹ ẹkpo ri Baibol ri djerephia nẹ e se vwo ogangan siẹrẹ e de hwe oma mu je vwẹroso Jihova, davwẹngba wọ vwọ riẹn irhiẹ rẹ eta evo kuyovwin. Wọ sa vwọ riẹn ayen kuyovwin, o che yovwin wo de se ayen phia yẹrẹ si ayen phiyotọ ji dje ayen esese. Jihova vuẹ Joshua nẹ o se ọbe rẹ Urhi na kọke kọke rere o se vwo vwo aghwanre. Urhi na je cha chọn uko vwo phi oshọ kparobọ ji fiudugberi sun ihwo rẹ Ọghẹnẹ. (Jos. 1:8, 9) Eta buebun rehẹ Baibol na sa nẹrhẹ wo vwo ufuoma rẹ ẹwẹn vẹ ubiudu vwẹ ẹdia re sa nẹrhẹ oshọ mu we yẹrẹ ro ẹnwan jovwo.—Une 27:1-3; Isẹ 3:25, 26.

16. Mavọ yen Jihova reyọ ukoko na vwọ chọn avwanre uko vwo hwe oma muẹ je vwẹrosuọ?

¹⁶ (5) Nene ihwo rẹ Ọghẹnẹ ghwọrọ ọke kugbe. Jihova reyọ iniọvo na vwọ chọn avwanre uko vwo hwe oma muẹ je vwẹrosuọ. Vwẹ emẹvwa, a mrẹ erere vwo nẹ eta ra vwọ phia vwẹ enu rẹ umukpe, ẹkpahọnphiyọ rẹ iniọvo na, kugbe  eta rẹ ọbọgan ra vẹ ayen ta kuẹgbe. (Hib. 10:24, 25) A je sa mrẹ ọbọgan siẹrẹ e de rhievun ta obo ri kpokpo avwanre ẹwẹn kẹ igbeyan ra vwẹroso vwevunrẹ ukoko na. “Ota esiri” rẹ ugbeyan tare sa nẹrhẹ oma vwerhen avwanre.—Isẹ 12:25.

17. Vwo nene obo rehẹ Hibru 6:19, mavọ yen iphiẹrophiyọ rẹ Uvie na sa vwọ nẹrhẹ e hwe oma mu vwẹ ọke rẹ ebẹnbẹn?

¹⁷ (6) Sẹro rẹ iphiẹrophiyọ wẹn. Iphiẹrophiyọ rẹ Uvie na pha kerẹ “ọtan rẹ avwanre churu erhi rẹ avwanre mu,” rọ yọnrọn avwanre o toro ẹdia rẹ avwanre hepha-a. (Se Hibru 6:19.) Roro kpahen ive ri Jihova rehẹ obaro na. Vwẹ ọke yena ohwo vuọvo rha cha ro ẹnwa-an. (Aiz. 65:17) Vwẹ ẹro roro akpọ rẹ ufuoma rọ vrabọ ẹnwan. (Maika 4:4) Wọ je cha sẹro rẹ iphiẹrophiyọ wẹn wọ da vuẹ ihwo efa kpahọn. Ru oborẹ wo se ru eje vwẹ iruo rẹ aghwoghwo vẹ odibo egbe na. Wo de ru ọtiọyen, wo che vwo “ẹroẹvwọsuọ rhiri rhi te oba.”—Hib. 6:11.

18. Die yen sa phia vwẹ obaro na, kẹ die yen e se ru kpahọn?

¹⁸ Eyeren nana vwo kuẹphiyọ na, avwanre che rhiẹromrẹ ebẹnbẹn buebun re sa nẹrhẹ a ro ẹnwan. Uyovwinrota rẹ ukpe ri 2021 sa chọn avwanre uko vwo hwe oma mu ọke re de hirharoku ebẹnbẹn re sa nẹrhẹ a ro ẹnwan siẹrẹ a da vwẹroso Jihova. Vwẹ ukpe na ejobi, e gbe jẹ e djephia womarẹ uruemu nẹ avwanre vwo esegbuyota kpahen ive ri Jihova nana: “Oma ehwemuẹ kugbe ẹro ẹvwọ suọ ọye ogangan rẹ ovwan epha.”—Aiz. 30:15.