UYONO 4
Obo ri Muẹ Avwanre Vwo Kpo Ẹkarophiyọ Na
“We rhe ruẹ ọnana vwọ karophiyọ ovwẹ.”—LUK 22:19, NW.
UNE 20 Wo Siobọnu Ọmọ Ọghanghanre Wẹn
ỌDJẸKOKO *
1-2. (a) Ọke vọ yen avwanre ma vwọ karophiyọ ohwo re vwo ẹguọnọ kpahen ro ghwuru? (b) Die yen Jesu vwo mu vwẹ ason rọkoba o ki ghwu?
O TORI sẹ ohwo re vwo ẹguọnọ kpahen ghwu krire-e, a je karophiyọ ayen. Kukpe kukpe ẹdẹ rẹ ayen ghwuru na de te, ka rhoma karophiyọ ayen.
2 Kukpe kukpe yen avwanre vwo kuomagbe iduduru rẹ ihwo vwo ruẹ Ẹkarophiyọ rẹ ughwu rẹ ohwo ọvo rẹ avwanre vwo ẹguọnọ rọyen mamọ—Jesu Kristi. (1 Pita 1:8) Avwanre siomakoko vwo ruẹ Ẹkarophiyọ rẹ ughwu rẹ ohwo rọ vwẹ arhọ rọyen vwọ kpahotọ vwo sivwin avwanre vwo nẹ umwemwu kugbe ughwu. (Mat. 20:28) Vwọrẹ uyota, Jesu guọnọre nẹ idibo rọyen ru Ẹkarophiyọ rẹ ughwu rọyen. Vwẹ ason rọkoba o ki rhi ghwu, ọ da vwẹ irueru rẹ emuẹriọ rẹ ovwọnvwọn rẹ oghẹresan vwo mu je tanẹ, “we rhe ruẹ ọnana vwọ karophiyọ ovwẹ.”—Luk 22:19, NW.
3. Die yen a cha fuẹrẹn vwẹ uyono nana?
3 Ẹmẹko rẹ ihwo evo ri kpo Ẹkarophiyọ rẹ ughwu ri Kristi na yen vwo iphiẹrophiyọ rẹ ayen vwo kpo odjuvwu. Ẹkẹvuọvo iduduru rẹ ihwo buebun ri vwo iphiẹrophiyọ rẹ ayen vwo dia otọrakpọ na ji kuomakugbe ayen. Vwẹ uyono nana, e che yono kpahen oboresorọ ẹko rẹ ihwo nana ivẹ na vwo vwo owenvwe rẹ ayen vwo kpo Ẹkarophiyọ na kukpe kukpe. E ji che yono kpahen erere a mrẹ siẹrẹ e de kpo Ẹkarophiyọ na. E gbe jẹ a fuẹrẹn emu evo re sorọ ihwo ra jẹreyọ na vwo kpo Ẹkarophiyọ na.
OBORESORỌ IHWO RA JẸREYỌ NA VWO KPO ẸKAROPHIYỌ NA
4. Diesorọ ihwo ra jẹreyọ na vwọ ria ibrẹdi na je da udi na vwẹ Ẹkarophiyọ na?
4 Kukpe Kukpe ihwo ra jẹreyọ na ri kpo Ẹkarophiyọ na ria ibrẹdi na je da udi na. Diesorọ ayen vwọ ria ibrẹdi na je da udi na? A vwọ kpahenphiyọ onọ yena, roro kpahen obo re phiare vwẹ ason rọ koba Jesu ki ghwu. Ayen vwo ru orẹ rẹ ọwanvrẹn na nu, Jesu da vwẹ irueru ọfa vwo mu ra rhe riẹn phiyọ Emu Ovwọnvwọn rẹ Ọrovwori Na. O de mu ibrẹdi na vẹ udi na vwọ kẹ idibo rọyen 11 ri fuevun kẹ, je vuẹ ayen nẹ ayen re je da. Jesu ta ota kpahen ọphọ ivẹ re dia ọphọ kpokpọ na vẹ ọphọ rẹ Uvie na. * (Luk 22:19, 20, 28-30) Ọphọ yena nẹrhẹ idibo rọyen na vẹ ẹmẹko rẹ ihwo efa rhi vwo uphẹn rẹ ayen vwo sun vwẹ odjuvwu. (Ẹvwọ. 5:10; 14:1) Uchekotọ ra jẹreyọ * na ri vwobọ vwẹ ọphọ ivẹ nana ọvo, yen ihwo ri muwan re sa vwọ re ibrẹdi na je da udi na vwẹ Ẹkarophiyọ na.
5. Die yen ihwo ra jẹreyọ na riẹn kpahen iphiẹrophiyọ rẹ ayen vwori na?
5 Emu ọfa rọ nẹrhẹ ihwo ra jẹreyọ na ji kpo Ẹkarophiyọ na kọna: Irueru nana nẹrhẹ ayen vwo uphẹn rẹ ayen vwo roro kpahen iphiẹrophiyọ rayen na. Jihova kẹ ayen iphiẹrophiyọ roghẹresan, rẹ ayen vwo vwo ugboma ro jeghwo kugbe ọ ro jẹ ghwọrọ vwẹ obodjuvwu rere ayen se vwo nene Jesu vẹ ihwo 144,000 ri chekọ na sun, ma rho, je vwẹ ẹga kẹ Jihova vwẹ obaro rọyen. (1 Kọr. 15:51-53; 1 Jọn 3:2) E ra jẹreyọ na riẹnre nẹ e durhie ayen rẹ ayen vwọ riavwerhen rẹ uphẹn nana vwẹ obodjuvwu. Ẹkẹvuọvo ayen ke sa ruọ, kẹ ofori nẹ ayen fuevun rhi te ẹdẹ ughwu rayen. (2 Tim. 4:7, 8) Ihwo ra jereyọ na de roro kpahen iphiẹrophiyọ rayen na ọ kẹ ayen omavwerhovwẹn. (Taitọs 2:13) Kẹ “igodẹ ichekọ” na vwo? (Jọn 10:16) Erhọ yen iroro evo re sorọ rẹ ayen vwo kpo Ẹkarophiyọ rẹ ughwu ri Jesu na?
OBORESORỌ IGODẸ EFA NA VWO KPO ẸKAROPHIYỌ NA
6. Diesorọ igodẹ efa na vwo kpo Ẹkarophiyọ rẹ ughwu ri Jesu na kukpe kukpe?
6 Ọ dia igodẹ efa na kpo Ẹkarophiyọ na rere ayen vwọ re je da-a, ẹkẹvuọvo omavwerhen ayen kidie ayen rare. Ukpe ri 1938 yen obọrẹsosuọ ihwo ri vwo iphiẹrophiyọ rẹ ayen vwọ dia otọrakpọ na tu vwo kpo Ẹkarophiyọ rẹ ughwu ri Jesu na. Uwevwin Orhẹrẹ ri March 1, 1938, da ta: “O yovwin siẹrẹ [igodẹ efa] na de kpo omẹvwa ọtiọyena je mrẹ obo re ruẹ vwẹ evun rọyen . . . O ji fo nẹ ọ je dia ọke omavwerhovwen vwọ kẹ ayen.” Kirobo oma vwerhen ihwo ri kpo irueru orọnvwe ye, ọtiọyen oma je vwerhen igodẹ efa na kidie ayen kpo Ẹkarophiyọ rẹ ughwu ri Jesu na.
7. Diesorọ igodẹ efa na vwọ rhẹro rẹ ota Ẹkarophiyọ na?
7 Kerẹ ihwo ra jẹreyọ na, igodẹ efa na ji roro kpahen iphiẹrophiyọ rayen. Ayen nẹ kiọkiọkiọ kpo ọke a cha vwọ ta ota rẹ Ẹkarophiyọ rẹ ughwu ri Jesu na, kidie ẹkpo sansan vwevunrẹ ota na karunumu erọnvwọn evo rẹ ihwo 144,000 na ri che nene Jesu sun ẹgbukpe uriorin na che ru vwọ kẹ ihworakpọ re fuevun vwẹ ọke yena. Vwẹ otọ rẹ usuon rẹ Ovie rayen Jesu Kristi, ihwo ri che nene sun vwẹ odjuvwu na cha vwẹ ukẹcha phia vwọ rhẹriẹ otọrakpọ na phiyọ iparadaisi ji ru ihwo ri nyẹme phiyọ ihwo re gbare. Oma nabọ vwerhen iduduru ri ihwo ri kpo Ẹkarophiyọ na ọke rẹ ayen de roro kpahen oborẹ aroẹmrẹ rọhẹ Aizaya 35:5, 6; 65:21-23; kugbe Ẹvwọphia 21:3, 4 che rugba wan vwẹ obaro na. Ayen da vwẹ ẹwẹn roro oborẹ ayen vẹ ihwo rẹ ayen vwo ẹguọnọ kpahen che yerin wan vwẹ akpọ kpokpọ na, ọnana kpuriẹnphiyọ iphiẹrophiyọ rayen kpahen obaro na, ọ je kẹ ayen owenvwe rẹ ayen vwo vwobọ vwẹ ẹga ri Jihova ọkieje.—Mat. 24:13; Gal. 6:9.
8. Ọrhọ yen iroro ọfa rọ nẹrhẹ igodẹ efa na ji kpo Ẹkarophiyọ na?
8 Roro kpahen emu ọfa rọ je nẹrhẹ igodẹ efa na kpo Ẹkarophiyọ na. Ayen guọnọ djephia nẹ ayen vwo ẹguọnọ ji biẹcha otu ra jẹreyọ na. Ota rẹ Ọghẹnẹ tarọphiyotọ jovwo nẹ otu ra jẹreyọ vẹ ihwo ri vwo iphiẹrophiyọ rẹ ayen vwọ dia otọrakpọ na che vwo uvi rẹ oyerinkugbe rọ kpẹkpẹre. Vwẹ idjerhe vọ? E ja ta ota kpahen idje evo.
9. Mavọ yen aroẹmrẹ rọhẹ Zekaraya 8:23 vwo dje oka ẹwẹn ro rhe igodẹ efa na kpahen ihwo ra jẹreyọ na?
9 Se Zekaraya 8:23. Aroẹmrẹ nana nabọ djefiotọ kẹ avwanre oka rẹ ẹwẹn ro rhe igodẹ efa na kpahen iniọvo rayen ra jẹreyọ na. Eta nana “ohwo ri Ju” kugbe “ovwan” shekpahen ẹko rẹ ihwo vuọvo na re dia uchekotọ rẹ ihwo ra jẹreyọ na. (Rom 2:28, 29) “Eshare ihwe ri che nẹ ẹgborho rẹ ephẹrẹ kephẹrẹ rhe” na mudiaphiyọ igodẹ efa na. Ayen cha “yọnre,” kọyen ayen che tinkamuẹ ihwo ra jẹreyọ na ji kuomakugbe ayen vwẹ ẹga rẹ uyota. Ọtiọyena, vwẹ ason ẹdẹ re vwo ruẹ Ẹkarophiyọ na, igodẹ efa na ki djephia nẹ ayen tinkamu ihwo ra jẹreyọ na womarẹ ayen vwo kpo Ẹkarophiyọ na.
10. Die yen Jihova ruru rere aroẹmrẹ rọhẹ Izikiẹl 37:15-19, 24, 25 se vwo rugba?
10 Se Izikiẹl 37:15-19, 24, 25. Aroẹmrẹ nana se vwo rugba, Jihova de ruo rere igodẹ efa na vẹ ihwo ra jẹreyọ na sa vwọ wian kugbe kpẹkpẹkpẹ. Aroẹmrẹ na djunute ubiurhe ivẹ. Ihwo ri vwo iphiẹrophiyọ ayen vwo kpo odjuvwu pha kerẹ “ubiurhe ri Juda” (uvwiẹ nana yen ivie ri Izrẹl nẹ cha), ihwo ri rhe vwo iphiẹrophiyọ re vwọ dia otọrakpọ na pha kerẹ “ubiurhe rẹ Ifrem.” * Jihova che ku ẹko ri ihwo ivẹ nana kugbe rere ayen vwọ dia “ubiurhe ọvuọvo.” Ọnana mudiaphiyọ nẹ ayen ga kuẹgbe vwẹ otọ rẹ Ovie rayen, Jesu Kristi. Kukpe kukpe, ihwo ra jẹreyọ vẹ igodẹ efa na vwoma ẹkuẹko-o, ẹkẹvuọvo ayen vwoma kerẹ “igodẹ ọvo” vwẹ otọ rẹ “osuigegede ọvuọvo.”—Jọn 10:16.
11. Idjerhe vọ yen “igodẹ” na re djunute vwẹ Matiu 25:31-36, 40 vwo djephia nẹ ayen biẹcha iniọvo ri Jesu?
11 Se Matiu 25:31-36, 40. “Igodẹ” rẹ Jesu djunute vwẹ itẹ ro kperi na mudiaphiyọ evwata rẹ ihwo vwẹ ọke oba na ri vwo iphiẹrophiyọ ayen cha vwọ dia otọrakpọ na, e ji se ayen igodẹ efa na. Ayen fuevun bicha iniọvo ri Jesu ra jẹreyọ na womarẹ ayen vwọ chọn ayen uko vwọ wian okpo owian rọ dia iruo rẹ aghwoghwo rẹ Uvie na kugbe odibo egbe na.—Mat. 24:14; 28:19, 20.
12-13. Erhọ yen idjerhe efa rẹ igodẹ efa na vwo djephia nẹ ayen biẹcha iniọvo ri Kristi na?
12 Kukpe kukpe, udughwrẹn evo tavwen e ki ruẹ Ẹkarophiyọ na, igodẹ efa na djephia nẹ ayen biẹcha iniọvo ri Jesu na womarẹ ayen vwo vwobọ vwẹ egbada-ẹdjẹ re vwo durhie ihwo vwo kpo Ẹkarophiyọ na. (Ni ekpeti na “ Wo muegbe Hẹrhẹ Ọke rẹ Ẹkarophiyọ rẹ Ughwu ri Jesu Na?”) Ayen je davwẹngba vwo muegbe erọnvwọn eje phiyotọ hẹrhẹ Ẹkarophiyọ na, ọ da tobọ dianẹ o vwo ohwo vuọvo vwevunrẹ ukoko rayen ra jẹreyọ-ọ. Oma vwerhen igodẹ efa na rẹ ayen vwo biẹcha iniọvo ri Kristi na vwẹ idjerhe ọtiọna. Igodẹ nana riẹnre nẹ Jesu nẹ oborẹ ayen ruẹ kẹ iniọvo rọyen na kerẹsiẹ a da mrẹ nẹ ọyen yen ayen ruro kẹ.—Mat. 25:37-40.
13 Erọnvwọn efa vọ yen muẹ avwanre vwo kpo Ẹkarophiyọ na ọ da tobọ dianẹ iphiẹrophiyọ rẹ avwanre fẹnẹre?
OBORESORỌ IHWO EJE VWO KPO ẸKAROPHIYỌ NA
14. Idjerhe vọ yen Jihova vẹ Jesu vwo dje ẹguọnọ rọ ma rho vwọ kẹ avwanre?
14Avwanre dje ọdavwaro phia kpahen ẹguọnọ rẹ Jihova vẹ Jesu dje kẹ avwanre. Idjerhe buebun yen Jihova vwo dje ẹguọnọ rọyen vwọ kẹ avwanre, jẹ o vwo ọvo usun rayen rọ ma teyenphia. Ọghẹnẹ dje ẹguọnọ rọ ma rho phia ro vwo ji ọmọ ọghanghanre rọyen nẹ ọ rhe rioja ji ghwu kẹ avwanre. (Jọn 3:16) Jesu ji dje oka rẹ ẹguọnọ nana phia rọ vwọ vwẹ oma rọyen kpahotọ vwo ghwu kẹ avwanre. (Jọn 15:13) A cha sa hwosa rẹ ẹguọnọ rẹ Jihova vẹ Jesu djephia vwọ kẹ avwanre-e. Ẹkẹvuọvo, e se dje ọdavwaro phia womarẹ akpeyeren avwanre ri kẹdẹ kẹdẹ. (Kọl. 3:15) E kpo Ẹkarophiyọ na rere e se vwo roro kpahen ẹguọnọ rẹ ayen dje kẹ avwanre vẹ obo re avwanre se vwo djẹ ẹguọnọ vwọ kẹ ayen.
15. Diesorọ igodẹ efa na vẹ ihwo ra jẹreyọ na vwo nẹ ọtanhirhe na kerẹ okẹ rọ ma ghanre?
15Avwanre nẹ okẹ rẹ ọtanhirhe na ghanghanre. (Mat. 20:28) Ihwo ra jẹreyọ na nẹ ọtanhirhe na ghanghanre, kidie ọyen yen nẹrhẹ ayen vwo uvi rẹ iphiẹrophiyọ. Kidie nẹ ayen vwo esegbuyota kpahen ọtanhirhe ri Kristi na, Jihova de se ayen evwata je dẹ ayen reyọ kerẹ emọ rọyen. (Rom 5:1; 8:15-17, 23) Oma je vwerhen igodẹ efa na kpahen ọtanhirhe na. Kidie nẹ ayen vwo esegbuyota kpahen izobo ri Jesu na, ọnana da nẹrhẹ ayen vẹ Jihova vwo uvi rẹ oyerinkugbe, vwẹ ẹga rọ fonro vwọ kẹ, ji vwo iphiẹrophiyọ ayen vwo “nẹ evun rẹ ukpokpogho rode na rhe.” (Ẹvwọ. 7:13-15) Idjerhe ọvo rẹ ihwo ra jẹreyọ vẹ igodẹ efa na vwo dje ọdavwaro phia kpahen ọtanhirhe na yen, ayen vwo kpo Ẹkarophiyọ na kukpe kukpe.
16. Die ọfa yen muẹ avwanre vwo kpo Ẹkarophiyọ na?
16 Orọnvwọn ọfa rọ nẹrhẹ avwanre kpo Ẹkarophiyọ na yen avwanre guọnọ nyupho ri Jesu. O toro iphiẹrophiyọ re vwori-i, avwanre nene iji rẹ Jesu vwọ kẹ avwanre vwẹ ason rọ reyọ Ẹkarophiyọ na vwo mu na: “Ru ọnana vwọ karohọ ovwẹ.”—1 Kọr. 11:23, 24.
ERERE AVWANRE EJE MRẸ SIẸRẸ E DE KPO ẸKAROPHIYỌ NA
17. Idjerhe vọ yen Ẹkarophiyọ na vwọ chọn avwanre uko vwo siẹkẹrẹ Jihova phiyọ?
17Avwanre siẹkẹrẹ Jihova phiyọ. (Jems. 4:8) Kirobo re yonore na, Ẹkarophiyọ na rhie uphẹn phiyọ re vwo roro kokodo kpahen iphiẹrophiyọ rẹ Jihova vwọ kẹ avwanre vẹ ẹguọnọ rọ ma rho ro djephia. (Jer. 29:11; 1 Jọn 4:8-10) Ọke re de roro kpahen iphiẹrophiyọ re vwo kpahen obaro na vẹ ẹguọnọ ro jẹ rhẹriẹ rẹ Ọghẹnẹ djephia vwọ kẹ avwanre, ọnana nẹrhẹ oyerinkugbe avwanre vẹ eguọnọ re vwo kpahọn ganphiyọ.—Rom 8:38, 39.
18. Die yen eroro kodo kpahen udje ri Jesu che mu avwanre vwo ru?
18Avwanre vwẹrokere udje ri Jesu. (1 Pita 2:21) Tavwen ẹdẹ rẹ Ẹkarophiyọ na ki te, avwanre se ikuegbe ri Baibol re ta ota kpahen udughwrẹn rọ koba ri Jesu vwẹ otọrakpọ na, ughwu kugbe evrẹnushi rọyen. Ota ra cha ta vwẹ ovwọnvwọn rẹ ẹdẹ rẹ Ẹkarophiyọ na, nẹrhẹ avwanre karophiyọ ẹguọnọ rẹ Jesu dje kẹ avwanre. (Ẹfe. 5:2; 1 Jọn 3:16) E de se ji roro kokodo kpahen udje rẹ omaevwoze ri Jesu, o che mu avwanre vwọ “yan kirobo rẹ ekpuyovwi rọye yanre.”—1 Jọn 2:6.
19. Mavọ yen avwanre sa vwọ dia evunrẹ ẹguọnọ rẹ Ọghẹnẹ?
19Avwanre muegbe a vwọ dia evunrẹ ẹguọnọ rẹ Ọghẹnẹ ọkieje. (Jud 20, 21) Avwanre da davwẹngba avwanre eje vwo nyupho rẹ Ọghẹnẹ, ru ọdẹ rọyen fon, ji ru obo re vwerhọn oma, ka sa dia evunrẹ ẹguọnọ rọyen. (Isẹ 27:11; Mat. 6:9; 1 Jọn 5:3) Ẹkarophiyọ na nẹrhẹ e vwo owenvwe ra vwọ vuẹ Jihova womarẹ akpeyeren ri kẹdẹ kẹdẹ rẹ avwanre nẹ, ‘Me guọnọ dia evunrẹ ẹguọnọ wẹn bẹdẹ!’
20. Iroro eghanghanre vọ yen nẹrhẹ avwanre kpo Ẹkarophiyọ na?
20 Avwanre eje vwo oboresorọ e vwo kpo Ẹkarophiyọ na, o torori sẹ iphiẹrophiyọ rẹ avwanre ọ re vwo kpo odjuvwu yẹrẹ a vwọ dia otọrakpọ na bẹdẹ-ẹ. Kukpe kukpe, avwanre de siomakoko vwẹ ẹdẹ yena, jẹ, a karophiyọ ughwu rẹ ohwo rẹ avwanre vwo ẹguọnọ kpahen, Jesu Kristi. Ọ rọ ma kenu, avwanre karophiyọ ẹguọnọ rọ ma rho rẹ Jihova djephia rọ vwọ tan avwanre hirhe womarẹ ọmọ rọyen. Vwẹ enukpe na, e che ru Ẹkarophiyọ na vwẹ ovwọnvwọn ri Friday, April 15, 2022. Avwanre vwo ẹguọnọ rẹ Jihova vẹ ọmọ rọyen. Re vwo kpo Ẹkarophiyọ rẹ ughwu ri Jesu na yen obo re ma ghanre kẹ avwanre vwẹ ẹdẹ yena.
UNE 16 Jiri Jihova Fikirẹ Ọmọ Rọyen ro Vwo Mu
^ ẹko. 5 Tẹ ọ dianẹ e vwo iphiẹrophiyọ re vwo kpo odjuvwu yẹrẹ ra vwọ dia iparadaisi vwẹ otọrakpọ na, avwanre rhẹro rẹ ọke re che vwo kpo Ẹkarophiyọ rẹ ughwu ri Jesu na kukpe kukpe. Vwẹ uyono nana, a cha vwẹ Baibol na vwọ fuẹrẹn oboresorọ e vwo kpo Ẹkarophiyọ na vẹ erere a mrẹ no cha.
^ ẹko. 4 Wọ da guọnọ evuẹ efa kpahen ọphọ kpokpọ na vẹ ọphọ rẹ Uvie na, ni uyovwinrota na “You Will Become ‘a Kingdom of Priests’ ” rọhẹ uwevwin orhẹrẹ ri October 15, 2014, aruẹbe 15-17 (ọ rẹ Oyibo).
^ ẹko. 4 OBORẸ OTA NANA MUDIAPHIYỌ: Uchekotọ ra jẹreyọ na mudiaphiyọ Inenikristi ra jẹreyọ re je herọ vwẹ otọrakpọ na.
^ ẹko. 10 Wọ da guọnọ evuẹ efa kpahen aroẹmrẹ rẹ ubiurhe ivẹ rọhẹ Izikiẹl uyovwin 37, ni Pure Worship of Jehovah—Restored At Last!, aruẹbe 130-135, ẹko. 3-17.
