INENIKRISTI rẹ ẹgbukpe ujorin ẹsosuọ nabọ davwẹngba vwo ghwoghwo “iyẹnrẹ esiri” rẹ Uvie na vwọ kẹ ihwo buebun. (Mat. 24:14) Evo usun rayen tobọ kpo ẹkuotọ efa re ghwoghwo. Kerẹ udje, ọyinkọn Pọl kpo ẹkuotọ ra riẹn phiyọ Turkey nonẹna. Ọ nabọ ghwoghwo vwẹ oboyin ọke rọ vwọ ga kerẹ imishọnare. * Omarẹ ikpe 2,000 vwọ wan nu, vwẹ 2014, a da rhoma ru aghwoghwo oghẹresan ọfa vwẹ Turkey. Diesorọ e vwo ruo? Amono yen vwobọ vwọ?

Ighwoghwota rehẹ Turkey te omarẹ 2,800, ẹkẹvuọvo ihwo re vrẹ oduduru 79 yehẹ evunrẹ ẹkuotọ na. Ọnana mudiaphiyọ nẹ ihwo re joma te 28,000 yen oghwoghwota ọvo che ghwoghwo kẹ. Kọyen ihwo buebun je herọ re che ghwoghwo kẹ. Ọdavwẹ rẹ aghwoghwo oghẹresan nana, ọyen e vwo ghwoghwo ota kẹ ihwo buebun vwẹ ọmọke krẹn. Iniọvo ri te omarẹ 550 re jẹ Turkish, yen nẹ ẹkuotọ efa rhe, rhe vwomaba iniọvo rehẹ ẹkuotọ rẹ Turkey, vwo ru aghwoghwo rẹ oghẹresan nana. Iyẹnrẹn vọ yen nuro rhe?

Aghwoghwo na ro ẹkuotọ na eje. Ukoko ọvo vwẹ Istanbul siri nẹ, “Ihwo vwọ mrẹ avwanre, kẹ ayen nọ: ‘E che ru ọghwẹkoko oghẹresan vwẹ etinẹ? Avwanre mrẹ Iseri rẹ Jihova vwẹ asan eje!’” Ukoko ọvo rọhẹ orere rẹ Izmir de ji si: “Ọshare ọvo rọ wian vwẹ igaraji nọ ọkpako ọvo nẹ, ‘Die yen phia? Ovwan hẹrẹ aghwoghwo ovwan phiyọ re?’” Ihwo ghene vwo oniso rẹ iruo oghẹresan nana.

Iniọvo ri nẹ ẹkuotọ efa rhe, nabọ riavwerhen rẹ iruo na. Oniọvo Steffen ro nẹ Denmark rhe, da ta: “Kẹdẹ kẹdẹ yen mi vwo ghwoghwo ota kẹ ihwo ri ji nyo kpahen Jihova dẹvo-o. Oma nabọ vwerhen ovwẹ nẹ mi se dje odẹ rẹ Ọghẹnẹ kẹ ihwo.” Jean-David ro nẹ France rhe, da je ta: “Avwanre ghwọrọ inọke buebun vwo ghwoghwo ota vwẹ urhuvwun ọvo. Oma vwerhen ovwẹ dẹn! Buebun rayen tobọ vughe Iseri rẹ Jihova-a. Emerha nuro iwevwin na eje yen avwanre de ghwoghwo, dje ividio, ji vwẹ ẹbe kẹ ihwo.”

 Iniọvo 550 na phi ẹbe ri te omarẹ 60,000 phiyọ ada vwẹ idughwrẹn ivẹ! Egbada-ẹdjẹ oghẹresan nana nẹrhẹ e se soseri kẹ ihwo buebun.

Oruru rayen rhoma ganphiyọ. Aghwoghwo nana nẹrhẹ oruru rẹ iniọvo rehẹ ẹkuotọ na ganphiyọ. Buebun rayen de rhi vwo ẹwẹn rẹ ayen vwọ ga kerẹ ekobaro ọkieje. Uvwre rẹ ẹgbukpe ọvo re vwo ru ẹgbada-ẹdjẹ ọghẹresan na nu, iniọvo 82 da vwomakpahotọ kerẹ ekobaro vwẹ Turkey.

Iniọvo ri nẹ ẹkuotọ efa rhe, tare nẹ iruo na nabọ djobọte aghwoghwo rayen, ọke rẹ ayen vwo rhivwin kpo ẹkuotọ rayen. Şirin, rọ dia oniọvo aye ro nẹ Germany rhe, de si: “Iniọvo rehẹ Turkey nabọ ruẹ aghwoghwo rẹ kpregede odedede. Ọke rẹ Jovwo, omavovwẹ ju vwe se ruẹ aghwoghwo rẹ kpregede-e. Ẹkẹvuọvo, ẹrhovwo ọgangan, kugbe udje esiri rẹ iniọvo na re me mrẹre ọke re vwo ruẹ egbada-ẹdjẹ na chọn vwẹ uko. Enẹna, mi tobọ ghwoghwo je vwẹ itrati kẹ ihwo vwẹ idjerhe! Oma rha vo vwẹ kirobo ri jovwo-o.”

“Mi yono ona kpokpọ mi se vwo ghwoghwo,” eriyin Johannes ro nẹ Germany rhe tare. “Iniọvo rẹ Turkey ghene guọnọ vwẹ Baibol na vwo yono ihwo buebun. Ayen reyọ kuphẹn kuphẹn ro rhiephiyọ eje vwo ghwoghwo. Mi de brorhiẹn nẹ mi ji che ru ọtiọyen ọke mi de rhivwin kpo Germany. Enẹna, me nabọ ghwoghwo ota kẹ ihwo buebun vrẹ obo ri jovwo.”

Oniọvo Zeynep ro nẹ France rhe, da je ta: “Egbada-ẹdjẹ nana chọn vwẹ uko mamọ. Ọ nẹrhẹ ovwẹ se vwo uduefiogbere vwẹ iruo aghwoghwo na, ki mi ji nabọ vwẹroso Jihova vrẹ obo ri jovwo.”

Ọ nẹrhẹ ighwoghwota na sikẹrẹ ohwohwo. Ẹguọnọ vẹ omamọ oyerinkugbe rẹ ighwoghwota ri nẹ ẹkuotọ sansan rhe na, djobọte iniọvo na mamọ. Jean-David, re djunute vwẹ obenu, da ta: “Iniọvo na nabọ vwọ uruemu re vwo dede erhorha. Ayen dede avwanre kerẹ igbeyan kugbe ihwo rẹ orua. Ayen de ji phi avwanre phiyọ uwevwin. Me riẹnre jovwo nẹ avwanre vwo iniọvo vwẹ akpọeje, mi sere vwẹ ẹbe rẹ ukoko na abọ buebun re, jẹ ọnana yen obọ ẹsosuọ mi tu vwọ rhiẹromrẹ. Ọ kẹ vwẹ omavwerhovwẹn  dẹn, nẹ mẹvwẹ ọvo usun rẹ idibo rẹ Jihova. Me kpevwẹ Jihova fikirẹ uphẹn rode nana.”

“Owenẹ ọ dia Denmark, France, Germany, yẹrẹ Turkey yen avwanre nurhe, avwanre eje orua ọvo. Kọ ghwa họhọ nẹ Ọghẹnẹ phoro ughwru rọ hẹriẹ ẹkuotọ na eje no,” eriyin oniọvo Claire ro nẹ France rhe tare.

Stéphanie ro nẹ France rhe, da je ta: “Egbada-ẹdjẹ oghẹresan na nẹrhẹ avwanre mrẹvughe nẹ ẹguọnọ rẹ avwanre vwo kpahen Jihova yen ku avwanre kugbe, ọ dia ephẹrẹ yẹrẹ ẹkuruemu rẹ avwanre-e.”

Buebun rẹ iniọvo ri nẹ ẹkuotọ efa rhe na, de jiroro nẹ ayen cha kwa kpo Turkey, kidie ihwo buebun ji chekọ re che ghwoghwo kẹ. Evo rayen kpo oboyin re. Iniọvo nana fo ejiro dẹn.

Kerẹ udje, o vwo ẹko rẹ iniọvo 25 re ga vwẹ ẹbẹre ọvo rẹ ẹkuotọ na. Vwẹ ikpe buebun rhire na, ọkpako ọvuọvo yen ayen vwori. Gbe roro kpahen oborẹ oma vwerhen ayen te, ọke rẹ iniọvo esan vwo nẹ obo Germany vẹ Netherlands kpo oboyin ra vwẹ ukẹcha kẹ ayen, vwẹ ukpe rẹ 2015!

Die yen iniọvo re ga vwẹ asan ra da ma guọnọ ukẹcha vwẹ Turkey ta kpahen oborẹ ayen yeren akpọ wan oboyin? Dede nẹ egbabọse evo herọ, jẹ erere vọnrọ gbidiki. Ni oborẹ evo usun rayen tare:

Federico rọ dia oniọvo ọshare rọ rọvwọnre rọ vrẹ ẹgbukpe 40 re, ro nẹ Spain kpo oboyin ra ga, da ta: “Kidie nẹ avwanre yeren akpọ ọlọlọhọ, ke me sa nabọ tẹnroviẹ ekuakua re ma ghanre.” Kẹ, o ghini se jiri uphẹn rẹ ẹga nana kẹ ihwo efa? Ọ da kpahen: “E, dẹn! Wo de kpo ẹkuotọ ọfa vẹ iroro wọ vwọ chọn ihwo uko vwọ riẹn Ọghẹnẹ, jẹ wo phi oma wẹn phiyọ obọ rẹ Jihova. Kẹ wọ cha mrẹ ẹroevwote rọyen vrẹ obo ri jovwo.”

Rudy rọ dia oniọvo ọshare rọ rọvwọnre ro siẹkẹrẹ ẹgbukpe 60 re, ro nẹ Netherlands kpo oboyin ra  ga, da ta: “Ra vwọ ga vwẹ asan ra da ma guọnọ ukẹcha, kẹ avwanre omavwerhovwẹn mamọ, kidie avwanre nabọ ghwoghwo ota kẹ ihwo buebun ri ji nyo Ota rẹ Ọghẹnẹ dẹvo-o.”

Sascha, ọyen ọgbuyovwin orua vwẹ Germany rọ vrẹ ẹgbukpe 40 re. O vwo gbikun rẹ obo ro rhiẹromrẹ, ọ da ta: “Kọke kọke mi de kpo aghwoghwo, me mrẹ ihwo ri ji nyo Ota rẹ Ọghẹnẹ dẹvo-o. Oma nabọ vwerhen ovwẹ, ọke mi de yono ayen kpahen Jihova.”

Atsuko, ọyen oniọvo aye rọ vrẹ ẹgbukpe 30 re, ro nẹ Japan kpo oboyin ra ga, da ta: “Ọke rẹ jovwo, me nẹrhovwo nẹ Amagidọn rhe kpata kpata. Ẹkẹvuọvo, me vwọ rhe Turkey re na, ke me kpẹvwẹ Jihova fikirẹ edirin ro vwori te ọke nana. Me vwọ mrẹ oborẹ Jihova ruẹ erọnvwọn wan na, ki mi siẹkẹrẹ vrẹ obo ri jovwo.”

Alisa, rọ dia oniọvo aye rọ vrẹ ẹgbukpe 30 re, nẹ Russia kpo oboyin ra ga. Ọ da ta: “Ẹga me vwọ kẹ Jihova vwẹ asan ra da ma guọnọ ukẹcha na, chọn vwẹ uko vwọ mrẹ iruo esiri rọyen eje.” (Une 34:8) Ọ da je ta: “Ọ ghwa dia Ọsẹ ọvo yen Jihova hepha kẹ vwẹ-ẹ, jẹ Ugbeyan rọ kẹrẹ ovwẹ. Ọ choma rọ vwọ chọn vwẹ uko vwẹ kẹdia kẹdia mi hepha. Me ghene mrẹ uvi rẹ omavwerhovwẹn vẹ ebruphiyọ buebun vwẹ akpeyeren mẹ!”

Egbada-ẹdjẹ oghẹresan re ruru vwẹ Turkey na, nẹrhẹ e se ghwoghwo iyẹnrẹn esiri na kẹ ihwo buebun. Dedena, ihwo buebun je herọ re ji ghwoghwo ota kẹ-ẹ. Kọke kọke yen iniọvo ri kpo asan ra da ma guọnọ ukẹcha vwẹ Turkey, vwọ mrẹ ihwo ri ji nyo kpahen Jihova dẹvo-o. Wọ guọnọ ga vwẹ asan tiọyen? Ọ da dia ọtiọyen, e durhie uwe nẹ wọ “kpare ẹro kpenu, re wo ni obo rẹ idju na ejobi ghwo te orhọ nure.” (Jọn 4:35) Wo de vwo ẹwẹn wọ vwọ ga vwẹ asan rẹ idju na ejobi “de ghwo te orhọ,” gba ton egbemuo na phiyọ asaọkiephana. Nabọ vwobọ vwẹ iruo aghwoghwo na vọnvọn, “re te oba rẹ akpọ na.” Wo de ru ọtiọyen, kẹ wọ cha mrẹ ebruphiyọ gbidiki!​—Iruo 1:8.