1. Diesorọ a sa vwọ rhọnvwe nẹ Jihova yen vwo erọnvwọn eje? (Ni uhoho rẹsosuọ na.)

JIHOVA yen vwo erọnvwọn eje! Ọyen vwo “odjuvwu rẹ odjuvwu, akpọ na vẹ emu re herọ ejobi.” (Urhi 10:14; Ẹvwọ. 4:11) Jihova yen ma ihworakpọ, ọtiọyena ọyen vwo avwanre eje. (Une 100:3) Ẹkẹvuọvo, Jihova sane ihwo evo nẹ ohri rẹ ihworakpọ eje nẹ ayen dia erọyen vwẹ idjerhe oghẹresan.

2. Amono yen Baibol na djisẹ rọyen kerẹ ihwo oghẹresan vwọ kẹ Jihova?

² Kerẹ udje, Une Rẹ Ejiro 135 vwo djisẹ rẹ idibo rẹ Jihova ri fuevun vwẹ ẹgborho rẹ Izrẹl awanre, o de se ayen “emuobọ rọye.” (Une 135:4) A je mraro vwẹ ọbe rẹ Hosia nẹ ihwo evo re dia ihwo rẹ Izrẹ-ẹl cha dia ihwo rẹ Ọghẹnẹ. (Hos. 2:23) Aroẹmrẹ rẹ Hosia na rugba ọke rẹ Jihova vwọ sane ihwo evo re dia ihwo rẹ Ju-u, vwọba ihwo ri che nene Jesu sun. (Iruo 10:45; Rom 9:23-26) “Ẹgborho ọfuanfon” nana, eyen “ihwo robọ rẹ Ọghẹnẹ” vwẹ idjerhe oghẹresan, kidie ẹwẹn ọfuanfon rẹ Ọghẹnẹ yen a vwọ jẹ ayen reyọ nẹ ayen che kpo obo odjuvwu. (1 Pita 2:9, 10) Kẹ Inenikristi ichekọ ri fuevun ri vwo iphiẹrophiyọ rẹ ayen vwọ dia otọrakpọ  na vwo? Jihova ji se ayen “ihwo” rọyen, ihwo rọ “jẹreyọ.”​—Aiz. 65:22.

3. (a) Amono yen riavwerhen rẹ omamọ oyerinkugbe vẹ Jihova nonẹna? (b) Die yen uyono nana cha chọn avwanre uko vwo ru?

³ Nonẹna, “imigegede” na ri vwo iphiẹrophiyọ rẹ ayen vwo kpo odjuvwu, vẹ “igodẹ efa” ri vwo iphiẹrophiyọ rẹ ayen vwọ dia otọrakpọ na yen kuomakugbe vwọ dia “igodẹ ọvo” rẹ Jihova reyọ phiyọ ihwo rọyen. (Luk 12:32; Jọn 10:16) Avwanre kpẹvwẹ Jihova fikirẹ uphẹn rẹ avwanre vẹ ọyen vwọ riavwerhen rẹ uvi rẹ oyerinkugbe tiọna. Uyono nana cha chọn avwanre uko vwo dje ọdavwaro phia kpahen uphẹn oghẹresan nana rẹ Jihova vwo brọghọ phiyọ avwanre oma.

4. Ọrhọ yen idjerhe ọvo re se vwo dje ọdavwaro phia kpahen uvi rẹ oyerinkugbe rẹ avwanre vwori vẹ Jihova, kẹ idjerhe vọ yen Jesu vwo ru ọtiọyen?

⁴ Omaẹvwọkpahotọ rẹ avwanre, ọyen idjerhe ọvo re vwo dje ọdavwaro phia kẹ Jihova. Ọke rẹ avwanre de bromaphiyame, avwanre djephia kẹ ihwo efa vwẹ azagba nẹ Jihova yen vwo avwanre, avwanre je guọnọ nyupho rọyen. (Hib. 12:9) Jesu ji ru emu tiọyen ọke ro vwo bromaphiyame. Kọ ghwa họhọ nẹ ọ vuẹ Jihova nẹ, “Me vwo omavwerhe ru ọhọre wẹn, E Ọghẹnẹ mẹ.” (Une 40:7, 8) Dede nẹ ẹkuotọ rọ vwomakpahotọ kẹ Ọghẹnẹ nure yen Jesu nurhe, ọ je vwomakpahotọ vwọ kẹ eruo rẹ ọhọre rẹ Ọghẹnẹ.

5, 6. (a) Ẹro vọ yen Jihova vwo ni omaebrophiyame rẹ Jesu? (b) Djudje rẹ oboresorọ omaẹvwọkpahotọ rẹ avwanre vwọ vwerhen Jihova oma, dede nẹ ọyen kẹ avwanre erọnvwọn eje.

⁵ Die yen Jihova ruru ọke rẹ Jesu vwo bromaphiyame? Baibol na da ta: “Ọke ra vwọ vwẹ ame kẹ Jesu nu, o de wotọ nẹ ame rhe: e vwo ni, odjuvwu de rhie phihọ, [“ẹwẹn,” NW ] rẹ Ọghẹnẹ kerẹ ilekuku de woto rhe, ọ da rhan muo. Nighe, urhuru ọvo de nẹ odjuvwu rhe ta nẹ, Ọnana hẹ ọmọ mẹ ro je vwe, rẹ evun rọye vwerhe ovwẹ.” (Mat. 3:16, 17) Dede nẹ Jesu ọmọ rẹ Ọghẹnẹ, jẹ oma vwerhen Jihova rọ vwọ mrẹ nẹ Jesu vwo owenvwe ro vwo ru ọhọre rọyen. Oma je vwerhọn ro vwo rhiabọreyọ omaẹvwọkpahotọ rẹ avwanre. Ọ je choma ro vwo bruba kẹ avwanre.​—Une 149:4.

⁶ Re vwo ru udje rọyen, vwẹro roro ọsẹ rọ kẹ ọmọtẹ rọyen ibiskiti. Ọmọ na de vwirhin emerha vwọ kẹ ọsẹ na. Ọ dia ọsẹ na yen vwo ibiskiti na jovwo? Diesorọ ọmọ na vwọ rhoma kẹ ọsẹ na ibiskiti rẹ ọsẹ na vwọ kẹ? Vwọrẹ uyota, ọsẹ ro vwo ẹguọnọ che se roro kpahen enọ tiọna-a. Ukperẹ ọtiọyen, o che ni ibiskiti na kerẹ odjephia rẹ ẹguọnọ rẹ ọmọ na vwo kpahen ọyen. Ẹro tiọyena yen Jihova vwo nẹ omaẹvwọkpahotọ rẹ avwanre.​—Eyan. 34:14.

7. Mavọ yen Malakae vwọ kanrunumu ẹro rẹ Jihova vwo ni ihwo re ga vwọrẹ owenvwe?

⁷ Se Malakae 3:16. Roro kpahen owọẹjẹ ọghanghanre yena, ọ da dianẹ wọ je rhe vwomakpahotọ ji bromaphiyame-e. Vwọrẹ uyota, ghwe vwo nẹ ọke re vwo vwiẹ avwanre eje yen Jihova vwo vwo avwanre. Ẹkẹvuọvo, roro kpahen oborẹ oma cha vwerhen Jihova te, siẹrẹ wọ da vwomakpahọtọ nẹ wo che ru ọhọre rọyen vwọrẹ odjephia rẹ ọghọ ru wo vwo kpahen usuon rọyen. (Isẹ 23:15) Jihova vwo oniso rẹ ihwo re ga vwọrẹ owenvwe, o ji si edẹ rayen phiyọ “ọbe rẹ ẹkarophihọ” rọyen.

8, 9. Die yen Jihova guọnọ mie ihwo rẹ edẹ rayen hẹ “ọbe rẹ ẹkarophihọ” rọyen?

 ⁸ O vwo obo ra guọnọre nẹ e ru tavwen odẹ rẹ avwanre ke sa daji “ọbe rẹ ẹkarophihọ” rẹ Jihova. Malakae kanrunumuo nẹ e jẹ avwanre ‘djoshọ rẹ Jihova, ji roro kpahen odẹ rọyen.’ E che si odẹ rẹ avwanre nẹ ọbe rẹ arhọ rẹ udje na siẹrẹ a da vwẹ ẹga vwọ kẹ ohwo yẹrẹ orọnvwọn ọfa.​—Eyan. 32:33; Une 69:28.

⁹ Ọtiọyena, omaẹvwọkpahotọ rẹ avwanre kẹ Jihova ghwa dia ọ re di vwo ve kẹ nẹ e che ru ọhọre rọyen, ji bromaphiyame-e. Obọ vuọvo yen e ruẹ enana, ẹkẹvuọvo ẹga rẹ avwanre ọ rẹ rhinrin. A da guọnọ ka ẹbẹre rẹ Jihova, avwanre ke vwẹ uruemu vwo djephia ọkieje nẹ avwanre guọnọ nyupho rọyen.​—1 Pita 4:1, 2.

10. Ofẹnẹ vọ yehẹ ohri rẹ ihwo re ga Jihova vẹ otu re ga-a?

¹⁰ A fuẹrẹn ikuegbe rẹ Ken, Solomọn vẹ ihwo rẹ Izrẹl vwẹ uyono rọ wanre na. Ayen eje tare nẹ ayen vwẹ ẹga vwọ kẹ Jihova, ẹkẹvuọvo ẹga rayen nẹ otọ rẹ ubiudu rhe-e. Ikuegbe rayen djerephia nẹ ofori ihwo rẹ Jihova vwọ ka ẹbẹre rẹ ọvwata, ji họnre vwọso umwemwu. (Rom 12:9) Malakae vwo djunute “ọbe rẹ ẹkarophihọ” na nu, Jihova da ta ota kpahen “ofẹnẹ rọ hẹ ohri rẹ ọvwata vẹ oruimwemwu, vwẹ uvwre rẹ ohwo rọ ga Ọghẹnẹ vẹ ọ ro jẹ ẹga.”​—Mal. 3:18.

11. Diesorọ o vwo fo nẹ e jẹ ihwo riẹn nẹ avwanre vwomakpahotọ kẹ Jihova nure?

¹¹ Ọnana ghwa idjerhe ọfa re se vwo dje ọdavwaro phia kẹ Jihova ro vwo kere avwanre ba ihwo rọyen. Ofori nẹ ihwo “mrẹ” ẹyan-obaro rẹ avwanre. (1 Tim. 4:15; Mat. 5:16) Nọ oma wẹn: ‘A riẹn vwẹ phiyọ ohwo rọ nabọ fuevun kẹ Jihova riẹriẹriẹ? Mi reyọ kuphẹn kuphẹn ro rhiephiyọ vwo dje oma phia kerẹ Oseri rẹ Jihova?’ Jihova vwọ sane avwanre nure na, oma cha sa vwerhọn siẹrẹ e de siomauko re vwo jẹ ihwo riẹn nẹ avwanre idibo rọye-en.​—Une 119:46; se Mak 8:38.

12, 13. Idjerhe vọ yen Iseri rẹ Jihova evo vwo siomanẹ kẹ ihwo?

 ¹² Ọ da ohwo mamọ nẹ iniọvo evo vwẹrokere “[“ẹwẹn,” NW ] rẹ akpọ na” ro rhe ihwo buebun nonẹna, ọtiọyena e rhe se vughe ofẹnẹ rọhẹ uvwre rayen vẹ ihwo re jẹ Jihova ẹga-a. (1 Kọr. 2:12) Ẹwẹn rẹ akpọ na nẹrhẹ ihwo titi ‘urhurusivwe rẹ ugboma rayen.’ (Ẹfe. 2:3) Kerẹ udje, ọsoso uchebro na eje ra vwọphia kpahen irhuon vẹ osẹnvwe na, jẹ ihwo evo ji sen osẹnvwe ri shephiyọ-ọ. Iwun ri tamuẹ oma yen ayen kuẹphiyọ kpo emẹvwa. Efa ruẹ ẹto rayen yẹrẹ bro vwọ họhọ ihwo rẹ akpọ na. (1 Tim. 2:9, 10) Ọtiọyena, ọ pha bẹnbẹn ra sa vwọ fẹnẹ ayen vwo nẹ “ugbeyan rẹ akpọ na” siẹrẹ ayen da hẹ ohri rẹ ihwo.​—Jems 4:4.

¹³ Vwọba, iniọvo evo ji rhi sen uruemu rẹ akpọ na vwẹ ẹdia efa-a. Oborẹ ayen gbeha wan vẹ oborẹ ayen ruẹ vwẹ ipati shephiyọ vẹ iwan rẹ Inenikristi-i. Ayen phiẹ ifoto vẹ erharhe eta phiyọ intanẹti. Ọkiọvo ayen ji rhi ru umwemwu egangan rọ sa nẹrhẹ a ghwọku aye-en, ẹkẹvuọvo, ayen orharhe udje vwọ kẹ ighene efa rehẹ evunrẹ ukoko na.​—Se 1 Pita 2:11, 12.

14. Die yen ofori nẹ avwanre ru siẹrẹ a da guọnọ sẹro rẹ oyerinkugbe rẹ avwanre vẹ Jihova?

¹⁴ Akpọ na titi “urhuru si vwe rẹ ugboma, ojevwe rẹ ẹro kugbe eheri.” (1 Jọn 2:16) Jẹ, kidie nẹ avwanre idibo rẹ Jihova, a da vwẹ uchebro kẹ avwanre nẹ, e “siobọ nẹ egagọ rẹ ofian kugbe ẹguọnọ rẹ akpọ ofefe na, rere avwanre yere akpọ rẹ avwanre dẹndẹn yoyovwi vwẹ evun rẹ akpọ na.” (Taitọs 2:12) Ota rẹ avwanre vẹ uruemu rẹ avwanre kpahen iruo, emuẹriọ vẹ udiẹda, irhuon vẹ osẹnvwe, kugbe kemu kemu efa rẹ avwanre ruẹ, che djephia sẹ Jihova ọvo yen avwanre vwomakpahotọ kẹ.​—Se 1 Kọrẹnt 10:31, 32.

15. Diesorọ o vwo fo nẹ avwanre nene iniọvo rẹ avwanre yerin kugbe dẹndẹn vwọrẹ ẹguọnọ?

¹⁵ Ẹ se dje ọdavwaro phia kpahen  oyerinkugbe rẹ avwanre vẹ Jihova, womare oborẹ avwanre nene iniọvo rẹ avwanre yerẹn wan. Jihova yen ji vwo ayen. Avwanre da karophiyọ ọyena, ọ cha nẹrhẹ e se nene iniọvo rẹ avwanre eje yerin kugbe dẹndẹn vwọrẹ ẹguọnọ. (1 Tẹsa. 5:15) Jesu da ta kẹ idibo rọyen: “Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.”​—Jọn 13:35.

16. Udje vọ vwẹ Urhi rẹ Mosis na yen nẹrhẹ a riẹn ẹro rẹ Jihova vwo ni ihwo rọyen?

¹⁶ Re vwo djudje rẹ obo ro fori nẹ avwanre nene ohwohwo yerin wan vwevurẹ ukoko na, gbe roro kpahen ẹdia nana. Imize vẹ iko rehẹ evunrẹ uwevwin rẹ ẹga na, a vwẹ ayen vwọ kpahotọ kẹ ẹga rẹ Jihova ọvo. Urhi rẹ Mosis nabọ dje obo ra vwẹrote ayen wan. Ohwo ro nene odjekẹ na-a, ko ghwu. (Ukeri 1:50, 51) Jihova da sa sẹro rẹ ekuakua ghevweghe ra vwọba ruiruo vwẹ ẹga rọyen, o muẹro dẹn nẹ ọ je cha sẹro rẹ idibo rọyen ri fuevun! Jihova da ta kẹ ihwo rọyen: “Kidie ohwo rọ vwẹ obọ te ovwan, yẹ ọ vwẹ obọ te ọmẹro” mẹ.​—Zek. 2:8.

17. Die yen Jihova “kerhọn” kẹ?

¹⁷ Malakae nabọ djisẹ rẹ Jihova kerẹ ohwo rọ “kerhọn” ro ji “nyo” oborẹ idibo rọyen ta kẹ ohwohwo. (Mal. 3:16) Jihova ghene “riẹn otu re dia ọrọye.” (2 Tim. 2:19) Ọ mrẹ oborẹ avwanre ohwo ọvuọvo ruẹ, o ji nyo kota kota rẹ avwanre ta. (Hib. 4:13) Jihova “kerhọn” o ji “nyo” siẹrẹ avwanre vẹ iniọvo rẹ avwanre rhe yerẹn kuẹgbe-e. O ji che vwo oniso rẹ avwanre siẹrẹ e de vwo uruemu re vwo dede ohwohwo, ruẹse, vwo ghovwo, ji yerẹn kuẹgbe dẹndẹn.​—Hib. 13:16; 1 Pita 4:8, 9. 

18. Mavọ yen e se vwo dje ọdavwaro phia kpahen ọghọ rẹ Jihova bru phiyọ avwanre oma, rọ vwọ reyọ avwanre phiyọ ihwo rọyen?

¹⁸ Vwọrẹ imuẹro, avwanre guọnọ dje ọdavwaro phia kẹ Jihova fikirẹ ọghọ ro bru phiyọ avwanre oma, rọ vwọ reyọ avwanre phiyọ ihwo rọyen. Avwanre mrẹvughe nẹ aghwanre herọ siẹrẹ a da vwomakpahotọ kẹ Jihova vwo nẹ otọ rẹ ubiudu rhe. Dede nẹ avwanre yerẹn “vwẹ uherevie rẹ uvwiẹ ogugunu chọchọ na,” avwanre guọnọ yerin vwẹ idjerhe re “vwo jẹ abe ẹriọ,” rere avwanre sa vwọ “la kerẹ urhukpẹ vwẹ akpọ na.” (Fil. 2:15) Avwanre brorhiẹn kokoroko ra vwọ họnre vwọso umiovwo. (Jems 4:7) Vwọba, avwanre vwo ẹguọnọ rẹ iniọvo avwanre, avwanre je muọghọ kẹ ayen kidie Jihova yen ji vwo ayen.​—Rom 12:10.

19. Idjerhe vọ yen Jihova cha vwọ hwosa kẹ ihwo re dia erọyen?

¹⁹ Baibol na da ta: “Ọrovwohwo cha sen ihwo rọye-e.” (Une 94:14) O toro ebẹnbẹn ri te avwanre oma-a, imuẹro ọgangan nana che se wene bẹdẹ-ẹ. Ughwu dede cha sa dobọ rẹ ẹguọnọ rẹ Jihova vwo kpahen avwanre ji-i. (Rom 8:38, 39) “Owenẹ avwanre ghwu, avwanre ghwuru kẹ Ọrovwohwo; owenẹ avwanre rhọ eyẹ avwanre ghwu, avwanre hẹ obọ rẹ Ọrovwohwo.” (Rom 14:8) Avwanre rhẹro rẹ ọke rẹ Jihova cha vwọ rhọvwọn igbeyan rọyen eje ri fuevun nushi rhe. (Mat. 22:32) Asaọkiephana dede, avwanre riavwerhen rẹ ebruphiyọ buebun. Baibol na da ta: “Ebruba kẹ orere rẹ Ọghẹnẹ rọye dia Ọrovwohwo, ihwo rọ jẹreyọ nẹ e dia ireuku rọye!”​—Une 33:12.