JESU vwo yono idibo rọyen oborẹ ayen che ghwoghwo iyẹnrẹn rẹ esiri na wan, ọ da vuẹ ayen nẹ ọ dia ihwo eje yen che rhiabọreyọ ovuẹ rẹ Uvie na-a. (Luk 10:3, 5, 6) Ihwo evo cha van ku avwanre vwevunrẹ iruo rẹ aghwoghwo na yẹrẹ tobọ harhe avwanre. Vwọrẹ uyota, erọnvwọn tiọyena sa nẹrhẹ ọ bẹn re vwo gbe arodọnvwẹ kẹ ihwo re ghwoghwo ota kẹ.

Ohwo ro gbe arodọnvwẹ nabọ vwo oniso rẹ ọdavwẹ vẹ ebẹnbẹn rẹ ihwo efa, o roro kẹ ayen, o ji vwo owenvwe rọ vwọ chọn ayen uko. Ọtiọyena, siẹrẹ arodọnvwẹ re vwo kpahen ihwo na de shekpotọ, o che djobọte oruru vẹ osasavwe rẹ avwanre vwo ruiruo rẹ aghwoghwo na. Ẹkẹvuọvo, e de gbe arodọnvwẹ kẹ ihwo na, ọ cha ghwa họhọ nẹ avwanre koko irhe phiyọ erhanre rọ la. Oruru rẹ avwanre kpahen iruo rẹ aghwoghwo na kọ cha ganphiyọ!​—1 Tẹsa. 5:19.

Mavọ yen e se vwo gbe arodọnvwẹ, tobọ vwẹ ọke rọ vwọ dia bẹnbẹn re vwo ru ọtiọyen? E jẹ avwanre fuẹrẹn udje rẹ ihwo erha nana ra sa vwẹrokere​—Jihova, Jesu kugbe ọyinkọn Pọl.

Vwẹ ikpe uriorin buebun rhire na yen Jihova vwo chirakon rẹ efian rẹ ihwo gun kpahọn. Dedena, o ji “nẹ aruẹdọn kẹ otu re riẹn ẹse te otu ri jẹ riẹn.” (Luk 6:35) O dje arodọnvwẹ rọyen phia womarẹ edirin ro vwori. Ọ guọnọre nẹ “ihwo na ejobi” vwo usivwin. (1 Tim. 2:3, 4) Dede nẹ Ọghẹnẹ vwo utuoma kpahen umwemwu, o ni ihworakpọ ghanghanre, ọ guọnọre nẹ ohwo vuọvo ghwọrọ-ọ.​—2 Pita 3:9.

Jihova riẹnre nẹ Eshu vwẹ efian vwọ phiẹn ihwo buebun. (2 Kọr. 4:3, 4) Nẹ ọkiemọ rhe yen e vwo yono ihwo buebun efian kpahen Jihova. Ọtiọyena, ọ bẹnre mamọ rẹ ayen vwo rhiabọreyọ uyota na. Ẹkẹvuọvo, Jihova vwo owenvwe rọ vwọ chọn ayen uko. Mavọ yen avwanre ru riẹn?

Roro kpahen ẹro rẹ Ọghẹnẹ vwo ni ihwo rẹ Ninive rẹ ọke awanre re dia inogbozighi. Jihova da ta kẹ Jona: “O gbi rhe fo re me re ehrọre ri Ninive, orere rode yena, rẹ ihwo rọye bunọ uriori ujosan re riẹn obọrhe eyẹ obohwẹre raye-en?” (Jona 4:11) Jihova gbe arodọnvwẹ kẹ ihwo na, kidie ayen riẹn uyota na-a. Kọyensorọ o vwo ji Jona yanran re si ayen orhọ.

Kerẹ Jihova, avwanre ji vwẹ ẹro ọghanghanre vwo nẹ ihwo. Ọtiọyena, avwanre guọnọ davwẹngba vwọ vwẹ ukẹcha kẹ kohwo kohwo, ọ da tobọ dianẹ ayen cha sen ovuẹ na.

Ivun de miovwo ihwo kpahen ovue rẹ avwanre, ofori nẹ avwanre davwẹngba vwo  vwo ẹruọ rẹ obo re nẹrhẹ ivun miovwo ayen. Ihwo evo vwo iroro ọchọchọ kpahen Baibol na yẹrẹ Inenikristi, fikirẹ orharhe uruemu rẹ ihwo buebun ri se oma rayen Inenikristi djephia. Ọ je sa dianẹ e gun efian kẹ ayen kpahen oborẹ avwanre segbuyota. Efa niro nẹ ihwo rẹ orua yẹrẹ ihwo rẹ ekogho rayen cha vwẹ ayen jehwẹ siẹrẹ ayen da kerhọ kẹ avwanre.

Ivun se miovwo ihwo evo fikirẹ emu ebrabra re phia kẹ ayen uvwre rẹ ọke yena. Oniọvo aye ọvo rọ dia imishọnare re se Kim da ta: “O vwo asan ọvo vwẹ ekogho rẹ avwanre de ghwoghwo na, rọ vọnre vẹ ihwo rẹ ekuakua rayen ghwru va abọ fikirẹ ofovwin. Kọke kọke yen ofu vwo dje ayen, kidie ayen rhe vwo iphiẹrophiyọ kpahen obaro na-a. Buebun rayen vwọsua ovuẹ rẹ avwanre. Ọ tobọ vwo ẹdẹ ọvo rẹ ayen vwọ họnre ovwẹ ọke re me vwọ hẹ aghwoghwo.”

Mavọ yen Kim se vwo gbe arodọnvwẹ kẹ ihwo na vwẹ ẹdia nana? Ọ da ta: “A da vwọso ovwẹ, ke me davwẹngba vwọ karophiyọ ọbe rẹ Isẹ 19:11 rọ tare nẹ, ‘Ohwo ro vwo ọhọ fobọ muẹ ophu-u.’ Ẹkarophiyọ rẹ oborẹ ihwo na rhiẹromrẹ vwẹ obuko yen chọn vwẹ uko vwo gbe arodọnvwẹ kẹ ayen. Jẹ, ọ dia ihwo eje rẹ avwanre mrẹre yen van ku avwanre-e. Mi tobọ vwo orhivwinbrura evo vwẹ ekogho yena.”

Nọ oma wẹn: ‘Me rha riẹn uyota na jovwo-o, mavọ yen me rha kpahen kẹ Iseri rẹ Jihova ri bru vwe rhe?’ Kerẹ udje, ọ da dianẹ avwanre nyo efian buebun re gun nyẹ Iseri rẹ Jihova vwo? Ọkiọvo ọyena sa nẹrhẹ avwanre sen ovuẹ na, e mi ji gbe arodọnvwẹ kẹ avwanre. Avwanre da karophiyọ nẹ Jesu vwẹ iji kẹ avwanre nẹ e ru kẹ ihwo kirobo rẹ avwanre guọnọre nẹ e ji ru kẹ avwanre, ọyena cha nẹrhẹ e se gbe arodọnvwẹ kẹ ayen ọ da tobọ dianẹ ọ bẹn kẹ avwanre.​—Mat. 7:12.

Ọyinkọn Pọl gbe arodọnvwẹ kẹ ihwo, tobọ ji te ihwo ri gboja kẹ. Diesorọ? Kidie ọ karophiyọ akpọ ro ke yerin. Ọ da ta: “Dẹvure jovwo me phọpherọ mi kpokpiro me da harhọ; ẹkẹvuọvo o de ni arodọvwẹ mẹ fikiridie ughẹghẹ vẹ ijesegbuyota mi vwo ruo.” (1 Tim. 1:13) Ọ mrẹvughe nẹ Jihova vẹ Jesu gbe arodọnvwẹ kẹ ọyen. Uruemu rọyen ri jovwo na, nẹrhẹ o se vwo ẹruọ rẹ ihwo ro ghwoghwo ota kẹ.

Pọl ghwoghwo ota kẹ ihwo evo rẹ esegbuyota vẹ uyono rẹ efian tan awọ muotọ vwevunrẹ ubiudu rayen. Mavọ yen ọyena djobọte wan? Iruo Rẹ Iyinkọn Na 17:16 tare nẹ ọke rẹ Pọl vwọ hẹ Atẹns, “ọhọre kọ kparọ tututu rọ  vwọ mrẹ orere na rọ vọnre vẹ ẹdjọ.” Dedena, Pọl da reyọ obo re kpare ophu rọyen na vwo soseri ro fiotọ. (Iruo 17:22, 23) O wene ovuẹ rọyen vwo nene ẹkuruemu rẹ ihwo sansan ro ghwoghwo ota kẹ, rere o “se vwo sivwi otu evo.”​—1 Kọr. 9:20-23.

A sa vwẹrokere Pọl siẹrẹ a da vwẹ aghwanre vwo ghwoghwo “ikun esiri oyoyovwi” na kẹ ihwo re vwọsua avwanre yẹrẹ ri se iyono rẹ efian gbuyota. (Aiz. 52:7) Oniọvo aye ọvo re se Dorothy da ta: “Buebun rẹ ihwo rehẹ ekogho rẹ avwanre de ghwoghwo, e yono ayen nẹ Ọghẹnẹ gbon ihwo, o vwo arodọnvwẹ-ẹ. Mi de jiri ayen nu, ki mi kpọ ẹwẹn rayen kpo oborẹ Baibol na ta kpahen ẹguọnọ rẹ Jihova kugbe ive rọyen kpahen obaro na.”

Ofori nẹ avwanre ji roro kpahen obo ra sa vwọ bọn iniọvo rẹ avwanre gan. Jessica da ta: “Ọke ra da hanrhe ọvo usun rẹ avwanre, me davwẹngba vwo siẹ ẹwẹn nẹ obo re phiare. Ke me kpọ otaẹtakuẹgbe rẹ avwanre na vwo kpo asan ọfa. Avwanre me ta ota kpahen erere rẹ iruo rẹ aghwoghwo rẹ avwanre na ghwa cha, dede nẹ ihwo evo sian ovuẹ na.”

Jihova nabọ riẹn egbabọse rẹ avwanre hirharokuẹ vwẹ aghwoghwo na. Oma nabọ vwerhọn ọke rẹ avwanre da vwẹrokere arodọnvwẹ rọyen! (Luk 6:36) Ẹkẹvuọvo, arodọnvwẹ rẹ Jihova dia ọ rẹ bẹdẹ bẹdẹ-ẹ. O muẹro nẹ Jihova riẹn ọke ro fori dẹn ro vwo phioba phiyọ eyeren nana. E jẹ avwanre ruiruo rẹ aghwoghwo na vẹ okpakpa bẹsiẹ ọke yena vwo te. (2 Tim. 4:2) E jẹ a vwẹ ọkieje vwo ghwoghwo vẹ oruru, ji gbe arodọnvwẹ kẹ “ihwo na ejobi.”