Oborẹ Wọ sa Vwọ Riavwerhen ji Mrẹ Erere Vọnvọn Vwo nẹ Uyono rẹ Baibol Wẹn

HWORO

JOSHUA guọnọ sun ẹgborho rẹ Izrẹl ro Otọ rẹ Uve na, jẹ obo ro che ru na vọnre vẹ egbabọse mamọ. Jihova da vwẹ imuẹro vẹ uduephiophiyawọ kẹ, rọ vwọ ta: ‘Fiudugberi wọ gan. Yọnrọn urhi na ejobi. Se te ason te uvo, rere wọ vwomakpotọ ru obo re si phiyọ ejobi, kọ nẹrhẹ idjerhe wẹn yovwin, ko ji yovwin kẹ wẹ.’—Jos. 1:7, 8.

Avwanre ji hirharokuẹ egbabọse egangan vwẹ “ẹdẹ ebrabra” re yerin te na. (2 Tim. 3:1) Avwanre se phikparobọ kerẹ Joshua, siẹrẹ a da yan nene uchebro rẹ Jihova vwọ kẹ. Ofori nẹ e se Baibol na kẹdẹ kẹdẹ, je reyọ obo re yono norhe vwọba akpọ yerin, rere e se vwo brorhiẹn rẹ aghwanre.

Ẹkẹvuọvo, ọ ghwa dia ihwo ejobi yen vwo omavwerhovwẹn kpahen uyono-o, ihwo evo tobọ riẹn obo re ruo wa-an. Dedena, uyono rẹ Baibol pha ghanghanre mamọ. Ọtiọyena, gba fuẹrẹn ekpeti na “ Davwen Iroroẹjẹ Nana,” rere wọ mrẹ erọnvwọn sansan re sa chọn wẹ uko vwọ riavwerhen rẹ uyono rẹ Baibol wẹn, ji mrẹ erere norhe.

Ọbuine na da ta: “Sun vwe wan idjerhe rẹ irhi wẹn, kidie ọ vwerhe ovwẹ oma.” (Une 119:35) Wọ sa riavwerhen rẹ uyono rẹ Ota rẹ Ọghẹnẹ. Wo che yono kpahen erọnvwọn buebun ru wọ riẹnre jovwo-o.

Dede nẹ wẹ dia Joshua re vwo mu nẹ o sun ẹgborho rode-e, jẹ wo vwo egbabọse romobọ wẹn. Nabọ mrẹ erere vwo nẹ uyono rẹ Ota rẹ Ọghẹnẹ kerẹ Joshua. Wo de ru ọtiọyen, ku wo se brorhiẹn rẹ aghwanre ji phikparobọ.

DAVWEN IROROẸJẸ NANA

Nẹrhovwo wọ ke tonphiyọ. Baibol na vọnre vẹ iroro rẹ Jihova re siri fikirẹ erhuvwu wẹn. Ọtiọyena, wo de se Baibol na, gba nẹrhovwo rhe Jihova nẹ ọ chọn wẹ uko vwo vwo ẹruọ rọyen ji karophiyọ oborẹ wo seri, rere wọ sa vwọ reyọ vwo ruiruo vwẹ akpeyeren wẹn.—Ẹzra 7:10.
Nọ oma wẹn enọ nana ọke ru wo de se Baibol na yẹrẹ ẹbe efa re vwo yono Baibol: ‘Die yen etinẹ na yono uvwe kpahen Jihova? Mavọ yen o vwo churobọ si uyovwinrota ro suẹn Baibol na? Mavọ yen me sa vwọ vwẹ ẹkpo nana vwọ chọn ihwo uko?’
Roro kokodo kpahen obo wo yono. Dunuji ọmọke krẹn, wo roro kpahen oborẹ wo seri. Mavọ yen ẹkpo nana djobọte vwe wan? Diesorọ mi vwo no ọtiọyen? Idjerhe vọ yen o vwo djobọte obo re phia kẹ vwẹ obuko, obo re phia enẹna, yẹrẹ obo re cha phia vwẹ obaro na? Mavọ yen me sa vwọ vwẹ odjekẹ vẹ uchebro nana vwo ruiruo vwẹ akpeyeren mẹ? (Job 23:5; Une 49:3) Nabọ roro kokodo sẹ wo se dje oboresorọ Jihova vwọ vuẹ ihwo rọyen nẹ ayen kẹnoma kẹ iruemu evo, yẹrẹ obo re sa phia siẹrẹ ohwo rha rhọnvwe ru obo ro fori nẹ o ruru-u.—Urhi 32:28, 29.
Vwẹ ẹwẹn roro oborẹ wo se siẹrẹ ọ da dia ikuegbe. Kerẹ udje, wọ sa vwẹ ẹwẹn roro obo re phiare ọke rẹ iniọvo rẹ Josef vwọ shẹ kẹ ihwo rẹ Ishmael? (Jẹn. 37:18-28) Wọ sa mrẹ ihwo na, nyo eta rayen, ji nyo ọnrhe sansan? Phioma wẹn phiyọ ẹdia rẹ ihwo na. Die yen ayen roro kpahan? Iroro tiọyena cha nẹrhẹ wọ sa nabọ mrẹ erere vwo nẹ uyono wẹn.
Vwẹ ekuakua re vwo ruẹ uyono rẹ ukoko vwọphia vwo ru ehiahiẹ. Yono oborẹ wọ sa vwọ nabọ reyọ ekuakua tiọna ra teyenphia vwẹ ephẹrẹ wẹn yẹrẹ re phi phiyọ jw.org vwo ruiruo. Nokpẹn rẹ ukẹcha mie ihwo efa. Wọ sa vwẹ ẹbe kerẹ Watch Tower Publications Index yẹrẹ Research Guide for Jehovah’s Witnesses vwọ hiẹ guọnọ odjefiotọ ra vwọphia kpahen iyovwinreta buebun vẹ ẹkpo rẹ Baibol sansan. Vwẹ apẹndisi rẹ New World Translation of the Holy Scriptures vwo ruiruo siẹrẹ ọ da herọ vwẹ ephẹrẹ wẹn. Wọ cha mrẹ evuẹ ri shekpahen asan, ọke, ọnyẹ vẹ ovwanvwe, kugbe erọnvwọn efa.
Ru ọdjẹkoko rẹ ẹkpo re ma ghanre rere wọ sa vwọ karophiyọ obo ru wo yonori na. Wọ sa tobọ vuẹ ihwo kpahọn. Ọkiọvo wọ sa mrẹ ẹkpo evo ru wo se vwo ruiruo vwẹ aghwoghwo. Wo de ru enana, ku wọ sa karophiyọ ẹkpo re ma ghanre, je chọn ihwo efa uko vwọ mrẹ erere norhe.