St. Paul, Minnesota, U.S.A. ọyen e de vwiẹ vwẹ, vwẹ ukpe ri 1954. Ọsẹ vẹ oni mẹ je mrẹ ria, avwanre kpo ẹga rẹ Roman Catholic. Mẹvwẹ ọmọ rivẹ vwẹ usun rẹ emọ iyorin. Mi kpo isikuru rẹ Catholic vwẹ ọkiemọ, mẹvwẹ jẹ ọmọ rọ vwẹ ukẹcha kẹ irherẹn na ọke re de ruẹ irueru rẹ ishọshi na. Dedena, mi ghwe vwo erianriẹn ri Baibol na-a. Mi vwo esegbuyota nẹ o vwo Ọghẹnẹ rọ ma erọnvwọn eje, ẹkẹvuọvo, me riẹnre nẹ ishọshi na cha sa cha vwẹ uko vwọ ga-a.

Iseri ri Jihova hworo ẹchẹ mẹ vwẹ ukpe rẹsosuọ me vwọ hẹ William Mitchell College of Law. Me fọrhọn emwa mẹ ọke yena, aye gbe ọshare ri bru vwe rhe na da rhọnvwe nẹ ayen cha rhoma rhivwin rhe. Ayen vwo rhivwin rhe, me da nọ ayen enọ ivẹ: “Diesorọ akpọ vwo yovwẹn irumwemwu nọ ihwo esiri?” vẹ “Mavọ yen e se vwo vwo uvi rẹ omavwerhovwẹn?” Me da reyọ ọbe rẹ The Truth That Leads to Eternal Life kugbe Baibol rẹ New World Translation of the Holy Scriptures kpokpọ ra vwẹ ame rẹ igrini vwo ru opharo rọyen. Me da rhọnvwephiyọ uyono  ri Baibol. Uyono na cha vwẹ uko vwọ riẹn erọnvwọn buebun. Oma vwerhen ovwẹ me vwọ riẹn nẹ Uvie rẹ Ọghẹnẹ ọyen usuon ro che sun akpọ na. Me mrẹvughe nẹ usuon rẹ ihworakpọ shefia, ayen se si ọmiaovwẹ, ojaẹriọ, oshenyẹ vẹ erọnvwọn ebrabra efa no-o.

Me vwomakpahotọ vwẹ ọtonphiyọ rẹ ukpe ri 1982, vwẹ ukpe vuọvo na, mi de bromaphiyame vwẹ ọghwẹkoko rẹ “Kingdom Truth” re ruru vwẹ St. Paul Civic Center. Me rhoma rhivwin kpo St. Paul Civic Center udughwrẹn rọ vwọ kpahọn re si ọdavwini re siẹ tavwen a ke sa dia ilọya vwẹ Minnesota (Minnesota bar exam). Vwẹ ọtonphiyọ rẹ emeranvwe rẹ October, me da rhe riẹn nẹ me wan ọdavwini na, ọtiọyena mi se ruiruo rẹ ilọya.

Vwẹ ọghwẹkoko rẹ “Kingdom Truth,” me da mrẹ oniọvo Mike Richardson rọ ga vwẹ Bẹtẹl rọhẹ Brooklyn. Ọ da vuẹ vwẹ nẹ a vwẹ ọfisi rọvwẹrote eta rẹ irhi mu vwẹ Brooklyn re. Me karophiyọ eta rẹ ohwo rẹ Etiopia re si phiyọ Iruo Rẹ Iyinkọn Na 8:​36, me da nọ oma mẹ ‘Kidie rha djẹ vwẹ mi vwo jẹ ẹwian vwẹ Ọfisi Rọvwẹrote Eta rẹ Urhi na?’ Ọtiọyena, mi de fili ifọmu ri Bẹtẹl.

Ivun miovwo ọsẹ vẹ oni mẹ nẹ mẹvwẹ Oseri ri Jihova. Ọsẹ mẹ da nọ vwẹ kpahen erere ro che te vwe obọ siẹrẹ me da vwẹ erianriẹn mẹ kerẹ ilọya vwọ wian kẹ Watchtower. Me da vuẹ nẹ owian ọphẹ ọyen me cha wian vwẹ oboyin. Me vuẹrẹ nẹ $75 yen a cha kẹ vwẹ kemeranvwe kemeranvwe rọ dia imigho ra kẹ iniọvo re ga vwẹ Bẹtẹl ayen vwọ vwẹrote oma ọke yena.

Kidie nẹ me rhọnvwere nẹ me cha wian vwẹ aguare ọvo jovwore, me rha sa ton iruo ri Bẹtẹl phiyọ ugege yena-a. Ukpe ri 1984 kọyen me vwọ ton ẹga ri Bẹtẹl phiyọ vwẹ Brooklyn, New York. A da tanẹ me wian vwẹ Ọfisi Rọvwẹrote Eta rẹ Urhi. Erianriẹn mi vwo vwẹ aguare me da ka wian jovwo na muegbe mẹ hẹrhẹ obo re cha vwẹ obaro.

A dẹ Stanley Theater rọhẹ Jersey City, New Jersey, vwẹ November 1983. Iniọvo na de si ọbe vwọ yare uphẹn ra vwọ rhuẹrẹ irhikpẹ vẹ ekpọghọ (pipe) rẹ ame djẹ wan vwẹ uwevwin na. Ayen vwọ yanran ra reyọ ẹbe ra vwọ rhọnvwephiyọ ẹrhuẹrẹ rẹ uwevwin na mie igọmẹti, iniọvo na da vuẹ ayen nẹ ayen guọnọ vwẹ Stanley Theater na vwo ru ọguan rẹ Iseri ri Jihova de che ru eghwẹkoko. Ọyena da ghwa ebẹnbẹn ọvo rhe. Urhi rẹ orere na tare nẹ asan rẹ ihwo dia ọvo yen  a bọn iwevwin ẹga phiyọ. Ẹkẹvuọvo, ekogho ra da chueki yen a bọn Stanley Theater na phiyọ, ọtiọyena igọmẹti rha rhọnvwe kẹ ayen ẹbe na-a. Iniọvo na da rhoma bru ayen ra, ẹkẹvuọvo ayen je rhọnvwe-e.

Vwẹ udughwrẹn rẹsosuọ me vwọ rhe Bẹtẹl, ukoko na de mu ota na kpo aguare. Me nabọ riẹn obo re guẹdjọ tiọyena kidie nẹ aguare vuọvo na vwẹ St. Paul, Minnesota yen me da wian ẹgbukpe ivẹ me ke rhe Bẹtẹl. Ọvo usun rẹ ilọya avwanre da tanẹ e ruẹ irueru sansan vwẹ Stanley Theater na jovwo kerẹ isinima vẹ eha rẹ uhworo egangan. Ọtiọyena, die rha suọ a vwọ tanẹ ọ chọre e vwo ru irueru rẹ ẹga vwẹ uwevwin na? Aguare na nabọ fuẹrẹn ota na, ayen de brorhiẹn nẹ Jersey City muọghọ kẹ ugbomọphẹ ẹga rẹ avwanre-e. Aguare na da tanẹ ayen kẹ avwanre ẹbe na. Me da rhe mrẹ oborẹ Jihova womarẹ iruo re ruẹ vwẹ ọfisi rọvwẹrote eta rẹ irhi na ku ebruphiyọ ku owian rẹ uvie na. Oma vwerhen ovwẹ mamọ nẹ mi vwobọ vwọ.

Iniọvo na da ton iruo rẹ ẹrhuẹrẹ rode phiyọ. O te ẹgbukpe ọvo ra vwọ ton iruo rẹ ẹrhuẹrẹ nana phiyọ-ọ, e de ru irueru rẹ ẹdẹ rẹ iniọvo rehẹ iklasi 79 wontọn nu isikuru ri Gilead vwẹ ọguan na vwẹ September 8, 1985. Oma vwerhen ovwẹ mi vwo ruiruo nana kẹ Jihova. Ọ kẹ vwẹ omavwerhovwẹn nọ ọke me vwọ wian kerẹ ilọya me ke rhe Bẹtẹl. Me nama riẹn ọke yena nẹ Jihova cha reyọ ovwẹ vwo guẹdjọ efa buebu-un.

Vwẹ uvwre rẹ 1980 fiẹ 1989, idọktọ vẹ họsipito sansan muọghọ kẹ orhiẹn-ebro rẹ oniọvo rọ dia omiragua rọ tare nẹ e se ọbara phiyọ ọyen oma-a. Ọnana egbabọse rode kẹ eya re mrevun kidie ọke buebun, iguẹdjọ roro nẹ ayen vwo uturhi rẹ ayen vwọ sen ọbara re che se phiyọ ayen oma-a. Iguẹdjọ na tanẹ, e rhe se ọbara phiyọ aye na oma-a, o se ghwu, ọmọ ro che vwiẹ na rhe che vwo oni-i.

Vwẹ December 29, 1988, ọbara buebun hwẹ nẹ oma rẹ oniọvo aye Denise Nicoleau ọke ro vwo vwiẹ ọmọshare rọyen nu. Ọbara rọyen shekpotọ vrẹ 5.0, ọtiọyena idọktọ na da nọ sẹ e se se ọbara phiyọ oma. Ọ da sen. Vwẹ urhiọke rẹ ẹdẹ rọ vwọ kpahọn, họsipito na da ra reyọ ọbe mie oguẹdjọ ọvo, rọ kẹ ayen uturhi re se vwo se ọbara phiyọ oniọvo na oma. Oguẹdjọ na tobọ nyo mie oniọvo na yẹrẹ ọshare rọyen tavwen ọ ke rhọnvwe kẹ họsipito na nẹ e se ọbara phiyọ oma-a.

Vwẹ Friday, December 30, ihwo re wian vwẹ họsipito na de se ọbara phiyọ Oniọvo Nicoleau oma, dede nẹ ọshare vẹ ihwo rẹ orua rọyen ri chidia kẹrẹ vwẹ họsipito na senre. Vwẹ ovwọnvwọn rẹ ẹdẹ yena, e de mu ihwo rẹ  orua rọyen evo kugbe ekpako evo kidie a tare nẹ ayen sogodogo riariẹ ehwa rẹ Oniọvo Nicoleau rere e vwo jẹ ọbara ese phiyọ oma. Vwẹ urhiọke rẹ Saturday December 31, ẹbe re ghwa iyẹnrẹn, itẹlivishọni vẹ iredio sansan vwẹ New York City vẹ ekogho re riarierẹ phiyọ da niyẹnrẹn rẹ iniọvo re muru na.

Vwẹ urhiọke rẹ Monday mi de nene Milton Mollen rọ dia oguẹdjọ rẹ aguare ro kpenu nọ ọrẹsosuọ na ta ota. Me vuẹrẹ obo re phiare na eje, je kanrunumuo nẹ oguẹdjọ na nyo mie oniọvo na vẹ ihwo rẹ orua rọyen tavwen ọ ke ghwobọphiyọ ọbe na-a. Oguẹdjọ Mollen da vuẹ vwẹ nẹ mi rhivwin rhe ọfisi rọyen vwẹ oghẹruvo rere avwanre jiroro kpahen ota na vẹ irhi ri shekpahọn. Philip Brumley rọ dia oniruo rọvwẹrote akon iruo me da wian de nenuvwe kpo ọfisi rẹ oguẹdjọ na vwẹ ovwọnvwọn rẹ ẹdẹ yena. Oguẹdjọ na ji durhie ilọya rẹ họsipito na rhe echidiotọ na. Ivwirhi bruru vwẹ echidiotọ na. O rhi vwo te ẹdia ọvo, Oniọvo Brumley de si eta nana “biko vwẹ ẹwẹn kpotọ” phiyọ ẹmẹbe vwọ kẹ vwẹ. Ọyen uvi rẹ uchebro kidie ophu ghini mu vwe jovwo re, rẹ mi vwo djephia nẹ oborẹ ilọya rẹ họsipito na ruru chọre.

Omarẹ unọke ọvo vwọ wan nu, Oguẹdjọ Mollen da tanẹ ẹdjọ nana yen a cha vwọ tonphiyọ vwẹ ẹdẹ rọ vwọ kpahọn. Avwanre vwo nẹ ọfisi rọyen, Oguẹdjọ Mollen da tanẹ ilọya rẹ họsipito na vwo “oghwa rode vwẹ odẹ rọ cha na.” Ọnana mudiaphiyọ nẹ ọ cha bẹn kẹ rọ vwọ chochọn rẹ họsipito na. Kọ ghwa họhọ nẹ Jihova kẹ vwẹ imuẹro nẹ avwanre cha riase rẹ ẹdjọ na. O gbe vwe unu me vwọ mrẹ oborẹ Jihova reyọ avwanre vwo ru ọhọre rọyen.

Avwanre wian ro ason re vwo muegbe kẹ ẹdjọ na vwẹ urhiọke rẹ ẹdẹ rọ vwọ kpahọn. Asan re de che guẹdjọ na kẹrẹ Bẹtẹl rọhẹ Brooklyn mamọ, ọtiọyena owọ yen buebun rẹ avwanre re wian vwẹ Ọfisi Rọvwẹrote Eta rẹ Urhi na vwọ yan. Iguẹdjọ ẹne na vwọ nabọ nyo ẹdjọ na nu, ayen da tanẹ uturhi ra vwọ kẹ họsipito na nẹ e se ọbara phiyọ oma rẹ oniọvo na chọre. Aguare rode na de bru kẹ oniọvo aye Nicoleau, ayen da je tanẹ ẹkuruemu ra vwọ reyọ uturhi vwẹ obuko rẹ ohwo, jẹ e nyo mie ohwo rẹ ota na shekpahe-en vwọso uturhi rẹ ohwo vwori.

Okriri-i aguare ro me kpenu vwẹ New York da rhọnvwe nẹ Oniọvo Nicoleau vwo uturhi  rọ vwọ sen ọbara re se phiyọ oma. Ọnana ọvo usun rẹ orhiẹn-ebro ẹne ro churobọ si ọbara rẹ aguare ride bruru vwẹ irere sansan vwẹ United States. (Ni ekpeti na “ Ophikparobọ re Vwori Vwẹ Aguare ri Me Kpenu.”) Me je vwomaba ilọya efa vwẹ Bẹtẹl vwo guẹdjọ ri shekpahen ohwo ro fori nẹ ọ yọnrọn ọmọ, orọnvwe-ẹfan, kugbe obo ra reyọ etọ vẹ iwevwin vwo ruiruo wan.

Ọke me ka vwọ mrẹ aye mẹ Dawn, jẹ ọ vẹ ọshare rọyen fan orọnvwe re, ọyen ọvo kọyen vwẹrote emọ rayen erha. Ọ wian ji ruiruo rẹ ọkobaro. Erọnvwọn lọhọ kẹ ọke yena-a, dedena owenvwe ọgangan ro vwo kpahen ẹga ri Jihova jevwe dẹn. Vwẹ 1992, avwanre vwo kpo ọghwẹkoko rẹ “Light Bearers” vwẹ New York City, me da ta ota kẹ. Ẹgbukpe ọvo vwọ wan nu, avwanre da rọvwọn. Aye ro vwo ẹguọnọ ri Jihova rọ nabọ jehwẹ tiọyena ghene okẹ ro nẹ obo ri Jihova rhe. Aye mẹ Dawn vwẹ uyoyovwin hwosa kẹ vwẹ vwẹ ẹdẹ rẹ akpeyeren avwanre eje.—Isẹ 31:12.

Avwanre vwọ rọvwọn, emọ na hẹ ẹgbukpe 11, 13, kugbe 16. Me guọnọ dia omamọ ọsẹ kẹ ayen, ọtiọyena, me da nabọ se erọnvwọn sansan ri shekpahen oborẹ me sa vwọ dia omamọ ọsẹ kẹ emọ aye mẹ na. Ota kanre orọnvwe-e, ẹkẹvuọvo, oma vwerhen ovwẹ nẹ emọ na rhiabọreyọ ovwẹ kerẹ ugbeyan vẹ ọsẹ rẹ ayen vwo ẹguọnọ kpahen. Avwanre dede igbeyan rẹ emọ na cha uwevwin avwanre, oma rayen vwerhen avwanre.

Vwẹ ukpe ri 2013, me vẹ aye mẹ da kua kpo Wisconsin ra vwẹrote ọsẹ mẹ, kugbe oni vẹ ọsẹ rẹ aye mẹ. O gbe vwe unu nẹ ọnana phioba phiyọ ẹga ri Bẹtẹl mẹ-ẹ. E ji durhie uvwe nẹ me rhe vwẹ ukẹcha phia vwẹ eta irhi evo kerẹ oniọvo re durhie rhe owian ri bẹtẹl vwẹ ọmọke.

Vwẹ September 2018, mi de rhi noso nẹ me kẹkẹ upho mẹ mamọ. Idọktọ ro sivwin avwanre da fuẹrẹn oma mẹ na, ẹkẹvuọvo, ọ sa riẹn oboresorọ-ọ. Ọke vwọ yanran re, idọktọ ọfa da tanẹ me ra mrẹ neurologist. Vwẹ January 2019, idọktọ nana da vuẹ vwẹ nẹ ọ sa dia okpọga ọvo re se supranuclear palsy (PSP) yen me họnvwa na.

Ẹdẹ erha vwọ wan nu, re me vwọ heha ọvo ro jevwe mamọ, mi de she vwirhin obọrhen mẹ. Me heha nana riẹnriẹn oma re, me je nabọ tẹn ona rọyen mamọ. Ọtiọyena me da rhe mrẹvughe nẹ ọga nana djobọte oyan mẹ re. Oborẹ ọga na hrabọ ro oma mẹ siẹvuọvo wan gbe vwe unu, ememerha na ke me mrẹ bẹnbẹn me vwọ ta ota, yan, ji rhivwin emu rọ.

Oma vwerhen ovwẹ nẹ me sa reyọ iruo rẹ ilọya mẹ na vwo bicha iruo rẹ Uvie na. Mi ji si iyovwinreta buebun vwẹ imagazini rẹ idọktọ, ilọya vẹ iguẹdjọ seri. Me je vwẹ eta phia vwẹ asan sansan vwẹ akpọ na re me vwọ chochọn rẹ uturhi rẹ idibo ri Jihova rẹ ayen vwọ sen ona rẹ omaesivwon ro churobọ si ọbara e se phiyọ oma. Me sa djẹ eta rehẹ Luk 17:10 koko ọtiọna: ‘Mẹvwẹ odibo ro fi emuọvo-o. Mi ru ẹkẹn iruo ro te vwe.’