1. Vwo nene obo rehẹ 3 Jọn 3, 4, die yen kẹ avwanre omavwerhovwẹn?

WỌ SA vwẹ ẹwẹn roro oborẹ oma vwerhen ọyinkọn Jọn te ọke ro vwo nyo nẹ ihwo rọ wianre gangan vwọ vwẹ ukẹcha kẹ vwọ mrẹ uyota na vughe je nabọ fuevun ga Jihova? Ayen hirharoku ebẹnbẹn sansan, ọtiọyena, Jọn kọ wian gangan rọ vwọ kpuriẹnphiyọ esegbuyota rẹ Inenikristi nana ro niri kerẹ emọ rọyen na vwẹ ọke yena. Eriyin oma je vwerhen avwanre ọke rẹ emọ avwanre yẹrẹ ihwo ra vwẹ ukẹcha kẹ vwọ mrẹ uyota na vughe da vwẹ oma rayen vwọ kpahotọ kẹ Jihova, je ga ọkieje.—Se 3 Jọn 3, 4.

2. Die yen ọdavwẹ rẹ ileta erha rẹ Jọn siri na?

² Vwẹ ukpe rẹ 98 C.E., ọ sa dianẹ Jọn dia kẹrẹ yẹrẹ dia orere rẹ Ẹfesọs. Ọhọhọre nẹ ọke re vwo siobọ no vwo nẹ uwodi rọ hepha vwẹ otọ rẹ ame riariẹphiyọ re se Patmọs nu yen ọ vwọ kua kpo etiyin. Vwẹ uvwre rẹ ọke yena, ẹwẹn ọfuanfon ri Jihova de muo vwo si ileta erha. Ọdavwẹ rẹ ileta yena yen o vwo phi oruru phiyọ Inenikristi re fuevun oma rere ayen vwọ sẹro rẹ esegbuyota rayen kpahen Jesu, ji nene idjerhe rẹ uyota na ọkieje.

3. Enọ vọ yen a cha kpahenphiyọ?

³ Jọn yen ọyinkọn vuọvo ro ghwu chekọ, o ji roro kpahen oborẹ iyono rẹ efian ruẹ vwẹ oma rẹ iniọvo rehẹ ukoko na. * (1 Jọn 2:18, 19, 26) Iyono rẹ efian na tare nẹ ayen riẹn Ọghẹnẹ, ẹkẹvuọvo ayen muọghọ kẹ irhi rọye-en. E je roro kpahen uchebro rẹ Jọn vwọ phia womarẹ ukẹcha rẹ ẹwẹn ọfuanfon na. E che vwo ru ọtiọyena, a cha kpahenphiyọ enọ erha nana: Die yen o mudiaphiyọ e vwo nene idjerhe rẹ uyota na? Ebẹnbẹn vọ yen avwanre hirharokuẹ? Kugbe mavọ yen a sa vwọ cha ohwohwo uko vwọ dia evunrẹ uyota na?

4. Vwo nene obo rehẹ 1 Jọn 2:3-6 vẹ 2 Jọn 4, 6, die yen e che ru e vwo nene idjerhe uyota na?

⁴ E vwo nene idjerhe rẹ uyota na, ofori nẹ a riẹn uyota rọhẹ Ota rẹ Ọghẹnẹ rọ dia Baibol na. Vwọba, ofori nẹ a “yọnrọn [irhi ri Jihova],” kọyen, e ru nene ayen. (Se 1 Jọn 2:3-6; 2 Jọn 4, 6.) Jesu phi udje ọgbagba phiyotọ kpahen ẹyọnrọn rẹ irhi ri Jihova. Ọtiọyena, idjerhe ọghanghanre ọvo rẹ avwanre wan nyẹme ri Jihova yen e vwo nene udje ri Jesu kpẹkpẹkpẹ.—Jọn 8:29; 1 Pita 2:21.

5. Die yen fori nẹ e vwo imuẹro kpahen?

⁵ Re vwo nene idjerhe rẹ uyota na ọkieje, ofori nẹ e vwo imuẹro kokoroko nẹ Jihova yen Ọghẹnẹ rẹ uyota na, nẹ kemu kemu rọ vuẹ avwanre vwevunrẹ Ota rọyen rọ dia Baibol na uyota. Ofori nẹ e ji vwo imuẹro kokoroko nẹ Jesu yen Mesaya re veri na. Nonẹna, ihwo buebun vwo imuẹro nẹ a vwẹ Jesu mu Ovie rẹ Uvie rẹ Ọghẹnẹ re-e. Jọn vwẹ orhọ-esio phia nẹ “otu re phiẹn ihwo buebu” herọ, re sa phiẹn ihwo ri vwo esegbuyota kokoroko kpahen Jihova vẹ Jesu-u. (2 Jọn 7-11) O de si: “Kono ọ vwọrọ ofian na ẹkẹvuọvo jokpa rẹ ohwo rọ senre nẹ Jesu dia Kristi na-a?” (1 Jọn 2:22) Idjerhe vuọvo ra sa vwọ kẹnoma kẹ ophiẹnvwe rayen yen e vwo yono Ota rẹ Ọghẹnẹ. Ọke yena re, ka sa nabọ riẹn Jihova vẹ Jesu. (Jọn 17:3) Idjerhe yena ọvo yen e se vwo vwo imuẹro kokoroko nẹ e vwo uyota na.

6. Ọrhọ yen ebẹnbẹn ọvo rẹ ighene re dia Inenikristi hirharokuẹ?

⁶ E jẹ Inenikristi eje nomaso rere ọkẹre rẹ iyono rẹ ihworakpọ vwo jẹ ayen emuo. (1 Jọn 2:26) Ighene re dia Inenikristi yen fori nẹ i me nomaso kpahen imuoshọ nana. Alexia * rọ dia oniọvo aye rọhẹ ẹgbukpe 25 ro nẹ France rhe da ta: “Ọke me vwọ hẹ isikuru, e yonuvwe nẹ erọnvwọn mamarhe, ọnana da nẹrhẹ mi vwo ẹwẹn ivivẹ kpahen uyota na. Vwẹ ọkievo, mi se iyono na gbuyota. Me da vuẹ oma mẹ nẹ, me cha sa ghwa kpairoro vrẹ obo ri Baibol na yonori re se emu eje rẹ iyono mẹ yonuvwe gbuyota-a.” Alexia de yono ọbe na Life—How Did It Get Here? By Evolution or by Creation? Vwẹ uvwre rẹ udughwrẹn  evo, o rhe vwo ẹwẹn ivivẹ ọfa-a. Alexia da ta: “Mi de rhi vwo imuẹro nẹ eta rehẹ Baibol na uyota. Me je rhe mrẹvughe nẹ mi vwo yeren akpọ nene odjekẹ ri Baibol na cha kẹ vwẹ aghọghọ vẹ ufuoma.”

7. Okeke vọ yen fori nẹ a sen, diesorọ?

⁷ Ofori nẹ Inenikristi eje sen okeke re vwo yeren akpọ rẹ aro ivẹ. Jọn djerephia nẹ e che se nene idjerhe rẹ uyota na je vwẹ ọke vuọvo na vwo yeren akpọ ọfanrhiẹ-ẹn. (1 Jọn 1:6) Avwanre da guọnọ ẹroesiri rẹ Ọghẹnẹ enẹna vẹ ọke rọ cha obaro na, ofori a vwọ karophiyọ nẹ Jihova mrẹ kemu kemu rẹ avwanre ruẹ. Obo ra ta na kọna, ọ da tobọ dianẹ ihwo mrẹ oborẹ avwanre ruẹ vwẹ odjahọ-ọn, Jihova mrẹ.—Hib. 4:13.

8. Die yen fori nẹ a sen?

⁸ Ofori nẹ a sen ẹro rẹ akpọ na vwo ni umwemwu. Ọyinkọn Jọn de si: “Avwanre da ta nẹ avwanre ru umwemwu-u, yẹ avwanre phiẹn oma rẹ avwanre.” (1 Jọn 1:8) Vwẹ ọke ri Jọn, ihwo ri she nẹ ukoko na re vwọ suọ tare nẹ ohwo sa rha vwẹ arogba vwo ruẹ umwemwu, ọ vẹ Ọghẹnẹ mi ji vwo oyerinkugbe. Nonẹna, avwanre je dia ohri rẹ ihwo ri ji vwo iroro rọ họhọ ọyena. Ihwo buebun tanẹ ayen se Ọghẹnẹ gbuyota, ẹkẹvuọvo ayen rhọnvwephiyọ ẹro ro vwo ni umwemwu-u, ma rho vwẹ ota rẹ ehware. O vwo uruemu rẹ ehware evo rẹ Jihova tare nẹ e chọre, ẹkẹvuọvo ihwo nana tanẹ ohwo se ru ayen ọ da dianẹ o jere.

9. Erere vọ yen ighene cha mrẹ siẹrẹ ayen de churumu imuẹro rẹ ayen vwo kpahen Baibol na?

⁹ Ọ sa bẹn kẹ Inenikristi re dia ighene rẹ ayen vwọ vwẹ ẹro abavo vwo ni ehware siẹrẹ ihwo re riariẹ ayen phiyọ vwẹ iruo yẹrẹ isikuru rha rhọnvwephiyọ obo ri Baibol na ta kpahọ-ọn. Ọyena yen obo re phia kẹ Aleksandar. Ọ da ta: “Emetẹ evo vwẹ isikuru mẹ keke uvwe mi vwo nene  ayen bru ehware. Me vwọ sen kẹ ayen, kẹ ayen tanẹ kidie nẹ me rhọnvwe kẹ ayen na-a kọyen mẹvwẹ ọshare ro duẹ ọshare.” Wo de hirharoku oka rẹ edavwini tiọyena, karophiyọ nẹ wo de se churumu imuẹro rẹ wo vwo kpahen Baibol na, wọ cha sẹro rẹ ọghọ wẹn, omakpokpọ, ẹdia iroro wẹn, kugbe oyerinkugbe wẹn vẹ Jihova. Kọke kọke wọ da sen ọdavwini yen ọ cha vwọ lọhọ phiyọ kẹ wẹ wo vwo ru obo ri yovwirin. Wọ me je karophiyọ nẹ Eshu yen ton ẹro ọchọchọ rẹ akpọ na vwo ni ehware phiyọ. Ọtiọyena wọ da sen iroro rẹ akpọ na, kọyen wo ‘phiẹ ohwo umwemwu na kparobọ.’—1 Jọn 2:14.

10. Mavọ yen 1 Jọn 1:9 cha avwanre uko vwọ riẹn nẹ a sa ga Jihova vẹ ẹwẹn obrorhiẹn rọ fonron?

¹⁰ Avwanre rhọnvwere nẹ Jihova vwo uturhi rọ vwọ vuẹ avwanre obo re dia umwemwu. Avwanre je davwẹngba avwanre eje re vwo jẹ umwemwu eruo. Jẹ avwanre de ru umwemwu, e gbe jẹ a fan oruchọ avwanre kẹ Jihova vwẹ ẹrhovwo. (Se 1 Jọn 1:9.) Ọ da dianẹ umwemwu ọgangan yen avwanre ruru, avwanre gba guọnọ ukẹcha mie ekpako na re dia ihwo rẹ Jihova vwo mu nẹ e vwẹrote avwanre. (Jems 5:14-16) Ẹkẹvuọvo, e jẹ ẹwẹn rẹ abe kpahen umwemwu re ru wanre mu avwanre rọ-ọ. Diesorọ? Kidie Ọsẹ avwanre vwẹ Ọmọ rọyen vwo ze izobo rẹ ọtanhirhe rere a sa vwọ mrẹ evwoghwo rẹ imwemwu rẹ avwanre. Jihova tare nẹ ọyen cha vwẹ imwemwu avwanre vwo ghovwo avwanre siẹrẹ e de kurhẹriẹ nẹ otọ evun rhe. Ọtiọyena, o vwo emu vuọvo rọ cha dobọ avwanre ji e vwo jẹ Jihova ẹga vẹ ẹwẹn obrorhiẹn rọ fonro-on.—1 Jọn 2:1, 2, 12; 3:19, 20.

11. Mavọ yen avwanre sa vwọ sẹro rẹ oma avwanre vwo nẹ obọ rẹ iyono re sa nẹrhẹ esegbuyota avwanre dogho?

¹¹ Ofori nẹ a sen iyono rẹ ihwo ri she nẹ  ukoko na re vwọ suọ. Vwo nẹ ọke rẹ ukoko rẹ Inenikristi vwọ tonphiyọ yen Idẹbono vwọ reyọ otu re phiẹn ihwo vwọ kọn ẹwẹn ivivẹ phiyọ udu rẹ idibo rẹ Ọghẹnẹ re fuevun. Ọtiọyena, ofori nẹ avwanre riẹn obo ra sa vwọ vwẹ ọhọ vughe ofẹnẹ rọhẹ uyota kugbe efian. * Ivwighrẹn avwanre sa hrahra efian kpahen avwanre vwẹ intanẹti rere esegbuyota avwanre kpahen Jihova kugbe ẹguọnọ avwanre kẹ iniọvo na vwo dogho. Karophiyọ nẹ Eshu yehẹ obuko rẹ efian na eje!—1 Jọn 4:1, 6; Ẹvwọ. 12:9.

12. Diesorọ o vwo fo nẹ e ru esegbuyota avwanre ganphiyọ?

¹² Rere a sa vwọ sen ẹgbaẹdavwọn rẹ Eshu rọ vwọ nẹrhẹ esegbuyota avwanre dogho, ofori e vwo ru esegbuyota avwanre ganphiyọ kpahen Jesu vẹ ẹdia rọ kare vwẹ ọhọre rẹ Ọghẹnẹ. Ofori a je vwọ vwẹroso odibo rọ fuevun rọ je ghwanre na rẹ Jihova reyọ vwo ruiruo nonẹna. (Mat. 24:45-47) E se ru esegbuyota avwanre ganphiyọ womarẹ eyono rẹ Ota rẹ Ọghẹnẹ. Ọke yena, esegbuyota rẹ avwanre kọ cha họhọ awọ rẹ urhe rọ nabọ ruotọ. Pọl je ta ota rọ họhọ ọyena ọke ro vwo si ọbe rhe ukoko rẹ Kọlose. Ọ da ta: “Kirobo rẹ ovwan reyọ Jesu Kristi Ọrovwohwo na ovwan yan nene ọtiọye, rere te erianriẹn rẹ ovwan te esegbuyota rẹ ovwan ejobi vwọ ghwotọ kokoroko.” (Kọl. 2:6, 7) Avwanre da wian gangan vwo ru esegbuyota avwanre gan, Eshu vẹ otu ri biẹcha cha sa dobọ avwanre ji e vwo jẹ idjerhe rẹ uyota na enene-e.—2 Jọn 8, 9.

13. Die yen fori nẹ e rhẹro rọyen, diesorọ?

¹³ Ofori nẹ avwanre rhẹro rọyen nẹ akpọ na che vwo utuoma kpahen avwanre. (1 Jọn 3:13) Jọn karophiyọ avwanre nẹ “akpọ na ejobi hẹ obọ rẹ ogangan rẹ ohwo umwemwu na.” (1 Jọn 5:19) Eyeren nana vwo kuẹphiyọ na, jẹ ophu rẹ Eshu rha ganphiyọ. (Ẹvwọ. 12:12) Ọ dia ona rẹ ufi ọfanrhiẹn yẹrẹ efian rẹ ihwo ri she nẹ ukoko na re vwọ suọ ọvo yen ọ reyọ vwọsua avwanre-e. Ọ je vwọso avwanre phiọgun womarẹ omukpahen ọgangan. Eshu riẹnre nẹ ọmọke krẹn yen chekọ kẹ rọ vwọ dobọ rẹ iruo aghwoghwo na ji yẹrẹ guọghọ esegbuyota avwanre. Ọtiọyena, o rhe gbe avwanre unu nẹ a dobọ rẹ iruo avwanre evo yẹrẹ eje ji vwẹ ẹkuotọ evo-o. Dedena, iniọvo avwanre ji chirakon vwẹ ẹkuotọ tiọyena. Ayen djephia nẹ o toro oborẹ Eshu ru avwanre-e, avwanre sa sẹro evun ẹfuọn avwanre!

14. Ọrhọ yen idjerhe ọvo ra sa vwọ cha iniọvo avwanre uko vwọ dia evunrẹ uyota na?

¹⁴ A vwọ cha iniọvo avwanre uko vwọ dia evunrẹ uyota na, ofori nẹ e dje erorokẹ phia. (1 Jọn 3:10, 11, 16-18) Ọ dia ọke rẹ erọnvwọn vwo yovwin ọvo yen e vwo dje ẹguọnọ kẹ ohwohwo-o, e jẹ e ji dje ẹguọnọ phia vwẹ ọke rẹ ebẹnbẹn. Kerẹ udje, wọ riẹn ohwo ọvo rẹ ohwo ro vwo ẹguọnọ kpahen ghwuru rọ guọnọ uchebro yẹrẹ ukẹcha? Wo nyori nẹ oghwọrọ phia kẹ iniọvo evo, nẹ ayen guọnọ ukẹcha ra vwọ rhoma bọn Eguan Ruvie yẹrẹ iwevwin rayen? Idjerhe rọ ma rho re se vwo dje ẹguọnọ vẹ erorokẹ phia kẹ iniọvo avwanre yen womarẹ obo re ruẹ, ọ dia womarẹ ota rẹ unu ọvo-o.

15. Vwo nene obo rehẹ 1 Jọn 4:7, 8, die yen fori nẹ avwanre ru?

¹⁵ Avwanre de dje ẹguọnọ phia kẹ ohwohwo, jẹ a vwẹrokere Ọsẹ avwanre rọhẹ obodjuvwu. (Se 1 Jọn 4:7, 8.) Idjerhe  ọghanghanre ọvo avwanre vwo dje ẹguọnọ phia yen a vwọ reyọ vwo ghovwo ohwohwo. Kerẹ udje, ohwo ọvo se gbe avwanre ku, ẹkẹvuọvo o mi yovwunu. Avwanre dje ẹguọnọ phia womarẹ a vwọ reyọ vwo ghovwo je kpairoro vrẹ ogbeku na. (Kọl. 3:13) Oniọvo ọshare ọvo re se Aldo hirharoku ọdavwini nana ọke rẹ oniọvo ọfa rọ nabọ muọghọ kẹ vwọ ta orharhe ota kpahen ihwo rẹ asan rẹ ekpuyovwin rọyen nurhe. Aldo da ta: “Ke me nẹrhovwo ọkieje nẹ Jihova cha vwẹ uko mi vwo jẹ orharhe ẹwẹn evwo kpahen oniọvo na.” Ẹkẹvuọvo, Aldo ru emu ọfa. Ọ vuẹ oniọvo na nẹ o nene ọyen wian vwẹ iruo aghwoghwo na. Ayen vwọ hẹ aghwoghwo, Aldo da vuẹ oniọvo na oborẹ ota rọ tare na darọ te. Aldo da ta: “Oniọvo na vwo nyo oborẹ orharhe ota rọ tare na da vwẹ te, o de yovwunu kẹ vwẹ. Upho ro vwo yovwunu na ghwe djephia nẹ ọ viẹ diekpọvwẹ kpahen obo rọ tare na. Avwanre da rhoma rhe dia uvi rẹ igbeyan.”

16-17. Die yen fori nẹ e brorhiẹn re vwo ru?

¹⁶ Ọyinkọn Jọn vwo ẹguọnọ rẹ iniọvo rọyen mamọ, ọ je guọnọ nẹ esegbuyota rayen ghwotọ. Ẹguọnọ vẹ ọdavwẹ ro vwo kpahen ayen nabọ teyenphia vwẹ uchebro rọ vwọ kẹ ayen vwẹ ileta erha ro siri na. Ọ vwerhen oma mamọ ra vwọ riẹn nẹ eya vẹ eshare ri vwo ẹguọnọ vẹ ọdavwẹ kerẹ Jọn yen che nene Kristi sun vwẹ odjuvwu!—1 Jọn 2:27.

¹⁷ E jẹ e roro kokodo kpahen uchebro re yono kpahen na. E jẹ e brorhiẹn re vwo nene idjerhe rẹ uyota na womarẹ a vwọ kerhọ ri Jihova vwẹ akpeyeren avwanre eje. Yono Ota rọyen, wo ji se obo wo yonori gbuyota. Bọn esegbuyota wẹn kpahen Jesu ganphiyọ. Sen iyono rẹ ihworakpọ vẹ e rẹ ihwo ri she nẹ ukoko na re vwọ suọ. Sen okeke rẹ wo vwo yeren akpọ rẹ aro ivẹ vẹ ọ rẹ wo vwo ru umwemwu. Yeren akpọ vwo nene iwan ri Jihova. E jẹ a cha ohwohwo uko vwọ dia evunrẹ uyota na womarẹ a vwọ reyọ vwo ghovwo ihwo ri gbe avwanre ku, je vwẹ ukẹcha kẹ otu re guọnọ ukẹcha. E de ru ọtiọyen, o toro ebẹnbẹn re hirharokuẹ-ẹ, e che nene idjerhe rẹ uyota na ọkieje.