1. Die yen Jihova ruru ọke rẹ Adam vẹ Ivi ghwe vwo ru umwemwu nu? (Jẹnẹsis 3:15)

 ADAM vẹ Ivi ghwe vwo ru umwemwu nu, o rhe kri-i, Jihova da vwẹ iphiẹrophiyọ vwọ kẹ uvwiẹ ri che nẹ oma rayen rhe womarẹ aroẹmrẹ ọghanghanre ọvo. A niyẹnrẹn rẹ eta nana phiyọ Jẹnẹsis 3:15.—Se.

2. Die yen nẹrhẹ aroẹmrẹ nana dia obo re ghanre?

² Aroẹmrẹ nana vwomaphia vwẹ ọbe rẹsosuọ ri Baibol na. Ẹkẹvuọvo, ẹbe ri chekọ eje vwẹ Baibol na vwẹ idjerhe sansan vwo churobọ si aroẹmrẹ nana. Kerẹ ufi ra vwọ gba ibieghan buebun koko o mi hirhephiyọ ekrun rẹ aghan ye, ọtiọyen aroẹmrẹ rọhẹ Jẹnẹsis 3:15 ji churu evuẹ rẹ ẹbe ri Baibol na eje si ohwohwo vwo hirhephiyọ ovuẹ ọvo rọ dia, Ọghẹnẹ che ji Osivwin ọvo rhe, rhe ghwọrọ Idẹbono kugbe otu umwemwu re vẹ ọyen gba herọ. * Ọnana cha dia uvi rẹ ebruphiyọ dẹn vwọ kẹ ihwo ri vwo ẹguọnọ ri Jihova.

3. Die yen a cha fuẹrẹn vwẹ uyono nana?

³ Vwẹ uyono nana, a cha kpahenphiyọ enọ nana ri shekpahen aroẹmrẹ rọhẹ Jẹnẹsis 3:15 na: Ihwo vọ yen e djunute vwẹ aroẹmrẹ na? Mavọ yen aroẹmrẹ na rugba wan? Idjerhe vọ yen o vwo fierere kẹ avwanre?

4. Ono yen “ọrọdekọ na,” kẹ mavọ yen avwanre ru riẹn?

⁴ Enana yen ihwo re djunute vwẹ aroẹmrẹ rọhẹ Jẹnẹsis 3:14, 15 na: “Ọrọdekọ” ọvo, ‘ọmọ’ rẹ ọrọdekọ na, “aye na,” kugbe ‘ọmọ’ rẹ aye na. Baibol na cha avwanre uko vwo vwo ẹruọ rẹ oborẹ ayen ọvuọvo mudiaphiyọ. * E jẹ a ka vwẹ ọrọdekọ na vwọ tuọnphiyọ. Ọrọdekọ ghevweghe che se vwo ẹruọ rẹ oborẹ Jihova tare vwẹ ogba rẹ Idẹn na-a. Ọtiọyena, aphro herọ-ọ nẹ ọvo usun rẹ emama rẹ Ọghẹnẹ ro vwo aghwanre yen Jihova ta eta nana vwọ kẹ. Ono yen ohwo yena? Ẹvwọphia 12:9 nabọ dje oka rẹ ohwo rẹ ọrọdekọ na hepha kẹ avwanre. Ẹkpo yena djere fiotọ nẹ “ọrọdekọ rẹ awanre na” yen Eshu rọ dia Idẹbono na. Ẹkẹvuọvo, amono ke yen rha hẹ ọmọ rẹ ọrọdekọ na?

5. Amono yen ọmọ rẹ ọrọdekọ na?

⁵ Baibol na da reyọ ọmọ vwo ruiruo vwẹ idjerhe rẹ udje, jẹ ọ ta ota kpahen ihwo ri roro ji ruẹ họhọ ohwo rẹ ayen vwo ru ọsẹ. Ọtiọyena, ọmọ rẹ ọrọdekọ na yehẹ emekashe kugbe ihworakpọ re vwọso Jihova kugbe ihwo rọyen. Enana yen emekashe ri gbobọnyẹ ewian ra vwọ kẹ ayen vwẹ odjuvwu vwẹ ọke ri Noa, kugbe ihworakpọ re dia irumwemwu re vwẹrokere ọsẹ rayen rọ dia Idẹbono.—Jẹn. 6:1, 2; Jọn 8:44; 1 Jọn 5:19; Jud 6.

6. Diesorọ a sa vwọ tanẹ ọ dia Ivi yen aye na-a?

⁶ Enẹna, e gbe ja ta ota kpahen aye na. Aye na cha sa dia Ivi-i. Diesorọ? Roro kpahen emu ọvo rọ sorọ ra vwọ ta ọtiọyen. Aroẹmrẹ na tare nẹ ọmọ rẹ aye na cha “ghwiẹ” uyovwin rẹ ọrọdekọ na. Kirobo ra ta ota kpahen re na, ọrọdekọ na yen Eshu rọ dia amakashe umwemwu na, o vwo ọvuọvo vwẹ usun rẹ emọ rẹ Ivi rọ gbare yẹrẹ ro vwo ẹgba  rọ sa vwọ ghwiẹ Eshu uyovwi-in. Kẹ, mavọ yen a sa vwọ ghwọrọ Eshu?

7. Kirobo rẹ Ẹvwọphia 12:1, 2, 5, 10 djere, ono yen aye na re djunute vwẹ Jẹnẹsis 3:15?

⁷ A nabọ dje aye na rọhẹ Jẹnẹsis 3:15 na fiotọ vwẹ ọbe rọ koba vwẹ Baibol na. (Se Ẹvwọphia 12:1, 2, 5, 10.) Ọnana dia aye ghevweghe-e! Aye na mu awọ kpahen emeranvwe, ọ da rha vwẹ erhu vẹ isio 12 vwo tughẹ. Aye na vwiẹ ọmọ ra je mrẹ ọkpọ rọyen dẹvo-o, rọ dia Uvie rẹ Ọghẹnẹ. Odjuvwu yen Uvie na hepha, kọyen odjuvwu yen aye na je hepha. A vwẹ aye nana vwo dje emekashe re fuevun re dia ẹbẹre ọvo rẹ ukoko rẹ Ọghẹnẹ rọhẹ odjuvwu.—Gal. 4:26.

8. Ono yen ẹbẹre rẹsosuọ rẹ ọmọ rẹ aye na, kẹ ọke vọ yen ọ rhe vwọ dia ọtiọyen? (Jẹnẹsis 22:15-18)

⁸ Baibol na je chọn avwanre uko vwo vughe ẹbẹre rẹsosuọ rẹ ọmọ rẹ aye na. Uvwiẹ rẹ Ebraham yen o che nurhe. (Se Jẹnẹsis 22:15-18.) Kirobo ra mraro rọyen phiyotọ, uvwiẹ rẹ ọshare nana rọ fuevun na yen Jesu ghini nurhe. (Luk 3:23, 34) Ẹkẹvuọvo, ọmọ nana che vwo ẹgba vrẹ ohworakpọ kidie ọyen cha ghwọrọ Eshu rọ dia Idẹbono na no riẹriẹriẹ. Ọtiọyena, Jesu vwo te omarẹ ẹgbukpe 30 re, Ọghẹnẹ da reyọ ẹwẹn ọfuanfon rọyen vwọ jẹreyọ kerẹ Ọmọ rọyen. Ghwe vwo nẹ ọke ra vwọ jẹreyọ, Jesu da rhe dia ẹbẹre rẹsosuọ rẹ ọmọ rẹ aye na. (Gal. 3:16) Jesu vwo ghwu, a je vwọ rhọnvwọ nẹ ushi nu, Ọghẹnẹ da “vwẹ urinrin vẹ ọghọ vwo tughẹ,” je kẹ “ogangan ejobi re hẹ odjuvwu vẹ akpọ,” kugbe ogangan rọ vwọ “guọghọ iruo rẹ Idẹbono.”—Hib. 2:7; Mat. 28:18; 1 Jọn 3:8.

9-10. (a) Vwọ vrẹ Jesu, ihwo vọ yen jehẹ ọmọ rẹ aye na, kẹ ọke vọ yen ayen rhe vwọ dia ẹbẹre rivẹ rẹ ọmọ rẹ aye na? (b) Die yen a cha ta ota kpahen enẹna?

⁹ Ẹkẹvuọvo, vwọ vrẹ Jesu, ọmọ na ji vwo ẹbẹre ọfa. Ọyinkọn Pọl djunute ẹbẹre nana ọke rọ vwọ ta ota vwọ kẹ ihwo ri Ju kugbe Igiye re rhe dia Inenikristi ra jẹreyọ: “Ọ da dianẹ ovwan ọ ri Kristi, yẹ ovwan kẹ uvwiẹ rẹ Ebraham ọriuku kirobo rẹ ive epha.” (Gal. 3:28, 29) Ọke rẹ Jihova da reyọ ẹwẹn ọfuanfon rọyen vwọ jẹ Onenikristi reyọ, ohwo yena kọ dia usun rẹ ẹbẹre rivẹ rẹ ọmọ rẹ aye na. Ọtiọyena, ọmọ rẹ aye na yen Jesu Kristi kugbe ihwo 144,000 ri che nene sun na. (Ẹvwọ. 14:1) Ayen eje yen dje uruemu ri Jihova Ọghẹnẹ rọ dia Ọsẹ rayen na phia.

¹⁰ Enẹna re vwo vughe ihwo re djunute vwẹ Jẹnẹsis 3:15 re na, e gbe ja rhoma fuẹrẹn oborẹ Jihova ruẹ, ro vwo ru aroẹmrẹ nana gba kugbe obo ro vwo fierere kẹ avwanre.

11. Idjerhe vọ yen a vwọ rhọvwọn “uchukowọ” rẹ ọmọ rẹ aye na?

¹¹ Vwo nene aroẹmrẹ rọhẹ Jẹnẹsis 3:15, ọrọdekọ na cha rhọvwọn “uchukowọ” rẹ ọmọ rẹ aye na. Ọyena rugba ọke rẹ Eshu vwọ reyọ ihwo ri Ju vẹ ihwo ri Rom vwọ teyen Ọmọ rẹ Ọghẹnẹ hwe. (Luk 23:13, 20-24) Kirobo rẹ ohwo da woma vwẹ uchukowọ kọ bẹn rọ vwọ yan ye, ọtiọyen ọ je hepha nẹ Jesu se ru emu vuọvo vwẹ ọsoso ẹdẹ erha rọ vwọ hẹ evunrẹ ushi na-a.—Mat. 16:21.

12. Ọke vọ kugbe idjerhe vọ yen a cha vwọ ghwiẹ ọrọdekọ na vwẹ uyovwin?

¹² Rere aroẹmrẹ rọhẹ Jẹnẹsis 3:15 se vwo rugba, Jesu je cha daji evunrẹ ushi-i. Diesorọ a vwọ ta ọtiọyen? Kidie kirobo rẹ aroẹmrẹ na tare, ọmọ rẹ aye na cha ghwiẹ ọrọdekọ na vwẹ uyovwin. Ọnana mudiaphiyọ nẹ Jesu che vrẹnushi. Ọtiọyen ọ ghene phia! Ẹdẹ erha vwọ wan ro vwo ghwu nu, a da kpare Jesu vrẹnushi kerẹ ohwo rẹ ẹwẹn ro jeghwo vwo  kpo odjuvwu. Ọke rẹ Ọghẹnẹ bruru de te, Jesu kọ cha ghwọrọ Eshu no kakare. (Hib. 2:14) Jesu kugbe ihwo ri che nene sun cha ghwọrọ ivwighrẹn rẹ Ọghẹnẹ eje re dia emọ rẹ ọrọdekọ na no kakare.—Ẹvwọ. 17:14; 20:4, 10. *

13. Idjerhe vọ yen avwanre vwọ mrẹ erere vwo nẹ orugba rẹ aroẹmrẹ nana cha?

¹³ Wọ da dia odibo rẹ Ọghẹnẹ rọ vwomakpahotọ kẹ, jẹ wọ mrẹ erere vwo nẹ orugba rẹ aroẹmrẹ nana cha. Jesu ọyen ohworakpọ ọke rọ vwọ hẹ otọrakpọ na. Ọ nabọ vwẹrokere uruemu rẹ Ọsẹ rọyen gbagba. (Jọn 14:9) Ọtiọyena, avwanre de yono kpahen Jesu, ka sa riẹn ji vwo ẹguọnọ ri Jihova Ọghẹnẹ. Avwanre je mrẹ erere vwo nẹ iyono vẹ odjekẹ, kugbe oborẹ Jesu sun ukoko rẹ Inenikristi wan nonẹna. O yono avwanre oborẹ avwanre yeren akpọ wan rere a sa vwọ mrẹ aroesiri ri Jihova. Ughwu yẹrẹ ẹrhọvwọn rẹ uchukowọ ri Jesu ji fierere kẹ avwanre eje. Vwẹ idjerhe vọ? A vwọ kpare Jesu nẹ ughwu nu, Jihova de rhiabọreyọ izobo ọgbagba rọyen, rọ “hworhẹ avwanre nẹ umwemwu ejobi.”—1 Jọn 1:7.

14. Mavọ yen avwanre ru riẹn nẹ ọ dia ugege rẹ Jihova vwọ ta ota rẹ aroẹmrẹ rọ tare vwẹ ogba rẹ Idẹn na yen o vwo rugba-a? Djekpahọn

¹⁴ Eta rẹ Jihova tare vwẹ aroẹmrẹ rọ vwọphia vwẹ ogba rẹ Idẹn na, djerephia nẹ ọ dia ọke yena yen aroẹmrẹ na che vwo rugba-a. Ọ cha reyọ ọke tavwen ọmọ rẹ aye na ke vwomaphia, Idẹbono ki koko ihwo rọyen, eghrẹn ke je dia vwẹ uvwre rẹ ẹko rẹ ihwo ivẹ na. E de vwo ẹruọ rẹ aroẹmrẹ nana o che fierere kẹ avwanre, kidie o si avwanre orhọ nẹ akpọ nana rẹ Eshu suẹn na che vwo utuoma kpahen ihwo re ga Jihova. Jesu je vwẹ ọkpọ rẹ orhọesio tiọyena vwọ kẹ idibo rọyen. (Mak 13:13; Jọn 17:14) Vwọrẹ uyota, avwanre mrẹ orugba rẹ ẹbẹre nana rẹ aroẹmrẹ na re, ma rho kẹ uvwre rẹ ikpe 100 re wanre na. Vwẹ idjerhe vọ?

15. Diesorọ utuoma rẹ ihworakpọ na vwo kpahen ọmọ rẹ aye na vwọ rhoma ganphiyọ vrẹ obo ri jovwo, kẹ diesorọ oshọ rẹ Eshu vwo jẹ avwanre emuo?

¹⁵ A ghwa vwọ vwẹ Jesu mu Ovie rẹ Uvie rẹ Ọghẹnẹ vwẹ 1914 nu, a da djẹ Eshu nẹ odjuvwu rhe. Enẹna, ọ hẹ otọrakpọ na rọ vwọ hẹrhẹ oghwọrọ rọyen. (Ẹvwọ. 12:9, 12) Rhanvwe ọke yena rhe, o mu abọ phiyotọ-ọ. Ophu muẹ Eshu djọghrọ djọghrọ enẹna, ọ je vwọsua ihwo rẹ Ọghẹnẹ. (Ẹvwọ. 12:13, 17) Ọnana yen sorọ utuoma rẹ akpọ rẹ Eshu na vwo kpahen avwanre vwọ ganphiyọ ganphiyọ. Dedena, ofori nẹ oshọ rẹ Eshu vẹ ihwo rọyen mu avwanre-e. Ukperẹ ọtiọyen, avwanre se vwo ọkpọ rẹ imuẹro ro rhe ọyinkọn Pọl ro vwo si nẹ, “ọ da dianẹ Ọghẹnẹ vẹ avwanre obọ, kono se mukpahe avwanre?” (Rom 8:31) Kidie nẹ aroẹmrẹ rọhẹ Jẹnẹsis 3:15 na joma rugba re na, ọnana sa nẹrhẹ avwanre vwo imuẹro kokoroko kpahen Jihova.

16-18. Erere vọ yen Curtis, Ursula, kugbe Jessica mrẹre kidie nẹ ayen vwo ẹruọ rẹ aroẹmrẹ rọhẹ Jẹnẹsis 3:15?

¹⁶ Ive ri Jihova rọhẹ Jẹnẹsis 3:15 sa chọn avwanre uko vwo yerin ghene ebẹnbẹn rẹ akpeyeren. Curtis, rọ dia imishọnare rọ ga vwẹ Guam da ta: “Ọkievo, edavwini vẹ ofudjevwe ri mi hirharokuẹ vwẹ akpeyeren nẹrhẹ ọ bẹn kẹ vwẹ me vwọ fuevun kẹ Jihova. Ẹkẹvuọvo, mi vwo roro kpahen aroẹmrẹ rọhẹ Jẹnẹsis 3:15, ọ chọn vwẹ uko vwọ sẹro rẹ ẹroẹvwọsuọ ri mi vwo kpahen Ọsẹ mẹ rọhẹ odjuvwu.” Curtis rhẹro rẹ ẹdẹ rẹ Jihova  che vwo phioba phiyọ ebẹnbẹn rẹ avwanre eje.

¹⁷ Oniọvo aye re se Ursula rọ dia Bavaria vwẹ Germany tare nẹ, ẹruọ rẹ aroẹmrẹ rọhẹ Jẹnẹsis 3:15 rẹ ọyen vwori chọn ọyen uko vwo vwo imuẹro nẹ ẹwẹn ọfuanfon rẹ Ọghẹnẹ yen e vwo si Baibol na. Ọ mrẹ oborẹ aroẹmrẹ ri chekọ vwẹ Baibol na eje vwo churobọ si aroẹmrẹ nana, ọnana tere ẹwẹn mamọ. Ọ da je ta: “O te vwe ẹwẹn mamọ me vwọ riẹn nẹ Jihova jowọ ugege yena rere ihworakpọ se vwo vwo iphiẹrophiyọ.”

¹⁸ Jessica ro nẹ Micronesia rhe da ta: “Me je karophiyọ oborẹ oma ru vwe ọke rẹsosuọ me vwọ mrẹ uyota na vughe! Aroẹmrẹ rọhẹ Jẹnẹsis 3:15 ruẹgba re. Ọ chọn vwẹ uko vwọ karophiyọ nẹ ọ dia oka rẹ akpọ rẹ Jihova guọnọ kẹ avwanre yen avwanre yerẹn nonẹna-a. Aroẹmrẹ nana ji ru esegbuyota mẹ ganphiyọ nẹ, ra vwọ ga Jihova nẹrhẹ e yeren omamọ akpọ enẹna, kugbe uvi rẹ akpeyeren vwẹ obaro na.”

19. Diesorọ avwanre vwo vwo imuẹro nẹ ẹbẹre rọ koba rẹ aroẹmrẹ na ji che rugba?

¹⁹ Kirobo re yono cha re na, aroẹmrẹ rọhẹ Jẹnẹsis 3:15 ruẹgba re. A nabọ vughe ọmọ rẹ aye na kugbe ọmọ rẹ ọrọdekọ na fiotọ re. Jesu rọ dia ẹbẹre rẹsosuọ rẹ ọmọ rẹ aye na ghwuru, o de ji vrẹnushi, asaọkiephana ọyen Ovie ro vwo ẹgba, ro jeghwo vwẹ odjuvwu. Enẹna, ẹsanọ rẹ ihwo re dia ẹbẹre rivẹ rẹ ọmọ rẹ aye na joma gba re. Kidie nẹ ẹbẹre rẹsosuọ rẹ aroẹmrẹ na rugba re, ọnana kọ nẹrhẹ avwanre vwo imuẹro nẹ ẹbẹre rọ koba rẹ aroẹmrẹ na rọ dia ẹghwiẹ rẹ uyovwin rẹ ọrọdekọ na ji che rugba. Mavọ yen oma cha vwerhen idibo rẹ Ọghẹnẹ te siẹrẹ a da ghwọrọ Eshu no nu! Bẹsiẹ ọke yena ki te, wo jẹ oma rhọ wẹ-ẹ. Kidie Ọghẹnẹ rẹ avwanre ku ohwo phiyotọ-ọ. Ọ cha womarẹ ọmọ rẹ aye na vwo ku ebruphiyọ buebun ku “ẹgborho rẹ akpọ na ejobi.”—Jẹn. 22:18.