Jesu yono ihwo nẹ ayen yerin kugbe vwọrẹ ufuoma. Jẹ, ọke ọvo vwo te, ọ da vuẹ iyinkọn rọyen: “We roro ni mi rhi phi ufuoma phihọ akpọ-ọ, me vwẹ ufuoma rhe-e, ẹkẹvuọvo ọlọkọ. Me rhere rhi phi ohẹriẹ phihọ uvwre rẹ ọsẹ vẹ ọmọ, ọmọtẹ vẹ oni rọye, kugbe aye vẹ oniorọvwe rọye.” (Mat. 10:34, 35) Die yen otọ rẹ eta ri Jesu nana?

Ọ dia Jesu guọnọ phi ohẹriẹ phiyọ orua-a, ẹkẹvuọvo, ọ riẹnre nẹ iyono rọyen cha so ohẹriẹ vwẹ erua evo. Ọtiọyena, ofori nẹ ihwo ri vwo owenvwe rẹ ayen vwọ dia idibo ri Kristi ri ji bromaphiyame riẹn nẹ oma cha vwerhen ihwo rẹ orua rayen evo kpahen orhiẹn rayen na-a. Ẹvwọsuọ ro nẹ obọ rẹ ọrivẹ rẹ orọnvwe yẹrẹ ihwo rẹ orua efa re dia Iseri-i cha, sa nẹrhẹ ọ dia bẹnbẹn a vwọ fuevun nene iyono ri Kristi na.

Baibol na vuẹ Inenikristi nẹ ayen “vẹ ohwo ọvuọvo ghwọ-ọ.” (Rom 12:18) Ẹkẹvuọvo, iyono ri Jesu sa dia kerẹ “ọlọkọ” vwẹ erua evo. Emu tiọyena sa vwomaphia siẹrẹ ihwo evo vwẹ orua na da vwọsua ohwo ọvo ro rhiabọreyọ iyono ri Jesu vwẹ orua na. Vwẹ ẹdia nana, ihwo rẹ orua na, kọyen ihwo rẹ evwruwevwin rẹ ohwo na me rhe vwẹ “eghrẹ” vwọso ọ ro yono Baibol na.—Mat. 10:36.

Ọkievo idibo ri Jesu ri nene ihwo rẹ orua ri kpo ẹga sansan dia se hirharokuẹ egbabọse sẹ ayen cha fuevun kẹ Jihova vẹ Jesu yẹrẹ ihwo rẹ orua rayen. Kerẹ udje, ihwo rẹ orua re ga Jihova-a sa vuẹ ayen nẹ ayen nene ayen ru erẹ rẹ ẹga rayen. Siẹrẹ a da davwen ayen ni vwẹ idjerhe tiọna, ayen ki che brorhiẹn rẹ ohwo rẹ ayen che nyẹme rọyen. Jesu da ta: “Ohwo rọ guọnọ ọsẹ eyẹ oni nọ vwẹ, yo fo vwe-e.” (Mat. 10:37) Vwọrẹ uyota, ọ dia Jesu tanẹ ohwo che siobọ rẹ ẹguọnọ ro vwo kpahen ọsẹ vẹ oni rọyen kpotọ tavwen o ki muwan ro vwo nene ọye-en. Ukperẹ ọtiọyen, ọ karunumuẹ ra vwọ vwẹ ẹro rẹ abavo vwo nẹ emu. Ọ da tobọ dianẹ ihwo rẹ orua re dia Iseri-i vwọsua ẹga rẹ avwanre vwọ kẹ Jihova, e ji che rhe vwo ẹguọnọ rayen, ẹkẹvuọvo, e jẹ a je mrẹvughe nẹ ẹguọnọ re vwo kpahen Ọghẹnẹ yen ma kenu kẹ avwanre.

Aphro herọ-ọ, omukpahen ro nẹ orua cha ghene da ohwo mamọ. Dedena, idibo ri Jesu je karophiyọ eta rọyen nana: “Ohwo ro rhe mu agbagba rọye [“urhe rẹ oja rọyen,” NW ] ro de nene uvwe-e, yẹ ohwo yena se fo vwe-e.” (Mat. 10:38) Ọtiọyena, Inenikristi ni ẹvwọsuọ ro nẹ obọ rẹ ihwo rẹ orua cha kerẹ usun rẹ oja ro fori nẹ idibo ri Kristi chirakon rọyen. Vwẹ ọke vuọvo na, ayen je rhẹro rọyen nẹ omamọ rẹ uruemu rẹ ayen djephia ji se mu ihwo rẹ orua re dia Iseri-i vwo siobọ rẹ omukpahen rayen na kpotọ ji rhi vwo owenvwe rẹ ayen vwo yono Biabol na.—1 Pita 3:1, 2.