DEVID yen ta eta yena ọke ro vwo jirẹ aye ọvo rọ mrẹre. Odẹ rọyen Abigail. Die yen mu Devid vwo jiro, erere vọ yen avwanre sa mrẹ nẹ udje rẹ aye na rhe?

Ọke rẹ Devid vwọ djẹ kẹ Ovie Sọl yen ọ vwọ mrẹ aye nana. Abigail, ọyen aye rẹ Nabal rọ dia ọdafe ro vwo ichuru buebun. Nabal dia ubrakpọ rẹ igbenu hepha vwẹ Juda. Devid vẹ ihwo rọyen “họhọ igbẹhẹ” kẹ isuigodẹ rẹ Nabal vẹ ichuru rọyen. Ọke vwọ yanran na, Devid de ji ihwo rọyen evo bru Nabal ra, rere ọ vwẹ ‘kemu kemu rẹ obọ rọyen teri ejobi’ vwọ kẹ ayen. (1 Sam. 25:8, 15, 16) A cha sa tanẹ oyare yena chọre-e kidie Devid vẹ ihwo rọyen nabọ vwẹ ukẹcha kẹ Nabal.

Ẹkẹvuọvo, Nabal ru nene odẹ rọyen ro mudiaphiyọ “Ughẹghẹ” yẹrẹ “Ẹkpa.” Ọ da van ku eshare na ukperẹ o vwo ru oborẹ ayen nọ mie. Ophu de rhi mu Devid, o de muegbe ro vwo gboja kẹ Nabal vẹ evwruwevwin rọyen fikirẹ aroeyivwon rọyen vẹ uruemu rẹ ẹkpa ro djephia.—1 Sam. 25:2-13, 21, 22.

Kiridie nẹ ọ riẹn emu rẹ imuoshọ ro se nẹ obo re phiare na rhe, Abigail de fiudugberi ru obo ri fori. Ọ da rẹ Devid nẹ ọ kpairoro vrẹ obo rọ guọnọ ruẹ na, fikirẹ oyerinkugbe rọyen vẹ Jihova. O ji mu emu rhe Devid rọ dia ohwo rọ cha reyọ ẹdia rẹ Sọl. Devid da tanẹ Jihova yen ji aye nana rhe, rhe da ọyen ji, ro vwo jẹ abe rẹ ọbara ẹriọ. Devid da vuẹ Abigail nẹ, “Ebruba kẹ ọhọ wẹn, ebruba kẹ wẹn, rọ da vwẹ obọ ji mi vwo jẹ abe rẹ ọbara ẹriọ nonẹ.”—1 Sam. 25:18, 19, 23-35.

O muẹro nẹ o vwo ohwo vuọvo usun rẹ avwanre na rọ guọnọ dia kerẹ Nabal rọ riẹn ẹse-e. Vwọba, avwanre da mrẹ okpetu rọ cha, ofori nẹ a davwẹngba vwọ kẹnoma kẹ. Aphro herọ-ọ, avwanre eje rhọnvwephiyọ ota rẹ ọbuine na ta kẹ Ọghẹnẹ nẹ, “Yono uvwe omamọ rẹ orhiẹbro kugbe erianriẹn.”—Une 119:66.

Ihwo efa se vwo oniso rẹ aghwanre vẹ ọhọ rẹ avwanre djephia. Owenẹ ayen tarọ yẹrẹ ayen jẹ ẹta, ayen ji se vwo oka rẹ ẹwẹn ro rhe Devid ọke rọ vwọ tanẹ, “Ebruba kẹ ọhọ wẹn.”