ỌBE rẹ Matiu djisẹ obo re phiare ọtiọna: “Jesu da ro evun rẹ [“uwevwin,” NW ] rẹ Ọghẹnẹ, ọ da djẹ ihwo buebu re shẹ kugbe e re dẹ vwẹ evun uwevwi rẹ ẹga, o de geri imẹjẹ rẹ otu ri wene igho she, kugbe egbara rẹ otu re shẹ ilekuku; Ọ da ta kẹ ayen nẹ, e siro nẹ, Uwevwi mẹ e se nẹ uwevwi rẹ ẹrhovwo: ẹkẹvuọvo we vwi ro ru unu rẹ iji.”—Mat. 21:12, 13.

Ikuegbe rẹ ihwo rẹ Ju djere nẹ ineki na gborho ihwo re dẹ mie ayen womarẹ erọnvwọn rẹ ayen shẹ ghanghanre. Kerẹ udje, o vwo ọke ọvo vwẹ ẹgbukpe ujorin ẹsosuọ rẹ ohwo vwọ reyọ igho rẹ owian rẹ ẹdẹ 25 vwọ dẹ inekuku ivẹ. Inekuku yẹrẹ igue ọyen ivwiogbere vwo ze izobo; jẹ enẹna igho ra vwọ dẹ tobọ vrẹ oborẹ ẹgba rayen muru. (Liv. 1:14; 5:7; 12:6-8) Fikirẹ ophu ọgangan ro vwo kpahen ẹdia nana, Oyono ọvo re se Simeon ben Gamaliel de si igho ra vwọ dẹ inekuku na kpotọ te ẹdia rẹ, igho ra hwa kẹ ohwo rọ wiowian rẹ inọke erha kọyen a vwọ dẹ inekuku ivẹ.

Vwo nene idjedje nana, ka sa ghene tanẹ Jesu riẹn ru, ro vwo se ineki na “iji” fikirẹ urhuru rayen.