1, 2. Die yen ofori nẹ avwanre mrẹvughe? (Ni uhoho rẹsosuọ na.)

KIROBO re djere vwẹ uyono rọ wanre na, Idẹbono tare nẹ Jihova suẹn vwẹ idjerhe ro je fo, ọ je tanẹ oma cha vwerhen ihworakpọ siẹrẹ ayen ọvo de sun oma rayen. Ota rẹ Eshu na gbare? Ọ da tobọ dianẹ ihworakpọ ri suẹn oma rayen se yerin bẹdẹ, usuon rayen na se yovwin vrẹ ọ rẹ Ọghẹnẹ? Oma cha vwerhen owẹ ọ da dianẹ wo se sun oma wẹn je dia bẹdẹ bẹdẹ?

² O vwo ohwo vuọvo rọ sa kpahenphiyọ enọ yena kẹ wẹ-ẹ. Avwanre ohwo vuọvo yen che roro kpahen ayen. E jẹ avwanre mrẹvughe nẹ usuon rẹ Ọghẹnẹ yen me yovwin kparobọ. Ọtiọyena, ofori nẹ a vwẹ ẹwẹn avwanre ejobi vwo bicha. Baibol na vuẹ avwanre oboresorọ e vwo ru ọtiọyen. E jẹ a fuẹrẹn oborẹ Baibol na ta kpahen uturhi rẹ Jihova vwori ro vwo sun.

3. Diesorọ Jihova vwọ dia Ohwo ro fori ro sun avwanre?

³ Jihova yen fo Ohwo ro sun akpọ vẹ odjuvwu kidie ọyehẹ Ọghẹnẹ ro me vwẹgba kugbe Ọmemama na. (1 Ikun 29:11; Iruo 4:24) Ẹvwọphia 4:11, djisẹ rẹ ihwo 144,000 ra mrẹ vwẹ emramrẹ, ayen vwọ tanẹ, “Wọwẹ hẹ ohwo ro fori,  Ọrovwavwanre kugbe Ọghẹnẹ, rọ reyọ urinrin kugbe ọghọ kugbe ogangan, kidie wọwẹ re mama emu ejobi, ọhọre wẹn ayen vwọ herọ kọye a vwọ mama ayen.” Vwọrẹ uyota, Jihova yen vwo uturhi ro vwo sun ihworakpọ kugbe emekashe ejobi kidie ọyen ma erọnvwọn eje.

4. Diesorọ re vwo gbevwọso usuon rẹ Ọghẹnẹ vwọ dia ọmuvwiẹ re vwo ruiruo vwẹ idjerhe rọ chọre?

⁴ Eshu ma emu vuọvo-o. Eriyin na, o vwo uturhi ro vwo su-un. Ọyen aroeyivwo rẹ ọ vẹ aye gbe ọshare ẹsosuọ na vwo gbevwọso usuon rẹ Jihova. (Jer. 10:23) A riẹnre nẹ ayen vwo ọmuvwiẹ, ayen ji se brorhiẹn ayen ọvo vwo sun oma rayen. Ẹkẹvuọvo, ọyena ko mudiaphiyọ nẹ ayen vwo uturhi yena? Ẹjo. Ọmuvwiẹ chọn avwanre uko vwo bru omamọ orhiẹn kẹdẹ kẹdẹ. Dedena ọ kẹ ayen ẹgba ayen vwo gbevwọso Ọmemama rayen kugbe Ohwo ro vwo arhọ na-a. Re vwo gbevwọso Jihova, ọyen ọmuvwiẹ re vwo ruiruo vwẹ idjerhe rọ chọre. Otọ rẹ usuon rẹ Jihova yen ofori nẹ avwanre dia.

5. Die yen kẹ avwanre imuẹro nẹ orhiẹn ọsoso yen Ọghẹnẹ brẹ?

⁵ O vwo orọnvwọn ọfa rọ nẹrhẹ a tanẹ Jihova yen fo Ohwo ro sun avwanre. Ọ vwẹ ogangan rọyen vwo ruiruo vwẹ idjerhe ọsoso. Jihova da ta: “Mẹvwẹ Ọrovwohwo ro nẹ ẹguọnọ ro jẹrhẹriẹ rọ guọnọ uyota kugbe ọvwata vwẹ akpọ na; kidie imu nana ri je vwe.” (Jer. 9:24) Ọ dia irhi rẹ ihworakpọ ri jẹgba siri, ọyen o vwo brorhiẹn esiri rọye-en. Ọyen ohwo ro brorhiẹn ọsoso, womarẹ ọnana kọyen ọ je vwọ kẹ ihworakpọ irhi ri sun ayen. “Ọvwata kugbe ọsoso eyẹ ichiyotọ rẹ ekete [rọyen],” ọtiọyena, o mu avwanre ẹro nẹ irhi vẹ orhiẹn-ebro rọyen eje, e rẹ ọvwata. (Une 89:14; 119:128) Vwọ fẹnẹ Jihova, Eshu ji se rhi ru akpọ na phiyọ asan rẹ orhiẹn-ebro ọsoso hepha-a, dede nẹ o gun efian nẹ usuon rẹ Jihova shekpotọ vwẹ ẹdia nana.

6. Ọrhọ yen iroro ọvo rọ nẹrhẹ a tanẹ Jihova yen vwo uturhi ro vwo sun akpọ na?

⁶ Vwọba, Jihova yen fo Ohwo ro sun kidie o vwo erianriẹn vẹ aghwanre rọ sa vwọ vwẹrote akpọ vẹ odjuvwu. Roro kpahen ẹgba rọ vwọ kẹ Ọmọ rọyen ro vwo sivwin ega rẹ idọktọ se sivwi-in. (Mat. 4:23, 24; Mak 5:25-29) Vwẹ ubiẹro rẹ Jihova, ọnana dia igbevwunu-u. Kidie ọ riẹn oborẹ ugboma rẹ ohworakpọ hepha, o ji vwo ẹgba rọ vwọ rhuẹrẹ phiyọ siẹrẹ o de shechọ. Ọtiọyen o ji vwo ẹgba rọ vwọ kpare ihwo ri ghwuru nushi, je dobọ rẹ oghwọrọ ri kpregede re phia ji.

7. Idjerhe vọ yen aghwanre rẹ Jihova vwo kpenu shesheri vwọ vrẹ ọ rẹ akpọ nana?

⁷ Akpọ rẹ Eshu nana je guọnọ obo rọ sa vwọ rhuẹrẹ ẹghwọ rọhẹ uvwre rẹ ẹkuotọ sansan phiyọ; Jihova Ọghẹnẹ ọvo yen vwo aghwanre ro vwo phi ufuoma phiyọ otọrakpọ na. (Aiz. 2:3, 4; 54:13) Re vwo yono kpahen aghwanre vẹ erianriẹn rẹ Jihova na, ọ cha nẹrhẹ e vwo ẹwẹn rẹ ọyinkọn Pọl, rọ tare nẹ, “E, nighe ekodo vẹ efe kugbe eghwanre vẹ erianriẹn rẹ Ọghẹnẹ! Mavọ orhiebro rọye gba te ono sa riẹn idjerhe ro neneri.”—Rom 11:33.

8. Die yen kẹ avwanre omavwerhovwẹn kpahen oborẹ Jihova suẹn wan?

⁸ Ọ dia Baibol na de tanẹ Jihova vwo uturhi ro vwo su-un. O dje oboresorọ usuon rọyen vwo kpenu nẹ ọ rẹ ihwo efa. Ọ vuẹ avwanre nẹ Jihova suẹn vwọrẹ ẹguọnọ. Vwọrẹ uyota, obo rọ vwẹ ẹgba rọyen vwo ruiruo wan kẹ avwanre  omavwerhovwẹn. Ọyen ohwo “rọ ria ehrọre vẹ arodọvwẹ, ọ fobọ muophu-u ọ vẹ ẹguọnọ vẹ uyota.” (Eyan. 34:6) Ọghẹnẹ brọghọ phiyọ idibo rọyen oma. Ọ vwẹrote avwanre vrẹ oborẹ avwanre sa vwẹrote oma avwanre. Vwọ fẹnẹ eta rẹ Eshu, Jihova siẹ emu esiri vuọvo nẹ vwọ kẹ ihwo re fuevun ga-a. Ọ tobọ reyọ Ọmọ ọghanghanre rọyen vwọ kpahotọ rere avwanre se vwo vwo iphiẹrophiyọ rẹ arhọ rẹ bẹdẹ!—Se Une Rẹ Ejiro 84:11; Rom 8:32.

9. Mavọ yen avwanre ru riẹn nẹ Ọghẹnẹ vwo ọdavwẹ rẹ avwanre ohwo vuọvo?

⁹ Jihova vwo ọdavwẹ rẹ ihwo rọyen eje kerẹ ẹko. Ẹkẹvuọvo, o ji vwo ọdavwẹ avwanre ohwo vuọvo. Kerẹ udje, roro kpahen uvwre rẹ ẹgbukpe ujorin erha rẹ Jihova vwọ vwẹ iguẹdjọ mu nẹ ayen sivwin orere rẹ Izrẹl nẹ abọ rẹ ivwighrẹn rayen. Vwẹ ọke yena, o ji vwo oniso rẹ Rutu rọ dia ohwo rẹ Izrẹli-i. O siobọnu erọnvwọn buebun rere ọ sa vwọ ga Ọghẹnẹ rẹ uyota na. Jihova vwẹ ọshare vẹ ọmọ vwọ kẹ. Ẹkẹvuọvo, ebruphiyọ rọyen vrẹ ọtiọyen. Oma cha vwerhen Rutu ọke ra da rhọnvwọn nushi, rọ da cha riẹn nẹ Mesaya na nẹ urhiẹ rẹ ọmọ rọyen rhe. Aghọghọ rode yen o che vwo ọke rọ da rhe riẹn nẹ a sẹro rẹ ikuegbe rọyen vwẹ Baibol na, je vwẹ odẹ rọyen vwo se ọbe ọvo vwẹ evunrẹ rọyen!—Rutu 4:13; Mat. 1:5, 16.

10. Diesorọ usuon rẹ Jihova vwo jẹ ọ rẹ oshenyẹ ẹdia?

¹⁰ Usuon rẹ Jihova dia ọ rẹ oshenyẹ-ẹ. Ọ nẹrhẹ e vwo ọmuvwiẹ, o ji toroba aghọghọ. (2 Kọr. 3:17) Devid djisẹ rọyen ọtiọna: “Ọghọ vẹ orhuarho e hẹ obaro [rẹ Ọghẹnẹ], ẹgba vẹ aghọghọ e hẹ asan rọye.” (1 Ikun 16:7, 27) Vwẹ idjerhe vuọvo na, ọbuine Etan de si: “Ebruphihọ kẹ ihwo re riẹn ekperẹ rẹ orẹ na, re yan vwẹ urhukpẹ rẹ opharo wẹn, E Ọrovwohwo, re ghọghọ vwẹ odẹ wẹn vwẹ ẹdẹ na ejobi, re kpare ọvwata wẹn kpenu.”—Une 89:15, 16.

11. Die yen se toroba imuẹro rẹ avwanre vwori nẹ usuon rẹ Jihova yen me yovwin?

¹¹ Avwanre de roro kpahen uyoyovwin rẹ Jihova ọkieje, ọyena cha nẹrhẹ e vwo imuẹro rọ nabọ gan nẹ ọyen osun ro me yovwin kparobọ. Kọ sa nẹrhẹ e vwo oka rẹ ẹwẹn ro rhe ọbuine na rọ vwọ ta: “Ẹdẹ ọvo vwẹ eguan wẹn o yovwi nọ uriori vwẹ asan ọfa.” (Une 84:10) Ọtiọyen ọ ghene hepha, kiridie kerẹ Ọmemama ro vwo ẹguọnọ rẹ avwanre, Jihova riẹn obo re cha nẹrhẹ oma vwerhen avwanre, kọ je reyọ vwọ kẹ avwanre odedede. Kemu kemu rọ tare nẹ avwanre ru, ọ riẹnre nẹ o che fi erere kẹ avwanre je nẹrhẹ oma nabọ vwerhen avwanre dede nẹ ọ sa nẹrhẹ avwanre vwẹ erọnvwọn evo vwo ze.—Se Aizaya 48:17.

12. Die yen mu avwanre vwo titi usuon rẹ Jihova?

¹² Baibol na tare nẹ Usuon Ẹgbukpe Uriorin rẹ Kristi de re nu, a je cha mrẹ ihwo re cha vwọso usuon rẹ Jihova. (Ẹvwọ. 20:7, 8) Die yen se mu ayen vwo ru ọtiọyen? E de siobọnu Idẹbono nu, kọ cha davwen ihwo ni vẹ ojevwe romobọ rere o vwo sun ayen ghwru kirobo ro ruẹ jovwo. Ọ je cha davwẹngba rọ vwọ riẹriẹ ayen vwo vwo imuẹro nẹ, ayen rhe nyupho rẹ Jihova dede-e, ayen je sa dia bẹdẹ bẹdẹ. Ọyena cha sa dia uyota-a. Ẹkẹvuọvo, ọ ghene sa riẹriẹ avwanre vẹ iroro tiọyen? Ẹjo, ọ da dianẹ avwanre ghini vwo ẹguọnọ rẹ Jihova fikirẹ iruemu iyoyovwin rọyen, avwanre da je ga kiridie ọyen ohwo ro fori nẹ o sun akpọ vẹ odjuvwu. Emu ọfa rhe che je avwanre vrẹ a vwọ dia otọ rẹ usuon rẹ Jihova-a.

13. Mavọ yen ẹroevwokere rẹ Ọghẹnẹ vwo djephia nẹ e titi usuon rọyen?

¹³ Aphro herọ-ọ, usuon rẹ Jihova fo oborẹ avwanre titi vwo nẹ otọ rẹ ubiudu rẹ avwanre eje rhe. Avwanre mrẹvughe nẹ o vwo uturhi ro vwo sun avwanre eje, usuon rọyen yen me yovwin. Avwanre da fuevun ga Jihova je sẹro rẹ ọyọnregan rẹ avwanre, ke se titi usuon rọyen. Die ọfa yen e ji se ru? E ji se titi usuon rẹ Jihova siẹrẹ e de ru obo rọ guọnọre. Avwanre de ru erọnvwọn nene odjekẹ rẹ Jihova, jẹ avwanre djephia nẹ e vwo ẹguọnọ rẹ usuon rọyen, e ji tito.—Se Ẹfesọs 5:1, 2. 

14. Mavọ yen ekpako vẹ igbuyovwin rẹ orua vwẹrokere Jihova wan?

¹⁴ Avwanre yono nẹ Baibol na rhe nẹ Jihova suẹn ihwo vwẹ idjerhe rẹ ẹguọnọ. Ọtiọyena, ko fori nẹ igbuyovwin rẹ orua kugbe ekpako vwẹrokere Jihova vwo sun ihwo rehẹ obotọ rayen vwẹ idjerhe rẹ ẹguọnọ ukperẹ ayen vwọ djoma ku ayen. Pọl nabọ vwẹrokere Ọghẹnẹ kugbe Ọmọ rọyen. (1 Kọr. 11:1) Ukperẹ Pọl vwọ phọphọ ihwo yẹrẹ djẹ uguegue mu ayen rere ayen ru oborẹ ayen guọnọ ru-u, ọ rẹ ayen. (Rom 12:1; Ẹfe. 4:1; Filim. 8-10) Eriyin Jihova ji ruẹ. Ọtiọyen ofori nẹ kohwo kohwo ro vwo ẹguọnọ rẹ Jihova ji titi usuon rọyen ji ru.

15. Mavọ yen ọghọ re muẹ kẹ ihwo re vwo mu djephia nẹ avwanre vwo ẹguọnọ rẹ usuon rẹ Jihova?

¹⁵ Iruemu vọ yen ofori nẹ avwanre djephia kpahen ogangan rẹ Ọghẹnẹ vwọ kẹ igbuyovwin? Siẹrẹ avwanre de bicha ayen vwẹ idjerhe rẹ ọghọ, jẹ avwanre titi usuon rẹ Jihova. Ọ da tobọ dianẹ avwanre ghwe vwo ẹruọ rẹ orhiẹn rẹ ayen bruru-u yẹrẹ avwanre rhọvwenphiyọ dede-e, o ji fo nẹ avwanre bicha ayen. Dede nẹ ọnana fẹnẹ obo ra mrẹ vwẹ akpọ na, jẹ ọyen obo ro fori nẹ  ohwo ro titi usuon rẹ Jihova ru. (Ẹfe. 5:22, 23; 6:1-3; Hib. 13:17) Erere herọ siẹrẹ e de ru ọtiọyen, kidie erhuvwu rẹ avwanre yen Ọghẹnẹ guọnọre.

16. Mavọ yen ihwo ri bicha usuon rẹ Ọghẹnẹ brorhiẹn wan?

¹⁶ Avwanre ji se djephia nẹ avwanre bicha usuon rẹ Ọghẹnẹ womarẹ orhiẹn rẹ avwanre brẹ. Jihova ghwa kẹ avwanre irhi kpahen kemu kemu rẹ avwanre che ru-u, ọ de chọn avwanre uko vwọ mrẹ iroro rọyen. Kerẹ udje, ọ kẹ avwanre ọbe re si oka rẹ osẹnvwe ro fori nẹ a sẹn phiyọ-ọ. Ukperẹ ọtiọyen, ọ vuẹ avwanre nẹ a sẹn osẹnvwe ro che dje avwanre phia kerẹ uvi rẹ Inenikristi. (1 Tim. 2:9, 10) Ọ je guọnọ nẹ avwanre dia ekprowọ kẹ ihwo efa womarẹ orhiẹn rẹ avwanre-e. (1 Kọr. 10:31-33) Avwanre de brorhiẹn nene iroro rẹ Jihova ukperẹ ojevwe romobọ avwanre, ọyena odjephia nẹ avwanre vwo ẹguọnọ rọyen ji biẹcha usuon rọyen.

17, 18. Erhọ yen idjerhe evo rẹ ihwo re rọvwọnre se vwo djephia nẹ ayen titi usuon rẹ Jihova?

¹⁷ Roro kpahen idjerhe ọvo rẹ Inenikristi re rọvwọnre se vwo nene odjekẹ rẹ Jihova ji bicha usuon rọyen. Ọ da dianẹ orọnvwe na vọnre vẹ egbabọse, yẹrẹ obo wọ rhẹro rọye-en kọyen wọ mrẹre vwo? Gbe roro kpahen oyerinkugbe rẹ Jihova vẹ ihwo rẹ Izrẹl. Ọ vwẹ oma rọyen vwo dje ọshare rẹ ẹgborho yena. (Aiz. 54:5; 62:4) “Orọnvwe” rayen na dia ọ rẹ omavwerhovwẹn kakaka-a. Dedena, Jihova brokpakpa yanjẹ ayen vwo-o. Ọke buebun yen o vwo gbe arodọnvwẹ kẹ orere yena, ọ da je fuevun yọnrọn ọphọ rẹ ọ vẹ ayen rere. (Se Une Rẹ Ejiro 106:43-45.) Ẹguọnọ ro jẹ rhẹriẹ rẹ Jihova na nabọ te avwanre ubiudu.

¹⁸ Ofori nẹ ihwo re rọvwọnre ri vwo ẹguọnọ rẹ Jihova vwẹrokere. Ayen hworo ona vwo vrẹn nẹ orọnvwe rayen siẹrẹ ebẹnbẹn da vwomaphia-a. Ayen mrẹvughe nẹ Jihova vwo ku ayen ihwo ivẹ kugbe nure na, ọ guọnọre nẹ ayen “gbanọ” yẹrẹ tinka mu ohwohwo. Ọfanrhiẹn yen orọnvwọn vuọvo rẹ Baibol na rhọvwenre nẹ ọ sa nẹrhẹ ayen fan orọnvwe je rọvwọn ohwo ọfa. (Mat. 19:5, 6, 9) Siẹrẹ ayen da davwẹngba vwọ rhuẹrẹ ebẹnbẹn rayen phiyọ, jẹ ayen titi usuon rẹ ọvwata rẹ Jihova.

19. Die yen ofori nẹ avwanre ru siẹrẹ avwanre de ru obo re chọre?

¹⁹ Fikirẹ jẹgba, avwanre se gbe Jihova kuẹ ọkiọvo. Ọ riẹnre, kọyensorọ ọ vwọ gbẹn idjerhe evwoghovwo phiyotọ kẹ avwanre womarẹ ọtanhirhe rẹ Kristi. Eriyin na, erọnvwọn evo da chọ avwanre obọ, e jẹ avwanre rẹ Jihova nẹ o vwo ghovwo avwanre. (1 Jọn 2:1, 2) Ukperẹ avwanre vwo brorhiẹn ku oma avwanre ọkieje, e jẹ a davwẹngba vwo yono nẹ echobọ rẹ avwanre. Avwanre de sikẹre Jihova, o che vwo ghovwo avwanre je chọn avwanre uko vwọ kẹnoma kẹ oruchọ tiọyena.—Une 103:3.

20. Diesorọ o vwo fo nẹ avwanre titi usuon rẹ Jihova asaọkiephana?

²⁰ Vwẹ akpọ kpokpọ na, ihwo eje cha dia otọ rẹ usuon rẹ Jihova, ji yono idjerhe rẹ ọvwata rọyen. (Aiz. 11:9) Enẹna avwanre riavwerhen rẹ uyono buebun tiọyen. Vwọba, ọke ra vwọ rhuẹrẹ ota ro shekpahen ohwo ro fori nẹ o sun akpọ vẹ odjuvwu nabọ sikẹre re. Ọnana yen ọke re vwo djephia nẹ avwanre titi usuon rẹ Jihova womarẹ ọyọnregan, ẹga kugbe ẹgbaẹdavwọn rẹ avwanre vwọ vwẹrokere.