DON, ọyen Oseri rẹ Jihova vwẹ Canada rọ davwẹngba ro vwo ghwoghwo ota kẹ kohwo kohwo ro vwo uwevwi-in. O vwo gbikun rẹ ohwo ọvo tiọyen rọ mrẹre, ọ da ta: “Ọshare ọvo re se Peter ro vwo uwevwin rọ dia-a, ọyen ohwo ro me gboma kparobọ me mrẹ re vwevunrẹ urhuvwun na. Ọ pha gbegbe mamọ, ọ je djẹ ihwo nẹ oma. Ọ rhọnvwan nẹ e ru ẹse kọye-en.” Ọ vrẹ ẹgbukpe 14 rẹ oniọvo Don vwọ davwẹngba rọ vwọ chọn uko.

Ẹdẹ ọvo, ọshare nana da nọ Don: “Diesorọ wọ vwọ davwenrhọ mẹ? Ihwo ri chekọ eje yan jẹ uvwe vwo re. Diesorọ wo vwo vwo ọdavwẹ mẹ?” Vwẹ idjerhe rẹ ona, Don de dje ẹkpo rẹ Baibol erha vwọ kẹ ọshare na. Ẹsosuọ ọ da nọ ọshare na sẹ ọ riẹnre nẹ Ọghẹnẹ vwo odẹ, ọ da vuẹ nẹ o se ọbe rẹ Une Rẹ Ejiro 83:18. O vwo ru ọyena nu, kọ vuẹ Peter nẹ o se ọbe rẹ Rom 10:13, 14 rọ tare nẹ, “kohwo kohwo ro se odẹ rẹ Ọrovwohwo kọ rhọ.” Ọ da vuẹ nẹ ẹkpo nana yen sorọ o vwo vwo ọdavwẹ rọyen. Don de rhe se Matiu 9:36. Ọ da je vuẹ ọshare na nẹ o se komobọ. Etiyin tare nẹ, “Ọke rọ vwọ mrẹ otu buebu na, ẹro da dọn, fikiridie ayen da hra ke ro ẹnwan kerẹ igegede ri vwo osu-un.” Ro vwo se nu, ame de sun nẹ ẹro rẹ Peter, ọ da ta: “Kọyen mẹvwẹ jẹ ọvo usun rẹ igegede nana?”

Peter de rhi ru ewene. Ọ da nabọ họ oma rọyen, wanre ẹtuegba rọyen, ji ku omamọ iwun rẹ Don vwọ kẹ phiyọ. Peter kọ nabọ vwẹrote oma rọyen ọkeneje.

Peter vwo ẹbe ro si obo ro ruẹ phiyọ kẹdẹ kẹdẹ. Erọnvwọn ro ke si phiyọ shekpahen oka rẹ akpọ ro yerẹn jovwo, enẹna ikuegbe rẹ omavwerhovwẹn rẹ oborẹ Don chọn rọ uko wan keyen obo ro siẹ kpahan. Vwẹ ọvo usun rẹ ẹbe ro siri, ọ da ta: “Me riẹn odẹ rẹ Ọghẹnẹ nonẹ. Enẹna me da nẹrhovwo, ke me nẹ rhe Jihova. Oma vwerhen ovwẹ me vwọ riẹn odẹ rẹ Jihova. Don tare nẹ Jihova sa dia ugbeyan  mẹ. Ọ je tanẹ Jihova muegbe rọ vwọ kerhọ mẹ kọke kọke me da nẹrhovwo rhe o toro ọke yẹrẹ obo me vuẹ rẹ-ẹ.”

Peter si eta re koba rọyen rhe iniọvo rọyen. O de si:

“Oma mẹ ghwa gan nonẹna-a. Mi no nẹ ọghwo te vwe oma re. Jẹ ọ da tobọ dianẹ nonẹ yen ẹdẹ rọ koba mẹ vwẹ akpọ na, me riẹnre nẹ me cha rhoma mrẹ ugbeyan mẹ [Don] vwẹ Iparadaisi. Wo de se ọbe nana, gba riẹn nẹ me rha herọ-ọ. Ẹkẹvuọvo wọ da mrẹ ọshare ọvo vwẹ ughworivwin mẹ wo rorori nẹ ofori nẹ ọ dia etiyi-in, ta ota kẹ, wo ji se ọmọbe rẹ blu nana [ọyen ọbe re vwo yono Baibol na jovwo re se The Truth That Leads to Eternal Life ra vwọ kẹ]. * Ọ tare nẹ me cha rhoma mrẹ ugbeyan mẹ vwevunrẹ Iparadaisi. Me nabọ vwo imuẹro rẹ ọnana dẹn. Oniọvo rẹ ovwan ọghanghanre, Peter.”

E vwo sho nu, Ummi rọ dia oniọvo rẹ Peter da tanẹ, “Omarẹ ẹgbukpe ivẹ re wanre, me vẹ Peter da ta ota. Ọyen obọ ẹsosuọ vwẹ ikpe buebun re me vwọ mrẹ nẹ oma vwerhenrọ. Ọ tobọ hwẹ.” Ummi da vuẹ Don nẹ, “Mi che se ọbe na kiridie orọnvwọn ro se te ubiudu rẹ oniọvo mẹ, jẹ omamọ rẹ orọnvwọn dẹn.” Ummi da je tanẹ, ọyen choma ro vwo yono ọbe re se What Does the Bible Really Teach? rẹ Iseri rẹ Jihova vwo yono ihwo kpahen Baibol na asaọkiephana.

Ukperẹ avwanre vwo ni oborẹ ihwo hepha, ofori nẹ e dje ẹguọnọ kẹ kohwo kohwo ji vwo odirin rayen. (1 Tim. 2:3, 4) Avwanre de ruẹ ọyena, ọ sa nẹrhẹ avwanre sikẹre ihwo kerẹ Peter ri vwo ẹwẹn esiri dede nẹ ihwo efa nẹ ayen kuẹrofia. Avwanre se vwo imuẹro nẹ Ọghẹnẹ ro “nẹ evun rẹ udu” rẹ ihwo cha nẹrhẹ uyota na rho vwevunrẹ ubiudu rẹ ihwo ri vwo ẹwẹn esiri.—1 Sam. 16:7; Jọn 6:44.