1. Die yen kẹ avwanre omavwerhovwẹn oghẹresan?

OMA vwerhen avwanre siẹrẹ e de nyo iyẹnrẹn rẹ ebuon rẹ ihwo rẹ Jihova! Vwẹ ukpe rọ wanre na, avwanre ru uyono rẹ Baibol re vrẹ 10,000,000. Enana eje djerephia nẹ ihwo rẹ Ọghẹnẹ nẹrhẹ urhukpẹ rayen lo! Ji roro kpahen iduduru rẹ ihwo ri dje omavwerhovwẹn phia, re rhe Ẹkarophiyọ na. Ayen nabọ yono kpahen ẹguọnọ rẹ Jihova dje kẹ avwanre womarẹ ọtanhirhe na.​—1 Jọn 4:9.

2, 3. (a) Die yen cha sa djẹ avwanre ẹla “kerẹ urhukpẹ” vwẹ akpọ na-a? (b) Vwo nene eta rehẹ Matiu 5:14-16, onọ vọ yen avwanre cha fuẹrẹn vwẹ uyono nana?

² Vwẹ akpọneje, Iseri rẹ Jihova jẹ ephẹrẹ sansan. Ẹkẹvuọvo, ọyena cha sa dobọ rẹ ujiri ro fori nẹ a vwọ kẹ Jihova kerẹ orua ọvo ji-i. (Ẹvwọ. 7:9) O toro ephẹrẹ rẹ avwanre jẹ yẹrẹ asan rẹ avwanre dia-a, e se lo “kerẹ urhukpẹ vwẹ akpọ na.”​—Fil. 2:15.

³ Uruemu ra vwọ rhẹrẹ, iruo rẹ aghwoghwo rẹ avwanre, vẹ oyerinkugbe rẹ avwanre ghwa ujiri vwo rhe Jihova.  Idjerhe vọ yen urhukpẹ rẹ avwanre se vwo lo fiotọ vwẹ ẹdia erha nana?​—Se Matiu 5:14-16.

4, 5. (a) Vwọ vrẹ iruo rẹ aghwoghwo na, idjerhe ọfa vọ yen urhukpẹ rẹ avwanre se vwo lo fiotọ? (b) Erere vọ yen se nẹ obuko rẹ omamọ rẹ uruemu rẹ avwanre rhe? (Ni uhoho rẹsosuọ na.)

⁴ Idjerhe ọghanghanre ọvo re se vwo djephia nẹ urhukpẹ rẹ avwanre lo, ọyen womarẹ iruo rẹ aghwoghwo vẹ odibo egbe na. (Mat. 28:19, 20) Vwẹ ukpe rẹ 1925, vwevunrẹ uyovwinrota na “Light in the Darkness” (Uwevwin Orhẹrẹ rẹ June 1, 1925, ọ rẹ oyibo), a da tanẹ vwẹ ẹdẹ rẹ oba na, ohwo cha sa fuevun kẹ Ọrovwori na siẹrẹ ọ rha “reyọ kuphẹn kuphẹn vwọ nẹrhẹ urhukpẹ rọyen la-a. Ofori nẹ o ru ọnana womarẹ iyẹnrẹn esiri na ro ghwoghwo vwọ kẹ ihwo, ji yeren akpọ nene idjerhe rẹ urhukpẹ na.” Vwọba, e ji se jiri Jihova womarẹ uruemu rẹ avwanre. Ihwo vwo oniso rẹ uruemu rẹ avwanre ọke rẹ avwanre de ghwoghwo. Opharo rẹ ehwẹ vẹ uyeren ri sasasa rẹ avwanre nẹrhẹ ayen vughe ọka rẹ ihwo rẹ avwanre hepha vẹ Ọghẹnẹ rẹ avwanre ga.

⁵ Jesu da ta kẹ idibo rọyen: “Ovwan de te uwevwi we yere.” (Mat. 10:12) Ihwo rehẹ ekogho rẹ Jesu vẹ idibo rọyen de ghwoghwo ota, vwo ẹkuruemu rẹ ayen vwo dede erhorha phiyọ uwevwin. Vwẹ asan buebun nonẹna, ọyena ghwa dia ẹkuruemu raye-en. Dedena, opharo ẹsasọ vẹ ehwẹ avwanre vwẹ ọke a da vuẹ ayen obo ri mu avwanre rhe sa nẹrhẹ ẹwẹn rayen totọ. Obo ro me yovwin, ọyen ra vwọ vwẹ ehwẹ vwọ tuọnphiyọ. Ọnana ghene wian, ma rho vwọ kẹ iniọvo re vwobọ vwẹ aghwoghwo rẹ azagba vẹ imikpekpa re ghorie. Siẹrẹ wọ da sasa opharo ji yeren ihwo vwẹ iruo yena, wọ cha mrẹ nẹ ihwo cha sasa opharo kẹ wẹ rhivwin, ọyena sa nẹrhẹ ayen vwẹriẹ je reyọ ẹbe rẹ avwanre. Omamọ rẹ uruemu wẹn na sa tobọ nẹrhẹ wo ghwoghwo ota kẹ ayen.

6. Idjerhe vọ yen aye gbẹ ọshare ọvo re kpakore vwọ hẹre iruo rẹ aghwoghwo rayen phiyọ?

⁶ Fikirẹ jẹ omakpokpọ evwo, aye gbẹ ọshare ọvo re kpakore vwẹ England re se vwobọ vwẹ iruo aghwoghwo rẹ nuwevwin kpo uwevwi-in. Ẹkẹvuọvo, ayen guọnọre nẹ urhukpẹ rayen lo. Rọ vwọ dianẹ isikuru kẹrẹ asan rẹ ayen dia na, kẹ ayen rhuẹrẹ ẹbe ri si urhuru phiyọ imẹjẹ vwẹ otafe rẹ uwevwin rayen vwẹ ọke rẹ esẹ vẹ ini na de che mu emọ rayen. Emiọvwọn evo tobọ reyọ ọbe na Questions Young People Ask​—Answers That Work, Ukori 1 vẹ 2, kugbe ibroshọ efa mie ayen. Oniọvo aye ọvo rọ dia ọkobaro vwẹ ukoko rayen je vwomaba ayen. Omamọ uruemu rẹ ọkobaro na kugbe ẹgbaẹdavwọn rẹ aye gbe ọshare na da nẹrhẹ emiọvwọn evo rhiabọreyọ uyono rẹ Baibol.

7. Ukẹcha vọ yen wọ sa vwọ kẹ erhorha rehẹ ekogho wẹn?

⁷ Vwẹ ikpe evo rhire na, ihwo ri djẹ kpo ẹkuotọ efa ke buẹnphiyọ. Mavọ wọ sa vwọ chọn ihwo tiọyena uko vwọ riẹn Jihova? Ẹsosuọ, wo se yono uyeren rayen. Aplikeshọni rẹ JW Language sa chọn wẹ uko vwo ru ọyena. Vwọba, wo se yono eta evo vwẹ ephẹrẹ rayen re vwerhen ayen. Wo se dje ividio vẹ ẹbe re herọ vwẹ ephẹrẹ rayen vwọ kẹ ayen vwẹ jw.org.​—Urhi 10:19.

8, 9. (a) Mavọ yen uyono rẹ uvwre rẹ udughwrẹn na vwọ chọn avwanre uko? (b) Idjerhe vọ yen emiọvwọn sa vwọ vwẹ ukẹcha kẹ emọ rayen vwọ kpahanphiyọ enọ?

 ⁸ Jihova vwẹ Uyono rẹ Akpeyeren vẹ Iruo Uvie Na vwọ chọn avwanre uko vwọ tẹn ona rẹ iruo aghwoghwo na. Obo re yono vwẹ omẹvwa nana chọn avwanre uko vwo fiudugbere ọke re de ru orhivwinbrura vẹ uyono rẹ Baibol.

⁹ Erhorha da rhe emẹvwa rẹ avwanre, oma vwerhen ayen siẹrẹ emọ na da kpahanphiyọ enọ. Emiọvwọn, ovwan yono emọ rẹ ovwan oborẹ ayen sa vwẹ eta robọ rayen vwọ kpahanphiyọ enọ. Ẹkpahọnphiyọ tiọyena, ro ji nẹ otọ rẹ ubiudu rayen rhe na nẹrhẹ ihwo evo mrẹ uyota na vughe re.​—1 Kọr. 14:25.

10. Mavọ yen ẹga orua se vwo toroba oyerinkugbe rẹ orua?

¹⁰ Re vwo toroba oyerinkugbe rọhẹ orua kugbe ukoko na, ọyen idjerhe ọfa rẹ urhukpẹ wẹn se vwo lo. Idjerhe ọvo rẹ emiọvwọn se vwo ru ọtiọyen ọyen ayen vwo vwo ọrhuẹrẹphiyotọ Ẹga Orua ọkieje. Erua evo vwẹ JW Broadcasting rẹ kemeranvwe kemeranvwe na vwọba ọrhuẹrẹphiyotọ rayen. Ayen de no nu, kẹ ayen ta ota kpahen oborẹ ayen se vwo ru nene oborẹ ayen yonori na. Ofori nẹ emiọvwọn karophiyọ nẹ odjekẹ rẹ omotete guọnọre fẹnẹ ọ rẹ eghene guọnọre. E jẹ emiọvwọn davwẹngba rere ihwo rẹ orua na sa vwọ mrẹ erere nẹ ẹga orua na rhe.​—Une 148:12, 13.

11-13. Mavọ yen avwanre eje se vwo toroba oyerinkugbe rọhẹ ukoko na?

¹¹ Mavọ yen ighene se vwo toroba oyerinkugbe rọhẹ ukoko na, je chọn ihwo efa uko vwọ nẹrhẹ urhukpẹ rayen lo? Ayen se ru ọtiọyen siẹrẹ ayen da vwẹ ugbeyan mu iniọvo re kpakore vwẹ ukoko na. Wọ sa nọ ayen kpahen oborẹ ayen rhiẹromrẹ rọ nẹrhẹ ayen sa dia evun rẹ ukoko na rhi te ọke nana. Ikuegbe na cha bọn wẹn vẹ ayen gan. Avwanre eje se bru ẹkẹn kẹ oma re vwo dede erhorha re rhe uyono rẹ avwanre. Siẹrẹ e de ru ọtiọyen, jẹ e toroba oyerinkugbe rọ sa nẹrhẹ urhukpẹ rẹ erhorha na lo phia. Yeren ayen sasasa, vwẹ ukẹcha kẹ ayen guọnọ asan rayen che  chidia, ji dje ayen kẹ iniọvo efa rere ẹwẹn rayen se vwo totọ.

¹² A da vuẹ wẹ nẹ wọ vwẹrote omẹvwa rẹ aghwoghwo, wọ me nabọ vwẹ ukẹcha kẹ iniọvo re kpakore rehẹ ẹko na. Ofori nẹ a ghare ayen phiyọ asan ro shephiyọ ayen oma. Ọkiọvo, a sa ghare ayen vẹ ighene re sa vwẹ ukẹcha kẹ ayen. O ji fo nẹ e dje erorokẹ vwọ kẹ ihwo ri ghwe vwo omakpokpọ-ọ. Erorokẹ tiọyena sa chọn ighene vẹ iniọvo re kpakore uko vwo ghwoghwo iyẹnrẹn esiri na vẹ oruru.​—Liv. 19:32.

¹³ Ọbuine na da ta: “Mavọ oyovwi te rọ vwerhe te rẹ iniọvo da dia kugbe vwẹ okugbe!” (Se Une Rẹ Ejiro 133:1, 2.) Oma vwerhen ihwo rẹ Izrẹl ọke rẹ ayen da ga Jihova kuẹgbe. Oyerinkugbe rayen na họhọ omamọ rẹ ori ro gbon phaphapha. E jẹ avwanre eje davwẹngba vwo toroba oyerinkugbe rọhẹ evunrẹ ukoko na. Ẹkẹvuọvo, wo se “rhie udu” wẹn phiyọ yẹrẹ ruo vrẹ ọtiọyen?​—2 Kọr. 6:11-13.

14. Idjerhe vọ yen urhukpẹ wẹn se vwo lo vwẹ asan vwọ dia?

¹⁴ O toro asan rẹ avwanre dia-a, urhukpẹ rẹ avwanre se lo fiotọ. Omamọ uruemu vẹ eta rẹ avwanre sa nẹrhẹ ihwo re dia kẹrẹ avwanre mrẹ uyota na vughe. Wọ sa nọ, ‘Ẹro vọ yen ihwo re dia kẹrẹ ovwẹ vwo ni vwe? Mi ruẹ uwevwin vẹ egodo mẹ fuan? Me vwẹ ukẹcha vwọ kẹ ihwo efa?’ Wẹ vẹ iniọvo efa de gbikun, wọ sa nọ ayen kpahen oborẹ omamọ rẹ uruemu rayen djobọte ihwo rẹ orua, ihwo re dia kẹrẹ ayen, ihwo rẹ ayen nene wian, kugbe emọ isikuru rayen. O muẹro nẹ ikuegbe rayen na cha bọn wẹn gan.​—Ẹfe. 5:9.

15. Diesorọ o vwo fo nẹ avwanre rhẹrẹ?

¹⁵ Ofori nẹ e vwo oniso rẹ ọke rẹ avwanre de yerẹn na siẹrẹ avwanre da guọnọ nẹ urhukpẹ rẹ avwanre lo fiotọ. Jesu vwẹ uchebro vwọ kẹ idibo rọyen abọ buebun nẹ ayen “rhẹrẹ.” (Mat. 24:42; 25:13; 26:41) Vwọrẹ uyota, siẹrẹ e de roro nẹ “ukpokpogho [rode]” na ji sheri, avwanre re che vwobọ vwẹ iruo rẹ ghwoghwo na vẹ ẹwẹn okpakpa-a. (Mat. 24:21) Ukperẹ urhukpẹ rẹ avwanre vwọ la fiotọ, kọ cha dia yẹrẹyẹrẹ, yẹrẹ fun karekare.

16, 17. Die yen sa chọn wẹ uko vwọ rhẹrẹ ọkieje?

¹⁶ Eyeren nana vwo miovwẹn phiyọ na, ọke nana kọyen o vwo fo nẹ a rhẹrẹ vrẹ obo ri jovwo. Aphro herọ-ọ, oba na cha rhe vwẹ ọke rẹ Jihova bru phiyọ. (Mat. 24:42-44) Ofori nẹ avwanre rhẹrẹ vẹ erhiorin bẹsiẹ ọke yena vwo te. Ọtiọyena, e gbe jẹ avwanre se Baibol na ji nẹrhovwo kẹdẹ kẹdẹ. (1 Pita 4:7) Vwẹrokere udje rẹ iniọvo ri ga Jihova krẹ re. Wo se se ikuegbe tiọyena vwẹ Uwevwin Orhẹrẹ rẹ April 15, 2012, aruọbe 18-21, ro vwo uyovwinrota na “Seventy Years of Holding On to the Skirt of a Jew,” (ọ rẹ oyibo).

¹⁷ Wọ cha mrẹ aghọghọ rode siẹrẹ wo de muomaphiyọ iruo rẹ ẹga na, ji nene iniọvo na ghwọrọ ọke kugbe. Vwọba, ọyena je cha nẹrhẹ wọ sa kẹnoma kẹ ẹnwan okamuka kpahen ọke rẹ oba na cha vwọ rhe. (Ẹfe. 5:16) Idibo rẹ Jihova muomaphiyọ iruo rẹ Uvie na mamọ vwẹ uvwre rẹ ikpe ujorin re wanre na. Ẹkẹvuọvo womarẹ ukẹcha rẹ Jihova, iruo na rhe hẹrephiyọ vrẹ obo re rhẹro rọyen. Enẹna, urhukpẹ rẹ avwanre lo muẹ akpọneje vwọ vrẹ obo ri jovwo.

18, 19. Mavọ yen ekpako ukoko sa vwọ chọn avwanre uko vwọ rhẹrẹ? Djudje rọyen.

 ¹⁸ Ọ vwerhoma rha vwọ riẹn nẹ Jihova rhiabọreyọ ẹga rẹ avwanre, dede nẹ avwanre gbare-e. Ọtiọyena, e jẹ avwanre vwo ọdavwaro kpahen ekpako rẹ Jihova vwo “ru ẹse kẹ” avwanre. (Se Ẹfesọs 4:8, 11, 12.) Siẹrẹ ọkpako da kọn bru we rhe ọke ọfa, gba reyọ uphẹn yena vwọ mrẹ erere nẹ aghwanre vẹ uchebro rọyen.

¹⁹ Vwẹ England, oniọvo ọvo vẹ aye rọyen niyẹnrẹn rẹ ebẹnbẹn rọhẹ orọnvwe rayen vwọ kẹ ekpako ivẹ. Aye na tare nẹ ọshare na dia uvi rẹ udje vwọ kẹ orua na vwẹ ẹga rẹ Jihova-a. Ọshare na rhọnvwere nẹ ọyen dia uvi rẹ oyono-o, o ji vwo ọrhuẹrẹphiyotọ rẹ ẹga rẹ orua rẹ ọkieje-e. Ekpako na da chọn ayen uko vwo roro kpahen udje rẹ Jesu. Ayen da vuẹ ọshare na nẹ ọ vwẹrokere Jesu rọ nabọ vwẹrote ọdavwẹ rẹ idibo rọyen. Ayen da rha vwẹ uchebro vwọ kẹ aye na nẹ o vwo edirin. Ukuotọ rọyen, ayen da vwẹ iroroẹjẹ phia kpahen oborẹ ayen vẹ emọ rayen sa vwọ wian kugbe vwo vwo uvi rẹ ẹga rẹ orua rẹ ọkieje. (Ẹfe. 5:21-29) Ọke vwọ yanran na, ayen da nabọ jiri oniọvo ọshare na fikirẹ ẹgbaẹdavwọn rọyen. Ayen da je vuẹ nẹ ọ cha dia uvi rẹ ọgbuyovwin siẹrẹ o de chirakon je vwẹroso ukẹcha rẹ ẹwẹn ọfuanfon rẹ Jihova. Ukẹcha rẹ ekpako na vwọphia ghene chọn orua na uko.

20. Erere vọ yen che te we obọ siẹrẹ urhukpẹ wẹn de lo fiotọ?

²⁰ Ọbuine na da ta: “Ebruphihọ kẹ ohwo kohwo rọ djẹ oshọ rẹ Ọrovwohwo na, rọ yan phihọ idjerhe rọye!” (Une 128:1) Urhukpẹ wẹn cha nabọ lo, siẹrẹ wọ da rhẹrẹ ọkieje, chọn ihwo efa uko vwọ ga Jihova, ji toroba uvi rẹ oyerinkugbe rọhẹ evunrẹ ukoko na. Ọyena cha nẹrhẹ oma vwerhen owẹ. Ihwo efa ji cha mrẹ iruo esiri wẹn, ọke yena kẹ ayen cha vwẹ ujiri kẹ Jihova.​—Mat. 5:16.