Iruemu irhirin yen e si phiyọ awọreta na: “Omamọ rẹ ẹwẹn na yen ẹguọnọ, aghọghọ, ufuoma, ako echiro, ẹse-eruo, uyoyovwin, esegbuyota, dẹndẹn, omaẹriẹnsuon.” Ẹkẹvuọvo ọ dia iruemu yena ọvo yen iruemu iyoyovwin rẹ ẹwẹn Ọghẹnẹ sa cha avwanre uko vwo vwo-o.

Vwo oniso rẹ obo ri Pọl siri tavwen o ki djunute omamọ rẹ ẹwẹn na: “Iruo rẹ ugboma na e pha phẹphẹ: igberadja, ọfanrhiẹ rẹ ehware, jẹ ẹme-enyo, edjọ ẹgọ, orhan, ohọnre vẹ ẹghwọ, ohẹriẹ, evun ephuo, ophuemuo, mẹvwẹ-marho, emuo kpahe ihwo ride, uyono rẹ efian, omaẹriọ, ozighẹ, idi ẹda, udu ọgangan, kugbe uruemu efa etieye na.” (Gal. 5:19-21) Kọyen Pọl rhe se djunute “iruo rẹ ugboma na” efa kerẹ i ro djunute vwẹ Kọlose 3:5. Eriyin o ji ru ọke ro vwo djunute iruemu iyoyovwin irhirin na nu. Vwẹ owọ 23, ọ da ta: “O vwo urhi vuọvo rọ vwọso erọnvwọn tiọna-a.” Ọtiọyena, ọ dia iruemu iyoyovwin eje rẹ ẹwẹn ọfuanfon sa cha avwanre uko vwo vwo yen Pọl djunute-e.

Ọ nabọ phẹn siẹrẹ a da vwẹ omamọ rẹ ẹwẹn na vwọ vwanvwen emamọ rẹ urhukpẹ rẹ Pọl si rhe ukoko rẹ Ẹfesọs: “Kidie emamọ rẹ urhukpẹ vwenẹ a mrẹ vwẹ evun rẹ obo ri yoma ejobi kugbe obo re gbare kugbe uyota.” (Ẹfe. 5: 8, 9) E, “obo ri yoma” yẹrẹ uyoyovwin vẹ ọvwata kugbe uyota, eyen ẹbẹre ọvo rẹ “emamọ rẹ urhukpẹ” na, jẹ ẹbẹre ọvo rẹ “omamọ rẹ ẹwẹn na.”

Pọl ji jiro kẹ Timoti nẹ o vwo iruemu iyoyovwin esan nana: “ọvwata, uruemu esiri, esegbuyota, ẹguọnọ, erhiori, dẹndẹn.” (1 Tim. 6:11) Erha ọvo usun rayen (esegbuyota, ẹguọnọ, dẹndẹn) yen e djunute kerẹ ẹbẹre ọvo rẹ “omamọ rẹ ẹwẹn na.” Timoti je cha guọnọ ukẹcha rẹ ẹwẹn na o se vwo vwo iruemu ri chekọ re djunute na: ọvwata, uruemu esiri, kugbe akon-echiro.—Ni Kọlose 3:12; 2 Pita 1:5-7.

Ọtiọyena, ọ dia iruemu eje ra guọnọ mie Inenikristi yen Galesha 5:22, 23 (NW) djunute-e. Ẹwẹn rẹ Ọghẹnẹ sa cha avwanre uko vwo vwo ẹbẹre irhirin rẹ “omamọ rẹ na.” O ji vwo iruemu efa ro fori nẹ e vwo a sa vwọ dia Onenikristi ro tedje, ji “ku ohwo ọkpokpọ na phihọ oma, ra mare vwẹ uhoho rẹ Ọghẹnẹ vwẹ omamọ rẹ ọvwata kugbe ẹfuọn.”—Ẹfe. 4:24.