AVWANRE vwo imuẹro nẹ Jihova sun ihwo rọyen, je vwẹ oborẹ ayen guọnọre vwọ kẹ ayen rere ayen se vwo sikẹrẹ vwẹ “oba rẹ ẹdẹ na.” (2 Tim. 3:1) Ọtiọyena, ofori nẹ avwanre eje kerhọ rọyen. A sa vwẹ ẹdia rẹ avwanre vwo dje ọ rẹ ihwo rẹ Izrẹl ọke rẹ ayen vwọ hẹ aton na. O vwo obo ofori nẹ ayen ru siẹrẹ ayen de nyo use rẹ owanre na.

Jihova vuẹ Mosis nẹ ọ vwẹ idọnọ ọfuanfon duvwu owanre ivẹ, owanre na kọyen o “vwo se erhọn na koko, kọye ukoko na [je] vwọ vẹn.” (Ukeri 10:2) Irherẹn na che hworo owanre na vwẹ idjerhe sansan vwo dje obo ra guọnọre nẹ ihwo na ru. (Ukeri 10:3-8) Nonẹna, a je vwẹ odjekẹ kẹ ihwo rẹ Ọghẹnẹ vwẹ idjerhe sansan. Vwẹ uyovwinrota nana, a cha ta ota kpahen idjerhe erha ra wan vwẹ odjekẹ kẹ avwanre nonẹna, je reyọ ayen vwọ vwanvwen use rẹ owanre rẹ ọke rẹ ihwo rẹ Izrẹl. E se ihwo rẹ Ọghẹnẹ nonẹna vwọ kẹ eghwẹkoko ride, e yono iniruo re vwo mu, je vwẹ odjekẹ kẹ ikoko na eje kpahen ewene re ruru.

Jihova da guọnọ nẹ “ukoko na ejobi” koko vwẹ asan anurhoro rẹ ẹbẹre ọnre va nẹcha rẹ itabanako na, irherẹn na ki hworo owanre ivẹ na. (Ukeri 10:3) Uvwiẹ na eje ra ghare phiyọ ẹko ẹne ri won riariẹ itabanako na nyo use na. Ihwo ri won kẹre itabanako na sa yan phia vwẹ uvwre rẹ imibrẹro evo. Asan rẹ ihwo efa won phiyọ sheri kẹ itabanako na, ọtiọyena, ọ sa reyọ ọmọke vẹ ẹgbaẹdavwọn ọgangan ayen ke yan phia. O toro asan rẹ ayen won phiyọ-ọ, Jihova guọnọre nẹ ayen eje koko vwọ kẹ odjekẹ rọ cha vwọ kẹ ayen na.

Nonẹna, avwanre koko vwẹ itabanako-o, ẹkẹvuọvo, e ji se avwanre kpo asan rẹ ihwo rẹ Ọghẹnẹ de siomakoko. Asan tiọyena churobọ si eghwẹkoko kugbe irueru rẹ oghẹresan efa, re dia asan ra da vwẹ evuẹ eghanghanre kugbe odjekẹ vwọ kẹ avwanre. Vwẹ akpọneje, ihwo ri Jihova riavwerhen rẹ ọrhuẹrẹphiyotọ vuọvo. Ọtiọyena, ihwo eje re rhe emẹvwa nana riavwerhen rẹ oyerinkugbe kerẹ orua rode. Ihwo evo nẹ asan oshesheri cha asan re de ruẹ emẹvwa na, efa dia kẹrẹ. Dedena, ihwo ri nyo use na eje cha rhọnvwe nẹ ayen ghwọrọ ọke rayen kufia-a.

Ihwo re dia asan ri sheri mamọ re cha sa rhe asan re de che ru emẹvwa ride na-a je sa mrẹ erere norhe? E, womarẹ ena kpokpọ ri she rhe, ayen sa mrẹ erere nẹ ọrhuẹrẹphiyotọ vuọvo na kerẹsiẹ a da mrẹ nẹ ayen ra re. Kerẹ udje, ọke re vwo ji oniọvo nẹ esiri ukoko rhi kin oghọn ukoko rọhẹ Benin, ayen de churu ọrhuẹrẹphiyotọ na fi orere ra da tọn otọ guọnọ efe rọhẹ Sahara Desert re se  Arlit vwẹ Niger. Ihwo 21 yen rhe re. Dede nẹ asan rẹ ayen pha sheri, jẹ ọ ghwa họhọ nẹ ayen vwomaba iniọvo 44,131 ri koko vwẹ asan e de ru omẹvwa na. Oniọvo ọshare ọvo de si: “Ovwan kobiruo mamọ vwọ kẹ ọrhuẹrẹphiyotọ na re churu fi obonẹ rọ nẹrhẹ avwanre riavwerhen omẹvwa na. Ọnana djerephia nẹ ovwan ghini vwo ẹguọnọ rẹ avwanre.”

Ọ da dianẹ owanre ọvo yen irherẹn na hwori, “isun na, igbuyovwi” na ọvo yen che siomakoko vwẹ asan ra da vwẹ oma na. (Ukeri 10:4) Etiyin kọyen Mosis de yono je kẹ ayen odjekẹ re sa cha ayen uko vwo ruiruo rayen vwẹ uvwiẹ rẹ ayen nurhe. Siẹrẹ wọ da dia ọvo usun rẹ igbuyovwin na, o muẹro nẹ wọ cha davwẹngba wẹn eje wo vwo nyo use na je mrẹ erere norhe.

Nonẹna, ekpako rẹ ukoko na dia ‘isu-un,’ ayen ji do kuẹ uchuru rẹ Ọghẹnẹ ra vwọ kẹ ayen yọnre na-a. (1 Pita 5:1-3) Ukperẹ ọtiọyen, ayen davwẹngba rayen eje vwọ vwẹrote igodẹ na. Ọtiọyena, kpakpata yen ayen kpahenphiyọ use rẹ eyono kerẹ Isikuru rẹ Ekpako vẹ Idibo Rowian. Vwẹ isikuru nana, e yono ekpako vẹ idibo rowian oborẹ ayen sa vwọ nabọ ruiruo rẹ ukoko na. Ọnana cha nẹrhẹ ekpako vẹ iniọvo na eje sikẹre Jihova phiyọ. Ọ da tobọ dianẹ wo ji rhi kpo isikuru nana-a, wọ je mrẹ erere siẹrẹ iniọvo re ra re da vwẹ obo re yono ayen vwọ cha iniọvo ukoko na uko.

Ọke evo, irherẹn rẹ Izrẹl na hworo owanre rẹ udubruvwe. Ọnana odjephia nẹ Jihova guọnọre nẹ ihwo na ejobi kparoma. (Ukeri 10:5, 6) Dede nẹ ọ guọnọ ẹgbaẹdavwọn, idjerhe rẹ ayen eje vwọ kparoma nẹ asan rẹ ayen won phiyọ gbe ohwo unu mamọ. Ọ sa dianẹ evo mrẹrẹ bẹnbẹn rẹ ayen vwọ kparoma kpo asan ọfa. Diesorọ?

Ọkiọvo, ihwo evo se roro nẹ use ra vwọ kparoma na kpata nọ yẹrẹ ọ cha kpregede nọ. “Ọke ọvo egho na mi mu nẹ ovwọnvwọn re te irhiọke.” Vwẹ ọke ọfa, egho na sa dia “ẹdẹ ivẹ, eyẹrẹ emeranvwe ọvo, eyẹrẹ ọke okrekri” tavwen ayen ke kparoma. (Ukeri 9:21, 22) Bro abọ yen ihwo na mu erhọn vwẹ oyan rayen na? Ọbe rẹ Ukeri uyovwin 33 djunute omarẹ asan 40 rẹ ihwo rẹ Izrẹl won phiyọ.

Ọke evo, ayen se won phiyọ asan rẹ ophie hepha. Oma se fu ayen vwẹ asan ọtiọyen kidie “aton rode ro mu oshọ” yen ayen wan na. (Urhi 1:19) Ọtiọyena, ayen se hirharoku ọdavwini re vwo roro nẹ asan rẹ ayen che won phiyọ obọ che yovwin te asan rẹ ayen hepha na-a.

Uvwiẹ evo da kparoma re, efa sa mrẹ bẹnbẹn ayen vwọ hẹrhẹ te ọke rẹ ayen vwọ kparoma. Ihwo eje yen nyo edo rẹ owanre rẹ udubruvwe na, jẹ ayen eje cha sa kparoma vwẹ ọke vuọvo-o. E de hworo owanre rẹ udubruvwe na, uvwiẹ ri won phiyọ ẹbẹre ọnre va nẹcha kọyen uvwiẹ rẹ Juda, Isaka kugbe Zẹbulọn ke cha kparoma. (Ukeri 2:3-7; 10:5, 6) Ayen de mu oyan re, irherẹn na ki che hworo owanre rẹ udubruvwe na abọ rivẹ vwọ vuẹ uvwiẹ erha ri won phiyọ obọrhen ọnre na nẹ ayen kparoma. Enenẹ yen irherẹn na che ru bẹsiẹ ayen eje vwọ kparoma.

Ọ sa dianẹ wọ mrẹrẹ bẹnbẹn wo vwo rhiabọreyọ ewene evo re ruru vwẹ ukoko na re. Ọkiọvo wo rori nẹ ewene na bunọ. Ọ je sa dianẹ ọrhuẹrẹphiyotọ evo nabọ fun we oma ọtiọyena wọ rha guọnọ nẹ e wene aye-en. O toro iroro rọ sorọ-ọ, ọ sa bẹn wo vwo vwo edirin rhi te ọke rẹ ewene na vwọ riẹnriẹn owẹ oma. A da davwẹngba vwọ nuẹ nene ewene re vwomaphia, o vwo obo rọ wanre-e, a cha mrẹ erhuvwu ro che norhe kugbe ebruba ri Jihova.

Jihova sun oduduru rẹ eshare, eya, kugbe emọ wan aton na vwẹ ọke ri Mosis. Ababọ rẹ ẹroevwote vẹ odjekẹ ri Jihova, ayen rhe se sivwinrhọ-ọ. Nonẹna, Jihova ji suẹn avwanre wan ẹdẹ re koba ro muoshọ na. Ọ cha avwanre uko vwo siẹkẹrẹ je bọn esegbuyota rẹ avwanre gan! Ọtiọyena, e jẹ avwanre eje brorhiẹn ra vwọ kerhọ rẹ use rẹ owanre na kirobo rẹ ihwo rẹ Izrẹl re fuevun ruru!