UYONO 26
“Rhivwi Bru Vwe Rhe”
“Rhivwi bru vwe rhe, rere mi rhivwi bru ovwan rhe.”—MAL. 3:7.
UNE 102 “Cha Otu rẹ Evwiẹre Uko”
ỌDJẸKOKO *
1. Mavọ oma ru Jihova siẹrẹ ogodẹ rọyen ro bo ghwru de rhivwin rhe?
KIROBO re yonori vwẹ uyono rọ wanre na, Jihova vwẹ oma rọyen dje osuigodẹ rọ nabọ vwẹrote igodẹ rọyen ọvuọvo. Ọ je guọnọ ogodẹ kogodẹ ro bo ghwru. Jihova vuẹ ihwo ri Izrẹl re yan jovwo: “Rhivwi bru vwe rhe, rere mi rhivwi bru ovwan rhe.” Avwanre riẹnre nẹ iroro tiọyen ji rhe te ọke na, kidie ọ tare nẹ me “rhẹriẹ-ẹ.” (Mal. 3:6, 7) Jesu tare nẹ oma vwerhen Jihova vẹ emekashe na gangan siẹrẹ odibo ri Jihova ọvo ro bo ghwru de rhivwin rhe.—Luk 15:10, 32.
2. Die yen a cha ta ota kpahen vwẹ uyono nana?
2 Jẹ e roro kpahen idje ri Jesu erha ri yono avwanre erọnvwọn eghanghanre kpahen obo ra sa vwọ cha otu ri bo ghwru uko. A cha ta ota kpahen iruemu evo kiriguo ra guọnọre a sa vwọ cha igodẹ ri bo ghwru uko vwo rhivwin rhe. A je cha mrẹvughe nẹ ọke ra ghwọrọ vwọ cha ayen uko dia ọke ra ghwọrọ kufia-a.
GUỌNỌ IDỌNỌ RO GHWRURU NA
3-4. Die yen nẹrhẹ aye re djunute vwẹ Luk 15:8-10 na nabọ gbẹrophiyotọ guọnọ idọnọ rọyen ro ghwruru na?
3 Ofori a vwọ wian gangan vwọ guọnọ otu ri vwo owenvwe rẹ ayen vwo rhivwin bru Jihova rhe. Vwẹ itẹ ri Jesu re si phiyọ ọbe ri Luk, o djisẹ rẹ aye ọvo rọ guọnọ idọnọ ọfuanfon rọyen ro ghwruru. Itẹ na tẹnrovi oborẹ aye na davwẹngba te vwọ hiẹ guọnọ idọnọ na.—Se Luk 15:8-10.
4 Jesu djisẹ rẹ oborẹ oma ru aye na ọke rọ vwọ mrẹ idọnọ ro ghwruru na. Vwẹ ọke ri Jesu, ini evo re dia ihwo ri Ju vwẹ idọnọ efuanfon ihwe vwọ kẹ emetẹ rayen ri kpo orọnvwe vwẹ ẹdẹ rẹ irueru orọnvwe na. Ọ sa dianẹ idọnọ ro ghwruru na ọvo usun rẹ idọnọ ihwe rẹ oni rọyen vwọ kẹ. Aye na rorori nẹ idọnọ na she phiyọ otọ rẹ uwevwin na. Ọ da vwẹ urhukpẹ mu, kọ hiẹ guọnọ, ẹkẹvuọvo, ọ mrẹrẹ-ẹ. Ọ sa dianẹ urhukpẹ rẹ evwri rọyen na se lo te ẹdia rọ da mrẹ idọnọ ọfuanfon na-a. Ukuotọ rọyen, ọ da nabọ hwerhe uwevwin na eje. Vwẹ ekpẹn rẹ uwevwin na ro hwerhe koko, ọ da rhe mrẹ idọnọ ọfuanfon na ro lo wrowro ọke rẹ urhukpẹ rẹ evwri na vwo lo muo. Oma vwerhenrọ gangan! Kọ vuẹ igbeyan kugbe ihwo re dia kẹrẹ nẹ ayen rhi nene ọyen ghọghọ.
5. Diesorọ a vwọ davwẹngba guọnọ otu ri bo ghwru?
5 Udje ri Jesu na yono avwanre nẹ emu de ghwru va avwanre abọ, ofori nẹ a davwẹngba vwọ guọnọ. Eriyin ọ je hepha kpahen iniọvo re dobọ rẹ iruo ẹga na ji. Ofori a vwọ davwẹngba guọnọ ayen. Ọ sa dianẹ ayen dobọ rẹ iruo ẹga na ji ikpe buebun re. Ọ sa tobọ dianẹ ayen kua kpo asan ọfa re, jẹ iniọvo rehẹ ekogho yena tobọ vughe aye-en. Imuẹro herọ nẹ evo usun rayen vwo owenvwe rẹ ayen vwo rhivwin bru Jihova rhe asaọkiephana. Ayen guọnọ kuoma kugbe iniọvo na vwọ ga Jihova, ẹkẹvuọvo ayen guọnọ ukẹcha rẹ avwanre.
6. Mavọ yen ihwo eje vwevunrẹ ukoko na se vwo vwobọ vwẹ ẹhiẹ guọnọ rẹ iniọvo re dobọ rẹ iruo ẹga na ji?
6 Ono yen se vwobọ vwẹ ẹhiẹ guọnọ rẹ iniọvo re dobọ rẹ iruo ẹga na ji? Avwanre eje; ekpako, ekobaro, ihwo rẹ orua kugbe ighwoghwota rẹ ukoko na. Wo vwo ugbeyan yẹrẹ ohwo rẹ orua rọ dobọ rẹ iruo ẹga na ji? Wọ da mrẹ ohwo rọ dobọ rẹ iruo ẹga na ji vwẹ aghwoghwo rẹ nẹ uwevwin kpo uwevwin yẹrẹ aghwoghwo rẹ azagba, die yen fori nẹ wo ru? Vuẹ ohwo na nẹ, ọ da guọnọ nẹ a kọn bru ọyen rhe, oma cha vwerhen owẹ wọ vwọ vwẹ adrẹsi yẹrẹ ukeri rẹ ifonu rọyen vwọ kẹ ekpako ukoko wẹn.
7. Die yen wo yono vwo nẹ eta rẹ ọkpako re se Thomas rhe?
7 Ekpako yen me vwo oghwa ra vwọ guọnọ iniọvo re dobọ rẹ iruo ẹga na ji. Mavọ yen ayen se vwo ru ọtiọyen? Ni oborẹ ọkpako ọvo re se Thomas * rọ dia Spain tare. Ọ cha iniọvo re vrẹ 40 uko vwo rhivwin rhe ukoko na re. Thomas da ta: “Ẹsosuọ, me nọ iniọvo sansan sẹ ayen vughe asan rẹ iniọvo re dobọ rẹ iruo ẹga na ji vwevunrẹ ukoko na dia enẹna. Yẹrẹ me nọ ighwoghwota na sẹ ayen karophiyọ iniọvo re rha cha uyono-o. Buebun rẹ iniọvo na dje omavwerhovwẹn phia rẹ ayen vwo vwobọ vwẹ ẹhiẹ guọnọ na. Me da kọn bru iniọvo re dobọ rẹ iruo ẹga na ji, ke me nokpẹn rẹ emọ kugbe ihwo rẹ orua rayen. Evo usun rayen mu emọ rayen cha uyono jovwo, ọ sa tobọ dianẹ emọ na ighwoghwota jovwo. A je sa cha emọ na uko vwo rhivwin bru Jihova rhe.”
CHA EMETẸ VẸ EMESHARE RI JIHOVA RI GHWRURU UKO VWO RHIVWIN RHE
8. Vwẹ itẹ rẹ ọmọ osoghoro na rọhẹ Luk 15:17-24 die yen ọsẹ na ru kẹ ọmọ na?
8 Iruemu vọ yen fori nẹ e vwo, a da guọnọ vwẹ ukẹcha kẹ iniọvo ri vwo owenvwe rẹ ayen vwo rhivwin bru Jihova rhe? Vwo oniso erọnvwọn evo re se yono vwo nẹ itẹ rẹ ọmọ osoghoro na rọ kua nẹ uwevwin. (Se Luk 15:17-24.) Jesu djekpahen ọke rẹ iroro rọyen vwo bro rhe, ro vwo brorhiẹn ro vwo rhivwin kpo. Ọsẹ rọyen da djẹ bro ra, ra gbanọ rere ọmọ na vwọ riẹn nẹ o ji vwo ẹguọnọ rọyen. Ẹwẹn obrorhiẹn rẹ ọmọ na kpokpiro, o ji no nẹ ọyen rhe fo ohwo re se ọmọ rẹ ọsẹ na-a. Ẹro rẹ ọmọ na da ọsẹ na ọke rẹ ọmọ na vwọ ta oborẹ obo ro ruru na darọ te. Ọsẹ na de ru erọnvwọn evo vwo djephia kẹ ọmọ na nẹ ọyen rhiabọreyọ rhivwin rhe uwevwin na kerẹ ọmọ, ọ dia odibo-o. Ro vwo dje ọnana phia, ọsẹ na da tanẹ a re orẹ, ji ku adagba phiyọ ọmọ na ro kurhẹriẹ na.
9. Iruemu vọ yen fori nẹ e vwo rere a sa vwọ cha iniọvo re dobọ rẹ iruo ẹga na ji vwo rhivwin bru Jihova rhe? (Ni ekpeti na “ Obo Ra Sa Vwọ Cha Iniọvo re Guọnọ Rhivwin Rhe Uko.”)
9 Jihova họhọ ọsẹ rọhẹ itẹ yena. O vwo ẹguọnọ rẹ iniọvo avwanre re dobọ rẹ iruo ẹga na ji, ọ je guọnọ nẹ ayen rhivwin bro rhe. A da vwẹrokere Jihova, a sa cha ayen uko vwo rhivwin rhe. Re vwo ru ọnana, ofori e vwo dje edirin, erorokẹ, kugbe ẹguọnọ phia. Diesorọ e vwo dje iruemu yena phia, kẹ mavọ yen e se vwo ruo?
10. Diesorọ a vwọ guọnọ edirin ọke ra da cha oniọvo uko ro vwo rhivwin bru Jihova rhe?
10 Ofori nẹ e vwo edirin, kidie ọ reyọ ọke tavwen ohwo ki se rhivwin bru Jihova rhe. Buebun rẹ iniọvo re dobọ rẹ iruo ẹga na ji jovwo tare nẹ ekpako na vẹ iniọvo efa vwevunrẹ ukoko na kọn bru ayen rhe abọ buebun tavwen ayen ki rhivwin bru Jihova rhe. Oniọvo aye ọvo re se Nancy ro nẹ Southeast Asia rhe de si: “Ugbeyan mẹ ọvo vwevunrẹ ukoko na vwẹ ukẹcha kẹ vwẹ mamọ. O vwo ẹguọnọ mẹ kerẹ oniọvo rọyen ọkpako. Ọ ta ota kpahen ọke rẹ avwanre ghwọrọ kugbe wanre. Ọ nabọ kerhọ ọke me da ta ẹwẹn mẹ kẹ, o ji siomauko rọ vwọ vwẹ uchebro kẹ vwẹ-ẹ. Uvi rẹ ugbeyan yen o ghini ruẹ, ọ je cha oma rọ vwọ vwẹ ukẹcha phia ọkieje.”
11. Diesorọ a vwọ guọnọ erorokẹ ọke ra da cha oniọvo rẹ ophu muẹ uko?
11 Erorokẹ họhọ uhuvwun; o se sivwin ohwo ro muomaphiyọ. Iniọvo evo dobọ rẹ iruo ẹga na ji fikirẹ oborẹ ohwo ọvo vwevunrẹ ukoko na ru ayen ikpe buebun re wanre, jẹ ophu ji mu ayen kpahen ota na te ọke na. Fikirẹ ọnana, ayen rhe vwo owenvwe rẹ ayen vwo rhivwin bru Jihova rhe-e. Evo se roro nẹ e shenyẹ ayen. Ọ sa dianẹ ayen guọnọ ohwo rọ cha nabọ kerhọ kẹ ayen ji vwo ẹruọ rẹ ẹdia rayen na. (Jems 1:19) María rọ dobọ rẹ iruo ẹga na ji vwẹ ọke evo da ta: “Me guọnọ ohwo rọ cha kerhọ kẹ vwẹ, vwẹ uvi rẹ uchebro kẹ vwẹ, je cha vwẹ uko.”
12. Idjerhe vọ yen ẹguọnọ rẹ Ọghẹnẹ vwọ họhọ ufi?
12 Baibol na djisẹ rẹ ẹguọnọ ri Jihova vwo kpahen avwanre kerẹ ufi yẹrẹ uruhrẹ. Idjerhe vọ yen ẹguọnọ rẹ Ọghẹnẹ vwọ họhọ ufi? Roro kpahen udje nana: Vwẹ ẹwẹn roro nẹ wo shephiyọ abadi rọ họnra, ku wo divwẹn, ohwo ọvo de do ewun rọ nẹrhẹ ohwo phorhẹ kẹ wẹ. Oma cha vwerhen owẹ fikirẹ ukẹcha yena kidie ọ cha cha wẹ uko wo vwo jẹ edivwon. Ẹkẹvuọvo ewun rọ nẹrhẹ ohwo phorhẹ ọvo che se sivwin uwe-e. Ame na pha djidjiro, wọ rha ro okọ-ọ, wo che ghwu. Wọ guọnọ ohwo ro che do ufi kẹ wẹ, ji si we ro okọ na. Ni obo ri Jihova ta kpahen ihwo rẹ Izrẹl ri bo ghwru: Me “vwẹ irihrẹ . . . vẹ ufi rẹ ẹguọnọ” vwo si ayen te oma mẹ ọkieje. (Hos. 11:4) Iroro vuọvo na yen ji rhe Ọghẹnẹ nonẹna kpahen iniọvo re dobọ rẹ iruo ẹga na ji, ri divwẹn vwẹ ẹnwan vẹ ebẹnbẹn. Ọ guọnọ nẹ ayen riẹn nẹ ọyen vwo ẹguọnọ rayen, nẹ ọyen je guọnọ si ayen te oma. Jihova sa reyọ owẹ vwo dje ẹguọnọ rọyen kẹ ayen.
13. Idjerhe vọ yen obo re phia kẹ Pablo vwo djephia nẹ ẹguọnọ avwanre djephia sa cha iniọvo uko vwo rhivwin bru Jihova rhe?
13 Ọ ghanre mamọ a vwọ vwẹ imuẹro kẹ iniọvo re dobọ rẹ iruo ẹga na ji nẹ Jihova vwo ẹguọnọ rayen, je vuẹ ayen nẹ avwanre ji vwo ẹguọnọ rayen. Pablo re djunute vwẹ uyono rọ wanre na dobọ rẹ iruo ẹga na ji vwẹ ikpe re vrẹ 30. Ọ da ta: “Urhiọke ẹdẹ ọvo mi vwo nẹ uwevwin mẹ, oniọvo aye ọvo rọ kpakore da mrẹ vwẹ, ọ da ta ota kẹ vwẹ vwẹ idjerhe ẹguọnọ. Ke me viẹ kerẹ ọmọboba. Me da vuẹ nẹ, ọhọhọre nẹ Jihova yen ji we rhe, rhe ta ota kẹ vwẹ. Ugege yena yen mi vwo brorhiẹn mi vwo rhivwin bru Jihova rhe.”
BICHA OTU RE VWIẸRẸRE VWẸ IDJERHE ẸGUỌNỌ
14. Vwo nene itẹ rọhẹ Luk 15:4, 5, die yen osuigodẹ na ruru ọke rọ vwọ mrẹ ogodẹ na nu?
14 Iniọvo re dobọ rẹ iruo ẹga na ji guọnọ obicha rẹ ọkieje mie avwanre. Kerẹ ọmọ osoghoro na vwẹ itẹ ri Jesu, ọ sa dianẹ ẹwẹn rayen kuọnrọnre. Ọ vwọ dianẹ ayen hẹ akpọ rẹ Eshu na krire na, ọkiọvo oyerinkugbe rayen vẹ Jihova rha kpẹkpẹ kirobo ri jovwo-o. Ofori nẹ a cha ayen uko vwo ru esegbuyota rayen kpahen Jihova ganphiyọ. Vwẹ itẹ rẹ ogodẹ ro ghwruru na, Jesu djisẹ rẹ oborẹ osuigodẹ na mu ogodẹ na phiyọ akoko rọyen, o de muo rhivwin rhe uchuru na. Osuigodẹ na ghwọrọ ọke, je davwẹngba vwọ guọnọ ogodẹ ro ghwuru na re. Ẹkẹvuọvo, ọ mrẹvughe nẹ ofori o vwo mu ogodẹ na rhivwin kpo uchuru na kidie ogodẹ na rhe vwo ẹgba rẹ ọyen ọvo vwọ yan rhivwi-in.—Se Luk 15:4, 5.
15. Mavọ yen e se vwo bicha otu re vwiẹrẹre re guọnọ rhivwin bru Jihova rhe? (Ni ekpeti na “ Ọbe rọ Pha Ghanghanre.”)
15 Ọ sa dianẹ ọ cha reyọ ọke vẹ ẹgba a ke sa cha iniọvo re dobọ rẹ iruo ẹga na ji uko vwo rhivwin bru Jihova rhe. Ẹkẹvuọvo, a sa cha ayen uko vwọ rhoma ru oyerinkugbe rayen vẹ Jihova gan womarẹ ukẹcha rẹ ẹwẹn ọfuanfon ri Jihova, Ota rọyen, kugbe ẹbe rẹ ukoko na. (Rom 15:1) Mavọ yen e se vwo ru ọnana? Ọkpako ọvo rọ ga krẹre da ta: “Buebun rẹ iniọvo re dobọ rẹ iruo ẹga na ji jovwo guọnọ uyono ri Baibol ọke rẹ ayen de brorhiẹn rẹ ayen vwo rhivwin bru Jihova rhe.” * Ọtiọyena, ọkpako da vuẹ wẹ nẹ wo yono ohwo rọ dobọ rẹ iruo ẹga na ji jovwo, wo che rhiabọreyọ uphẹn na vẹ omavwerhovwẹn? Ọkpako na je tanẹ, “E jẹ oghwoghwota ro che yono oniọvo na dia uvi rẹ ugbeyan, ohwo rẹ ọ rọ dobọ rẹ iruo ẹga na ji jovwo na sa ta evun kẹ.”
AGHỌGHỌ VWẸ ODJUVWU VẸ AKPỌ
16. Mavọ avwanre ru riẹn nẹ emekashe na che bicha avwanre?
16 Buebun rẹ oborerhiẹromrẹ djerephia nẹ emekashe na sun avwanre vwọ guọnọ iniọvo re dobọ rẹ iruo ẹga na ji, ri vwo owenvwe rẹ ayen vwo rhivwin bru Jihova rhe. (Ẹvwọ. 14:6) Kerẹ udje, Silvio ro nẹ Ecuador rhe, nẹrhovwo gangan vwọ kẹ ukẹcha ro vwo rhivwin rhe ukoko na. Ọ je vwọ nẹrhovwo na, agogo rẹ uwevwin rọyen de hworo. Ekpako ivẹ hẹ anurhoro rọyen. Oma vwerhen ekpako na rẹ ayen vwọ vwẹ ukẹcha rọ guọnọre kẹ vwo nẹ ẹdẹ yena yanran.
17. Mavọ yen oma che ru avwanre siẹrẹ a da cha iniọvo re vwiẹrẹre uko vwo rhivwin bru Jihova rhe?
17 A cha mrẹ aghọghọ rode siẹrẹ a da cha iniọvo re vwiẹrẹre uko vwo rhivwin bru Jihova rhe. Vwo oniso oborẹ Salvador rọ dia ọkobaro rọ nabọ davwerhọ rẹ iniọvo re dobọ rẹ iruo ẹga na ji tare: “Ọkievo, oma vwerhen ovwẹ te ẹdia rẹ ameoviẹ rẹ aghọghọ de nẹ ẹro mẹ cha. Oma vwerhen ovwẹ gangan nẹ me vẹ Jihova sa wian kugbe vwọ cha odibo rọyen ọghanghanre ọvo uko vwo vrẹ nẹ akpọ rẹ Eshu na rhivwin rhe ukoko rọyen.”—Iruo 20:35.
18. Ọ da dianẹ wọ dobọ rẹ iruo ẹga na ji, imuẹro vọ yen wo se vwo?
18 Ọ da dianẹ wọ dobọ rẹ iruo ẹga na ji, biko vwo imuẹro nẹ Jihova ji vwo ẹguọnọ wẹn gangan. Ọ guọnọre nẹ wo rhivwin bru ọyen rhe. Wọ cha jẹ owọ evo wo se vwo rhivwin bro rhe. Ẹkẹvuọvo, kerẹ ọsẹ rọhẹ itẹ ri Jesu na, Jihova rhe nẹ idjerhe kiọkiọkiọ hẹrhẹ owẹ, o che deduwe vẹ omavwerhovwẹn.
UNE 103 Eshare re Vwo Ruẹse kẹ Avwanre
^ e?ko. 5 Jihova guọnọre nẹ iniọvo re dobọ rẹ iruo ẹga na ji rhivwin bru ọyen rhe. E se ru erọnvwọn buebun vwo phiuduphiyawọ rẹ iniọvo re dobọ rẹ iruo ẹga na ji, ri vwo owenvwe rẹ ayen vwọ kerhọ rẹ edurhie ri Jihova rọ tare nẹ, “Rhivwi bru vwe rhe.” Vwẹ uyono nana, a cha ta ota kpahen obo ra sa vwọ cha ayen uko vwo ru ọtiọyen.
^ e?ko. 7 E wene edẹ evo.
^ e?ko. 15 A sa cha iniọvo evo re dobọ rẹ iruo ẹga na ji uko womarẹ e vwo yono ayen asan evo vwẹ ọbe rẹ Dia Evunrẹ Ẹguọnọ rẹ Ọghẹnẹ, efa mrẹ erere vwo nẹ ẹrhomafuẹrẹn rẹ iyovwinreta rẹ ọbe rẹ Draw Close to Jehovah. Umẹ Rọvwẹrote Iruo rẹ Ẹga rẹ Ukoko na yen che brorhiẹn rẹ oniọvo ro muwan rọ cha vwẹrote uyono na.
^ e?ko. 68 IDJEDJE RẸ IHOHO: Iniọvo erha sansan vwẹ ukẹcha kẹ oniọvo ọshare ọvo rọ guọnọ rhivwin bru Jihova rhe. Ayen ru ọtiọyen womarẹ ayen vwo nyo mie, vwẹ imuẹro kẹ nẹ ayen vwo ẹguọnọ rọyen, je nabọ kerhọ kẹ.
